PROCESO DE SELECCIÓN DOS ALUMNOS-TRABALLADORES DO OBRADOIRO DE EMPREGO

PROCESO DE SELECCIÓN DOS ALUMNOS-TRABALLADORES DO OBRADOIRO DE EMPREGO “CAMBADOS RUTA XACOBEA CAMIÑO DE SANTIAGO”

Os candidatos/as preseleccionados/as pola Oficina de Emprego, para as prazas de Alumnos-Traballadores/as que estivesen interesados/as en participar no proceso selectivo das prazas convocadas, deberán acudir as dependencias do Departamento de Persoal (situado na rúa Ourense. Primeiro andar) no dia e hora que se indica na citación que recibiron da Oficina de Emprego:

Para o módulo de Albaneleria o día 14 de decembro de 2020

Para o módulo de Xardineria-Forestal o día 15 de decembro de 2020

Máis información https://wp.me/p74tPV-1rK

A XUNTA LIMPA AS MARXES DA VÍA RÁPIDA ESTA VINDIERA SEMANA

A Xunta ten previsto iniciar a vindeira semana os traballos de roza e limpeza nas marxes da vía de altas prestacións V.G.-4.3, que comunica Cambados e Vilagarcía de Arousa.

A Consellería de Infraestruturas e Mobilidade, a través da empresa pública Seaga, vén realizando nos últimos meses estas tarefas de acondicionamento nas franxas de dominio público de vías autonómicas das catro provincias para previr lumes e reforzar a seguridade viaria.

No marco destas actuacións, tamén se seguirá avanzando nas limpezas de distintas vías autonómicas da provincia de Pontevedra, nas zonas do Condado-Paradanta e Vigo-Baixo Miño, así como na vía de alta capacidade C.G.- 4.2, en Tomiño e na Guarda.

As tarefas que se veñen realizando céntranse na retirada de especies pirófilas, aquelas que son máis propensas á propagación do lume, coa fin de previr incendios forestais.

Tamén se acometen rozas para completar o traballo ordinario de conservación das estradas e reducir progresivamente o uso de herbicidas, dando cumprimento a un acordo parlamentario.

Ademais, realízase o acondicionamento de zonas verdes e sendas peonís, para que estean en condicións axeitadas.

As intervencións teñen como obxectivos potenciar o efecto cortalumes das estradas; aumentar a seguridade viaria, cunha maior visibilidade; e fomentar unha mobilidade máis segura e sustentable mediante as sendas e zonas verdes para o tránsito peonil.

CLAUSURADOS OS OBRADOIROS DE EMPREGO CO ANUNCIO DE DOUS NOVOS NO 2021

A delegada territorial da Xunta en Pontevedra, Luisa Piñeiro, destacou hoxe, durante o acto de clausura do obradoiro de emprego Ruta Marítima Camiño de Santiago II, o “absoluto compromiso” do Goberno galego coa formación e a inserción laboral no Concello de Cambados, xa que anunciou o comezo inminente doutras dúas iniciativas destas características para favorecer a reactivación económica e incrementar os niveis de ocupación.

A representante autonómica revelou que a Consellería de Emprego e Igualdade vén de aprobar o obradoiro de emprego dual Rutas Xacobeas, que se desenvolverá cos módulos de Xardinaría e Forestal, e a iniciativa para xóvenes Cambados Emprendedor II, que impartirá Dinamización de Actividades de Tempo Libre e Culturais e Limpeza de Espazos Abertos, Instalacións Industriais e Xestión de Residuos. Ambas terán lugar durante nove meses e formarán, en total, a 40 persoas -vinte delas de ata 30 anos no caso da segunda- grazas a un investimento de 776.000€.

A delegada territorial engadiu que os esforzos continuados da Xunta nesta área “permiten que a nosa comunidade teña moito mellores datos de ocupación laboral que a media de España” e ademais deixou claro que a creación de emprego sitúase, no actual contexto da pandemia, no podio de prioridades xunto coa Sanidade e a Educación: “Estamos a redobrar os esforzos en formación e na inserción laboral especialmente nestes momentos tan complicados pola crise sanitaria, xa que temos como obxectivo principal o impulso, canto antes, da reactivación”.

Luisa Piñeiro, que estivo acompañada na clausura pola alcaldesa de Cambados, Fátima Abal, tamén quixo agradecer ao persoal desta iniciativa laboral e aos vinte alumnos-traballadores “o seu traballo ao longo deste ano, a súa responsabilidade e o bo desempeño que realizaron durante as súas prácticas para mellorar as tres rutas do Camiño de Santiago ao seu paso por Cambados e para as labores de limpeza e prevención de lumes no monte da Pastora”. Ademais, animou aos participantes a que aproveiten as oportunidades que lles brinda a súa gañada formación e a experiencia deste ano “para adentrarse con forza no mercado de traballo”.

En canto a este clausurado obradoiro de emprego Ruta Marítima Camiño de Santiago II, desenvolveuse dende o pasado mes de novembro e recuperou as súas semanas de paralización polo estado de alarma decretado fronte á covid-19 grazas a un acordo da Xunta, que pretendía non prexudicar nin menoscabar a súa formación polos efectos da pandemia.

Así, celebrouse durante doce meses cun investimento de 336.446€ e contou coa participación dunha vintena de desempregados de Cambados que realizaron a súa actividade formativa nos módulos de Carpintaría de Madeira e Xardinaría-Forestal.

O acto de clausura, que tivo lugar na Praza de Fefiñáns, tamén contou coa participación do director, Enrique Ferreiro, a titora, docentes, persoal e os alumnos do obradoiro e culminou coa entrega de diplomas acreditativos. 

