ENTREVISTA A FÁTIMA ABAL. OS ESPUMOSOS RÍAS BAIXAS EN XAPÓN E A FESTA DA VIEIRA

A alcaldesa Fátima Abal adiantou varias novas nunha entrevista nen COPE Pontevedra.
O viño albariño espumoso servirase nunha feira de Tokio grazas á promoción que fixo Cambados en FITUR, a Feira Internacional do Turismo celebrada a pasada semana en Madrid. Profesionais xaponeses solicitaron unhas botellas da Denominación de Orixe Rías Baixas para o seu evento. Posteriormente, confirmaron que visitarán Cambados na festa do Albariño de agosto, segundo anunciou en COPE + Pontevedra a alcaldesa Fátima Abal. Esta variedade de espumoso promocionarase tamén na Festa do Albariño que se celebra en Mallorca no mes de abril e nas novas xornadas que organizará Cambados os días 14, 15 e 16 de febreiro no Salón José Pena. Sobre esa localización, Abal recoñeceu que non corre risco por necesitar dunha autorización de Portos de Galicia, xa que o viño maridará con conservas e, desta forma, mantense un uso relacionado co sector do mar. Segundo o que a presidenta de Portos de Galicia transmitiulle á rexedora do Salnés, este ano resolverase a petición de Cambados para que o paseo dá Calzada deixe de ser terreo portuario e pase a ser municipal.
FESTA DA VIEIRA Despois de non poder celebrarse en 2019 por falta de produto, o Concello de Cambados e a confraría local recuperará a festa da Vieira durante a fin de semana do 17 ao 19 de xullo, posiblemente cambiando de localización ao parque Torrado e pasando a ser un evento máis popular.


A entrevista completa AQUÍ.

ÉXITO NO PRIMEIRO DÍA DA FESTA DA VIEIRA

A inauguración contou coa presenza da conselleira do Mar, Rosa Quintana. Tampouco faltou o goberno municipal en pleno, presidida pola alcaldesa Fátima Abal, representantes da confraría San Antonio de Cambados e Porto de Cambados, empresa comercializadora da vieira.
Só dirixíronse aos presentes o patrón maior, Ruperto Costa, e Rosa Quintana, o que xerou malestar no goberno local, ao entender que a alcaldesa debería poder dirixirse aos asistentes.

Cambados celebra este fin de semana as Xornadas de Exaltación da Vieira, este ano cun novo formato que está a cultivar un gran éxito de participación. Non en balde, todas as actividades programadas cobren a totalidade de prazas dispoñibles. Tras os showcookings do sábado, desenvolvidos por María Varela (A Parada das Bestas) pola mañá, e Manuel Garea e Fran Sotelino pola tarde, este domingo tócalle a quenda ao lalinense Diego López (La Molinera) que protagonizará unha demostración culinaria coa vieira e outros produtos de Porto de Cambados como protagonistas. Pola tarde continuarán as actividades cun taller infantil desenvolvido por Manuel Garea e Fran Sotelino. Nestas demostracións, que substitúen á degustación popular doutros anos, imprimen un carácter máis profesional e divulgativo á celebración, que exalta un dos produtos máis característicos de Cambados. “A vieira define a nosa frota e a nosa forma de vivir o mar”, sinalaba o patrón maior, Ruperto Costa. As demostracións culinarias complétanse con varios food trucks instalados no Paseo da Calzada, que esgotaron existencias, polo que tiveron que repoñer vieira, unha exposición fotográfica sobre o traballo das xentes do mar de Arousa e visitas guiadas aos bancos marisqueiros da man de Guimatur.

