O CONSELLO REGULADOR ESTABLECE UN PROTOCOLO E NORMAS DE PREVENCIÓN DE CARA Á VENDIMIA

O Consello Regulador puxo en marcha un protocolo e unhas normas de prevención para esta campaña de vendima. Ditas directrices aplícanse aos 24 veedores/auditores e ao persoal técnico do propio Consello Regulador que supervisarán o proceso de recollida da uva nas distintas adegas da Denominación de Orixe Rías Baixas e ás adegas e viticultores implicados.

Segundo explica o secretario do Consello Regulador, Ramón Huidobro, “estas medidas adoptáronse en coordinación coas Consellerías de Sanidade –a través do SERGAS- e de Medio Rural co fin de garantir as actuacións hixiénico-sanitarias e de prevención contra a Covid-19 no desenvolvemento das distintas auditorías”. Ademais dos tests serolóxicos que estes días realízanse aos veedores/auditores implicados na presente campaña de vendima, o Consello Regulador poñerá a dispor dos mesmos máscaras cirúrxicas, xel hidroalcohólico e luvas con obxecto de facilitar a protección persoal.

A maiores, e co máximo espírito de colaboración para a protección da saúde das persoas, “desde o Consello Regulador –engade Huidobro-, en cumprimento coa petición formulada pola Axencia Galega de Calidade Alimentaria ( AGACAL) e o SERGAS, trasladamos ás adegas e asociacións do sector a información remitida pola Xunta de Galicia co obxectivo de maximizar a seguridade nas explotacións agrícolas”, en consonancia cos protocolos de prevención e control da infección polo virus SARS- CoV-2 que elaborou o Servizo Galego de Saúde para as empresas que empregan a traballadores temporeiros.

Precisamente entre as medidas que neles reflíctense, figura a realización por parte do SERGAS, e previo ao comezo desta campaña, de test serolóxicos de detección de anticorpos anti- SARS- CoV-2 para todas as persoas involucradas na vendima. O obxectivo pasa por conxugar a continuidade da actividade agrícola, coa saúde e protección dos traballadores de campo, das empresas que os contratan e da poboación en xeral.

O protocolo do Consello Regulador tamén establece unha serie de pautas a seguir, incluídas na documentación entregada a todos os profesionais involucrados nesta vendima. Estas implican que cada veedor deberá realizar todos os días un breve recoñecemento da súa saúde persoal que rexistrarán no documento Verificación síntomas compatibles con COVID-19 e reportarán ao Consello Regulador antes de comezar a xornada laboral. En caso de notar algún síntoma (tose seca, febre, dificultades respiratorias ou malestar, perda de gusto e/ou olfacto), deberán informar inmediatamente e poñerse en contacto coas autoridades sanitarias.

Ademais das medidas xerais –uso obrigatorio de máscara, hixiene de mans e distancia mínima de seguridade interpersoal-, establécense unha serie de especificidades relativas ás auditorías para realizar nas adegas rexistradas e en viñedo. Veedores e adegas informarán dos seus respectivos protocolos de actuación co fin de que ambas partes respecten as directrices que neles reflíctense, optimizando, deste xeito, o seu labor.

As reunións entre auditores e persoal responsable de adega sempre se concertarán previamente de mutuo acordo, facilitando a flexibilidade horaria. Segundo especifícase no protocolo do Consello Regulador, os encontros realizaranse cun número de interlocutores “o máis reducido posible”.

Cando leven a cabo as comprobacións, o auditor realizaraas coa máxima precaución e acompañado por unha única persoa da adega ou explotación. No caso da recollida de evidencias, evitarase “o contacto co material de adega. Facilitarase como norma sempre o traslado de datos vía telemática, solicitando, ademais, permiso para tomar fotos que axilicen a recollida de achados”. En canto á redacción de informes e levantamento de actas, os veedores deberán realizalas a soas. A continuación, leerá e explicará o seu contido antes da súa firma polo responsable de adega, co obxectivo de minimizar o tempo das reunións.

