Xornalismo é, escribir, publicar e transmitir o que non queren que se publique, escríbase e transmítase, o outro son "plumillas e relacións públicas da censura e a corrupción con premeditación e engano aos seus lectores".
CORES DE CAMBADOS É UN BLO
G. Sobre todo crítico.
Amosando publicacións coa etiqueta Concello de Cambados. Amosar todas as publicacións
Amosando publicacións coa etiqueta Concello de Cambados. Amosar todas as publicacións

20 de xuño de 2018

XA PODES ANOTAR AOS TEUS FILLOS NO PLAN MADRUGA DOS COLES DE CAMBADOS



Dende a Concellaría de Cultura do Concello de Cambados volverá a poñerse en marcha, un ano máis, o Plan Madruga “Os primeiros do cole” neste curso 2018-2019. Este programa vai dirixido a aquelas familias que debido as súas obrigas teñen dificultades para poder deixar aos seus fillos e fillas á hora de entrada no colexio.
O Plan Madruga “Os primeiros do cole” iniciarase co comezo do curso escolar, o vindeiro 12 de  setembro e desenvolverase durante todo o curso lectivo. Realizarase en colaboración coas direccións de cada centro educativo no que se acade un mínimo de 10 nen@s. Terá un horario de inicio de 7:45 horas ata o comezo das clases. Durante este tempo, os monitores recibirán aos nen@s e realizarán actividades e xogos. A utilización deste servizo terá un custo para o/a usuario/a  de 4 € ao mes.
Para acollerse a esta actividade será condición indespensabele cubrir unha solicitude que está  a disposición de todas  as familias interesadas no Rexistro do Concello de Cambados ou na Biblioteca Municipal Luís Rei. O prazo de presentación de ditas solicitudes será do 20 de xuño ao 31 de xullo, e realizarase atendendo ás seguintes indicacións:
  • A persoa interesada deberá achegarse á Oficina da Tesourería no primeiro andar da Casa Consistorial. Alí fará efectivo o primeiro pagamento de 4€ para que a súa solicitude sexa admitida a trámite, emitíndose o correspondente recibo.
  • A continuación presentarase coa solicitude cuberta e a documentación requerida, na Oficina do Rexistro, sita na planta baixa do Concello. O horario de atención ao público será de luns a venres de 8:30 a 14:30 horas.
De entre a documentación que se solicita destaca un certificado de empresa que acredite a necesidade de facer uso deste servizo, aínda que tamén se poderán atender, de no cubrirse as  prazas, aquelas peticións puntuais nas que as circunstancias familiares así o esixan, como ter persoas maiores ao cargo, ou atencións médicas continuadas, debendo achegar igualmente a xustificación correspondente.
O ingreso económico non faculta ás persoas interesadas para acceder á actividade; porén deberán agardar ao 21 de agosto, data na que se publicarán as solicitudes admitidas. Darase prioridade a aquelas familias, nas que traballen os dous proxenitores e precisen deixar aos seus fillos todo o curso escolar dende as 7:45-8:00 horas. A aquelas persoas non admitidas reembolsaráselles na conta aportada na inscrición o pagamento realizado.
Para maior comodidade, a partir do segundo mes de uso do servizo, permitirase o pagamento a través de domiciliación bancaria de novembro a xuño, ou trimestralmente. Tamén poderá realizarse na Oficina de Tesourería. O pagamento deberá efectuarse nos 5 días anteriores ao comezo do mes para o que se inscriba ao nen@.
Documentación de obrigada aportación xunto con esta solicitude:
Fotocopia do recibo do primeiro pagamento de 4€ efectuado na Oficina de Recadació.
Fotocopia do DNI do pai/nai/titor@ legal do nen@ e do libro de familia ou DNI do nen@.
Certificado de empresa, entidade ou organismo que acredite a ocupación laboral incompatible co horario de apertura do colexio.
Fotocopia do número de conta bancaria no que desexa domiciliar o pago (se é o caso).
Fotocopia do número de conta bancaria no que solicita o reembolso do pagamento de 4€ inicial (se é o caso).
De ser necesario o servizo por motivos de saúde, circunstancias familiares ou atencións médicas continuadas aportarase documentación xustificativa.


17 de xuño de 2018

OS CADETES NEREA GARCÍA BUSTOS E JORGE GONZÁLEZ, VENCEDORES DO TRÍATLON POPULAR DE CAMBADOS


Os cadetes do Centro Galego de Tecnificación Deportiva Nerea García Bustos (Náutico de Narón) e Jorge González (Natación Riveira) proclamáronse hoxe vencedores do Tríatlon Popular de Cambados, no que participaron 200 deportistas nun soleado día.
Nerea García foi moi superior e venceu con bastante comodidade cun tempo de 1:08:38. A segunda posición foi para Aída García (Tríatlon Rías Baixas) cun tempo de 1:12:08 e terceira foi María Martínez (Atletismo Porriño) cun tempo de 1:12:30.
Na categoría masculina, Jorge González logrou o seu triunfo cunha magnífica carreira a pe, na que foi o máis rápido para chegar a meta en primeira posición (58:52) por diante de Ismael Vieitez (Tríatlon Arteixo) cun tempo de 59:06. O terceiro posto foi para Estebvan Basanta (Cidade de Lugo Fluvial) cun tempo de 59:43.
No documento adxunto tedes as clasificacións.