A FESTA DA VIEIRA DE CAMBADOS O SÁBADO E DOMINGO

Os días 14 e 15 de xullo, Cambados celebra as Xornadas de Exaltación da Vieira, un dos seus produtos máis significativos. Pero farao dun modo diferente a outros anos, motivado por unha dispoñibilidade menor de produto (de outubro a xaneiro non se capturou) e tamén á intención de darlle novos aires á celebración, máis centrados na divulgación e a posta en valor do produto que na venda en si. “É unha aposta arriscada, pero cremos que vai ser un éxito”, apunta Mar Ambroa, xerente de Porto de Cambados -impulsora das xornadas-. Desta forma, non haberá venda de produto en carpa senón unha aula gastronómica onde se celebrarán tres sesións de showcookings a cargo de reputados cociñeiros, que prepararán diferentes elaboracións a partir de vieira pero tamén outros produtos cos que traballa Porto de Cambados, como son as huevas de ourizo, o polbo ou o choco, todos certificados por Peixarías.

Así, o sábado pola mañá cociñará María Varela, da Parada dás Bestas; o sábado pola tarde, Manuel Garea e Fran Sotelino; e o domingo, en dobre sesión (público adulto e público infantil), Diego López ‘ Moli’. A asistencia a cada sesión, cun total de 100 prazas dispoñibles, é gratuíta previa inscrición en info@portodecambados.com ou o teléfono 679196972. Como queira que a edición deste ano ten un carácter máis solidario que nunca, establécese unha entrada simbólica de 3 euros por persoa, que serán doados ao 50% ás asociacións Esperanza Salnés e AME. Esta última celebra, coincidindo coas xornadas, un mercado solidario no Pazo de Torrado para recadar fondos para a investigación médica. Pódese visitar ata o día 29, en horario de mañá e tarde.

A programación das Xornadas complétase con diversas actuacións musicais, unha exposición fotográfica cedida polo GALP sobre os oficios do ‘Mar de Arousa’, visitas guiadas polas mariscadoras de Guimatur e a instalación de tres food trucks, no mesmo Paseo dá Calzada, doutros tantos establecementos locais que quixeron sumarse á celebración, apostando polo produto local, como son Pandemonium, A Fonte do Viño e Casa de Miguel.

CAMBIOS NA PRÓXIMA FESTA DA VIEIRA DE CAMBADOS PARA ASEGURARSE A PRESENZA DO MOLUSCO

A escaseza de vieiras supón todo un reto para as empresas organizadoras da Festa da Vieira de Cambados, que se ven obrigadas a buscar outro enfoque para que poida celebrarse.


En Cambados celébrase cada ano a mediados de xullo a Festa da Vieira. Este ano, os organizadores do evento móstranse preocupados debido á pouca cantidade de molusco existente.
A empresa abastecedora está traballando en alternativas para facer posible que a festa se siga celebrando.

Na campaña que houbo este ano entre os meses de xaneiro e marzo, só puideron extraerse 62 toneladas de vieiras, unha das cifras máis baixas no que vai de século. Ante esta situación, as empresas que traballan comercializándoas teñen que facer fronte ao problema de compaxinar a demanda dos clientes habituais, coa que teñen cada mes de xullo para a festa.

As empresas organizadoras insisten en que a festa, declarada de Interese Turístico Autonómico, si terá lugar, e están traballando en alternativas que suplan a falta de produto.

A XUNTA DÁ 3.000 € PARA A FESTA DA VIEIRA

O Diario Oficial de Galicia (DOG) fixo hoxe pública a lista de concellos beneficiados a través de dúas liñas de axudas da Axencia de Turismo de Galicia que suporán, na comarca do Salnés, un total de 32.156 euros para 4 festas e 4 municipios turísticos .

Na nosa comarca, beneficianse catro festas de Interese Turístico Galego: as XVII Xornadas de Exaltación da Vieira de Cambados; a Festa do Mexillón e do Berberecho de Vilanova de Arousa; a Semana Santa e Pascua de Paralela en Meis e a Festa da Ameixa de Carril en Vilagarcía de Arousa. Así, cada unha delas recibirá 3.000 euros de subvención.