En definitiva, o Consello Regulador insiste en que a finalidade última de todas estas medidas é a de conxugar os labores de auditoría e control de vendima, cos traballos de viñedo sen descoidar a protección dos traballadores de campo, das adegas e da poboación en xeral.

Mostraxes constantes

Mentres tanto, desde o Consello Regulador e as propias adegas están a levarse a cabo mostraxes constantes en campo co fin de comprobar o estado da uva para establecer o momento óptimo para a súa recollida. Aínda que se mantén a previsión de comezo da vendima de maneira xeneralizada para a primeira quincena de setembro –tal e como se recolle no informe de estimación de vendima-, todo vai depender da evolución que se rexistre nos próximos días e das condicións meteorolóxicas.

INÍCIANSE MAÑÁN MÉRCORES OS TEST RÁPIDOS A PERSOAL DOCENTE E DA VENDIMA

A área Sanitaria de Pontevedra e O Salnés iniciará este mércores, día 26 de agosto, os cribados preventivos mediante test rápidos de anticorpos de dobre banda ao persoal docente dos distintos centros educativos dos 26 concellos desta área sanitaria, así como ao persoal temporal da vendima. Diso informou a Xerencia nun comunicado remitido aos medios, no que sinala que a Administración sanitaria pública galega contempla esta actividade preventiva, que é totalmente voluntaria, efectúase de forma diaria en quendas de tarde inicialmente e de mañá e tarde en setembro, nos puntos de extracción de analíticas nos tres hospitais que conforman a área. Deste xeito, as previsións que manexa a área Sanitaria de Pontevedra-O Salnés e a Xefatura Territorial da Consellería de Educación estiman que ao redor de 4.000 docentes e 350 temporais poderán efectuar de forma voluntaria este cribado. Esta probas durarán ata uns días antes do inicio do curso escolar. Cada centro educativo e adega dispuxo dun coordinador que, en colaboración coa área Sanitaria, coordinará os sistemas de traballo interno para iniciar este mércores os test. A xerencia lembrou que o proceso de test rápido de anticorpos de dobre banda efectúase mediante unha picada nun dedo, proba que cunha pinga de sangue extraído revela o seu resultado en ao redor de 10 minutos. Este tipo de probas serven para aumentar a cifra de casos detectados á vez que amplían en abanico de diagnóstico xa que permiten diferenciar entre infeccións agudas, avanzadas ou curadas. Ademais, de detectar posibles casos, os test rápidos de anticorpos de dobre banda tamén permiten diferenciar entre cales son positivos activos e cales inmunizados.

ACABADA A FESTA DO ALBARIÑO XA PENSANDO NA VENDIMA

O noveno Túnel do Viño, organizado polo Consello Regulador, mantense como un dos pratos fortes da LXVII Festa do Viño Albariño D.O. Rías Baixas en Cambados. Numerosos amantes do viño, concretamente 510 persoas, que se achegaron entre o xoves 1 de agosto e o domingo 4 de agosto, ao Salón de Congresos e Exposicións José Peña para degustar algunhas das máis de 150 marcas de 60 adegas expostas.

A directora do Departamento de Marketing, Eva Mínguez, amosouse satisfeita pola resposta do público: “estamos contentos coa respuesta do público pois pasaron máis de medio milleiro de persoas durante os catro días que o túnel abriu as súas portas”.

E acabada a Festa do Albariño estamos máis preto da vendima que este ano adiantarase unhas semanas.

O Órgano de Control e Certificación da Denominación de Orixe Rías Baixas presentoulle ao Pleno do Consello Regulador o Informe de Estimación de Colleita 2019. Este documento, elaborado en base aos datos estimados polos técnicos de campo das empresas durante a primeira quincena de xullo, explica que neste momento o viñedo atópase nunha situación heteroxénea. Este feito vén motivado polas condicións meteorolóxicas adversas no momento da floración e da purga, o cal dificulta a estimación da colleita de 2019.

O informe, que foi analizado polos vogais do pleno, estima unha recollida en 2019 de “36,6 millóns de quilogramos de uva, un 5,2% menos que a colleita 2018”. Con ese volume de produción poderían vinificarse máis de 24,5 millóns de litros de viño.