15 de xuño de 2018

5 PERCEPTORES DA RISGA COMEZARÁN A TRABALLAR PARA O CONCELLO DE CAMBADOS



O Goberno galego apoiará en 5 concellos da comarca do Salnés a contratación de 34 perceptores da Renda de Integración Social de Galicia (RISGA). Para iso, investirá ao redor de 268.400 euros.
Estas axudas están dirixidas a concellos ou agrupacións de concellos coas que, ademais de promover a contratación na Administración local, búscase incrementar as oportunidades laborais das persoas en risco de exclusión social.
O importe medio da axuda concedida por traballador é de 8747 euros, case un 4% máis que o ano pasado. Na contratación terán preferencia, ao igual que nas últimas dúas edicións deste programa, aquelas persoas que teñan asignado un proxecto de inserción de carácter laboral, os maiores de 45 anos e as que teñan cargas familiares.
Na comarca do Salnés, beneficiaranse 20 desempregados de Vilagarcía de Arousa, que contará cunha subvención de 125.702 euros; 5 do Grove e 5 de Cambados, cada un destes concellos con 52.095 euros; e 2 de Meis e 2 de Meaño, con 17.661 e 20.838 euros, respectivamente.
A nivel provincial, a Consellería de Economía, Emprego e Industria investirá, a través destas axudas, un total de 2,1 millóns de euros para a contratación de 226 desempregados.
José Manuel Cores Tourís engadiu que "a Xunta ampliará nas próximas semanas o crédito para esta convocatoria de axudas co obxectivo de poder atender todas as solicitudes que cumpran cos requisitos”. Segundo os baremos que se marcan na orde, cada concello pode solicitar un mínimo de 2 traballadores e un máximo de 40.
Con independencia da duración do contrato, o período que financiará a Xunta con estes apoios será de sete meses. A contía que se conceda será a equivalente ao necesario para sufragar os custes salariais totais, incluída a cotización empresarial á Seguridade Social por todos os conceptos, na mesma cantidade que a fixada para o salario, segundo o convenio colectivo vixente. Para a resolución das axudas tívose en conta o número de desempregados, a evolución do paro entre 2013 e 2017 de cada localidade e da poboación neste período e o número de perceptores da Risga a peche do ano pasado.
A iniciativa enmárcase na aposta da Xunta polo emprego inclusivo, un eido que está impulsando a través de diversos programas. A Administración autonómica, ademais de mellorar a empregabilidade e inserción laboral dos galegos e galegas que máis o precisan, fomenta a contratación nos concellos galegos.
A Consellería de Economía, Emprego e Industria está a investir este ano preto de 60 millóns de euros para impulsar o emprego na Administración local a través de programas como o Aprol Rural, os apoios para a contratación de socorristas, os obradoiros duais e os específicos para a mocidade e os programas integrados de emprego.



O CONCELLO DE CAMBADOS INVITA OS VECIÑOS A PARTICIPAR, POR TERCEIRO ANO CONSECUTIVO, NO REMONTE XACOBEO DO ULLA



O Concello de Cambados convida os veciños do municipio e visitantes a participar no Remonte Xacobeo do Ulla, que, por terceiro ano consecutivo, partirá desde o porto de Tragove. A XXXIV edición da Traslatio, que conmemora a chegada a Galicia por mar do corpo do Apóstolo Santiago, celebrarase o domingo 1 de xullo cun percorrido desde Cambados ata Padrón. O catamarán sairá ás 16:15 horas da tarde desde o porto de Tragove, con chegada a Padrón sobre as 18:20 horas e regreso a Cambados ás 19:00 horas. O Concello de Cambados quere, un ano máis, facer partícipes aos veciños e visitantes desta peregrinación do Ulla e, ao mesmo tempo, promover a Ruta Marítimo-Fluvial pola Ría de Arousa, o primeiro dos camiños de peregrinación. A invitación para este evento está aberta o público en xeral e é gratuita, eso sí, necesitarase inscrición previa a partir do Luns 18 de Xuño  na  Oficina de Tursimo de Cambados, a través dos teléfonos 986 520 786 //  986 520 943 Ext. 769 ou ben a través do mail  turismo@cambados.es.



