A ALCALDESA, FÁTIMA ABAL PARTICIPA NO RECOÑECEMENTO QUE A FUNDACIÓN MANOLO PAZ LLE BRINDA A ÁLVARO SIZA

A alcaldesa de Cambados acudiu hoxe á sede da Fundación Manolo Paz para participar no recoñecemento que a institución cultural cambadesa lle brinda ao eminente arquitecto portugués Álvaro Siza. Xunto a alcaldesa tamén o conselleiro de Cultura Román Rodríguez asistiron á conferencia que Siza impartiu co gallo da apertura das IV Xornadas da Fundación Manolo Paz, orientadas ao achegamento artístico entre Galicia e Portugal, e á entrega do galardón conmemorativo.

A Fundación recoñece deste xeito o conxunto da traxectoria de Siza e, en especial, as relevantes contribucións realizadas en Galicia e, dun xeito particular, en Santiago de Compostela, onde mostra a acertada conxugación de arquitectura e paisaxe, tanto na contorna do CGAC e o Parque de Bonaval, como no Campus Norte coa Facultade de Ciencias da Comunicación.

Este arquitecto, nado en Matosinhos no 1933, recibiu algúns dos premios internacionais máis importantes da súa profesión, como o Premio Pritzker, Premio Mies van der Rohe, a Medalla de Ouro do RIBA, a Medalla Alvar Aalto, a UIA Gold Medal ou Wolf Prize in Architecture. No eido autonómico, Siza recibiu no 2002 o Premio Internacional Grupo Compostela-Xunta de Galicia, que busca recoñecer a persoas significadas polo seu traballo en prol da unidade europea e da preservación do patrimonio cultural do Camiño de Santiago e dos seus valores.

IV XORNADAS DA FUNDACIÓN MANOLO PAZ EN CAMBADOS

O sábado 29 de xuño celebraranse as IV Xornadas da Fundación Manolo Paz en Cambados.

. Os actos, que se desenvolverán durante ese mesmo sábado terán lugar no espazo da Fundación Manolo Paz no lugar de Castrelo, Cambados, nun ano que estará especialmente dedicado á creación do norte de Portugal.

. Nesta edición homenaxearase co IV Premio Fundación Manolo Paz a Álvaro Siza, coñecido arquitecto que conseguiu como poucos relacionar a natureza na súa arquitectura. Entre outros recoñecementos, Álvaro Siza foi galardoado co Premio Alvar Aalto, co Premio de Arquitectura Contemporánea Mies van der Rohe e co Premio Pritzker, sempre con obras capaces de vincularse ao espazo que as contén.

. Os actos completaranse cunha mesa redonda sobre deseño en Galicia e o norte de Portugal, e a presentación da primeira edición da Porto Design Biennale, que será inaugurada no próximo mes de setembro en Oporto e Matosinhos.

O sábado 29 de xuño terá lugar a presentación das IV Xornadas da Fundación Manolo Paz en Cambados. Os actos, que se desenvolverán durante ese mesmo sábado no espazo da Fundación Manolo Paz en Castrelo, consistirán nunha serie de presentacións e conversas en torno á figura de Álvaro Siza, coñecido arquitecto que conseguiu como poucos relacionar a natureza na súa arquitectura.

O premio da Fundación Manolo Paz, é un galardón que recoñece o labor de profesionais destacados pola súa contribución á conservación e mellora da paisaxe e a difusión da arte. No caso de Álvaro Siza a razón deste recoñecemento estriba na súa traxectoria profesional e, en particular, o importante traballo que desempeñou en Galicia, xa sexa na arquitectura como no parque de Bonaval en Santiago de Compostela, un lugar que se converteu en modelo de respecto no tratamento da paisaxe urbana. Entre outros recoñecementos, Álvaro Siza foi galardoado co Premio Alvar Aalto, co Premio de Arquitectura Contemporánea Mies van der Rohe e co Premio Pritzker, sempre con obras capaces de vincularse ao espazo que as contén.

Estes actos en torno á figura de Álvaro Siza completaranse cunha mesa redonda sobre deseño en Galicia e o norte de Portugal, así como coa presentación da primeira edición da Porto Design Biennale, que será inaugurada no próximo mes de setembro en Oporto e Matosinhos.