MENCIÓN DE HONRA PARA A CAMBADESA ARIADNA CORDAL NOS PREMIOS XUVENTUDE CREA

A moza Carlota Álvarez, do Porriño (Pontevedra), gañou coa súa obra ' Zafirada' o primeiro premio da categoría de videocreación do certame ' Xuventude Crea', organizado anualmente pola Consellería de Política Social. O segundo premio recaeu no santiagués Luís Xavier do Rego, con 'Raíces', mentres que o terceiro compárteno os coruñeses Hugo Vales con 'O fin dos nosos días' e Andrés Sanjurjo con 'Sen título'. Ademais, fíxose unha mención de honra a obra 'Aves migratorias' de Ariadna Cordal, de Cambados.

A directora xeral de Xuventude, Cristina Pichel, participou este sábado na final da especialidade de videocreación, que tivo lugar no Centro Galego de Artes dá Imaxe, na Coruña. Desde alí, destacou a "implicación" e o "enxeño" dos participantes de cada ano, o que demostra a "creatividade" da mocidade galega. Coa entrega dos premios de videocreación, o ' Xuventude Crea' concluíu as fases finais de todas as súas categorías. Os 13 restantes correspóndense con fotografía, artes plásticas, teatro, cociña, creación de videoxogos, danza moderna, deseño de xoias, grafiti, moda, música, poesía, novela curta e cómic.

O primeiro premio en cada especialidade recibe 3.000 euros, mentres que o segundo e o terceiro fanse con 1.500 e 1.000 euros, respectivamente. O xurado tamén pode outorgar mencións de honra, sen dotación económica. A Consellería de Política Social destaca que a edición deste ano do ' Xuventude Crea' conseguiu un récord de participación, con case de 500 mozos e mozos que presentaron as súas candidaturas, fronte ás 382 do ano pasado.

O NADAL EN GALICIA SEGUNDO FEIJÓO

Como será o Nadal en Galicia? Feijóo propón "familias burbulla" para limitar reunións

O presidente da Xunta avoga por ter en conta as "unidades familiares", máis que o número de persoas que se reúnan, para establecer as restricións en Galicia Como será o Nadal 2020? Cando xa falta menos dun mes para Noiteboa, seguen sen resolverse as dúbidas sobre como celebraremos estes festexos. Onte, o Consello Interterritorial pechábase sen ningún acordo entre Goberno e comunidades autónomas, que se citarán a próxima semana para fixar as restricións das próximas datas do Nadal. A pesar de que aínda non hai unha concreción sobre @dicha medidas, a Xunta xa avanzou algunhas das propostas que trasladará ao executivo central. Onte, o presidente da Xunta, Alberto Núñez Feijóo, avanzaba a proposta do seu executivo de excluír aos menores de 10 anos do límite de persoas nunha reunión. A esta idea, o xefe do Goberno galego engadía hoxe un novo concepto a ter en conta nas reunións do Nadal: as "familias burbullas". Feijóo ve máis conveniente, para limitar a reunións en Nadal, ter en conta as "unidades familiares", máis que o número de persoas que se reúnan. Preguntado na rolda de prensa posterior ao Consello de la Xunta sobre este concepto ao que fixo referencia esta mesma mañá nunha entrevista radiofónica, Feijóo explicou que o significado de "burbulla familiar": "Trátase daquelas persoas que conviven de forman continuada e que comparten fogar". "Seis persoas de tres familias diferentes teñen un maior risco de contaxios que 12 persoas de dúas familias distintas", dixo o presidente da Xunta, que non ve "razoable" que unha familia con catro fillos "non poida reunirse con ninguén este nadal" ao exceder o límite de seis persoas que propón o Goberno central. A Xunta, pola súa banda, manexaba a idea de permitir reunións de ata 10 persoas. Non contar aos menores de 10 anos O presidente galego tamén se referiu á proposta exposta onte no Consello Interterritorial sobre a exclusión dos menores de 10 anos do cómputo que delimite o número de participantes nunha reunión. Esta proposta, baséase na peculiaridade de que "os nenos teñen unha capacidade de transmisión diferente á dun adulto", afirmou Feijóo, quen, en todo caso, asegura que serán os pediatras quen considere cales son os protocolos máis adecuados a seguir.

XUNTA E CONCELLO AVANZAN NA TRANSFERENCIA DA FACHADA MARÍTIMA AO GOBERNO DE CAMBADOS

A delegada territorial da Xunta en Pontevedra, Luisa Piñeiro, reafirmou esta mañá a “colaboración absoluta” do goberno galego co Concello de Cambados durante a súa primeira visita institucional a este municipio e exemplificou ese clima de entendemento ante o inminente inicio das obras de mellora do centro de saúde e do comedor escolar do colexio de San Tomé.

O goberno galego cofinancia ambas actuacións cunha aportación global de 110.000€ que permitirá realizar unha remodelación do punto médico, que a propia delegada aclarou que non interferirá na actividade asistencial ao desenvolverse en quendas de tarde e noite, e a construción do comedor escolar e dunha aula educativa na citada escola.

Ademais, na xuntanza de traballo mantida coa alcaldesa, Fátima Abal, que agradeceu a súa presenza, tratouse a posibilidade de que a Xunta acometa unha obra de separación de augas pluviais e fecais nunha zona da estrada PO-550 na saída cara Meaño e diversas cuestións vencelladas con Portos de Galicia.

Así, Luisa Piñeiro recolleu a solicitude para a posible sinatura dun convenio que permita revertir os terreos da fachada central do casco urbano en favor do Concello, xa que actualmente están en mans da autoridade portuaria, e tamén a realización de xestións para axilizar o Plan Especial de Infraestruturas entre Portos e o Concello co obxectivo de que se poida acometer a reforma da Praza de Abastos.

A representante autonómica valorou moi positivamente a reunión e amosouse convencida de que haberá un “bo ánimo de colaboración” entre ambas administracións que reafirmará o “compromiso” da Xunta con Cambados.

O COLEXIO DE CASTRELO CONTARÁ MOI PRONTO CUNHA RADIO ESCOLAR

O CEIP Plurilingüe de Castrelo, en Cambados, contará próximamente cunha radio escolar no marco do programa 'Radio na Biblio' da Xunta de Galicia.

