Xornalismo é, escribir, publicar e transmitir o que non queren que se publique, escríbase e transmítase, o outro son "plumillas e relacións públicas da censura e a corrupción con premeditación e engano aos seus lectores".
CORES DE CAMBADOS É UN BLO
G. Sobre todo crítico.
Amosando publicacións coa etiqueta CULTURA. Amosar todas as publicacións
Amosando publicacións coa etiqueta CULTURA. Amosar todas as publicacións

23 de abril de 2018

A PROGRAMACIÓN TEATRAL DO ANO DA LINGUA LEVARÁ A MARÍA VICTORIA MORENO, LETRAS GALEGAS 2018 POR TODA A PROVINCIA



A programación teatral do Ano da Lingua levará a María Victoria Moreno por toda a provincia

Seis compañías escenificarán textos sobre a vida e a obra da autora homenaxeada no Día das Letras Galegas deste ano nun total de 60 actuacións 
programación teatral do Ano da Lingua O departamento de Cultura e Lingua aproveitou o Día do Libro para presentar publicamente a programación teatral do Ano da Lingua que terá como protagonista a obra e a vida de María Victoria Moreno, a autora homenaxeada no Día das Letras Galegas no 2018. Baixo o lema ‘María Victoria Moreno a escena! a Deputación levará un total de 60 representacións teatrais por todos os concellos da provincia. "Con este programa o que facemos é democratizar de verdade o acceso á cultura, e conseguimos que todas as persoas, vivan no concello que vivan, poidan ver teatro de calidade" asegurou o deputado de Cultura e Lingua, Xosé Leal.



O deputado nacionalista estivo acompañado na presentación por representantes de tres das compañías que fan parte desta programación, Anxo García de Viravolta Títeres- Seisdedos, Inacio Vilariño de Odaiko, e as tres actrices que conforman Matrioshka Teatro, Anabel Gago, Lorena Conde e Chelo do Rejo. Estas últimas escenificaron, ademais, un pequeno fragmento da súa montaxe que leva por título "Señora que pasea pola rúa con dous cans preciosos" e coa que poñen en escena a faceta docente de María Victoria Moreno. Leal tamén aproveitou a súa intervención para poñer en valor "o papel da muller na cultura, porque a muller ten moita presenza pero non sempre ten a visibilidade que lle corresponde" e lembrou que en 55 edicións, o Día das Letras Galegas se lle dedicou a autoras só en moi contadas ocasións.
Sobre "Señora que pasea pola rúa con dous cans preciosos", Lorena Conde explicou que "o que queriamos era, dunha banda, conmemorar a obra da autora, pero doutra facerlle unha homenaxe a todas as figuras de referencia que todas temos na vida e que fixeron que sexamos mellores persoas". A actriz indicou que este enfoque está baseado  nas declaracións da propia María Victoria Moreno nas que aseguraba que prefería a súa faceta de docente por riba da de escritora. O espectáculo toca todos os aspectos  que foron importantes na vida e na obra da escritora como son a literatura, o ensino, os animais e a natureza.
Viravolta Títeres – Seisdedos  porá en escena "Romance de cans", baseado no conto "Can branco, can negro". Anxo García explicou que "María Victoria Moreno escribiu este conto en forma de romance polo que aproveitamos para recoller e introducir ditos e contos sobre cans e amosalos a través do personaxe do cego dos monifates". García lembrou que Viravolta Títeres leva máis de trinta anos realizando investigacións sobre a representación popular, a través da que chegaron ao personaxe do cego dos monifates, moi común na Galiza nas representacións populares, e que o están aproveitando como recurso para poñer en valor textos de autores galegos, como pode ser Castelao, ou coma nesta ocasión, o conto elixido de María Victoria Moreno.
Odaiko levará polos concellos unha obra titulada "Mar Adiante" baseada na primeira obra publicada por María Victoria Moreno, poñendo enriba das táboas o barco escola ‘Arroás', que é o fío condutor de todos os contos da obra orixinal. "Construímos un espectáculo que é un soño e construímos un barco escola que non se basea na relación de poder entre profesorado e alumnado, senón que se basea na praxe" asegurou Inacio Vilariño. O actor engadiu que "a pedagoxía que xa nos anos 70 estaba reivindicando nesta obra María Victoria Moreno era moi avanzada para aquela época". A montaxe ten, ademais, unha gran presenza musical utilizando practicamente todas as partes do barco como instrumentos para producir sons e facer música.
Propostas
Ademais de "Mar adiante" de Odaiko e de "Romance de cans" De viravolta Títeres – Seisdedos, a programación teatral do Ano da Lingua inclúe dúas propostas máis para público de todas as idades. Son "Unha historia de amor. Homenaxe a María Victoria Moreno", un contacontos ilustrado para público familiar a cargo do colectivo ‘Polo correo do vento'; e a adaptación de "Leonardo e os fontaneiros", unha produción da Editorial Galaxia e que pon en escena Ubu Teatro, utilizando técnicas como a narración oral, a dramatización e o teatro de sombras.
Para público maior de 14 anos contémplanse dúas propostas: "Señora que pasea pola rúa con dous cans preciosos" de Matrioshka Teatro; e "Anagnórise" tamén producida por Editorial Galaxia e representada por Limiar Teatro, que utiliza un desguace como escenario para ir percorrendo toda a road movie que narra a historia da obra orixinal.  
Todas as compañías participan na programación teatral do Ano da Lingua con 10 representacións cada unha, e todas serán de balde para o público ata completar o aforo dos lugares nos que se presentan.