Para inscribirse ás xornadas ou recibir máis información:

Inscricións en xornadas@fundacionmanolopaz.gal
www.fundacionmanolopaz.gal
(Lugar de Quintáns. Parroquia de Castrelo. Cambados)

O CGAC PROPÓN UNHA LECTURA DA ARTE GALEGA CONTEMPORÁNEA A PARTIR DE OBRAS DA SÚA COLECCIÓN

O Centro Galego de Arte Contemporánea propón no seu novo proxecto expositivo un achegamento á arte galega das últimas décadas ata hoxe a través de obras da súa colección, dunha trintena de artista, entre os que se inclúen nomes de referencia como os de Antón Lamazares, Menchu Lamas, Xosé Lodeiro, Mónica Alonso, Luis Caruncho, Pamen Pereira, Manuel Mampaso, Manolo Paz, Francisco Leiro, Reimundo Patiño, Manolo Moldes, Montse Rego, Silverio Rivas, Ánxel Huete e Din Matamoro, entre outros.

Baixo o título Modelo x armar. Arte en Galicia na Colección do CGAC, a mostra foi presentada esta mañá en rolda de prensa polo seu comisario, e director do centro, Santiago Olmo, e polo secretario xeral de Cultura, Anxo Lorenzo, quen salientou que “algunhas das obras que forman parte da exposición nunca foron exhibidas ata o momento”. É o caso da peza Tampouco o mar dorme, de Pamen Pereira, creada en 2015 e adquirida polo CGAC este mesmo ano; e tamén da obra Cariátide, corpo en cambio, da artista Marta Lorenzo, mercada polo centro en 2015. Doutras pezas da mostra o secretario xeral recordou que é a primeira vez que se exhiben no CGAC, como o colaxe Espantallo, de Manuel Facal.

O papel da arte na construción de Galicia

Puxo tamén en valor Anxo Lorenzo o papel levado a cabo polo colección do CGAC nas últimas décadas, desde o momento da súa posta en marcha, en 1995, e o papel que segue a desempeñar actualmente no contexto artístico galego; un papel que considerou “imprescindible, non só polo que supón desde o punto de vista do patrimonio artístico galego, senón tamén como construción dunha historia común de Galicia”, afirmou.

Parafraseando o título da novela de Julio Cortázar 62/Modelo para armar, a exposición estrutúrase en tres seccións de carácter cronolóxico. A primeira abrangue os anos cincuenta e sesenta, nos que se constrúe unha idea de abstracción; a segunda inclúe as décadas dos setenta e os oitenta, nas que se contrapón unha arte de carácter normativo e xeométrico a unha visión máis xestual e figurativa. Por último a terceira sección, que chega ata a actualidade, arranca nos anos noventa, coincidindo coa creación da Facultade de Belas Artes de Pontevedra e coa apertura do CGAC en 1993.

Este período máis actual caracterízase por unha relevante presenza de artistas mulleres, polas conexións internacionais, que tamén potencia o CGAC desde os seus programas expositivos e desde a súa colección, así como por unha apertura á fotografía, ao vídeo ou a instalación, e mais a temas conectados con cuestións de xénero ou sociopolíticas, tratados desde unha multiplicidade de perspectivas.

A exposición, na que se inclúen algunhas obras da colección internacional do CGAC co obxectivo de contextualizar historicamente o traballo dos artistas galegos e poder establecer un diálogo con outras liñas estéticas do momento, poderá verse ata o 25 de febreiro, na entrada e na planta soto do CGAC.

Programación de actividades

Ao abeiro desta nova exposición desenvolveranse diversas iniciativas. Esta tarde, ás 19:30 horas, previamente á inauguración da exposición, presentarase o Proxecto de catalogación da colección CGAC, a cargo do seu director, Pedro de Llano Neira; da investigadora Ánxela Caramés e do director do CGAC.