A Xunta de Galicia vén de incorporar un total de 30 centros educativos en toda Galicia ao programa Radio na Biblio.

Esta iniciativa da Consellería de Cultura, Educación e Universidade ten como obxectivo impulsar a creación de emisoras ou laboratorios radiofónicos no contexto da biblioteca escolar.

Coas novas incorporacións, en total participan nesta iniciativa este curso un total de 109 centros públicos de infantil, primaria, ESO, Bacharelato ou FP integrados no Plan de Mellora de Bibliotecas Escolares (PLAMBE) de toda Galicia.

Os novos centros seleccionados recibirán 2.000 € de fondos para a posta en marcha dun laboratorio de radio (incluíndo un obradoiro de formación). Para iso contarán co apoio da Asesoría de Bibliotecas Escolares da Consellería, que orientará o seu desenvolvemento e porá á súa disposición recursos e propostas.

Así mesmo, os centros que xa participaron en Radio na Biblio en cursos anteriores e renovan recibirán unha asignación de 500 € por centro para a realización de obradoiros de formación específica para o funcionamento da emisora ou ben de lectura expresiva ou de mellora da expresión oral.

A XUNTA DESTACA EN CAMBADOS O PAPEL CLAVE DOS GRUPOS DE ACCIÓN LOCAL DO SECTOR PESQUEIRO

A directora xeral de Desenvolvemento Pesqueiro, Susana Rodríguez, participou hoxe na inauguración da xornada Talento azul. Compartindo experiencias para avanzar cara o crecemento sostible dos nosos territorios costeiros, onde puxo en valor o labor realizado polos grupos de acción local do sector pesqueiro (GALP) para mellorar a economía das zonas costeiras de Galicia e fixar poboación no territorio. Por iso, destacou, son elementos clave para acadar o relevo xeracional na cadea mar-industria da comunidade.

A representante do Executivo galego explicou durante este encontro, organizado polo GALP Ría de Arousa, que a remuda xeracional é un dos retos máis importantes que ten o conxunto de Galicia -incluído o sector marítimo-pesqueiro- nos próximos anos. Neste sentido, salientou que é fundamental facer atractivos para a xente nova os oficios vencellados co mar e incidiu en que os GALP contan cun papel determinante neste obxectivo pois teñen demostrado que son un instrumento moi útil para a creación de emprego e riqueza vencellados ao mar dun xeito sustentable e respectuoso cos recursos.

A directora xeral de Desenvolvemento Pesqueiro lembrou que os grupos de acción local do sector pesqueiro fomentan a aprendizaxe e a cooperación entre territorios para avanzar no eido da economía azul e subliñou que a xornada Talento azul se enmarca neste obxectivo pois permite coñecer o labor realizado nos distintos territorios costeiros de Galicia. “Aproveitamos así as distintas experiencias e todos os recursos que nos dá o mar porque é importante compartir os éxitos e os fracasos para avanzar en beneficio do conxunto da comunidade”, destacou Susana Rodríguez.

Nesta liña, a representante da Consellería do Mar explicou que as accións desenvolvidas polos GALP veñen a constatar a importancia do mar como motor da economía de Galicia e contribúen a mellorar as condicións de traballo e de futuro das persoas que viven do mar. Por iso, insistiu, teñen un papel transcendental para superar o desafío que supón a remuda xeracional no eido marítimo-pesqueiro.

Xornada ‘Talento azul’

Este encontro está promovido polo GALP Ría de Arousa e consiste nunha sesión de traballo na que os oito GALP de Galicia presentarán os proxectos máis destacados dos seus territorios e intercambiarán experiencias e impresións sobre como avanzar no crecemento azul para acadar o desenvolvemento socioeconómico das zonas costeiras.

Os grupos de acción local do sector pesqueiro puxeron en marcha desde 2016 preto de 400 proxectos que mobilizaron un investimento total próximo aos 60 millóns de euros. Estas accións xeraron máis de 360 empregos directos a tempo completo e arredor de 2.100 postos de traballo nas actividades vencelladas co seu desenvolvemento, o que contribuíu a impulsar a economía local das zonas beneficiadas. 

A XUNTA ENTREGA VIVENDAS DE PROMOCIÓN PÚBLICA EN RIBADUMIA E VILAGARCÍA DE AROUSA

A Comisión provincial de vivenda aprobou esta semana a lista definitiva de adxudicatarios de vivendas de promoción pública correspondentes aos concellos de Ribadumia e Vilagarcía de Arousa.

En Ribadumia aprobouse unha lista definitiva de catro adxudicatarios para as dúas vivendas de promoción pública, de tres dormitorios, dispoñibles para adxudicación; mentres que en Vilagarcía son catro as vivendas dispoñibles e aprobouse unha lista con dezasete adxudicatarios, de maneira que si os primeiros da lista renuncian á vivenda adxudícase ao primeiro da lista de espera, sen que sexa preciso iniciar un novo procedemento de adxudicación que alargaría o proceso de entrega de chaves.

CORES TOURÍS XA NON SERÁ DELEGADO DA XUNTA EN PONTEVEDRA

O presidente da Xunta, Alberto Núñez Feijóo, avanzou hoxe na rolda de prensa do Consello a aprobación do decreto da nova estrutura orgánica da Xunta, enfocada na loita contra a covid e na reactivación social e económica, como quedou patente dende o mesmo momento en que se configuraron as distintas consellerías.

Máis polo miúdo, Feijóo precisou que a Vicepresidencia Primeira asume as competencias da Axencia de Turismo de Galicia; e a Secretaría Xeral de Igualdade pasa a integrarse na Consellería de Emprego e Igualdade, onde se crea unha nova dirección xeral: a Dirección Xeral de Relacións Laborais, coa que se reforza este ámbito de cara aos vindeiros meses, nos que a reactivación económica e o emprego debe ser unha prioridade.