14 de abril de 2018

PRESENTOUSE EN CAMBADOS A BIOGRAFÍA DOS IRMÁNS VILAR PONTE







Onte venres no Salón Peña, de Cambados, tivo lugar a presentación do libro Común temos a patria. Biografía dos irmáns Villar Ponte de Emilio Xosé Ínsua e Xurxo Martínez González.
No acto, organizado coa colaboración das librerías Ramón Cabanillas e Contos, acompañaron aos autores Victor Caamaño e Francisco Fernández Rei.

«Todo canto eu fixen se acha ateigado dun amor a Galiza que calquera poderá igualar, pero nunca superar.» A frase de Ramón Villar Ponte, igualmente aplicábel a seu irmán Antón, resume perfectamente o norte que guiou a intensa, continua e poliédrica actividade cívica, política, cultural, xornalística e literaria destes dous irmáns no sangue e na patria que idearon no seu día, «en parolas íntimas», as Irmandades da Fala.
Desde a prensa, o folleto, a carta, o libro e a tribuna, os irmáns Villar Ponte resultaron decisivos na configuración dun tempo en que a lingua se fixo bandeira e Galiza comezou a se sentir nación plena á procura dos seus dereitos.
Emilio Ínsua e Xurxo Martínez relatan esta singradura irmandiña botando man dunha inxente cantidade de documentos inéditos ou descoñecidos que permiten ofrecer un retrato complexo e axustado destes dous membros destacados da Xeración de 1916. Un esforzo de síntese ameno e rigoroso para dar conta dunha obra de magnitude e relevancia verdadeiramente xigantescas.



10 de abril de 2018

EXPOSICIÓN DE SOLEDAD PENALTA NO PAZO DE TORRADO



Soledad Penalta Lorenzo nace en Noia (A Coruña) en 1943. A vocación artística levouna á Escola de Artes Aplicada da cidade herculina tras os estudos de química e de filosofía e letras, coñecementos que, en calquera caso, acusará na súa obra máis persoal, tanto humanística como tecnicamente.
Titulada na especialidade de Cerámica, amplía estudos en Barcelona, co profesor Fernández Chiti, e na Bisbal, Xirona, en 1978 e 1979, data na que participa no seminario de Estudos Cerámicos de Sargadelos, Lugo. Outras modalidades da mesma parcela, como mayólica e gres, en Altea, Alacante. Bolseira pola Consellería de Industria da Xunta de Galicia, traballa en Faenza, Italia, con Emilio Galasi, e en Sotomayor, Pontevedra. En 1989 desprázase a Estados Unidos e segue diversos cursos en Minnesota. Comezou a expoñer en mostras colectivas na Coruña, en 1978, e particularmente na súa cidade natal, en 1981. A súa obra exhibiuse en cidades de toda Galicia e en exposicións itinerantes por diversos puntos de España. Recibiu distincións en certames de Galicia. Posúe obra súa o Museo Bello Piñeiro de Ferrol e institucións galegas varias. É autora dun monumento público en Porto do Son, A Coruña, e de obra no museo ao aire libre das inmediacións da Torre de Hércules. Aínda que é importante a obra cerámica desta artista, a súa personalidade máis calada e definidora está nas pezas en ferro, na que absorbeu modos que se inician en Gargallo e van ata Chillida. Son emocionantes, pola sinxeleza resultante e a complexidade do concepto, os seus xogos cos planos. Domina a xeometría e recréase na aproximación, tanxencia, fusión de planos e polígonos, creando volumes que resultan en poliedros irregulares, a modo de cuarcitas e basaltos que traballa ata que parecen encartarse ou expandirse, ou formando conxuntos caprichosos, como estalactitas ennegrecidas.

Escultora desde 1972, goza sucesivamente do traballo con cerámica, cerámica de alta temperatura, refractarios, fundición de bronce, fundición de ferro, ferro en ferros soldadas, escultura de gran formato para exterior. Vive no estudo, no campo, coa súa familia. A súa obra é a súa linguaxe ou unha linguaxe que ela fala. Emociónanlle os problemas da xente e quere que se solucionen, apoia sen ningunha dúbida aos que queren axudar a solucionalos. Non, non quere ser a única, pero está aí.....



6 de abril de 2018

CONVOCADO O CERTAME DE ARTES PLÁSTICAS NOVOS VALORES 2018




As obras a concurso poderán ser entregadas entre os días 5 e 15 de xuño no Sexto Edificio do Museo de Pontevedra