En total, na provincia de Pontevedra beneficiaranse destas axudas un total de 26 festas de Interese Turístico de Galicia, cunha axuda global de 81.000 euros.

Destacou a liña de axudas para concellos declarados municipios turísticos e a xeodestinos de Galicia para a contratación de persoal nas oficinas de turismo nos meses de xuño, xullo, agosto e setembro, beneficiándose neste senso os concellos de Cambados, Vilagarcía de Arousa, Sanxenxo e o Grove na comarca do Salnés, cunha axuda global de 20.156 euros. A nivel provincial, beneficiaranse desta axuda un total de 11 concellos que recibirán case 55.000 euros en total.

Os concellos declarados Municipios Turísticos son aqueles nos que, pola unha afluencia periódica ou estacional, a poboación anual de poboación turística é superior ao 25% do número de veciños. Tamén aqueles que contan cun número de aloxamentos turísticos e de segundas residencias superior ao 50% do número de vivendas de residencia primaria. Ademais, tamén deben contar dentro do seu territorio con algún servizo turístico susceptible de producir unha atracción turística de visitantes cinco veces superior a súa poboación e contar con servizos municipais como saneamento, recollida de residuos, protección civil e ordenación urbanística, entre outros.

A PLANTA DE EVISCERACIÓN DA VIEIRA DA CONFRARÍA, LISTA

A Consellería do Mar inviste preto de 1,3 millóns de euros na nave de descarga e eviscerado de moluscos de Cambados

Rosa Quintana visitou esta mañá estas instalacións e destacou que grazas esta inversión da Xunta, é a primeira vez que a confraría de Cambados se encarga de depurar e eviscerar o seu marisco.

Explicou que constitúe un exemplo de eficiencia na comercialización da vieira, xerando maior valor engadido e incrementando os beneficios directos para a propia confraría.                                                                                                                                                                           
A Consellería do Mar investiu preto de 1,3 millóns de euros na nave de descarga e eviscerado de moluscos da confraría de Cambados. Así o trasladou a conselleira do Mar, Rosa Quintana, durante unha visita ás instalacións cambadesas, onde estivo acompañada pola directora xeral de Desenvolvemento Pesqueiro, Susana Rodríguez.

Alí, a conselleira lembrou que o seu departamento colaborou coa propia obra a través dunha inversión directa e a través de investimentos subvencionados para a mellora dos equipamentos portuarios. A conselleira recordou ademais que a confraría recibiu unha axuda por importe de 172.000 euros a través do Grupo de Acción Local do Sector Pesqueiro da Ría de Arousa, para a posta en marcha do proxecto de depuración e evisceración de vieira. A maiores, sinalou que grazas a esta inversión da Xunta, é a primeira vez que a confraría de Cambados se encarga de depurar e eviscerar o seu marisco.

Nesta liña, Rosa Quintana destacou que precisamente esta instalación é un exemplo de creación e consolidación de emprego na zona en épocas de campaña. Ademais, dixo, constitúe un modelo de eficiencia na comercialización de vieira, xerando un maior valor engadido e incrementando os beneficios directos para a propia confraría. Con isto, explicou a conselleira, mellórase a seguridade alimentaria e o control de todos o procesos, garantindo ao tempo a calidade do produto en todas as fases.

A obra
As obras executadas consistiron na construción dunha nave de 1.460 metros cadrados que contan cunha zona de poxa, cunha sala de comisos e mostraxes, cámaras frigoríficas, almacéns, vestiarios despachos e un depósito de lixo. Nela atópase a planta de eviscerado de vieira que conta cunha zona para recepción e depuración do produto, outra para o procesado e eviscerado e outra para cámaras, envasado e expedición.   