“E o segundo dos órganos directivos de nova creación tamén ten que ver coas prioridades do momento actual”, dixo, referíndose á Dirección Xeral de Atención Integral Sociosanitaria, que formará parte da Consellería de Política Social, que reforzará esta área para afrontar os retos presentes e futuros dos servizos sociais, ante a necesidade de perfeccionar os mecanismos de atención sanitaria nos centros de maiores e persoas con discapacidade e de repensar o modelo de residencias, ademais de seguir axilizando os procesos de valoración da dependencia e da discapacidade.

No tocante á Consellería de Facenda, o titular da Xunta subliñou que asume a Dirección Xeral de Avaliación e Reforma administrativa e a Escola Galega de Administración Pública. E referiuse tamén aos cambios de denominación en varios departamentos das distintas consellerías, como a Dirección Xeral de Enerxía e Minas pasa a chamarse Dirección Xeral de Planificación Enerxética e Recursos Naturais.

En relación aos nomes das persoas que ocuparán outras responsabilidades, Feijóo explicou Antonio Rodríguez Miranda será o secretario xeral de Emigración. Na Consellería de Facenda, Jesús Oitavén estará á fronte da Dirección Xeral de Avaliación e Reforma Administrativa, onde substitúe a Natalia Prieto Viso que ocupará a Dirección Xeral de Administración Local. Elena Mancha Montero de Espinosa ocupará a recentemente creada Dirección Xeral de Relacións Laborais da Consellería de Emprego e Igualdade. E, José Luis Cabarcos asumirá a dirección da Axencia galega da Calidade Alimentaria (Agacal), en substitución de Manuel Rodríguez.

Inés Santé Riveira será a nova directora da Axencia Galega de Desenvolvemento Rural (Agader), cargo no que releva a Miguel Pérez Dubois. Silvia Cortiñas será a nova secretaria xeral técnica da Consellería do Mar. E José Flores asume a xerencia do Sergas, onde substitúe a Antonio Fernández Campa.

Pola súa banda, Carmen Durán Parrondo ocupará a Dirección de Saúde Pública e Ana María Comesaña Álvarez será a nova directora de Recursos Humanos do Sergas.

En Política Social: Jacobo Rey Sastre asume a Dirección Xeral de Familia, Infancia e Dinamización Demográfica; Fernando González Abeijón ocupará a Dirección Xeral de Maiores e persoas con discapacidade; e o doutor Antón Acevedo, médico especialista en Medicina Preventiva e Saúde Pública, farase cargo da Dirección Xeral de Atención Integral Sociosanitaria.

En canto ás delegacións territoriais, Feijóo precisou que: Gonzalo Trenor farase cargo da de Coruña; Gabriel Alén ocupará a Delegación de Ourense; Luisa Piñeiro exercerá como delegada territorial da Xunta en Pontevedra; Javier Arias Fouz será o delegado territorial da Xunta en Lugo e, finalmente, a delegada territorial da Xunta en Vigo será Marta Fernández Tapias.

O presidente da Xunta concluíu subliñando que os novos delegados substitúen a Ovidio Rodeiro, José Manuel Balseiro, Marisol Díaz Mouteira, José Manuel Cores Tourís e Corina Porro, aos que agradeceu profundamente a súa labor á fronte da Administración periférica da Xunta, e que continuarán servindo aos galegos no Parlamento de Galicia.

José Manuel Cores Tourís

Naceu en Cambados en 1958. Cursou estudos de bacharelato no IES Ramón Cabanillas de Cambados.

Membro de Xóvenes Agricultores-Asaja Galicia. En 1985 fundou HORSAL, xunto con outros catorce horticultores da Comarca do Salnés, e desempeñou o cargo de director-xerente durante nove anos.

Foi vicepresidente do Consello Regulador da Denominación de Orixe Rías Baixas (1992-2007) e tamén membro das xuntas directivas da Asociación Española e da Asociación Europea de Cidades do Viño (ACEVIN-RECEVIN) e da Asociación Española de Cidades da Pesca (AECIPE).

Foi vogal do Consello de Administración de Portos de Galicia.

A súa actividade política comezou no ano 1987 ao ser elixido concelleiro da corporación cambadesa dentro da candidatura do Partido Popular. De 1989 ata 1998 desempeñou o cargo de primeiro tenente de alcalde. Foi alcalde do Concello de Cambados no 1998 e reelixido nas eleccións municipais de 1999, 2003 e 2007. Presidente da Mancomunidade do Salnés do 1998 ao 2003.

Foi senador por Pontevedra nas lexislaturas VII, VIII e IX (2000-2009), e secretario primeiro da Comisión de Agricultura, Gandeiría, Pesca e Alimentación, voceiro de Pesca, vocal da Comisión Mixta para o Estudo do Problema das Drogas e voceiro da Comisión de Peticións.

Desde 2009 desempeñou o cargo de delegado da Xunta de Galicia para a provincia de Pontevedra. Foi elixido deputado do Parlamento de Galicia nas autonómicas de 2012 e 2016, renunciando nas dúas ocasións para seguir ostentando o cargo de delegado territorial da Xunta de Galicia en Pontevedra. 

Cores Tourís exercerá como deputado autonómico tras ser elixido nos comicios de xullo. Agora será sustituído por Luisa Piñeiro, , alcaldesa de Moraña e secretaria de organización provincial do PP.

A XUNTA ADXUDICA AS OBRAS DE MELLORA DE FIRME EN DISTINTAS ESTRADAS AUTONÓMICAS DAS COMARCAS DE PONTEVEDRA, O SALNÉS E CALDAS

Os traballos, cun prazo de execución de 4 meses, prevén o seu inicio a finais deste mesmo mes

Actuarase nas vías PO-223, PO-224, PO-300, PO-305, PO-308 e PO-309, ao seu paso polos municipios de Pontevedra, Campo Lameiro, Barro, Meis, Ribadumia, Vilanova de Arousa, Cambados, Caldas de Reis, Vilagarcía de Arousa, Sanxenxo e Poio

A Consellería de Infraestruturas e Mobilidade continúa a reforzar a seguridade viaria nas estradas da Xunta, ao tempo que impulsa investimentos para favorecer a actividade económica

A Consellería de Infraestruturas e Mobilidade vén de adxudicar por máis de 815.000 euros as obras de mellora de firme en distintas estradas autonómicas das comarcas de Pontevedra, O Salnés e Caldas.