Tamén acompaña a exposición o seminario Novas narrativas na historia da arte contemporánea, organizado pola Universidade de Santiago de Compostela e que se celebra no CGAC o 24 e o 25 de novembro. Nel abordarase unha reflexión ambiciosa ao redor dos obxectos e dos métodos de estudo da historia da arte. Coincidindo coa presenza no seminario da recoñecida teórica e ensaísta Mieke Bal, o día 25 de novembro o CGAC abrirá ao público, no seu Espazo de proxectos, a instalación multipantalla Madame B., traballo no que a pensadora belga colabora coa realizadora inglesa Williams Gamaker.

Ademais, o venres 10 de novembro, e dentro do ciclo Xornadas de música contemporánea 2017, ás 20:30 horas, no auditorio do CGAC, O Taller Atlántico Contemporáneo (TAC) presenta “Inger mi calices”, escrita por encargo para esta ocasión polo recoñecido compositor Fernando Buide, e que conta ademais coa colaboración, para a interpretación desta obra, da nova videocreadora galega Laura Iturralde.

Visitas guiadas na fin de semana

Todos os sábados ás 12:00 horas, o público poderá achegarse ao CGAC para gozar das exposicións acompañado por mediadoras especializadas en arte. Este servizo ten como fin estimular o interese pola creación artística contemporánea e facilitar a comunicación entre o espectador e as obras de arte. As visitas son gratuítas e non se require inscrición previa.

A colección do CGAC

A colección permanente do CGAC creouse en 1995 e, desde entón, non deixou de se enriquecer con incorporacións de obras procedentes do contexto galego e internacional, con especial atención aos artistas españois, portugueses e latinoamericanos. Os seus fondos contan na actualidade con máis de 1.200 pezas adquiridas ou doadas por coleccionistas particulares, institucións e artistas.

A colección está constituída fundamentalmente por obra de artistas que viron consolidada a súa traxectoria a partir da segunda metade do século XX e algunhas das súas obras emblemáticas foron concibidas especificamente para os espazos do CGAC.

II XORNADAS DA FUNDACIÓN MANOLO PAZ

As II Xornadas da Fundación Manolo Paz, que se desenvolverán o próximo fin de semán, 8 e 9 de setembro, nas instalacións que o escultor posúe en Cambados, contarán coa presenza de varios artistas internacionais que chegan a Cambados para participar na exposición "Paisaxes sen título" .

Serán os brasileiros Albano Afonso e Marco Giannotti, a escocesa Emma Crichton e o portugués Baltazar Torres, quen xunto con Irene Grau e Juan López conectarán o seu traballo co universo do Manolo Paz a través das súas obras e de conferencias sobre a arte e a paisaxe, achegando unha mirada distinta sobre esta combinación de elementos coa finalidade de reflexionar sobre a súa importancia.

UNIVERSITARIOS DE CALIFORNIA ESTUDAN O ENOTURISMO DE CAMBADOS

Profesores e estudantes da Universidade Fresno en California (Estados Unidos) seleccionaron Galicia e Castela e León como exemplo de enoturismo e turismo rural en España. Nesta viaxe, os estudantes americanos coñecerán in situ os recursos e características específicas dos produtos e da oferta asociada a este segmento turístico.

O grupo xestionado e coordinado pola empresa e-Spain e a súa xerente, Angel Moretón realizaron un percorrido de 4 días pola zona sur de Galicia estudando a oferta enoturística e os recursos agroalimentarios ligados ao turismo.

Os estudantes comezaron  o seu andadura na veciña Comunidade de Castela e León onde foron visitar a D.O. Ribeira do Douro, tiveron a oportunidade de coñecer os viños de Roda visitando as bodegas Hijos de Alberto e a través dunha charla técnica do propio Consello Regulador da denominación de orixe, para finalizar na D.O. Cigales. Posteriormente o grupo emprendeu camiño cara a terras galegas, non sen antes visitar as Medulas e a Denominación de Orixe Bierzo.

 Xa en Galicia o seu primeiro destino foi a Ribeira Sacra cunha primeira parada en Monforte de Lemos para coñecer o traballo do Consello Regulador da Denominación de Orixe e visitar o Museo do Viño. Posteriormente o grupo dirixiuse á bodega Regina Vinarum para poder ver in situ os procesos de vinificación e catar as diferentes variedades da zona. Durante o resto de días os alumnos norteamericanos visitaron a empresa A Rosaleira como exemplo da produción sustentable de produtos vexetais, a bodega Terras Gauda e a Bodega Pazo Baion na D.O. Rias Baixas.