Acaban de publicarse no Boletín Oficial da Provincia de Pontevedra as bases que regulan o Certame de Artes Plásticas ‘Novos Valores' para a edición 2018. Ao igual que nas dúas convocatorias anteriores, este certame contempla como premio a adxudicación de catro bolsas por importe de 7.500 euros cada unha para ampliar os estudos artísticos das persoas que resulten gañadoras do certame. Hai que lembrar que a fórmula das bolsas de estudos artísticas se establecera fai dous anos para recuperar a filosofía dos antigos ‘pensionados' da Deputación.
Como complemento a este premio, a Deputación tamén se compromete a programar nas instalacións do Museo de Pontevedra, no ano seguinte á finalización da bolsa, unha exposición colectiva con obras das catro persoas premiadas. Neste sentido, hai que lembrar que neste ano 2018, está previsto que entre o 21 de xuño e o 22 de xullo o claustro do Edificio Sarmiento acolla a mostra coas obras resultantes das estadías de estudos dos e das gañadoras da pasada edición: Yolanda Ríos Coello, Malú Feijóo Cid, Aitor Víctor Fernández Marcos, e Borja Guerrero Parapar.
A concesión da bolsa establecerase mediante un convenio entre a persoa gañadora e o ente provincial, concretando o emprego da mesma e o prazo, que non será superior a un ano. Ademais de cursar a citada ampliación de estudos artísticos, a persoa adxudicataria deberá entregar unha memoria xustificativa e unha obra orixinal e asinada.
Participantes e prazos
Neste certame poderán participar todos e todas as artistas, sen límite de idade, susceptibles de seren considerados novos valores e de diferentes disciplinas artísticas tales como pintura, escultura, debuxo, deseño, gravado, fotografía, cerámica e videocreación.
Deben presentar obras orixinais e non se admitirán as que xa fosen expostas noutras mostras, tanto individuais como colectivas, ou que figurasen noutros certames. Aceptarase unha obra por artista en cada disciplina e o seu peso non poderá superar os 500 quilos nin os 2 metros. No caso de obras audiovisuais, non deben exceder os 5 minutos.
As obras deberán ser entregadas no Sexto Edificio entre os días 5 e 15 de xuño, ambos incluídos, de luns a venres e en horario de 9 a 14 horas. As obras presentadas serán obxecto, ademais, dunha primeira selección coa que se conformará a mostra Novos Valores 2018, que estará aberta ao público no Museo de Pontevedra entre o 2 de agosto e o 16 de setembro.


20 de marzo de 2018

CONCERTO DE MÚSICA SACRA NA IGREXA PARROQUIAL DE CAMBADOS





Desde a súa creación no mes de xaneiro do 2017, Amicorum Musiace preséntase como un coro cun novo estilo, xurdido da amizade reencontrada dos seu máis de 90 membros tras moitos anos de dispersión, e que ademais constitúese como asociación musical coa fin, entre outras, de fomentar e difundir o patrimonio musical español e asturiano.
A dilatada experiencia musical e coral dos seus membros permite a esta agrupación afrontar un variado repertorio baixo diferentes formatos, aínda que no momento actual está especializada en polifonía a capella.
Xunto á orquestra  Sinfonietta Concertante, e coa  colaboración de solistas de renome internacional, realizaron durante os meses de marzo a xuño de 2017 á Xira de Pascua, na que   presentaron a Misa de Réquiem KV 626, dirixidos polo mestre don Gaspar Muñiz Álvarez, con gran éxito de crítica e público. En maio do mesmo ano, e baixo a dirección de don Amaro González de Mesa,  presentéronse ao  público ovetense, cun programa de polifonía española, na igrexa Santa María La Real de La Corte.
Convidados pola Asociación Amigos de Silos,  participaron na XXI Edición do Septiembro Musical ofrecendo un concerto no Convento de San Francisco de Santo Domingo de Silos (Burgos). A primeiros de decembro e baixo a dirección de dona Julia Fernández González, participa na conmemoración do 60 Aniversario del Colexio Oficial de Enxeñeiros Técnicos de Minas do Principado de Asturias ofrecendo un concerto na  Basílica de San Juan El Real de Oviedo, co título de “More Hispano: Un recorrido breve por oito séculos de polifonía española”. No nadal de 2017 e dirixidos por don Gaspar Muñiz Álvarez, interpretan “12 Panxoliñas Asturianas” para coro, solistas, piano e gaita, baixo a dirección de dona Julia Fernández González.
Na actualidade conta coa dirección musical de dona Julia Fernández González e como directores convidados coa participación de Gaspar Muñiz Álvarez, director da orquestra Sinfonietta Concertante de Oviedo, e de Amaro González de Mesa, actual director do coro de cámara Duque de Calabria e do Coro de la Universidad de Alcalá de Henares, así como da Sociedad Coral Excelentia, de Madrid.
Sábado 24 a partires das 9 da noite.


17 de marzo de 2018

AUDICIÓNS DE PRIMAVERA NO AUDITORIO





A Escola Municipal de Música e o Conservatorio Municipal organizan a vindeira semana as audicións de primavera, ás 18:00 e 20:00.
Ademais, o xoves 22 ás 20:00 a Banda de Música Xuvenil ofrecerá o concerto “Músicas que soan na radio”


16 de marzo de 2018

CATÁLOGO DE EXPOSICIÓNS DE TORRADO






Conversas Inesperadas
23 FEBREIRO | 1 ABRIL 
 Pintura, debuxo, escultura, fotografía, instalación, videoinstalación. Pazo Torrado abreu o ano con esta mostra colectiva comisariada por Ana Cancela. Unha exposición multidisciplinar onde se aborda o concepto artístico dende ángulos moi diferentes e persoais, levando ao espectador por unha viaxe de múltiples lecturas e estéticas antagónicas pero que complementan e enriquecen o noso panorama artístico.
Yolanda Ríos Iria Cortizo Victor Tomé Joana Soto Malú Feijóo Laura Álvarez Encarna Salas Servando Barreiro Ana Cancela