Os traballos, adxudicadas á empresa Covsa, contan cun prazo de execución de 4 meses.e prevén o seu comezo a finais deste mesmo mes.

As actuacións incluídas neste contrato levaranse a cabo en varios tramos das estradas PO-223, PO-224, PO-300, PO-305, PO-308 e PO-309, ao seu paso polos municipios de Pontevedra, Campo Lameiro, Barro, Meis, Ribadumia, Vilanova de Arousa, Cambados, Caldas de Reis, Vilagarcía de Arousa, Sanxenxo e Poio.

O contrato ten por obxecto a rehabilitación de firme naqueles puntos nos que a capa de rodadura presente carencias ou se atope deteriorada, coa finalidade de reforzar e mellorar a seguridade viaria e a comodidade dos usuarios destas estradas. Tamén se prevé a reposición da sinalización horizontal en varios treitos.

Na estrada PO-223, Pontevedra-Campo Lameiro (PO-231), actuarase no treito entre os puntos quilométricos 4+250 e 16+100. Neste treito de preto de 12 quilómetros realizarase o fresado localizado e reforzo de firme, así como a renovación das marcas da vía.

Na estrada PO-224, Ponte Bora (N-541)-San Antoniño (N-550), os traballos de rehabilitación do firme realizaranse en dous treitos, o que vai dos puntos quilométricos 5+330 o 6+570, e entre o 10+100 e 10+830. En toda a estrada renovaranse as marcas viarias.

Os mesmos traballos serán executados na PO-300, Mosteiro-Cambados (VG-4.3), nos treitos entre os puntos quilométricos 2+680 e 6+320, así como entre os puntos 6+790 e 11+720. Tamén se executarán esta tarefas na estrada PO-305, Saiar (N-640)-Vilagarcía (N-640), no tramo que que vai do punto quilométrico 0 a 0+600.

Na estrada PO-308, Pontevedra-A Lanzada (PO-550), a intervención prevista comprende as distintas actuacións nos treitos dos puntos quilométricos 17+350 e 17+405, 18+332 e 19+000, 17+405 e 18+332, así como entre os puntos 17+350 e 19+000.

Finalmente os traballos deste contrato prevén a renovación das marcas viarias na PO-309: Poio Sur (PO-308)-A9, no tramo entre os puntos quilométricos 0 e 1+180.

Deste xeito, o departamento de Infraestruturas da Xunta continúa a súa aposta polo reforzo da seguridade viaria nas estradas autonómicas ao tempo que impulsa investimentos para favorecer a actividade económica.

VECIÑOS DE VILARIÑO EN PÉ DE GUERRA

Veciños de Covas de Lobos na parroquia de Vilariño no concello de Cambados están fartos dos cheiros diarios que, segundo as suas sospeitaa, algunha empresa conserveira da zona está depositando e enterrando a escasos 50 mts do rio Umia. Son varios centos de toneladas de cuncha de mexilón os que levan tirados nesta propiedade.
Entre tres a catro camións depositan diariamente desde comezoa do mes de agosto mais o nos días que levamos de Septembro.
Estes cheiros fan imposible a vida sana do rural. Estes veciños pregúntanse como as autoridades consinten semlljante depósito de residuos., Tampouco saben a empresa conserveira ou a encargada de desfacerse da cuncha teñen algún permiso. O único que saben é que os cheiro e nauseabundo. A finca na que que se deposita a cuncha está a escasos metros da EDAR de Ribadumia.
Porque o Seprona non paraliza e investiga este despropósito e comprobe e investigue a legalidade deste verquido.
Onde está o SEPRONA?
Onde está Augas de Galicia?

As imaxes foron tomadas esta mesma mañán por un dos veciños denunciantes destes feitos.

FEIJÓO OCULTA A REALIDADE DOS RASTREXADORES DA COVID-19

Fontes sanitarias informaron a este blog que están a traballar como rastrexadores persoal sanitario que debería estar a disfrutar das súas vacacións.
Este persoal está preparado e polo tanto a Xunta aforra na preparación destes traballadores é tamén unha forma de aumentar o número de rastrexadores aínda que non sexan específicos para estes postos.

O grupo parlamentario socialista no parlamento galego pregunta por esta e outras cuestións derivadas da COVID-19 ao goberno da Xunta.
A pandemia provocada pola COVID19 supón unha das situacións máis difíciles que temos afrontado como sociedade en décadas. A afectación sobre a poboación, e o seu impacto sobre o noso modo de vida, evidencian a necesidade de estar permanentemente alerta e preparados ante as posibles incidencias, e prever todos escenarios posibles para afrontar coas maiores garantías.
Galicia está inmersa neste verán nun difícil escenario, pois é un foco preocupante de rebrotes en número de contaxiados. 

A esta situación súmanse, entre outros elementos, a incerteza provocada pola ausencia de datos oficiais ao mesmo nivel que outras CCAA e que o Estado, a queixa sistemática dos profesionais de Atención Primaria sobre a situación do seu servizo coa non cobertura de baixas e vacacións e ausencia de materiais, a indefinición sobre as medidas para o inicio do vindeiro curso escolar e a desaparición do aparato de información e publicidade que a Xunta tivo en funcionamento ata a metade do mes de xullo.
Non existe información nítida sobre o volume, formación e protocolos de actuación de rastreadores en Galicia, nin existen explicacións sobre as reclamacións de usuarios/as e traballadores/as de residencias de maiores sobre o trato ofrecido ou evitado a persoas residentes nestes centros. Non se coñece, na actualidade

Con todo isto, é importante coñecer a previsión de funcionamento para os
vindeiros meses por parte de Goberno de Galicia, e buscar os maiores acordos políticos e sociais para fortalecer o sistema sanitario e a súa rede, co fin de afrontar nas mellores condicións a situación actual e a súa continuidade.