O grupo non abandonou Galicia sen antes facer unha parada no municipio de Cambados para coñecer a súa oferta enoturística e a importancia da mesma o ano en que ostenta a capitalidade europea do Viño. Alí tiveron nunha recepción oficial no salón de plenos e organizóuselle unha pequena visita guiada polos técnicos de turismo municipais, aos monumentos máis importantes de Cambados, pasando pola Praza de Fefiñans, a Torre de San Sadurniño e mesmo as Ruínas da Igrexa de Santa Mariña. Tras unha extraordinaria visita aos tres barrios que conforman a localidade, o grupo tivo a oportunidade de realizar unha cata e viños da D.O. Rias Baixas no Museo da Fundación Manolo Paz.

Vídeo aéreo da Fundación Manolo Paz

A DEPUTACIÓN APOIA A FUNDACIÓN MANOLO PAZ NA SUA PROXECCIÓN INTERNACIONAL

O departamento provincial de Cultura e Lingua contribúe á difusión da actividade da Fundación no marco da Feira Internacional ARCO

O deputado de Cultura e Lingua, Xosé Leal, acompañado polo concelleiro de Cultura de Cambados, Víctor Caamaño, visitou onte a Fundación Manolo Paz co obxecto de  facer público o apoio da Deputación á esta Fundación na súa proxección internacional, no marco da Feira Internacional de Arte Contemporánea, ARCO. Nesta cita, se celebrará en Madrid entre os días 22 e 26 de febreiro, estará presente o traballo que se realiza desde a Fundación a través de diverso material divulgativo, en cuxa edición colaborou o ente provincial. "ARCO é un contexto de gran relevancia e que participe nesa feira un artista da provincia como Manolo Paz non é só un orgullo para as Administracións, senón que tamén é un deber apoialo e fomentar a labor que realiza" indicou Xosé Leal durante a visita.

O deputado insistiu ademais en que "na arte en pedra somos unha potencia e temos que saber proxectalo fóra", ao tempo que asegurou que "esperamos que neste Ano do Patrimonio, Cambados ademais de ser coñecida como capital do viño tamén sexa coñecida como capital da arte contemporánea". Nesta idea tamén incidiu o edil de Cultura, Víctor Caamaño, asegurando que "a Fundación Manolo Paz debe ser un atractivo máis de Cambados". Caamaño sinalou que "por parte do Concello traballaremos para que este espazo non só sexa un atractivo económico, senón que se perciba como un atractivo artístico, visual e dos sentidos". Insistiu ademais na necesidade de "poñer en valor a súa potencialidade" e de enfocalo a "público de todas as idades e todas as condicións".

Manolo Paz participou en ARCO por primeira vez en 1985 e desde entón a súa presenza foi case constante. Na edición de 2017 participará na sección editorial da Feira cun libro editado fai dous meses e que recolle o traballo e as principais obras da Fundación que leva o seu nome en Cambados. Ademais aproveitará a cita para difundir o legado artístico e paisaxístico da Fundación a través do material informativo editado en colaboración coa Deputación. "Eu quero agradecerlle a todas as institucións que colaboran para facer posible a difusión nunha das citas máis importantes do ano en canto a arte contemporánea, que é algo que me enorgullece porque eu sempre dixen que este é un proxecto de todos" sinalou Manolo Paz. O escultor fixo un percorrido polos diferentes espazos da Fundación e explicoulle ao deputado e ao concelleiro as previsións de ampliación tras a recente compra dun pequeno terreo colindante. Neste novo espazo proxecta unha actuación que permita gozar da vexetación propia de solo húmido, e que será especialmente deseñada atendendo ás necesidades de persoas con mobilidade reducida.

A Fundación Manolo Paz foi creada en 2010 a partires dunha leira rural na que o escultor tiña o seu obradoiro de traballo. Actualmente acolle parte da súa obra e unha serie de espazos concibidos para poñer en valor o diálogo entre as esculturas e a paisaxe nas que se insiren.