CHARLA SOBRE REUMATOLOXÍA EN CAMBADOS



A concellería de Sanidade, Servizos Sociais e Terceira Idade de Cambados, que dirixe Tino Cordal, organiza unha charla sobre reumatoloxía en colaboración coa Liga Reumatolóxica Galega (LRG). O obxectivo fundamental desta actividade é informar sobre os problemas reumáticos e como poder prevelos, ou axudar a palialos.
O 22% dos galegos e galegas padecen enfermidades reumáticas e músculo-esqueléticas, que non afectan soamente á xente maior senón tamén á mocidade. Tendo en conta estes datos, trátase dunha problemática que precisa moita atención por parte das autoridades sanitarias. Ademais, os concellos poden celebrar actos como o que se vai desenvolver en Cambados para informar á poboación ao respecto das enfermidades reumáticas.
A charla será impartida polo Doutor Rafael Melero do Complexo Hospitalario Universitario de Vigo (CHUVI) e será presentada polo propio concelleiro de Sanidade cambadés, Tino Cordal. A conferencia terá lugar no salón de actos de ExpoSalnés, sito no paseo da Calzada, este martes 19 de xuño ás 20 horas. O título da mesma é: “Teño unha enfermidade reumática e… agora que?
Cordal anima a todos os cambadeses e cambadesas que sofren problemas reumáticos a acudir a esta charla na cal poden coñecer algunhas das claves que lles proporcionen axuda para minorar as súas dores e contribúan a reducir os efectos destas enfermidades.


14 de xuño de 2018

240 VECIÑOS DE CAMBADOS DESFRUTARON DA EXCURSIÓN A ONS PARA MAIORES



Os cambadeses participaron na excursión marítima organizada pola Concellaría de Servizos Sociais e Terceira Idade que dirixe Tino Cordal

A Concellería de Servizos Sociais, Sanidade e Terceira Idade, dirixida por Tino Cordal, organizou no día de hoxe una excursión gratuíta a Ons para maiores de 60 anos. A excursión estaba prevista para o pasado xoves 7, pero debido ás condicións meteorolóxicas adiouse ata hoxe 14 de xuño.
O Concello alugou con esa finalidade un catamarán que saíu ás 10 da mañá do porto de Tragobe. A viaxe de Cambados a Ons en barco durou unha hora e 10 minutos, nun percorrido que cruzou a Ría de Arousa para deleite dos participantes na mesma.
Foron finalmente un total de 240 excursionistas cambadeses os que participaron nesta excursión marítima, logo de que se decidiu alugar un catamarán máis grande trala ampla demanda existente, posto que en apenas uns días inscribíronse no Concello máis de 200 persoas, participando na viaxe a totalidade das persoas inscritas nesta viaxe.
O xantar en Ons correu por conta dos excursionistas, así un total de 190 persoas comeron no restaurante existente na illa e o resto de participantes decidiron levar a súa propia comida da casa. O regreso estaba previsto para ás 18:45, chegando a Cambados sobre ás 20 horas.
A viaxe esta sufragada integramente pola partida orzamentaria para a Terceira Idade do Concello de Cambados. E foron acompañados polo Concelleiro de Servizos Sociais, Tino Cordal, xunto con técnicos municipais, un médico e unha enfermeira, que contaron tanto cun desfibrilador portátil do Concello como un botiquín de primeiros auxilios para atender calquera incidencia que puidera ocorrer durante a viaxe.
Os excursionistas que participaron nesta viaxe, puideron desfrutar do entorno do Parque Natural das Illas Atlánticas e percorrer as distintas Rutas que se realizaron tanto a maña como ao remate do xantar: a Ruta do Faro, a do Burato do Inferno, a da Praia de Melide ou a do Canexol.
A Concellería de Servizos Sociais, Sanidade e Terceira Idade entende que este tipo de actividades son moi beneficiosas para a saúde física e mental dos nosos maiores. Ademais, moitos deles desfrutaron dunha oportunidade única para visitar Ons, unha illa que forma parte do Parque Nacional das Illas Atlánticas.




13 de xuño de 2018

III TRIATLÓN CONCELLO DE CAMBADOS



Este sábado desenrolarase polo centro de Cambados o III Triatlón Popular Concello de Cambados. 


NATACIÓN: 1 VOLTA - 750 m Discorrerá dende as inmediacións do illote de San Sadurniño con saída na auga sobre un percorrido balizado ata a Praia pasando por debaixo do espigón do muelle de Santo Tomé. 
A saída estará situada a 400m da transición. 

CICLISMO: 4 VOLTAS - 20 Km O inicio da proba farase saíndo do muelle de Santo Tomé pola Alameda de Santo Tomé para continuar pola Avenida de Galicia, Ribeira de Fefiñáns e Beiramar chegando ó Porto de Tragove onde será o punto de retorno, volvendo polo mesmo percorrido ata a zona de transición onde se cumpre unha volta. Na cuarta volta entrarase de novo na transición. Percorrido de dureza baixa e pouco técnico. 

CARREIRA A PÉ: 2 VOLTAS - 5 KM O inicio da proba farase dende a transición, situada na escalinata do muelle de Santo Tomé seguindo o paseo Marítimo ata o punto de retorno que estará situado aproximadamente no comezo do muelle de Tragove volvendo polo mesmo paseo ata a zona de partida completando así unha volta. Na segunda volta os corredores entrarán na meta. 
Percorrido de dureza baixa.


Regulamento Tríatlon Cambados V2

A inscrición realizarase on-line, a través da web da Federación Galega de Tríatlonwww.fegatri.org , no apartado Competicións/Inscricións.