Soledad Penalta
13 ABRIL | 03 XUÑO 
Concibo a escultura como unha realidade que, acotando o espazo á súa medida, sinala, distingue, diferencia e distancia. Acepto a arte coma linguaxe de posibles e infinitas lecturas: "A obra vive só das interpretacións que dela se fan" (Umberto Eco) Soledad Penalta 

Emérita Méndez
15 XUÑO | 15 XULLO 
As ilustracións de Emérita Méndez guíannos a través dun detallado imaxinario cargado de delicadeza e misterio no que desprega todo o seu bestiario metafórico cunha aura case mitolóxica. Bea Laya  


Berta Cáccamo
27 XULLO | 23 SETEMBRO 
Falar de Berta Cáccamo é falar de parte da historia da pintura galega a partir da década dos oitenta do pasado século. Cunha tradición familiar arraigada e vital para a cultura galega e pertencente a un grupo xeracional de artistas abstractos, a artista viguesa desenvolve unha obra que reflexiona sobre os valores plásticos da pintura. Jose Vaamonde 

Julia Huete
05 OUTUBRO | 18 NOVEMBRO 
Galicia ten unha longa e importante tradición na artesanía e na industria textil. Julia Huete recolle esta tradición e a transforma nos seus bordados abstractos e minimalistas creando unha linguaxe propia. Esta é unha artista precoz que conta xa cun longo percorrido polos diversos mundos da arte. Na súa obra explora de xeito experimental as múltiples vías da abstracción a través da pintura textil e da ilustración. Jose Vaamonde

Colectivo Pataka
30 NOV | 13 XANEIRO

O curioso nome do colectivo Pataka ven das reunións que dende 2009 fan no bar Negreira de Santiago, coñecido popularmente como “O Pataca”. Un grupo de artistas de diferentes disciplinas que traen a Cambados unha mostra ecléctica e variada. Jose Vaamonde

Martes a Domingo  Inverno de 17 a 20h 
                             Verán de 18 a 21h




13 de marzo de 2018

ASOREY E PACO LEIRO NA MOSTRA MÁIS GRANDE DE ARTISTAS GALEGOS








A mostra reúne 192 obras de moitos dos artistas galegos máis relevantes dos últimos 150 anos


A Cidade da Cultura inaugurará este venres, 16 de marzo, a mostra máis ambiciosa realizada, ata o momento, sobre a arte galega: Galicia Universal. A arte galega nas coleccións de ABANCA e Afundación. A exposición presenta unha selecta escolma de 192 obras procedentes das dúas coleccións corporativas de arte máis senlleiras da comunidade e entre as máis importantes de España.
Por vez primeira, unha mesma exposición reúne obras de moitos dos artistas galegos máis relevantes dos últimos 150 anos como son Jenaro Pérez Villaamil, Fernando Álvarez de Sotomayor, Urbano Lugrís, Francisco Lloréns, Serafín Avendaño, Laxeiro, Virxilio Vieitez, Manuel Colmeiro, Luís Seoane, Arturo Souto, Maruja Mallo, Eugenio Granell, Julia Minguillón, Francisco Leiro, Francisco Asorey, Antón Patiño, Menchu Lamas, Xaime Quessada, Berta Cáccamo, Antón Lamazares, Pamen Pereira, Elena Colmeiro ou Antía Moure, entre outros moitos ata completar un total de 119.

O Museo Centro Gaiás acollerá ata o 14 de outubro esta escolma de pinturas, esculturas, fotografías e instalacións que supón unha oportunidade única para achegarse ao proceso de construción da nosa identidade cultural e comprender a dimensión universal da arte galega. Á vez, esta exposición facilítalle a toda sociedade o acceso ao relevante patrimonio artístico que posúen as importantes coleccións privadas de ABANCA e Afundación.

Actuación musical

A inauguración contará coa actuación especial de Alejo Amoedo, ao piano, e Asterio Leiva, ao clarinete, para interpretar dous movementos dunha sonata de Jesús Bal y Gay (Lugo, 1905 - Madrid, 1993), un dos compositores máis importantes do século pasado, que tivo unha vinculación moi estreita coas correntes artísticas do momento.


Programa de actividades

Galicia Universal. A arte galega nas coleccións de ABANCA e Afundación estará aberta ao público de martes a domingo, con entrada de balde, e contará cun amplo e variado programa de actividades e visitas guiadas e didácticas co fin de contribuír á difusión das obras, cunha especial atención á comunidade escolar, pero tamén aos amantes da arte, co obxectivo de incrementar a afluencia de turismo cultural.
O atractivo da exposición virá reforzado polo deseño da montaxe, a cargo do recoñecido estudio galego de arquitectura Abalo e Alonso, que desenvolveu un proxecto para realzar o valor singular das pezas e establecer un diálogo harmónico coa potencia visual do Museo Centro Gaiás.
O catálogo da exposición, en galego, castelán e inglés e editado polo estudio galego Desoños, representará unha obra de referencia para o coñecemento da arte galega, que permanecerá máis alá da clausura da exposición.
A exposición organiza as obras seguindo un criterio temático, no que as pezas se agrupan ao redor de cuestións como a cultura popular, a presenza da muller na arte, o compromiso social, a paisaxe, o retrato, a tradición e a renovación ou os movementos da nova arte galega.
A través deste discurso Galicia Universal. A arte galega nas coleccións de ABANCA e Afundación permite comprender como a construción da arte galega é o resultado de dous factores: do compromiso dos artistas coa identidade e por outra banda, da súa vocación de universalidade, reflectida na ligazón coas tendencias e movementos internacionais.