PRESENTADO O LIBRO SOBRE A FUNDACIÓN DE MANOLO PAZ

O conselleiro de Cultura, Educación e Ordenación Universitaria, Román Rodríguez, presentou esta tarde o libro ‘Fundación Manolo Paz Arte Contemporáneo’, na sede da Fundación homónima, sita no cambadés lugar de Quintáns. Román Rodríguez sinalou a importancia de que un artista “da sona internacional de Manolo Paz” escolla a súa terra para levar adiante o seu proxecto creativo, de xeito que todos os galegos e galegas “podamos gozar da súa arte e da actividade cultural e de divulgación artística da Fundación.”

Así mesmo, o conselleiro destacou que “desde as primeiras pegadas paleolíticas até a actualidade, a pedra foi unha gran aliada da nosa vida” e engadiu que “cómpre apreciar esta herdanza e a quen, como Manolo Paz, a recibe e nola transmite multiplicada en valor e calidade estética.” Finalmente, o titular de Cultura cualificou esta nova publicación como “imprescindible” para os interesados no escultor “polo equilibrio do seu conxunto”, de xeito que “fondo e forma, temática e análise rozan nesta obra a excelencia.”

A publicación está conformada por arredor de noventa imaxes das pezas de Manolo Paz e os espazos da Fundación e o Museo. Xunto a información gráfica, recolle extractos de textos especializados sobre a obra de Manolo Paz de David Barro, Elena Vozmediano, Fernando Castro Flórez, José Guirao Cabrera, José Jiménez, Javier Montero, Álvaro Negro e Bernardo Pinto de Almeida.

No acto participaron tamén Manolo Paz; o editor da Revista Dardo, David Barro; o secretario xeral de Cultura, Anxo Lorenzo; o concelleiro de Ensino, Patrimonio, Cultura, Deporte e Normalización lingüística de Cambados, e a directora da Fundación Manolo Paz e coordinadora da obra, Julia García Escudeiro.

Ferramenta de promoción

O libro Fundación Manolo Paz. Arte contemporánea, promovido pola Fundación e editada por Dardo coa colaboración da Consellería de Cultura, Educación e Ordenación Universitaria, pretende ser unha ferramenta útil para os visitantes do espazo desta institución cultural e para todos aqueles interesados no coñecemento da obra deste artista, un dos máis representativos dentro do marco da historia da arte galega e peninsular nas últimas décadas.

A publicación permite prolongar a visita a unha das institucións privadas máis senlleiras dentro do panorama artístico galego, a Fundación Manolo Paz. E, ao mesmo tempo, complementa a información da visita ao espazo museístico a través de fotografías e textos de especialistas que exploran a obra do artista de Cambados desde múltiples perspectivas.

Así mesmo, esta monografía levará o coñecemento do traballo da Fundación e da obra de Manolo Paz alén das nosas fronteiras. Esta publicación, con contidos en galego, castelán e inglés, permitirá a difusión da plástica de Manolo Paz tanto entre estudosos da arte contemporánea e coleccionistas, como entre amantes da arte e persoas interesadas na cultura en xeral. 

PRESENTACIÓN DO LIBRO "FUNDACIÓN MANOLO PAZ, ARTE CONTEMPORÁNEO"

Esta tarde terá lugar a presentación do libro Fundación Manolo Paz Arte Contemporáneo ás 17.00 horas na propia Fundación.
O libro recolle a traxectoria da Fundación desde a súa apertura así como unha variada selección de textos e imaxes arredor da obra de Manolo Paz.
A Fundación Manolo Paz serve así para vehicular a conservación dun dos mellores traballos artísticos desenvolvidos en Galicia nas últimas décadas, do mesmo xeito que para axudar na documentación e estudo da obra.Aparece tamén como un dos espazos imprescindibles para a arte non só galega senón española e internacional, aloxando unha das máis interesantes coleccións de escultura en espazo natural e seguindo un camiño no que a arte e a terra se aúnan para amosar o espazo de comuñón e símbolos propios, á vez que explorando todas as posibilidades conceptuais, técnicas e formais do noso tempo.
A presentación contará coa presenza do conselleiro de Cultura, Educación e Ordenación Universitaria en funcións, D.Román Rodríguez González, e o secretario xeral de Cultura D.Anxo M.Lorenzo Suárez.