COMEZOU HOXE A FESTA DA VIEIRA

Co mellor produto e baixo a organización de Porto de Cambados, Cambados acolle, ata o domingo, as XVI Xornadas de Exaltación da Vieira, unha festa declarada de Interese Turístico Galego e que nesta edición terá a tres das mellores cociñeiras da Comunidade como principais protagonistas. Na carpa especialmente habilitada para as degustacións, xantares e ceas (con capacidade para 200 persoas), Beatriz Sotelo asumirá a responsabilidade dos fogóns; en tanto que Inés Abril (Maruja Limón) e Leonor García (Retiro da Costiña), serán as protagonistas de senllos showcookings que se celebrarán durante estas xornadas.

Pero ademais dalgunhas elaboracións especiais preparadas a base de vieiras na carpa situada a tal fin, o menú que se poderá degustar durante eses días contará con outra variada oferta de produtos pesqueiros que tamén comercializa Porto de Cambados, como o polbo. En todos os casos, trátase de especies que contan coa certificación de PescadeRías. Ademais, como vén sendo habitual, a agrupación de mariscadoras Guimatur ofrecerá visitas guiadas polas diferentes zonas de marisqueo a pé nas que traballa.

REMATA UNHA EXCELENTE CAMPAÑA DA VIEIRA

A campaña da vieira en Cambados remata cos mellores resultados desde o 2010. Colléronse cerca de 90.000 quilos, un 23% máis ca o ano pasado, e a facturación da confraría por este molusco chegou aos 400.000 euros.

Último día para facer arrastradas na ría de Arousa. Remataba a mellor campaña da vieira dos últimos sete anos. En volume de vendas mellor. Este ano houbo case 90 toneladas e para o sector primario é importante. É un produto cada vez máis demandado e o sector puido cobrar algo máis, segundo a Xerente de Porto de Cambados. 

Desde o 2010 a facturación nunca superara os 300.000 euros. Este ano, os mariñeiros cobraron 4,75 euros por quilo durante todo o ano e no Nadal chegaron aos 5 euros. Esta campaña non houbo toxina e o sector puido traballar con continuidade. Unha frota importante que move moita xente e é  un recurso con mercado e é bo que saia. 

Nas últimas semanas, a empresa participada pola confraría que eviscera e comercializa o produto aprovisionouse para conxelala e poder abastecer o mercado na Semana Santa e no verán. A vieira comeza a desovar coa chegada da primavera.

INAUGURADA A XV FESTA DA VIEIRA

Esta mañán foi inaugurada a XV Festa de exaltación da Vieira por o patrón maior da confraría de Cambados, Ruperto Costa, a alcaldesa Fátima Abal e o secretario xeral da Consellería do Mar, Juan Maneiro, 

A Festa da Exaltación da Vieira que se celebra en Cambados chega a súa XV edición.
As vieiras presentaranse de diferentes xeitos que destacan o sabor do mar coa mestura de texturas.
Este ano os pratos serán elaborados polo cociñeiro Diego López. Haberá dous talleres de cociña a cargo de Pepe Solla e Kike Piñeiro.
Esta cita gastronómica que se celebra no parque da Calzada de Cambados está considerada como Festa de Interese Turístico.

PRESENTADA A FESTA DA VIEIRA

Fátima Abal, a concelleira do Mar, María José Cacabelos, e o concelleiro e portavoz Xurxo Charlín oficiaron o acto promocional das XV Xornadas de Exaltación da Vieira de Cambados, que se celebrarán do 15 ao 17 de xullo, un encontro gastronómico-turístico dos máis relevantes de Galicia. Entre as novidades desta edición, o Concello adquiriu preto de 500 vieiras a Porto de Cambados que fornecerá a máis dunha trintena de establecementos da hostalería local, quen as ofertará gratuitamente (durante esta semana e previamente ás Xornadas de Exaltación) a través de diferentes elaboracións culinarias, ben en forma de prato ou tapa.