A exposición ‘Galicia universal. A arte galega nas coleccións de ABANCA e Afundación’ pretende amosar todas as ideas e conceptos expostos ao longo de dez seccións, artelladas de forma mixta, temática e cronolóxicamente, nas que se presta atención aos procesos de desenvolvemento estético e a súa inserción no espazo cultural galego.
1-Cultura popular. Da anécdota á identidade. Na que atopamos a Maside, Torres, Colmeiro, 
Laxeiro, Seoane, Mario Granell... 
2- Representación da muller como imaxe do país. Mater Gallaecia. Neste espectro situamos a 
Maside, Failde, Laxeiro, Colmeiro ou Seoane. 
3- Paisaxe do Romanticismo aos tempos modernos. Localizamos nesta sección a Ovidio Murguía, Parada Justel, Jenaro Carrero, Alfredo Souto, Bello Piñeiro, Francisco Lloréns, Imeldo Corral, Sotomayor, Germán Taibo ou Manuel Abelenda. 
4- A vida, as formas; A natureza morta. Identidade a través dos obxectos. Aquí están artistas como Maruja Mallo, Juan Luis Abelenda e Luis Caruncho. 
5- Público–privado: Grandes escenarios. Grandes formatos. Onde teñen cabida Urbano Lugrís, Carlos Sobrino e Castelao. 
6- Retrato típico e arquetípico. Identificamos nesta categoría a Francisco Asorey, Fernando Álvarez de Sotomayor, Elvira Santiso, Julia Minguillón. 
7- Compromiso social e político. Os novos: Castelao, Arturo Souto, Luís Seoane
8- Entre a abstracción e a nova figuración: Manuel Mampaso, Manuel Molezún, Reimundo Patiño, José María de Labra, Luis Caruncho, Leopoldo Nóvoa, Lodeiro, Tino Grandío e Jorge Castillo. 
9- Atlantismo. Neste abano amplo están Xosé Lodeiro, Manuel Quintana Martelo, Ignacio Basallo, Silverio Rivas, Antón Pulido, Guillermo Monroy, Ánxel Huete, Menchu Lamas, Francisco Leiro, Antón Lamazares, Antón Patiño, Manuel Moldes ou Din Matamoro. 
10- Local e universal. As redes de comunicación. Nesta sección situamos a Pamen Pereira, Xoán Anleo, Ánxel Huete, Pilar Alonso e Jorge Barbi.




16 marzo 2018 – 14 outubro 2018 
Museo Centro Gaiás Martes a domingo, de 10 a 20 h Entrada de balde 
Visitas comentadas: De martes a venres, 17:30 h Sábados, domingos e festivos, 12.30 e 17.30 h Semana Santa, xullo e agosto, 12.30 e 17.30 h 
Non é preciso reservar praza


12 de marzo de 2018

"MULLERES EN ACCIÓN. VIOLENCIA ZERO" CHEGA A CAMBADOS COA PERFORMANCE DE ELISA MIRAVALLES








O programa da Deputación "Mulleres en acción. Violencia zero" chega a Cambados coa performance de Elisa Miravalles

A presidenta Carmela Silva e a alcaldesa de Cambados, Fátima Abal, asistirán á acción artística Extrema presenza xunto ao alumnado de centros escolares da localidade
A presidenta da Deputación de Pontevedra, Carmela Silva, acompañada pola alcaldesa de Cambados, Fátima Abal, a artista Elisa Miravalles, e pola deputada provincial, Digna Rivas, asistirá este luns 12 de marzo ás 12 horas, na praza do Concello, (en caso de mal tempo trasladarase ao Salón Peña), á novena intervención artística do programa "Mulleres en acción. Violencia zero", unha iniciativa que ten por obxectivo darlle visibilidade á loita contra as violencias machistas así como dar a coñecer o traballo de novas artistas contemporáneas que están a traballar a prol da igualdade.
A protagonista da acción artística será Elisa Miravalles, artista visual e de performance, licenciada en Belas Artes pola Universidade Complutense de Madrid, cun mestrado en Investigación, Arte e Creación realizado na mesma entidade. A obra que representará en Cambados titúlase Extrema presenza. A actuación, á que ten confirmada a súa asistencia o alumnado do Colexio Salesianos, estará aberta ao público xeral.
Todas as performances de Elisa Miravalles son irrepetibles e en cada unha delas existe un gran contido de improvisación. Debido a que estas dependen do estado "do ser" no que se atope nos días anteriores á acción, nunca pode asegurar con exactitude como se levará a cabo a representación. En Extrema presenza utilizará a forza e a presenza do seu corpo como fío condutor entre os materiais escollidos, o tempo e o espazo presentes, creando una acción dotada dunha grande intensidade estética, sonora, física e emocional que non deixará o público indiferente.
"Mulleres en acción. Violencia zero" reúne o traballo de 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta terceira edición comezou en novembro de 2017 e novamente terá lugar este ano en 25 concellos da provincia (Vigo, Pontevedra, Cerdedo-Cotobade, Mos, A Lama, Forcarei, As Neves, Lalín, Cambados, Ponteareas, Barro, A Cañiza, Valga, Silleda, Catoira, Gondomar, A Guarda, A Illa de Arousa, Bueu, Moaña, O Porriño, Ribadumia, Vilagarcía de Arousa, Mondariz e O Rosal).