O ESCULTOR CAMBADÉS MANOLO PAZ PROTAGONISTA NOS PREMIOS DA CULTURA GALEGA 2016

O conselleiro de Cultura e Educación en funcións, Román Rodríguez, acompañado polo secretario xeral de Cultura, Anxo Lorenzo, recibiu hoxe as esculturas coas que se recoñecerá o labor dos galardoados e das galardoadas cos Premios da Cultura Galega 2016. 
A obra, denominada “Froito” e realizada en bronce, foi creada polo artista cambadés Manolo Paz e representa o resultado da dedicación e da constancia diaria do traballo no campo cultural. As esculturas entregaránselles aos premiados deste ano nun acto solemne en próximas datas.

I XORNADAS DA FUNDACIÓN MANOLO PAZ

Hoxe e mañán, 10 e 11 de xuño celébranse as I Xornadas da Fundación Manolo 

Paz, co seguinte programa:

Venres 10 de xuño

12:00 – Presentación a cargo do Concelleiro de Cultura, Víctor Caamaño, e o 

escultor Manolo Paz. O artista Álvaro Negro e o arquitecto Luis Gil Pita, 

coordinadores da xornada, presentarán a ponencia “El viaje de la arquitectura a 

la naturaleza. La vegetación entreverada”.

13:30 – Premio Fundación Manolo Paz.

17:00 – Conferencia: “Transformaciones en la obra de ESTAR-ARQUITECTOS”, 

a cargo de Aurora Armental e Stéfano Ciurlo.

18:30 – Conferencia: “Arquitectura de la vid en la región de Entre-Douro-E-

Minho: fenomenología y paisaje”, a cargo de Ana Gallego Palacios.

20:00 – Clausura da xornada cun viño Rías Baixas.

Sábado 11 de xuño

12:00 – Cata de viños Rías Baixas a cargo do sumiller José Aragunde. En 

colaboración coa Ruta do Viño Rías Baixas. (Reserva: Ruta do Viño Rías Baixas, 

telf. 986 091 088 / 687 523 230 info@rutadelvinoriasbaixas.complazas l

imitadas).

18:00 – Ruta pola desembocdura do Umia, a cargo de Manolo Domínguez, 

biólogo.

19:30 – Concerto de jazz: presentación do novo disco de Paco Charlín Quartet 

inspirado na obra de Manolo Paz. Durante o concerto servirase un viño Rías 

Baixas.

Confirmación de asistencia a través de: info@fundacionmanolopaz.org

PRESENTADAS EN CULTURGAL´15 AS XORNADAS DA FUND. MANOLO PAZ

O Teniente Alcalde e Concelleiro de Cultura do Concello de Cambados Víctor Caamaño, o propio Manolo Paz, e Luís Gil Pita, arquitecto acompañados de Jose Vaamonde, técnico de Cultura do Concello de Cambados.Falaron en Culturgal´15 sobre a Fundación Manolo Paz.

 O Concello de Cambados ven promovendo, defendendo e difundindo dende fai anos a cultura e a arte, crendo neles como un motor creativo, vital e turístico. A gran cantidade de actividades culturais que se desenvolven ao longo do ano en Cambados é un bo exemplo delo o certame de Escultura Asorey, o festival Proxecta de Fotografía, o Festival Internacional de Cine Marítimo que éste será o seu primeiro ano, o Premio Cabanillas,

dous ciclos de teatro anuais e unha programación anual e estable de Sala de exposicións Pazo Torrado, que leva seis anos como tal, dan boa fe disto.

O Concello acudeu a Culturgal´15 para presentar as primeiras Xornadas sobre Paisaxe interiores da Fundación Manolo Paz,  que se celebrarán en Cambados entre os días 10 e 11 de xuño do 2016 e nas que haberá, a parte das conferencias, concertos e catas do brancos Rías Baixas.

Para elo o Concello de Cambados e a Fundación Manolo Paz colaborarán conxuntamente coa Ruta do Viño Rías Baixas e a Bodega Condes de Albarei entre outras.