12 de xuño de 2018

A PLAZA DE FEFIÑÁNS PERMANECERÁ CERRADA DURANTE XULLO E AGOSTO




A Praza de Fefiñáns e a Rúa Príncipe de Cambados quedarán pechadas ao tráfico rodado durante os meses de xullo e agosto.


O goberno municipal adoptou a decisión como medida de seguridade viaria en base a un informe da policia local e tras os dous accidentes rexistrados nesta zona o pasado mes de xaneiro.
A actuación non conta co respaldo unánime dos hosteleiros e comerciantes do entorno pero sí cun apoio que o Concelleiro do departamento, José Ramón Abal, considera suficiente para levala a cabo.
Paralelamente, o Concello habilita moi preto, na variante do Salnés, unha zona de aparcamento público gratuito durante todo o ano que dará cabida a 100 prazas de estacionamento.
Para tal fin, o Concello e o propietario da parcela, de 3.000 metros cadrados, asinaron un contrato de aluguer por catro anos por importe de 4.000 euros ao ano.
Os detalles explicábaos esta mañá o Concelleiro de Seguridade Cidadá, José Ramón Abal, acompañado do do Policía Local, Alejandro Falcón.


Escoitar a nova en ArousaSíRadio



7 de xuño de 2018

CHARLA EN CAMBADOS SOBRE O CONSUMO RESPONSABLE EN TELEFONÍA E INTERNET



O Concello de Cambados continúa enchendo de contidos o programa “Cambados Emprende”.
Nesta ocasión, a Concellería de Promoción Económica organiza para o próximo 14 de xuño unha charla aberta sobre telefonía e internet destinada a emprendedores e veciños en xeral.
Será en Exposalnés ás 20.30 horas e a asistencia é gratuita previa inscripción no correo economia@cambados.es.
A intención é asesorar aos asistentes a elexir a operadora e o contrato máis adecuados, así como defender os seus dereitos ante posibles disconformidades co servizo.


4 de xuño de 2018

A EXCURSIÓN A ONS PARA MAIORES DE 60 ANOS ADÍASE AO DÍA 14


A Concellería de Servizos Sociais, Sanidade e Terceira Idade, dirixida por Tino Cordal, organiza una excursión gratuíta a Ons para maiores de 60 anos. A excursión estaba prevista para este xoves 7 pero debido ás condicións meteorolóxicas adíase ata o vindeiro 14 de xuño.
O Concello alugou con esa finalidade un catamarán que sairá do porto de Tragobe ás 9:30 da mañá dese día. A viaxe de Cambados a Ons en barco dura aproximadamente unha hora e 15 minutos, co que se espera atracar no peirao desta illa antes das once.
Serán finalmente un total de 240 excursionistas cambadeses, logo de que se decidira alugar un catamarán máis grande trala ampla demanda existente, posto que en apenas uns días inscribíronse no Concello arredor de 260 persoas.
O xantar en Ons correrá por conta dos excursionistas, que poderán comer nos restaurantes existentes na illa ou levar a súa propia comida da casa. O regreso será ás 18:45, chegando a Cambados ás 20 horas.
A viaxe estará sufragada integramente pola partida orzamentaria para a Terceira Idade do Concello de Cambados.
A Concellería de Servizos Sociais, Sanidade e Terceira Idade entende que este tipo de actividades son moi beneficiosas para a saúde física e mental dos nosos maiores. Ademais, moitos deles terán unha oportunidade única para visitar Ons, unha illa que forma parte do Parque Nacional das Illas Atlánticas.

PROXECCIÓN DO DOCUMENTAL SOBRE O CONFLITO DA MEGAMINA EN TOURO E O PINO, ‘A AMEAZA DO COBRE’



“Por unha banda dinche que veñas ao rural, e por outra estanche cortando o teu medio de vida. Non sei a quen queren enganar”. A frase é dun dos gandeiros protagonistas do documental Touro – O Pino. A ameaza do cobre. No filme, de case unha hora de duración, abórdase o conflito xurdido nestes dous concellos e na súa contorna ante o megaproxecto que pretende Cobre San Rafael, da man da multinacional Atalaya Mining e a través da reapertura das vellas minas de cobre, e do que se advirte un forte impacto medioambiental, económico e social na zona.
O documental será presentado neste mércores 6 de xuño ás 20:30 horas no Salón de Actos de Exposalnés, nun acto no que estará presente o presidente da Asociación Véspera de Nada, Xoan Doldán, que organiza o acto xunto con Contraminacción, Rede contra a Minaría Destrutiva de Galiza e a Plataforma Veciñal Mina Touro – O Pino NON, ademais de ser presentado polo concelleiro de Servicios Sociais e Sanidade e Tenente de Alcalde, Tino Cordal. Que participaran trala proxección nun coloquio cos asistentes ao acto.
O filme, elaborado por Tingalaranga Audiovisual en colaboración con Nós TV, recolle testemuños de científicos, alcaldes, empresarios e habitantes dos municipios afectados. “Este proxecto é totalmente incompatible coa agricultura, a gandería ou un negocio coma o meu”, pódese oír no tráiler da boca dunha muller que rexenta unha casa rural.
Como lembra a Plataforma Veciñal Mina Touro – O Pino NON, o documental debulla o conflito arredor dunha explotación “moi cuestionada”, xa que  “afectaría ao Camiño de Santiago, a moitas empresas de turismo, gandería, agricultura, así como ás augas que abastecen a comarca, existindo riscos graves para a vida das persoas de zonas coma Arinteiro”. “O rio Ulla podería verse gravemente afectado e mesmo as zonas marisqueiras da súa desembocadura na Arousa”, advirten sobre un proxecto moi contestado e que o vindeiro 10 de xuño ten programada unha gran manifestación en Santiago de Compostela.