10 de marzo de 2018

ÚLTIMOS ACTOS DO DÍA INTERNACIONAL DA MULLER











O domingo día 11 de marzo.- GALA DAS MULLERES, no Salón de Congresos e Exposicións José Peña ás 18:00 h.
O Concello de Cambados homenaxeará a vinte viticultoras, de idades ben diferentes. O recinto estará decorado con camelias.
Luns 12 de marzo. –  "Mulleres en acción. Violencia Zero" 2017-2018 é un acto que ven da man da Deputación de Pontevedra de acción artística que se desenvolve no espazo público co fin de reivindicar a igualdade de xénero, concienciar a poboación do problema da violencia machista e, sobre todo, unir forzas para loitar contra esta praga presente na sociedade. Esta edición recolle 25 accións de arte contemporánea qe se levarán a cabo ata novembro de 2018 en 25 concellos da provincia.
Información 
Hora: 12:00 h
Lugar: Praza do Concello. En caso de chuvia, será no Salón Peña

Acción: a cargo de Elisa Miravelles



- 19:00 horas CHARLA SOBRE AXUDA ÁS MULLERES EMPRENDEDORAS no edificio Exposalnés, onde se informará ás novas emprendedoras e as que xa son emprendedoras das axudas a autónomas, tarifa plana etc..
O mércores dia 14 de marzo. – XORNADA DE MINDFULNESS “Mulleres rompendo barreiras”, no edificio de Exposalnés ás 18:00 h.



7 de marzo de 2018

ACTIVIDADES PARA O DÍA INTERNACIONAL DAS MULLERES







Mañán xoves  8 de marzo levaranse a cabo varios actos no día central da semana da MULLER.


– LECTURA DO MANIFESTO DO DÍA INTERNACIONAL DAS MULLERES, ás 12 horas na Praza do Concello se o tempo o permite, si non trasladarase o acto ao Salón de Plenos, ao mesmo tempo Fátima Abal anima a apoiar o parón que se levará a cabo desde as 12:00 h. ata as 14:00 h. 

- Pola tarde ás 19:00 h. terá lugar unha MASTER CLASS COMMUNITY MANAGER para emprendedoras, no edificio de Exposalnés, para explicar trucos para ser máis visible á hora de ser emprendedoras e captar así máis clientes.

- CHARLA-CONCERTO NO AUDITORIO DA XUVENTUDE ás 19h no auditorio municipal da Xuventude. A directora da escola de Música da Illa de Arousa Ana Belén Nieto ofrece una conferencia-concerto titulada “Eu, o trombón!”.






6 de marzo de 2018

REPRESENTACIÓN DA ÓPERA RITA NO AUDITORIO DE A XUVENTUDE










Mañán mércores 7 de marzo, ás 20:30h o Auditorio Municipal da Xuventude acollerá a representación da ópera Rita, de Donizetti, organizada polo Conservatorio Profesional de Música de Santiago de Compostela.
Esta ópera cómica, nun acto, so terá 4 funcións en Galicia: Santiago de Compostela (2), Noia e Cambados. A entrada é libre ata completar aforo.
O Conservatorio Profesional de Música de Santiago de Compostela estrea a vindeira semana a ópera ‘Rita’, a primeira ópera escenificada completa producida polo centro e na que o elenco o forma o alumnado dirixido polo seu profesorado. 
Con Alejandro Valcárcel na dirección musical, a orquesta compóñena os violinistas Roberto Santamarina, Gonzalo Muiño, Ângela Neto e Aldara Palmeiro; as violas Adela Beiro e Iria Levoso; os violonchelistas Xesus Seoane e Xulio Lemos; Laura Cernadas e Jésica Paz no contrabaixo; a frautista Noelia Ramos, os óboes Cecilia Castro e Gonzalo Arévalo; o clarinetista José Carlos Díaz; Darío Neira na trompa e Belén Carril no fagot. Alba Díaz é a pianista e repertorista.

O elenco está formado pola soprano Anna Melikhova no papel de Rita, o tenor Christian Losada no de Beppe (actual parella de Rita) e o barítono Pablo Nieves como Gaspar, primeiro marido.

A ópera orixinal é unha comedia doméstica formada por oito números musicais enlazados con diálogo falado. Rematouse no 1841 baixo o título Deux hommes et une femme (Dous homes e unha muller), describindo as relacións de parella no século XIX, pero Donizetti, o seu autor, nunca a viu representada. A nova proposta escénica, dinámica e divertida, dálle un novo sentido á obra de mans da directora de escena, Luz Alonso, que lle imprime un carácter educativo que ensina valores como o respecto e o agarimo.

Gaetano Donizetti Donizetti é considerado un dos pais da ópera romántica. Sendo mozo estudou arquitectura e leis, pero pronto as abandonou pola música, o debuxo e a poesía. Para abordar estas disciplinas inscribiuse na escola de música da súa cidade, Bérgamo. Alí coñeceu as partituras de Rossini, que o influíron. Logo foi a Bolonia, onde estudou baixo a tutela do pai Mattei. Ingresou no exército austríaco, pero seguiu compoñendo. Con Zoraide de Granada obtivo un gran éxito e foi nomeado como "rei da ópera", conseguindo que o dispensasen do servizo militar. Pasou os seus últimos anos recluído nun sanatorio mental.