Nestas xornadas estarán involucrados a parte dos anteriores protagonistas, Álvaro Negro, artista plástico e curador cunha ampla e completa traxectoria, con exposicións entre España e Portugal e obras en Coleccións como no CGAC, MARCO, MAC Gas Natural Fenosa, Fundación Barrié de la Maza ou Fundación Coca Cola.

Tamén contarse para a cata co sumillier José Aragunde, membro da Asociación de Sumilliers Gallaecia, finalista varios anos como Nariz de Oro de España, e actual Campión do Mundo de Cata. Esta clase maxistral será en colaboración coa Ruta do Viño Rías Baixas.

Dentro destas xornadas tamén poderase desfrutar de concertos, como o do contrabaixista de Jazz Paco Charlín, vilanovés formado entre escolas galegas, Tel-Aviv, Copenhage ou a Universidade de Berklee, en Boston, tocando con músicos da talla de Chano Dominguez, Perico Sambeat, Jorge Pardo, etc...

Todo isto nunha entorna incomparable que é a Fundación Manolo Paz, gozando da arte, da natureza e da paisaxe na desembocadura do Umia entre as pedras e piñeiros da parroquia de Castrelo, en Cambados.

A EXPOSICIÓN "LUNA AZUL" DE MANOLO PAZ PROLÓNGASE SEN DATA DE CLAUSURA

Continuarán as visitas comentadas todos os martes e xoves ás 19:30 horas ata o día da clausura.

A exposición "Luna Azul" do escultor Manolo Paz, que actualmente acolle o Sexto Edificio do Museo de Pontevedra, amplíase ata o vindeiro 5 de setembro. Aínda que a data programada para a súa clausura era o 25 de agosto o éxito da mostra do artista cambadés provoca que se alongue no tempo (tan só do 5 de xullo ó 22 de agosto, o Sexto recibiu 3.800 visitas grazas a esta e outras exposicións itinerantes).

Tamén continuarán as visitas comentadas levadas a cabo polo Gabinete didáctico do Museo,  durante os martes e xoves ás  19:30 horas ata o propio día da clausura, unha actividade individual da que participaron unhas 100 persoas durante as xornadas que se realizaron ata agora.

Arte de interior e exterior

Manolo Paz amósalle ó público unha serie de traballos en granito azul de Bahía, así como outros realizados especificamente para esta mostra. O autor lembra vistas aéreas e tamén algún glaciar, o cosmos, ou o mar, sempre presente. En "Luna Azul", obra que lle dá nome á exposición, descobre a plenitude do granito respectando sempre as súas calidades; astro que paradoxicamente non é desa cor senón que se denomina así a segunda lúa chea durante un mesmo mes do calendario gregoriano. Por outro banda, Manolo Paz fai unha metáfora perfecta das paisaxes mariñas a través da lúa que afecta ás mareas e á natureza, nuns mares de pedra nos que a unión con poesía están máis que presentes. Como elemento místico, a luz do afastado reflíctese de forma suave nas esculturas, mentres a cor e as formas transmiten tranquilidade.

Tamén presenta unha serie de traballos site-specific que poden verse desde dentro e fóra do Museo, como poden ser representacións plásticas das bateas de mexillóns que invaden os espazos de tránsito de entrada a salas de exposición. A mostra complétase con obras moi representativas da súa traxectoria coma "Colmeas", "Terra e aire" realizada con pedra de Benisalem; "Catro Estacións", un dos seus traballos máis singulares e cun sentido cromático de especial interese; ou "Debuxando no aire", obra que se pode gozar no exterior do Museo, na que o baleiro cobra un gran protagonismo. 

A exposición complétase cun libro retrospectivo onde se recollen as obras máis representativas da traxectoria do artista, acompañado de textos claves dunha serie de teóricos que acompañan o seu traballo e un ensaio inédito do comisario da mostra.

Artista con traxectoria

Cómpre lembrar que a Deputación distinguiu a traxectoria artística do escultor cambadés Manolo Paz co Premio Deputación 2011 na categoría de cultura e arte. Con esta distinción, a Deputación de Pontevedra quixo galardoar a contribución de Manolo Paz á proxección nacional e internacional da arte galega.