CAMBADOS ACOLLE EN XUÑO SETE NOVOS OBRADOIROS "SMARTPEME"




O Centro ExpoSalnés de Cambados acollerá durante todo o mes de xuño sete novos obradoiros ao abeiro de "SmartPeme", o programa de capacitación tecnolóxica impulsado pola Deputación de Pontevedra. "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas. O punto do Centro ExpoSalnés presta asistencia ao empresariado das comarcas do Salnés e Caldas.
As quendas para o mes de xuño son as seguintes: o martes 5 de xuño ás 19:00 horas, "Unifica a xestión das túas redes con Hootsuite". O xoves 7 de xuño, tamén ás 19:00 horas, "Como ser eficiente na organización do teu tempo: trello e toggl". O martes 12, á mesma hora, realizarase a acción "Parte Práctica da Lei de Protección de Datos 2018, RGPD Europeo", a cal contará cunha retransmisión en vivo. O xoves desa mesma semana, o día 14 á mesma hora, será a quenda de "Marketing de contidos: Como xerar unha estratexia efectiva". O día 19 de xuño, martes, ás 19:00 horas chega "Google Calendar, moito máis que unha axenda". O xoves desa mesma semana, á mesma hora, é a quenda de "Crea o teu propio logotipo con Canva". Por último, "Desenvolve a túa propia estratexia de email marketing" chegará o martes 26 de xuño, á hora habitual, as 19:00 horas. A oficina "SmartPeme" de Cambados, no Centro ExpoSalnés, atópase no Paseo da Calzada, s/n e as inscricións pódense facer no número de teléfono 886 20 20 20, o correo electrónico info.smartpeme@depo.es ou a páxina web www.smartpeme.depo.gal.
"SmartPeme" desenvolve este ano novas carteiras de servizos co obxectivo de continuar axudando ás empresas da provincia a ser máis competitivas na contorna económica actual. O programa abre tres novas grandes liñas: o "Centro Provincial de Economía Dixital" (CPED), no viveiro de empresas de Barro, "SmartPeme Impulsa" e "TurisTIC".
A través do Centro Provincial de Economía Dixital as empresas, persoas autónomas e emprendedoras da provincia poderán coñecer as ferramentas, aplicacións e solucións innovadoras máis relevantes da economía dixital. Para iso, o CPED vaise apoiar nas instalacións do FabLab que a Deputación ten instalado no viveiro de Barro, co obxectivo de posicionarse na vangarda da innovación ao servizo das empresas.
"SmartPeme Impulsa" abre novas vías de asesoramento en materia de innovación, competitividade e internacionalización unindo, deste xeito, os obxectivos das empresas coas máis novas tecnoloxías, procesos e servizos, e preparando ás empresas locais para competir nos mercados internacionais.
Finalmente "TurisTIC" erixirase como o punto de apoio do sector turístico. Este servizo, enmarcado no Plan Estratéxico de Turismo Rías Baixas, pretende potenciar o sector a través de axudas ás empresas para adaptarse á contorna dixital, cun enfoque específico para cada colectivo. Adicionalmente, esta liña de "SmartPeme" contará con algunhas iniciativas innovadoras como serán a creación dunha aceleradora para empresas TIC relacionadas co sector turístico e a creación dun congreso sobre o impacto das novas tecnoloxías no sector.



1 de xuño de 2018

CURSO SOBRE O NOVO REGULAMENTO XERAL DE PROTECCIÓN DE DATOS



O pasado 25 de maio entrou en vigor o Regulamento Xeral de Protección de Datos (RXPD). Trátase dunha nova regulación de ámbito europeo do tratamento dos datos que manexan as empresas e que, entre outras novidades, contempla multas que poderían chegar ata o 4% do volume de negocio anual da empresa.
Por elo, desde o Concello de Cambados consideramos imprescindible facilitar toda a información posible para que o tecido empresarial cambadés se adapte con normalidade a este novo e exixente escenario normativo.
Con tal motivo, a Concellería de Economía e Facenda vai desenvolver un curso dirixido a empresas e profesionais sobre o “REGULAMENTO XERAL DE PROTECCIÓN DE DATOS (RXPD)”, co obxectivo de coñecer o novo marco normativo, comprender os principios de privacidade e familiarizarse coa nova figura do Delegado de Protección de Datos.
O curso, que é totalmente gratuito, realizarase entre o 11 e o 22 de xuño (de luns a venres), en horario de 20:00 a 22:00 h. Para maior comodidade dos empresarios celebrarase nas aulas do novo Viveiro de Empresas municipal (Polígono Industrial). En caso de estar interesado en participar no mesmo pode solicitar a inscripcción no correo electronico, economia@cambados.es 
Trátase dunha iniciativa pioneira, xa que ata agora ningún concello da comarca do Salnés, nin do noso entorno, organizou unha actividade semellante.