Á súa vez, Mar Ambroa, xerente de Porto de Cambados, anticipou que nesta edición será o coñecido cociñeiro lalinense Diego López o encargado de elaborar os pratos que se servirán na ampla carpa habilitada para estas xornadas, menú que estará conformado por vieiras e chile cítrico, Vieira con bechamel e pan de millo e un falso Risotto de polbo con vieira, produtos todos (vieira e polbo) con orixe de Porto de Cambados. Á súa vez, o venres 15, o cociñeiro Kike Piñeiro realizará un showcooking con produtos exclusivamente da lonxa de Cambados, en tanto que o sábado 16, Pepe Solla impartirá un taller de cociña a partir da vieira cambadesa con algún outro produto desta ría. Ademais, os visitantes poderán participar unha ruta do marisqueo local da man de Guimatur.

XV XORNADAS DE EXALTACIÓN DA VIEIRA

Festa gastronómica de exaltación da Vieira, que se celebrará no parque da Calzada na vila pontevedresa de Cambados, co obxectivo de potenciar este exquisito molusco das Rías Galegas. 

A XV Festa dá Vieira dará comezo na xornada do venres 15 de Xullo coa apertura da carpa de degustación na cal todos os presentes poderán degustar a prezos populares este exquisito molusco elaborado de moi varias formas, desde as máis innovadoras ás máis tradicionais. 

Este ano, os pratos serán elaborados polo chef Diego López, do restaurante A Molinera (Lalín). A programación contará con dúas showcooking, un a cargo de Kike Piñeiro, do restaurante A Horta do Obradoiro (Santiago de Compostela), e outro con Pepe Solla, do restaurante Casa Solla (Poio). 

PREPARATIVOS DA XV FESTA DA VIEIRA

En Porto de Cambados están estes días a cen para organizar a Festa da Vieira, que se celebra entre o 15 e o 17 de xullo coincidindo coa festa do Carmen. Mar Ambroa é a organizadora de todo isto, unha festa que naceu hai quince anos da man da Confraría de Cambados. Haberá unha carpa onde se poderá degustar a vieira en diferentes presentacións da man de tres grandes cociñeiros galegos: Pepe Solla o sábado ao mediodía, Kike Piñeiro o venres pola tarde e os tres días Diego López da Molinera de Lalín. Como novidade, este ano un prato levará polbo de Porto de Cambados, que o eviscera e conxélao.

UN OPERATIVO CONTRA A VENDA DE VIEIRA ILEGAL SÁLDASE CON 13 DETIDOS

A Garda Civil desmantelou unha trama dedicada á venda ilegal de vieira procedente da ría de Ferrol, unha zona onde está prohibida a extracción deste marisco. En total, o operativo rematou con 13 persoas detidas e unha máis investigada, todas da comarca de Ferrol agás 3 de Pontevedra. A vieira coa que comercializaban estaba destinada a ser servida en establecementos hostaleiros da provincia de Pontevedra.

Actuaban na zona coñecida como Entrecastelos da ría de Ferrol. Alí descargaban as vieiras que apañaban na zona. Unha área, precisamente, onde está prohibida a extracción e comercialización deste molusco.

Os responsables da investigación aseguran que logo de varios meses de indagacións puideron iniciar un operativo en que comisaron 1.300 quilos de vieira, ao que hai que sumar a incautación varios vehículos, unha embarcación e material de mergullo.

Esa operación permitiu deter 13 persoas. Todas elas, unha máis como investigada, xa foron postas a disposición xudicial, acusadas de formar parte dunha banda organizada que atenta contra a saúde pública e de furtivismo.

Os responsables da investigación non a dan por pechada, xa que o que agora pretenden é identificar e imputar todos os responsables de locais de hostalería aos que finalmente ía dirixido este produto, en localidades como Lalín, O Grove, Vilagarcía, Meis, Meaño ou o propio Ferrol.