5 de marzo de 2018

ESTE XOVES CHARLA-CONCERTO NO AUDITORIO DA XUVENTUDE








Este xoves 8 de marzo, ás 19h no auditorio municipal da Xuventude, con motivo do Día Internacional da Muller, a directora da escola de Música da Illa de Arousa Ana Belén Nieto ofrece una conferencia-concerto titulada “Eu, o trombón!”

Formación

Comezou os seus estudios musicais coa guitarra á idade de 7 anos na Escola Municipal de música Bernardo del Río en Vilagarcía de Arousa. Con 14 anos empeza a estudar trombón da man de Jesús Nogueira Franco e realiza o Grao Profesional nos Conservatorios de Vilagarcía, Santiago e Ourense, combinándoo cos estudios de Licenciatura en Publicidad e Relacions Públicas que termina no 2011. No ano 2012 obtén o Grao Profesional de Trombón con Matrícula de Honra e Premio Extraordinario Fin de Grado. Ese mesmo ano accede ó Conservatorio Superior de Música de Vigo no que actualmente cursa 4º de Interpretación na especialidade de Trombón. No ano 2016 obtén a titulación de Máster universitario en Profesorado.

Realizou diversos cursos de perfeccionamiento técnico e instrumental con trombonistas moi prestixiosos como Antonio Caneda, Santiago Blanco, David Rejano, Carlos Gil, Indalecio Bonet, Alberto e Unai Urretxo, Douglas Wright, Vicent Lepape entre outros.

Experiencia docente
É profesora de Trombón, Música e Movemento e Linguaxe Musical nas escuelas de Música de Vilanova de Arousa e Illa de Arousa. Desde 2016, profesora de trombón na Escola de música de Vilaboa.

Outros

Actualmente é membro da Banda de Música de Vilagarcía de Arousa e colabora asiduamente con outras bandas da comunidade así como coa Orquesta Casablanca, Orquesta Clásica de Vigo e Orquesta Sinfónica 430.







2 de marzo de 2018

SHERLOCK HOLMES ESTE DOMINGO NO AUDITORIO DA XUVENTUDE







Os casos de Sherlock Holmes” de Cayetano Lledó será a terceira das representacións dun novo ciclo de Teatro ás seis que pasará polo escenario este domingo 4, ás 18Hrs. A entrada é de 3,50 euros para o público xeral e de 2,50 euros a reducida para parados, xubilados e menores de 18.


Espectáculo de maxia de Cayetano Lledó

Espectáculo de maxia teatralizada, con comedia e humor indicado para público familiar.
O famoso detective Sherlock Holmes enfrontarase esta vez a un complicado e emocionante caso. As xoias da mansión dos Patterson foron roubadas. Sospéitase de todo o persoal que traballa na casa, de todo aquel que estivera polas cercanías da mansión o día do roubo. Coa axuda do público o famoso detective tentará descubrir ao culpable e recuperar as xoias.
Ilusionismo teatral con comedia, maxia musical, manipulación de cartas, malabarismo, clown, mentalismo, hipnose. 


22 de febreiro de 2018

INAUGURACIÓN DA EXPOSICIÓN "CONVERSAS INESPERADAS"



O Concello de Cambados  convida a todos á  inauguración da exposición “Conversas Inesperadas”, comisionada por Ana Cancela, que terá lugar o venres, 23 de febreiro, ás 20h.
A exposición poderá ser visitada entre o 23 de febreiro e o 1 de abril, de martes a domingo en horario de 17 a 20 horas no Pazo de Torrado.





20 de febreiro de 2018

CAMBADOS CELEBRA A DESPEDIDA COMO CIDADE EUROPEA DO VIÑO












O Concello de Cambados pon fin ao seu ano como Cidade Europea do Viño cunha gala de clausura que se celebrará o vindeiro sábado, 24 de febreiro. No acto, que terá lugar no Auditorio Municipal dá Xuventude ás 19 horas, darase un especial agradecemento a case unha vintena de persoas e colectivos implicados no desenvolvemento do programa de actividades así como a todos os veciños. Do mesmo xeito, para poñer punto final a esta efeméride, durante a gala cederase a testemuña como Cidade Europea do Viño 2018 aos municipios portugueses de Torres Vedras e Alenquer. Os portavoces dos catro grupos municipais de goberno -Fátima Abal, José Ramón Abal, Víctor Caamaño e Tino Cordal- fixeron esta mañá un balance moi positivo do que foi todo un ano cheo de máis de 80 actividades incluídas nun programa, que supuxo un investimento de máis de 500.000 euros. Segundo o goberno, "foi un gran esforzo económico e de persoal pero conseguiuse bater récords na vila, con máis de 46.000 visitantes rexistrados na Oficina de Turismo, a maioría españois, franceses e portugueses, que visitaron durante todos os meses do ano Cambados e contribuíron a desestacionalizar a oferta turística. A pesar da satisfacción polo traballo realizado, o equipo de goberno lembrou a falta de apoio por parte da Xunta e do Goberno, ante o que consideraron "unha oportunidade perdida" para a promoción do albariño a nivel internacional. Con todo, o Concello de Cambados continúa apostando por conseguir que a Festa do Albariño sexa declarada de Interese Turístico Internacional, polo que están a realizar os trámites para tentar conseguir o distintivo para a edición deste ano.