O PSdeG pregunta:
1.ª) Que valoración fai o Goberno Galego da situación actual de Galicia ante os rebrotes existentes?
2.ª) A que aspectos atribúe o Goberno de Galicia a aparición de rebrotes?
3.ª) Que volume de rastreadores dispón agora mesmo o SERGAS en activo? Cal foi o método de selección e formación?
4.ª) Que previsión fai o Goberno de Galicia sobre a evolución dos casos de
afectados por COVID en Galicia nas vindeiras semanas e meses?
4.ª) Por que o Goberno de Galicia reduciu bruscamente o nivel de aparición pública e presencia continuada, especialmente do presidente, a partir da metade do mes de xullo?

A CONSELLEIRA DE EDUCACIÓN VEU A CAMBADOS SIN PROTOCOLOS NIN CARTOS

A conselleira de Educación, Universidade e Formación Profesional, Carmen Pomar, subliña que o seu departamento está traballando para un inicio de curso seguro, con todas as garantías sanitarias e dentro da máxima normalidade posible dentro do contexto actual da Covid-19. Neste senso, a conselleira fixo fincapé na necesidade de ir vendo a evolución día a día, así como atender ás decisións das autoridades sanitarias.

Así o expresou a conselleira esta mañá, durante unha visita ás instalacións do CEIP San Tomé de Cambados, onde puido comprobar in situ o plan organizativo que está levando a cabo o equipo directivo deste colexio de acordo co Protocolo de adaptación ao contexto da covid 19 nos centros de Ensino non Universitario de Galicia para o curso 2020-2021, elaborado polas Consellerías de Educación e de Sanidade.

Precisamente a conselleira lembrou que o propio Protocolo xa especifica que todas as medidas nel recollidas poden ser obxecto de revisión continua en función da evolución do risco sanitario e das decisións que adopten as autoridades sanitarias autonómicas e estatais. Polo tanto estas medidas iranse actualizando cando sexa necesario, se os cambios na situación epidemiolóxica así o requiren e sempre seguindo as indicacións das autoridades sanitarias.

O que non dixo a Conselleira é que segundo a normativa cada colexio ten que adaptar o protocolo coa normativa sanitaria da Xunta, ás propias instalacións, ao alumnado e á capacidade de docentes que teña o colexio. Como San Tomé xa tiña feito o protocolo e para botar un cable por así dicilo, a directores doutros coles que se cadra non teñen os recursos que teñen en Cambados, publicaron na páxina interna das comunidades educativas o protocolo que tiñan para que lle servira de base a outros colexios, de cómo facer determinadas cousas. Aproveitando que a conselleira pasa as súas vacacións en Sanxenxo e gustoulle moito o protocolo veu a San Tomé a facer publicidade do mesmo. Evidentemente o que viña era a dicir como se pode levar a cabo un protocolo nun colexio sen que a Xunta poña nin só euro. Para que outros fagan o mesmo sen botar mán ou pedir cartos á Xunta.

Intentan xustificar que non é necesario nin só euro para facer fronte aos gastos que teñen que facer tamén os colexios. A instalación de dispensadores de hidroxel o propio hidroxel e resto de material desinfectante e de limpeza. Todo iso corre por conta do propio colexio. E como farán todos os colexios que non teñan unha capacidade económica suficiente para facerse cargo? Que van facer cando no mes de novembro ou decembro esgoten o hidroxel? Que vai pasar? A partires de novembro, por exemplo, os nenos xa non se limpan, xa non se lavan as mans ou as desinfectan? Un despropósito todo o que esta facendo a Xunta co tema dos colexios. Queren xogar coa saúde dos nenos e das familias dos nenos?.

Outra cousa son os anuncios de novos docentes. Estes docentes xa estaban en moitos casos contratados. Se están a contar docentes que se aumentan pero dado o aumento de novas unidades resulta este aumento queda en nada. Si nos poñemos a contar o número de docentes que se aumenta e o numero de colexios que hai en toda Galicia non supón nin un docente por centro.

Esixen cumprir os protocolos sanitarios e que hai que cumprir os protocolos para o inicio do curso escolar pero a Xunta xa na reunión que mantivo co presidente da Fegamp deixou ben claro que non vai a aportar nin un só euro e que teñen que ser os propios concellos os que se fagan cargo de facer 3 desinfeccións e tres limpezas diarias por centro. No caso de Cambados serían 7 centros educativos entre infantil e primaria. Todo por conta do Concello Ese diñeiro terá que saír dalgún sitio. A mediados de agosto co curso prácticament á volta da esquina e a Xunta non vai colaborar en nada.

Está moi ben que veña a conselleira que faga unha propaganda perfecta de que o inicio do curso se fará con todas as garantías sanitarias grazas a quen? Pois grazas o diñeiro que achegan os veciños e as veciñas de cada Concello para sufragar estas limpezas e estas desinfeccións. Grazas á Xunta que é a que ten as competencias desde logo non será.

O único que fixo a Xunta foi crear un protocolo deixando todo en mans de Concello e persoal docente. Non chega con facerse cargo dos monitores do Plan Madruga ou a limpeza como ata o de agora.

Os protocolos de saídas ao patios?

Cómo se vai a levar a cabo o protocolo dos comedores escolares que están xestionados polas AMPAS? E que moitas non o farán. Nin a propia Xunta de Galicia ten un informe como base os protocolos dos comedores que xestionan eles mesmos. Todo está moi ben poñerse méritos e poñerse medallas cando realmente o que está a facer a Xunta é que dás a orde e a publicas no DOGA e que cada concello que se busque a vida para cumprir esta orde. Cal é a seguridade que se vai a seguir nos colexios e no patio. Como vai facer nos colexios onde teñen un patio moi reducido e ten moito alumno? Irán por por quendas ao recreo? E para comer? Algúns empezarán a comer ás 11 da mañá porque supostamente teñen que comer por cursos. Nun comedor dun colexio que ten desde infantil ata 6º de primaria que empezan coas comidas ás 11 da mañá. Quen vai a limpar e desinfectar entre comida e comida? O Concello tense que encargar da limpeza do comedor escolar entre comida e comida?