29 de maio de 2018

CHARLA SOBRE AS AXUDAS DE CONTRATACIÓN EN EXPOSALNÉS




Baixo o nome de “Cambados Emprende” ábrese unha programación formativa, cuxa primeira parte desenvolverase nos meses de maio e xuño
Unha das accións formativas será un Curso de Escaparatismo, con asistencia personalizada nas tendas, que impartirá a empresa Nordelaina do 5 ao 28 de xuño.
Será os martes e xoves en horario de 21 a 23 horas en Exposalnés con límite de 20 prazas.
A segunda actividade será un Curso de Manipulación de Alimentos, que terá lugar no Viveiro de Empresas o 29 de maio de 19 a 22 horas, igualmente con asistencia limitada a 20 prazas.
Por último, celebrarase unha Charla-Coloquio sobre as Axudas a Contratación e a Promoción do Emprego Autónomo, tamén hoxe 29 de maio, ás 20.30 horas en Exposalnés, a cargo do Despacho de Avogados Rodríguez&Alonso. A iniciativa está pensada para os autónomos, co fin de que poidan informarse das novas subvencións que poden solicitar.

 Á finalización da mesma terá lugar unha mesa redonda, na cal se tratarán as necesidades do comercio local, e na que se lle poderán trasladar aos representantes da Administración Local presentes, aquelas necesidades que entendamos se precisa solucionar (aparcadoiros, iluminación, etc..).

A única das accións que non será de balde é a de Manipulación de Alimentos, que terá un custe de 35 euros.


24 de maio de 2018

BASES DO 1º CONCURSO LITERARIO “CAMBADOS MAR DE LETRAS”



O IES Francisco Asorey de Cambados, co Patrocinio do Concello de Cambados, convoca na súa 1ª edición, o Concurso Literario “Cambados Mar de Letras”. DIRIXIDO ao alumnado dos centros educativos de Galicia, que estean cursando estudos de Secundaria, Bacharelato e Ciclos Formativos, e sempre que non superen os 20 anos de idade.
MODALIDADES
  • POESÍA: cunha extensión máxima de 100 versos, nun único ou varios poemas, de tema e forma libres.
  • RELATO CURTO: cunha extensión comprendida entre 3 e 6 folios, de tema libre, mecanografados a dobre espazo e por unha soa cara.
PRESENTACIÓN DAS OBRAS
As obras deberán ser orixinais, inéditas e escritas en Lingua Galega, segundo a normativa ortográfica vixente. Deberán enviarse 4 copias en papel, e unha en formato dixital (Word, pdf, open office) nun CD ou nun Pendrive. Neles figurará o título e a plica, ou pseudónimo, do autor. Os orixinais virán acompañados dun sobre pechado onde figurarán os seguintes datos: Nome e apelidos, idade, enderezo, teléfono, correo electrónico, fotocopia do DNI, Centro no que realiza os seus estudos, e o curso no que está matriculado.
No sobre exterior figurará só o nome da obra e a plica.
E serán enviados a:
1º CONCURSO LITERARIO
“CAMBADOS MAR DE LETRAS”
IES FRANCISCO ASOREY
R/ OS CAEIROS Nº 25
36630 CAMBADOS
PONTEVEDRA. 

PRAZO DE PRESENTACIÓN
Estará aberto dende o 17 de Maio do 2018 ata 10 de Outubro de 2018.
PREMIOS
Concederanse 2 premios en cada modalidade, dotados con 250€ o 1º premio e 125€ o accésit, e figura conmemorativa. Poderían ser recomendadas para a súa publicación, algunha outra obra se así o ditaminara o Xurado, pero en todo caso sen dotación económica. Os premios poderán ser declarados desertos. As obras premiadas e as seleccionadas, serán publicadas nun libro editado polo IES Asorey e o Concello de Cambados, na colección EDICIÓNS DO SERRIDO. Os autores recibirán exemplares do mesmo.
XURADO
Estará formado por profesores e escritores de recoñecido prestixio, e a súa composición será dada a coñecer con anterioridade ao fallo.
FALLO
Será dado a coñecer no mes de Outubro de 2018, mediante aviso aos galardoados e así mesmo, difundirase o acordo a través dos medios de comunicación. A decisión do xurado é inapelable.
ENTREGA DE PREMIOS
A entrega de premios aos autores galardoados, que deberán estar presentes, terá lugar no Concello de Cambados, o vindeiro 9 de Novembro de 2018, declarado como Día do Poeta Ramón Cabanillas.
A participación neste Concurso Literario “Cambados Mar de Letras” 2018, implica a aceptación das presentes bases.