Paz naceu en 1957 en Castrelo, Cambados, no seo dunha familia humilde e traballadora que atendía negocios de carnicería e do campo. Alí, na casa familiar, iniciou a súa paixón pola escultura a través das tallas de madeira que realizaba coa súa navalla. Entre 1978 e 1979 estudou na Escola de Artes e Oficios Mestre Mateo, de Santiago de Compostela. As súas primeiras exposicións públicas teñen lugar en 1979. En 1980 comezou a traballar como profesor de escultura na Escola de Canteiros de Poio, actividade que desenvolvería ata 1990. Desde 1992 a 1994 residiu e traballou en Nova Iorque.

Manolo Paz traballa granito, fundamentalmente, mais tamén madeira e metal. No entanto, é a pedra o seu material fetiche.

"LUNA AZUL" A EXPOSICION DE MANOLO PAZ INAUGÚRASE HOXE

O Museo de Pontevedra inaugurará este venres 5 de xullo unha ampla exposición individual do artista Manolo Paz. Luna Azul amosa unha vintena das súas obras pero non só se trata dunha retrospectiva xa que tamén contén obras actuais en granito azul de Bahía e obras realizadas ex profeso para esta mostra no Sexto Edificio, que constitúe a primeira que Manolo Paz realiza nun Museo en Galicia.

Na presentación da exposición, que se poderá visitar ata o 25 de agosto, Manolo Paz cualificou como un "reto" o feito de ter que adaptar as súas obras ós espazos expositivos do Museo e que a súa intención foi facer unha "gran exposición" ao mesmo nivel que calquera outra que se fixera en Nova York ou Europa.

O comisario da exposición, David Barro, puxo tamén de relevo a dificultade loxística que supón facer unha exposición de escultura en interior pola dimensión e o peso das pezas. Non obstante, salientou como singularidade importante o feito de que a simbiose entre o Museo e a obra nova creada polo escultor para amosar en Luna Azul, supuxo un cambio de modelo e "un punto de inflexión na carreira de Paz".

Na súa exposición, Barro comparou a obra de Manolo Paz coa do escultor suízo Alberto Giacometti que proclamaba a máxima de construír eliminando. Neste sentido, Manolo Paz, dixo Barro, "constrúe dialogando, xa que a propia pedra marca o seu lugar fala sobre o seu destino".

Pola súa banda, o titular da Deputación aseverou que dentro da traxectoria expositiva do Museo para reivindicar a cultura da provincia e de Galicia, "presentamos agora esta mostra dun autor que trascendeu as fronteiras para ser recoñecido a nivel internacional, e qué mellor sitio para facelo que no Sexto edificio".

TEMATICA DE LUNA AZUL

O título da mostra Luna Azul alude a que, cada tres anos, a natureza fai coincidir dúas lúas cheas nun mesmo mes, fenómeno que se coñece con ese nome. As pedras son parte da natureza que, nesta exposición, é o fío condutor da mesma: dende as cordas das bateas que reciben ao visitante, configurando unha paisaxe mariña, ata sucesos que a perturban (como o Prestige) ou o descubrimento da pedra azulada procedente de San Salvador de Bahía (Brasil).

Algunhas obras nos recordan a vistas aéreas, a circularidade do cosmos, ou a un glaciar. Así mesmo, o  mar sempre está presente. Pódese dicir que a mostra é unha metáfora de paisaxes diversos que se completa con obras moi representativas da súa traxectoria que se poden disfrutar no exterior del Museo.

Manolo Paz (Cambados, Pontevedra, 1957) é un dos principais representantes da escultura española dende principios dos 80, momento no que comeza a traballar en granito. Destacou dende entón en colectivas paradigmáticas como a realizada en 1984 no Museo do Pobo Galego, Imaxes dos 80 desde Galicia -donde participaban artistas como Basquiat o Warhol-, así como a súa presenza na galería de Fernando Vijande. A finais dos oitenta, dará o salto á escultura pública, monumental, de grandes dimensións, avanzando cara a representación xeométrica que combina maxistralmente co ancestral, co primitivo, coa súa terra do Salnés.