Novo comedor

Por outra banda, Carmen Pomar sinalou que se van levar a cabo as obras para o novo comedor deste centro cambadés, unha vez que, nos próximos días, se formalice a sinatura do acordo co Concello . O investimento ascenderá a 120.000 euros que serán asumidos a partes iguais polas administracións autonómica e local. 

Destacar a ausencia da alcaldesa ou calquer outro membro do equipo de goberno local. Como consuelo cabe decir que tampouco asisteu o ex concelleiro de cultura ata hai 5 anos.

A XUNTA PROHIBE FUMAR SI NON SE MANTEÑEN AS DISTANCIAS

Desde este xoves non se pode fumar en Galicia tanto en «a vía pública» como en «espazos ao aire libre, incluídas as terrazas», salvo que se «poida garantir o mantemento, en todo momento, da distancia de dous metros con outras persoas». A medida recolleuna esta noite o Diario Oficial de Galicia (DOG), a través dunha orde que establece que «só» baixo esas condicións «poderase exceptuar a obrigación do uso de máscara, e exclusivamente durante o consumo» de «tabaco ou de cigarros electrónicos». O presidente da Xunta en funcións, Alberto Núñez Feijóo, avanzou onte o mediodía, en rolda de prensa, unha nova medida concibida para facer fronte á pandemia de coronavirus, en pleno repunte de casos. Feijóo xa falou na súa intervención, desde a sede da Xunta en San Caetano, da «posibilidade de prohibir fumar nas rúas cando se está circulando e non se garante a distancia de seguridade cara a outros peóns». Ampliou posteriormente que se se fuma sen limitación en «zonas de gran afluencia de cidadáns», sen mediar «distancia física de seguridade», dáse un «risco alto de contaminación e de infección». A norma está a afinarse para dar «seguridade xurídica». A idea é «prohibir fumar en rúas ou en lugares públicos onde a distancia física de seguridade non é posible». O fume «prexudica a persoas lindeiras» situadas en lugares próximos cando unha persoa fumadora está «en tránsito ou en movemento» e non media a distancia necesaria. A medida, remarcaba Feijóo, sería efectiva desde leste mesmo xoves. Desde hai semanas, desde o comité de expertos sanitarios viña facendo fincapé no vector de risco que supón o feito de fumar cando non se poden garantir a distancia necesaria con outras persoas. «Se non podemos manter unha distancia de dous metros, non podemos fumar. Se queremos fumar, temos que manter unha distancia de dous metros», advertían os asesores da Xunta.

DOGA

TRABALLOS DE LIMPEZA NO RÍO UMIA, EN RIBADUMIA, CAMBADOS E VILANOVA DE AROUSA

A Consellería de Infraestruturas e Mobilidade, a través de Augas de Galicia, vén de iniciar os traballos de conservación e limpeza nos treitos interurbanos do río Umia, nos Concellos de Cambados, Ribadumia e Vilanova de Arousa.

Estas tarefas estanse a desenvolver no citado río ao seu paso polas parroquias de Baión, en Vilanova de Arousa; de Oubiña, en Cambados; ou en Ribadumia.

As actuacións céntranse na retirada de árbores, pólas e madeira morta na canle, na roza selectiva da maleza e na eliminación de canas.

As obras enmárcanse no programa de mantemento, conservación e mellora que realiza Augas de Galicia no dominio público hidráulico das bacías de Galicia-Costa, no ámbito territorial da zona Galicia-sur.

A Consellería de Infraestruturas e Mobilidade mantén activas as actuacións para a mellora dos leitos fluviais e para favorecer as condicións naturais do ecosistema dos ríos.

A XUNTA HOMOLOGA O PLAN DE ACTUACIÓN MUNICIPAL FRONTE AO RISCO DE INUNDACIÓNS DE CAMBADOS

A Comisión técnica permanente de Protección Civil homologou hoxe os plans de actuación municipal de varios concellos galegos, e informou favorablemente da actualización de distintos plans especiais.

O director xeral de Emerxencias e Interior, Santiago Villanueva, presidiu hoxe esta xuntanza, na que se homologaron os plans de actuación municipal fronte ao risco de inundacións e contra os incendios forestais do concello de Caldas de Reis. Tamén se homologaron os plans de actuación municipal contra o risco no transporte de mercadorías perigosas e fronte ao risco químico do concello de Mugardos; o plan de actuación municipal fronte ao risco de inundacións do concello de Cambados; e os plans de actuación municipal ante o risco de rotura das presas dos concellos Carballedo, Pantón e O Saviñao.

O obxecto destes plans é preparar unha resposta municipal de xeito que os respectivos concellos teñan un dispositivo permanente en función dos riscos detectados, unha estrutura de mando e uns procedementos de actuación e catalogación dos medios cos que conta o concello. Así, a finalidade é que con esta planificación as actuacións que se leven a cabo en caso de emerxencia non sexan froito da improvisación, e que a solución que se dea sexa a máis adecuada á incidencia acontecida.

Así mesmo, a Comisión tamén informou favorablemente as revisións dos plans de emerxencia exterior do Polígono da Grela Bens e de CLH Vigo; a actualización do Plan de Emerxencia Exterior de Cepsa Maside; e a actualización do Plan INUNGAL, para incluír os plans de emerxencia de presas actualizados e implantados desde o ano 2016. Estes plans serán elevados ao Pleno da Comisión Galega antes de finalizar o ano.