Adxuntos



23 de maio de 2018

"CAMBADOS EMPRENDE", NOVA PROGRAMACIÓN FORMATIVA PARA EMPRENDEDORES.




O Concello de Cambados, en colaboración coa Asociación Zona Centro, pon en marcha unha nova iniciativa destinada aos emprendedores.
Baixo o nome de “Cambados Emprende” ábrese unha programación formativa, cuxa primeira parte desenvolverase nos meses de maio e xuño
Unha das accións formativas será un Curso de Escaparatismo, con asistencia personalizada nas tendas, que impartirá a empresa Nordelaina do 5 ao 28 de xuño.
Será os martes e xoves en horario de 21 a 23 horas en Exposalnés con límite de 20 prazas.
A segunda actividade será un Curso de Manipulación de Alimentos, que terá lugar no Viveiro de Empresas o 29 de maio de 19 a 22 horas, igualmente con asistencia limitada a 20 prazas.
Por último, celebrarase unha Charla-Coloquio sobre as Axudas a Contratación e a Promoción do Emprego Autónomo, tamén o 29 de maio, ás 20.30 horas en Exposalnés, a cargo do Despacho de Avogados Rodríguez&Alonso.
A única das accións que non será de balde é a de Manipulación de Alimentos, que terá un custe de 35 euros.
Os interesados en participar en calquera das actividades deben inscribirse previamente a través das vías de comunicación do Concello.
Así o explicaba o Concelleiro de Promoción Económica, Xurxo Charlín, na presentación de "Cambados Emprende", acompañado do presidente de Zona Centro, Juan Rey, e os partícipes no programa formativo, Carlos Alonso e Montse Oubiña.




ÉXITO DOS RAPACES DO MAGARIÑOS NA SUA EXPERIENCIA COMO EMPRESARIOS




O mercado ambulante de Cambados tivo está mañá uns postos moi especiais: un grupo de nenos de  5º curso do colexio Antonio Magariños que crearon a súas propias cooperativas acudiron a vender os seus produtos ao mercado dos mércores. Os alumnos montaron dous postos. Sobre eles, despregaron a súa variada mercadoría, na que abundaban os xogos e os artigos de artesanía. Todos os artigos foron confeccionados polo propio alumnado.
Unha d que recauden coa venta dos seus produtos irá destinado a AECC (Asociación Esoañola Contra o Cancro) e ao Refugio de Animales de Cambados.
A experiencia forma parte do proxecto “Depoemprende”, da Deputación, e o seu obxectivo é fomentar o espírito emprendedor entre os nenos e os adolescentes. O Magariños cambadés foi un dos centros seleccionados para participar na experiencia, e desde hai meses, as súas dúas clases de quinto de Primaria traballan na posta en funcionamento da cooperativa.
Os alumnos tiveron que dar todos os pasos aos que estaría obrigada calquera outra entidade similar, como crear e aprobar uns estatutos, pedir un CIF en Facenda, solicitar a licenza municipal para exercer a venda e pagar as taxas por ocupación de espazo no mercado.
Este é o segundo ano que o Magariños participa no programa da Deputación “Depoemprende”.



PRESENTADA NA DEPUTACIÓN A VI RUTA DO ALBARIÑO




A Deputación amosa o seu apoio ao deporte na presentación da VI Ruta do Albariño que discorrerá polo Salnés e polo Concello de Poio


A proba de ciclismo, que terá lugar os días 26 e 27 de maio, está destinada ás categorías de Júnior e Sub 20


A Deputación de Pontevedra, xunto a Federación Galega de Ciclismo, o concello de Meaño e Cambados e o Club Ciclista de Cambados presentaron hoxe, a VI Ruta do Albariño destinada a ciclistas das categorías Júnior e Sub 20, procedentes de Galicia, España e Portugal. A actividade, que se levará a cabo nas comarcas do Albariño, conta con tres etapas que serán recorridas os días 26 e 27 de maio. O acto de presentación asistiron o Presidente da Federación de Ciclismo, Juan Carlos Muñiz; a alcaldesa de Meaño, Lourdes Ucha; o concelleiro de Deportes de Cambados, Víctor Caamaño; e o presidente do Club Ciclista Cambados, Ernesto Falcón.
A alcaldesa de Meaño agradeceu a Deputación a súa colaboración para o desenvolvemento desta proba ciclista o traballo conxunto das dúas administracións para a promoción do deporte e a dispoñibilidade para facer a presentación da proba no Pazo Provincial. Igualmente, o presidente da Galega subliñou a importancia da colaboración da Deputación nunha proba adicada a rapaces e rapazas. Ernesto Falcón, pola súa banda, detallou os tramos máis difíciles que vai ter o percorrido da proba que "é moi esixente"  pero que gusta moito aos máis pequenos e pequenas. Pola súa banda, Víctor Caamaño destacou que para o Concello de Cambados está proba ciclista é importante pero que o mesmo tempo é un escaparate para toda a comarca do Salnés.
Durante a presentación, que tivo lugar no Pazo Provincial da Institución Provincial, a deputada de deportes, Chelo Besada, amosou o seu orgullo e compromiso coas actividades deportivas da provincia sinalando que "dende a Deputación traballamos a diario para poñer en marcha actividades que promovan o deporte nos distintos ámbitos da sociedade, converténdoo deste modo nun eixo prioritario para a Institución". Besada tamén resaltou a importancia que teñen este tipo de eventos para destacar o atractivo turístico da provincia.
O grupo de ciclistas iniciarán a ruta o sábado as 11 de mañá cunha primeira etapa de tres quilómetros entre Meaño e o alto do Busto. A segunda etapa, que terá lugar ese mesmo día pola tarde, será de 63 quilómetros nos que percorrerán os concellos de Meaño, O Grove, Sanxenxo e Poio. O domingo porase fin a esta actividade cunha última etapa de 92 quilómetros, que terá o seu inicio e a súa fin no concello de Cambados.