A XUNTA REPARTIRÁ 100.000€ ENTRE 25 FESTAS DE PONTEVEDRA

Turismo de Galicia acaba de aprobar unha liña de axudas que conta cun importe total de 300.000 euros dos cales, 100.000, destinaranse a diversos eventos da provincia de Pontevedra, e á que poden optar tódolos municipios que organicen algunha deas  25 festas de Interese Turístico Galego nesta provincia durante o presente ano, aínda que non poderán ser obxecto de subvención as celebracións, que ademais da declaración de interese turístico autonómico, conten coa declaración de festa de interese nacional ou internacional.

En concreto, poderanse beneficiar destas axudas os concellos de Arbo, Mos, Redondela, Soutomaior, A Cañiza, Silleda, A Guarda, Tui, Moraña, As Neves, O Rosal, Cangas, Moaña, Ponte Caldelas, Vilaboa, Cuntis, Cambados, Vila de Cruces, Valga, A Estrada, Vigo, Salvaterra de Miño, Bueu, Vilagarcía e Vilanova de Arousa.

Trátase de festas de Interese Turístico Galego, que se desenvolven ao longo de todo o ano, que se centran tanto na gastronomía local como nos produtos típicos de cada lugar e nas tradicións ancestrais e que contan cunha afluencia global de máis de 500.000 asistentes.

Aínda que a maioría se celebran no verán (a festa do Xamón de A Cañiza, a da Empanada de Bandeira, a de a Langosta en A Guarda, a do Carneiro ao Espeto de Moraña, a do viño do Rosal e a do Viño do Tea en Salvaterra, a promoción das danzas ancestrais de Darbo, Hio e San Cibrán en Cangas, a exaltación da Vieira en Cambados, a da Anguía de Valga, as de Bouzas en Vigo, e as da Ameixa en Vilagarcía e o Mexilón e o Berberecho en Vilanova), tamén as hai de inverno (como as do Requeixo e a Mel de As Neves, o entroido de Cobres en Vilaboa ou o Lacón con Grelos de Cuntis), de primavera (a Lamprea de Arbo, o Choco de Redondela, a Ostra de Soutomaior, San Telmo en Tui, a Troita de Ponte Caldelas, o Galo de Curral de Vila de Cruces, o Salmón de A Estrada ou o Millo Corvo de Bueu) e incluso de outono como a do San Martiño de Moaña.

REANÚDASE A CAMPAÑA DA VIEIRA

Trece embarcacións volveron á campaña da vieira en Cambados tras a paréntese do Nadal. O prezo medio o mes pasado foi de 4,75 euros. A que se colla agora vai para conxelar e pagarase a 4,20 euros.

A frota da vieira de Cambados gardou os rastros a principios de xaneiro coincidindo cos primeiros temporais do ano. Agora volven traballar co obxectivo de aumentar as capturas e poder abastecer o mercado.

"Este ano empezamos a campaña o 16 de novembro porque había moita necesidade. Reclamábaa a hostalería e os clientes de toda a vida pedíannos que comezásemos un pouco antes. O ano pasado durou dous meses e medio e colléronse 62 toneladas. Este ano van 55 en mes e medio", di Ruperto Costa, patrón maior de Cambados.

13 embarcacións volveron hoxe ao traballo. A campaña durará dependendo da cantidade de viveira que haxa e da rendibilidade dos barcos. Porto de Cambados, a empresa que comercializa o recurso e que está participada pola confraría, pagoulles aos mariñeiros un 20% máis por quilo ca o ano pasado.

"O prezo medio na campaña do Nadal foi o 4,75 euros. A que se colla agora vai para conxelar e pagarase a 4,20 euros", recorda Ruperto Costa.

En Cambados teñen esperanzas de aumentar as capturas nesta segunda parte da campaña e que a toxina lles deixe seguir traballando.

COMEZOU A CAMPAÑA DA VIEIRA

Comezou a campaña da vieira na ría da Arousa. No primeiro día, os 20 barcos que están enrolados non tiveron problemas para capturar o tope de 70 quilos por tripulante. Os mariñeiros agardan que continúe deste xeito e que a toxina non afecte demasiado.