A Comisión técnica permanente de Protección Civil é un órgano de estudio e proposta dos temas que vaian a pasar a debate e aprobación pola Comisión Galega de Protección Civil, así como, a adopción de acordos en aquelas materias delegadas pola Comisión Galega de Protección Civil, entre outras, a homologación dos plans municipais.

A XUNTA CARGA AOS CONCELLOS A LIMPEZA DOS COLEXIOS E MOITOS QUEDARÁN SEN PLAN MADRUGA OU COMEDOR ESCOLAR

O próximo curso non haberá comedores escolares nos colexios da provincia de Pontevedra dependentes ou xestionados polas ANPA´s, por decisión dos pais que consideran inviable manter os comedores e cumprir o protocolo anti COVID deseñado pola Xunta. Xa o advertían nada máis coñecer o protocolo, e desde a Federación de ANPA´s pediron que se rectificasen algúns aspectos. Pero as súas demandas non se tiveron en conta, nin tampouco as dos sindicatos que expuxeron a retirada do proxecto. Contra vento e marea a Xunta segue adiante, e o contraataque dos pais é a suspensión dos comedores escolares, pero tampouco haberá Plan Madruga. A FANPA sabe que é un problema maiúsculo para a conciliación de miles de familias, pero o protocolo de seguridade elaborado de forma unilateral pola Xunta non lles deixa outra saída: nesas condicións é imposible e de aí o acordo anunciado polo presidente da Federación Provincial de Anpas, Rogelio Carballo.

Para poder levar a cabo os comedores e o Plan Madruga, a FANPA di que teñen que cambiar 3 cuestións, pero o que non acaban de entender é que nas aulas teñan unhas condicións e no comedor os requirimentos sexan moito maiores. Parece que o panorama non pode estar máis revolto, e con todo estao. Van saltar faíscas nos concellos porque a Xunta pídelles un esforzo económico á conta do COVID, tendo en conta de que o mantemento nos colexios é cousa dos concellos.
A Xunta desenténdese da limpeza a maiores motivada polo COVID-19. Ata agora eran os concellos quenes se encargaban da limpeza pero cos novos protocolos anti-COVID.
O presidente da Federación Galega de Municipios e Provincias (Fegamp), Alberto Varela, criticou este mércores que a Xunta non vaia a habilitar un fondo extraordinario para compensar aos concellos polas tarefas de limpeza especiais, derivadas da pandemia pola COVID-19, que deberán asumir nos centros escolares de primaria.
Os concellos consideran "inviable" sufragar os gastos anuais, a maiores, que calculan que lles custará poñer en marcha as medidas de prevención do coronavirus que estipula o protocolo da Xunta para os colexios. O documento esixe que "durante a xornada lectiva unha persoa do servizo de limpeza realizará unha limpeza de superficies de uso frecuente e, no caso dos aseos, de polo menos tres veces ao día".

CANCELADOS OS ACTOS PREVISTOS POLO CAPÍTULO SERENÍSIMO

Xa o decíamos esta tarde.....

O CAPÍTULO SERENÍSIMO PODE VERSE OBRIGADO A SUSPENDER OS ACTOS PROGRAMADOS

O Capítulo Serenísimo do Albariño anunciaba hai escasa duas horas a cancelación das súas dúas actividades programadas para esta fin de semana con motivo do Albariño de 2020. A asociación enogastronómica explica que decidiu cancelar tanto o irmandamento con outra confraría de Portugal do sábado, como a investidura dos Cabaleiros do domingo para cinguirse ás recentes recomendacións da Xunta de Galicia, que pediu que nas celebracións privadas non haxa máis de 25 persoas.
Supoñemos que a negativa do concello de Cambados influeu bastante máis que o que din desde o Capítulo.

UNHA CAMPAÑA DA XUNTA PASARÁ POR CATRO CONCELLOS DO SALNÉS

No marco do programa Galicia destino seguro, a Xunta de Galicia vén de pór en marcha unha campaña itinerante de concienciación que percorrerá a Comunidade durante o verán. Nela infórmase aos viaxeiros e aos propios galegos das medidas postas en marcha para garantir un turismo seguro no actual contexto sanitario, así como dos recursos turísticos dispoñibles na nosa Comunidade.

O conselleiro de Cultura e Turismo en funcións, Román Rodríguez, visitou esta mañá a primeira das accións da campaña, en Santiago de Compostela, onde se situou unha unidade móbil que funciona a modo de oficina de turismo na Alameda compostelana desde onde se achega información á cidadanía e aos turistas cunha mensaxe de responsabilidade, precaución e respecto no actual contexto sanitario.

O espazo informativo está atendido por profesionais da información turística e tamén difunde o destino, poñendo en valor recursos como o Camiño de Santiago, a paisaxe, a natureza, a enogastronomía ou o patrimonio cultural.

A Mariña, Rías Baixas e Ribeira Sacra

Está previsto que a campaña percorra Galicia e que estea presente nas sete cidades galegas e municipios turísticos con maior densidade de poboación, que superen os 10.000 habitantes. Así, tras Santiago de Compostela, onde estará todo o día de hoxe, continuará en Ferrol e iniciará o mes de agosto na A Coruña.

Continuará o resto da campaña en localidades que incluirán destinos como A Mariña lucense, a Ribeira Sacra, así como varios destinos costeiros. En concreto está previsto que en agosto visite Ribeira, Rianxo, Betanzos, Lugo, Monforte, Sarria, Viveiro, Ourense, O Carballiño, Poio, Pontevedra, Sanxenxo, O Grove, Cambados, Vilagarcía de Arousa, Cangas do Morrazo, Vigo, Nigrán, Baiona e Tui.

A campaña itinerante dá continuidade á batería de medidas postas en marcha pola Xunta para garantir seguridade e protección aos viaxeiros, traballadores e galegos no actual escenario. Enmárcase no Plan de Reactivación do sector turístico aprobado o pasado mes de abril que inclúe accións para promover Galicia como un destino seguro, con accións que axuden a xerar liquidez no tecido empresarial e o incentivar o consumo.