22 de maio de 2018

ALUMNOS DO MAGARIÑOS VENDERÁN MAÑÁN NO MERCADO OS SEUS PRODUTOS


Alumnos participantes na 1ª experiencia Depoemprende

O mercado ambulante de Cambados terá mañán uns postos moi especiais: un grupo de nenos de entre 5º curso do colexio Antonio Magariños que crearon a súas propias cooperativas acudirán a vender os seus produtos ao mercado dos mércores. Os alumnos montarán dous postos. Sobre eles, despregarán a súa variada mercadoría, na que abundaban os xogos e os artigos de artesanía. Todos os artigos foron confeccionados polo propio alumnado.
A metade dp que recauden coa venta dos seus produtos irá destinado a AECC (Asociación Esoañola Contra o Cancro) e ao Refugio de Animales de Cambados.
A experiencia forma parte do proxecto "Depoemprende", da Deputación, e o seu obxectivo é fomentar o espírito emprendedor entre os nenos e os adolescentes. O Magariños cambadés foi un dos centros seleccionados para participar na experiencia, e desde hai meses, as súas dúas clases de quinto de Primaria traballan na posta a piques da cooperativa.
Os alumnos tiveron que dar todos os pasos aos que estaría obrigada calquera outra entidade similar, como crear e aprobar uns estatutos, pedir un CIF en Facenda, solicitar a licenza municipal para exercer a venda e pagar as taxas por ocupación de espazo no mercado.

Este é o segundo ano que o Magariños participa no programa da Deputación "Depoemprende".



21 de maio de 2018

ABERTO O PRAZO DE INSCRICIÓN NA LUDOTECA DO CONCELLO



O Concello abreu o prazo de inscrición, dende o hoxe luns 21 de maio ata o venres 8 de xuño, para todas aquelas familias que desexen acollerse á ludoteca de verán que se vai poñer en marcha, como servizo de apoio á conciliación da vida familiar coa laboral. A ludoteca funcionará dende o 4 de xullo ata o 28 de agosto, en vésperas do novo curso 2018-19.
As familias interesadas neste servizo deberán cubrir os datos dunha solicitude e presentala no rexistro do Concello en horario de oficina ou na Sede Electrónica do Concello de Cambados no seguinte enlace. Como o ano anterior, ofértanse 120 prazas para nenos e nenas de 3 a 8 anos. Os prezos serán de 60 euros mensuais polas actividades, e 60 euros só para aqueles que utilicen o servizo de comedor.
Para facer o servizo máis eficiente, esixirase ós pais dos usuarios un certificado de empresa ou documento que acredite a necesidade de empregar a ludoteca de verán, aínda que tamén se atenderá as peticións nas que as circunstancias familiares así o esixan como ter persoas maiores a seu cargo, atencións médicas continuadas, ou circunstancias familiares doutra índole que amosen a necesidade deste servizo.
O Concello, en colaboración coa dirección da gardería municipal, facilitará os medios necesarios e deseñará un programa de actividades para os máis cativos.
De 8 a 14 horas, ou ata as 15 h con comedor
As aulas para este servizo habilitaranse en dous colexios públicos. Os rapaces desenvolven un amplo programa de actividades lúdicas, divididos en grupos por idades, nun horario de 8 a 14 horas pola mañá. Isto permite que os pais e nais poidan acudir aos seus respectivos traballos deixando os seus fillos perfectamente atendidos por monitoras cualificadas.
Esta iniciativa municipal xurdiu coa intención de responder a unha necesidade que afecta a numerosos pais e nais de familia. Os beneficiarios adoitan amosar a súa satisfacción por este servizo que lles permite conciliar a vida familiar coa laboral durante o verán, xa que non tiñan con quen deixar aos seus cativos.
O Concelleiro de Servizos Sociais, Tino Cordal, valora moi positivamente esta experiencia, en colaboración coa empresa adxudicataria da gardería, que é do agrado das familias, como o proban as numerosas inscricións de anos anteriores. O servizo de comedor facilita que os nenos poidan xantar no colexio completando o horario ata as 15 horas.