16 de febreiro de 2018

ESTE DOMINGO ARRANCA O CICLO TEATRO ÁS SEIS











“O segredo do Tendal” de Raquel Queizás, será a primeira das representacións dun novo ciclo de Teatro ás seis que arranca este domingo 18 ÁS 18Hrs. A entrada é de 3,50 euros para o público xeral e de 2,50 euros a reducida para parados, xubilados e menores de 18.
O espectáculo é unha mestura de teatro, monicreques e pantomima
Colgadas no tendal, as letras senten o sol a facerlles cóxegas e bailan unhas coas outras. A roupa tamén quere xogar coma elas: as pinzas axudan a un pano a medrar ata se converter nunha montaña, unha toalla foxe correndo entre as cordas... ou é un can de palleiro?

Este espectáculo de Raquel Quiezas xoga a tensar os límites entre teatro, monicreques e pantomima, e con eles as fronteiras da imaxinación máis alá do escenario, case nada é o que parece. 
Grazas a unha técnica de manipulación de panos inspirada nos mestres de monicreques orientais o escenario pasa de mostrar pezas de roupa secando ao sol a ser o interior dun castelo, un mar poboado por sereas, ou a cova dun feroz polbo gardián dun tesouro.




10 de febreiro de 2018

A FUNDACIÓN PLÁCIDO CASTRO E A CASA MUSEO CABANILLAS CONVOCADAS AO SEGUNDO ENCONTRO DAS CASAS MUSEO E FUNDACIÓNS DE ESCRITOR











A Casa dos Poetas de Celanova acolle unha xuntanza que se consolida como cita obrigada para fornecer accións conxuntas de colaboración
Cultura salienta a importancia destas entidades para a conservación do patrimonio cultural galego e pide a súa cooperación para a Memoria Dixital de Galicia


A Fundación Curros Enríquez convocou hoxe, sábado, na Casa dos Poetas de Celanova ás Casas Museo e Fundacións de Escritor a un encontro no que afondar no compromiso de traballar en rede, de xeito coordinado, como forma de poñer en valor a intensa actividade que realizan a prol da dinamización da cultura, sobre todo nos eidos local e rural.
Na orde do día estaban, ademais, iniciativas para a promoción conxunta das Casas Museo de Galicia e roteiros literarios e visitas teatralizadas. Este segundo encontro responde ao compromiso adquirido na primeira xuntanza, que tivo lugar no pasado mes de xuño en Ponteceso, de tirar partido dos parámetros comúns que rexen este tipo de entidades para articular iniciativas colectivas que lles dean máis visibilidade e contribúan a un aproveitamento óptimo dos recursos ao seu dispor.
O secretario xeral de Cultura, Anxo Lorenzo, participou na reunión, poñendo de manifesto a vontade da consellería de Cultura e Educación de “promover e potenciar o achegamento e intercambio de experiencias entre institucións e entidades con finalidades semellantes, para impulsar os seus obxectivos fundacionais”.Memoria Dixital de Galicia
Anxo Lorenzo, que tamén formaba parte da xuntanza como representante da Fundación Pública Camilo José Cela, puxo en valor o “importante papel” destas entidades na conservación e difusión da memoria dos escritores galegos e pediu a colaboración de todas no proxecto da Memoria Dixital de Galicia. Lorenzo lembrou que se trata dunha iniciativa colectiva, ao servizo da cidadanía e baseada nas novas tecnoloxías, “para a xestión e a conservación do patrimonio bibliográfico, arquivístico e museístico galego”.
Acafme.PNG“Quérese”, segundo o responsable de Cultura, “consolidar un fondo dixitalizado do patrimonio cultural material e inmaterial galego que, ao tempo, participe na confluencia de recursos dixitais no ámbito internacional.” De aí a importancia da colaboración das Casas Museo e Fundacións de Escritor, como depositarias da súa memoria.
Anxo Lorenzo animou aos participantes no Encontro a unirse a redes e proxectos de investigación europeas, seguindo o exemplo dalgunhas entidades que participan xa de xeito activo nelas. O secretario xeral de Cultura emprazounos a seguir traballando “en equipo”, posto que “os obxectivos das entidades das que forman parte son irrenunciables e delas depende unha parte imporante do que somos como sociedade e como pobo.”

FUNDACIÓNS CONVOCADAS:
Fundación Eduardo Pondal
Fundación Emilia Pardo Bazán
Fundación Luís Seoane
Fundación W. Fernández Flórez
Fundación Camilo José Cela
Casa Museo Rosalía de Castro
Museo Valle Inclán
Fundación Castelao
Fundación Celso Emilio Ferreiro
Fundación Torrente Ballester
Casa de la Troya
Fundación Manuel María
Fundación Uxío Novoneyra
Fundación Vicente Risco
Fundación Curros Enríquez
Casa Museo Otero Pedrayo
Fundación Losada Diéguez
Fundación Insua dos Poetas
Fundación Carlos Velo
Casa Museo Ramón Cabanillas
Fundación Filgueira Valverde
Fundación Illa Couto
Fundación Penzol
Casa Museo Francisco Fernández del Riego
Fundación Neira Vilas
Casa Museo Francisco y Julio Camba
Casa Natal de Valle Inclán
Fundación Carlos Casares
Fundación Plácido Castro
Fundación López Abente
Fundación Blanco Amor