O primeiro día, si. A ver mañá e pasado. O primeiro día é de proba. Pasados os dias verase como avanza a campaña.
A proba está na ría, onde traballan uns 20 barcos. Largan o aparello a 16 metros de profundidade. O rastro da vieira semella un arado. As arrastradas son boas de cantidade... e de calidade. O optimismo inicial evolucionará en función da presenza de toxina na ría. Os barcos non teñen problemas para coller o tope, que é de 3.000 quilos para todos os barcos.

O total para un barco de tres homes como este é de 210 quilos. O tope varía cada día. Se hai máis barcos, menos tope,
No sector hai un debate sobre a coincidencia da campaña da vieira e da centola.

A vieira véndeselle a unha empresa da confraría de Cambados, que é a encargada de preparar o produto para a súa comercialización. O prezo é pechado: 4 euros e 75 céntimos o quilo.

INAUGURADA A FESTA DA VIEIRA

Un ano máis, e van xa 14 edicións, Cambados acolle as xornadas de exaltación da vieira. Como ven sendo habitual, estas xornadas desenrolaránse na carpa habilitada no Paseo da Calzada.

A inauguración foi levada a cabo este mediodía, e a ela acudiron o Secretario Xeral do Mar Juan Carlos Maneiro, varios concelleiros encabezados pola alcaldesa Fátima Abal, e representantes da Confraría encabezados polo Patrón Maior Ruperto Costa.

Dende hoxe e ata o vindeiro domingo 19, aqueles que o desexen poderán degustar as distintas elaboracións que se realizarán deste molusco, ademáis de disfrutar das diversas actividades programadas.

A xornada inaugural contará coa actuación musical dos grupos “The Sharknadoos” e “Mandarina Jack” ás 23:00. Ademáis, durante o sábado e o domingo os asistentes poderán coñecer o traballo das mariscadoras a través das rutas turísticas de Guimatur. E o sábado o chef cambadés Yayo Daporta impartirá un taller de cociña.

Non entendemos como na inauguración están presentes operarios municipais que deberían estar "traballando". O novo goberno municipal debería entender que os cambadeses non temos que pagar a operarios municipais por moi alto rango que teñan para que vaian de picoteo a nosa conta. Si o criticamos co anterior goberno temos que facelo co actual.

FESTA DA VIEIRA EN CAMBADOS

CAMBADOS CELEBRA ESTA FIN DE SEMANA A XIV EDICIÓN DA FESTA DA VIEIRA CUN XEITO RENOVADO NA ELABORACIÓN DO BIVALVO.

A Festa da Vieira de Cambados inaugurase o venres 17 de xullo ás 13 horas no Paseo da Calzada.

A pesar da pésima campaña que tivo o sector o pasado inverno, finalmente os organizadores, a Confraría e Porto de Cambados, empresa que comercializa a vieira arousá, apostaron pola continuidade do evento debido o incremento das vendas durante os primeiros meses do ano.
Un dato que ofrecía hoxe na rolda de prensa de presentación do evento a Concelleira do Mar, Mª José Cacabelos, representante tamén da Confraría de Cambados.

Como ven sendo tradicional a degustación do bivalvo será na carpa gastronómica ubicada no Paseo da Calzada. Desta volta da renovada forma de preparar o molusco  encargarase o chef Rafael Centeno do Restaurante Maruja  Limón de Vigo.

A responsable de Porto de Cambados, Mar Ambroa, presentou as  recetas que se poderán degustar  durante os tres días no Paseo da Calzada:  “vieira marinada e cereais”, “vieira con velouté de erizos e millo”, “vieira con cremosos de noz moscada e cítricos” e a tradicional empanada de vieira.

O prezo da ración na carpa de degustación será de 8 euros en todas as variedades.
A previsión dos organizadores é elaborar 1.500 tapas diarias.

Ademáis, para aprender a preparar o popular molusco e outros productos que se poden atopar na lonxa, como lura, xurel e sardiña, o chef cambadés Yayo Daporta impartirá un taller de cociña o sábado 18 de xullo ás 19 horas na carpa de degustación.
A iniciativa desenvolverase baixo o título “Pesca de Rías.. de onde se non?” coa finalidade de promover e potenciar o consumo de productos das nosas rías.

Como outra novidade desta edición, a xornada inaugural tamén contará con actuación musical a cargo dos grupos The Sharknadoos e Mandarina Jack ás 23 horas.

Todo elo completarase coas Rutas Turísticas de Guimatur, de balde para as persoas que se inscriban, e que  se prolongarán durante o sábado e o domingo para poder observar o traballo das mariscadoras nos bancos de Cambados.
As Rutas desenvolveranse o sábado 18 ás 11:30 horas e o domingo 19 ás 12:00 horas.

A presentación desta XIV edición da Festa da Vieira de Cambados celebrouse esta mañá no Concello coa presencia da alcaldesa, Fátima Abal,  a Concelleira do Mar e representante da Confraría, Mª José Cacabelos, o Concelleiro Xurxo Charlín, a responsable de Porto de Cambados, Mar Ambroa, e o chef cambadés Yayo Daporta.

Por parte do Concello, o edil Xurxo Charlín destacou a importancia de axudar na organización da Festa da Viera porque “supón colaborar cun dos sectores productivos máis importantes do municipio como é o do mar”.

 

A VIEIRA ESCASEA EN PLENA CAMPAÑA DE NADAL

A vieira é un dos produtos máis demandados nas mesas durante o Nadal. Un produto que entrou a formar parte das especies que escasean na ría de Arousa.

Se as previsións pasaban por traballar ata 4.000 quilos ao día, o luns capturaron 1.700. Esperan que coa apertura de novos bancos haxa máis vieira.
As vieiras, un produto tan apreciado durante estas datas, forma parte das especies que escasean na ría de Arousa. Este produto non sae dos fondos na cantidade prevista polo porto de Cambados. Se as previsións eran de capturar ata 4.000 quilos, nas últimas horas os barcos trouxeron 1.700, gran parte do problema está en que só está aberta unha zona para a extracción.
A demanda de vieira é enorme e grazas ao aprovisionamento que fixeron nos primeiros días de extracción, poden satisfacer a demanda dos clientes de todo o ano.
En Cambados agardan que para os días fortes do Nadal poidan extraer vieiras en novas zonas.

NOVAS ESPERANZADORAS PARA ADIANTAR A CAMPAÑA DA VIEIRA.

Este ano a campaña da vieira podería adiantarse máis dun mes. Na confraría de Cambados recoñecen que aumentaron as vendas deste producto. O stock actual non lles permitiría facer fronte a demanda cara o Nadal. Malia que as primeiras mostras demostran a presenza de toxina amnésica, confían en que a situación mellore en pouco tempo.

A demanda de vieira galega medrou tanto que este ano a confraría de Cambados quere adiantar a campaña máis dun mes. As primeiras análises detectaron a presenza de toxina amnésica, pero en niveis baixos, polo que o sector é optimista.
Ao ser un producto que se comercializa en boa medida conxelado, permítelles ser previsores.

O ano pasado só en decembro vendéronse 200.000 unidades. Agora, non teñen nin a metade almacenado. Hai novas esperanzadoras de poder comezar tamén antes as capturas.

"Os niveis de toxina son bastante esperanzadores para que dentro de pouco tempo poidase extraer a vieira. En previsión do que poida pasar coa toxina na campaña de Nadal, queren ter algo almacenado para responder á demanda", apunta o patrón maior da Confraría de Cambados.

Son uns 40 barcos os que traballan na captura de vieira para este porto de Cambados , que na pasada campaña deu traballo a 178 mariñeiros e outras 40 persoas para o eviscerado e envasado.