Para redactar este documento, o Departamento Técnico do Consello Regulador supervisou o 45,9% das 4.045 hectáreas de superficie produtiva da denominación. A redución prevista na colleita deste ano débese, principalmente, ás condicións meteorolóxicas que incidiron nas condicións fenolóxicas de floración. Ademais, factores como o viento e a saraiba ocasionaron mermas directas nos acios e rotura de pámpanos. Os técnicos apuntan que as subzonas máis afectadas pola saraiba foron o Condado do Tea e O Rosal.

O informe do Órgano de Control e Certificación resalta que as mermas de produción son máis xeralizadas en viñedos vellos que novos e que non son reseñables os danos por pragas e enfermidades como a botrite, o mildeu e o oídio. Ademais, segundo se explica no documento, “as condicións meteorolóxicas adversas fan que os acios sexan máis pequenos”.

A D.O. RÍAS BAIXAS PECHA A VENDIMA 2018 CON 38,5 MILLÓNS DE KG DE UVA

O Consello Regulador da Denominación de Orixe Rías Baixas dá por concluída a vendima 2018 con 38.595.306 quilos de uva, un 1,9% menos que na campaña anterior. A recollida prolongouse desde o 8 de setembro ata o 14 de outubro. “A colleita tivo lugar nas datas habituais para esta denominación”, explica o director técnico do Órgano de Control e Certificación do Consello Regulador, Agustín Lago. O bo tempo permitiu ademais realizala con soseigo, orde e bo ritmo.

Se algo caracterizou esta vendima foi “o magnífico estado sanitario da uva”, engade Agustín Lago, para quen “a estabilidade meteorolóxica de agosto e setembro, con tempo seco e soleado, permitiu que a fase de envero se desenvolvese de modo axeitado e que finalmente a uva se atopase en moi boas condicións”.

O primeiro semestre deste ano estivo meteorolóxicamente marcado pola sucesión de sistemas frontais, procedentes do océano Atlántico, que deixaron en primavera temperaturas frías e elevadas precipitacións e fixeron temer que o rendemento do viñedo se vise afectado. Sen embargo a brotación foi excelente, e aínda que se produciron algúns ataques de mildeu e oídio, localizados especialmente na subzona do Condado do Tea, ademais dalgunhas perdas por corremento de flor, unha defensa adecuada contra os fungos por parte dos viticultores e unha meteoroloxía favorable na segunda metade do verán fixeron posible anular ameazas. De maneira que finalmente a Denominación de Orixe Rías Baixas superou as previsións iniciais de estimación de vendima con só unha merma del 1,9 % con respecto a 2017, acadando os 38.595.306 kg.

Nesta campaña de vendima participaron 5.265 viticultores, que recolleron uva en 4.043 hectáreas, repartidas entre 21.722 parcelas, para 183 adegas inscritas. O Consello Regulador empregou o sistema de auditoría no que traballaron 25 auditores/vedores.

Volume por variedades e subzonas
As variedades brancas nesta denominación continúan sendo as maioritarias, supoñendo un 99,15%. Delas, a variedade autóctona Albariño é a raíña co 97% do total. Séguenlle, nesta ocasión, a Caiño Branco, a Treixadura e a Loureira.

Pola súa parte, as variedades tintas representan un 0,80% do total da produción con 306.905 quilos de uva, na súa maioría recollida na subzona do Condado do Tea. As variedades maioritarias son a Sousón, a Brancellao e a Caíño Tinto.

En canto á distribución da vendima por subzonas, a do Salnés mantén a súa hexemonía co 65% da produción (superando os 25 millóns de quilos de uva). Séguenlle o Condado do Tea co 20% e O Rosal, co 10%. O 5% restante recolleuse en Ribeira do Ulla e Soutomaior.

Con estes máis de 38,5 millones de quilos de uva prevese elaborar uns 26 millóns de litros de viño para atender a demanda dos viños da D.O. Rías Baixas nos mercados galego, español e internacional.

Fonte: doriasbaixas.com

COMO SE ESCOLLEN OS GALARDOADOS NA FESTA DA VENDIMA?

Varias persoas foron as que en persoa ou a través de internet nos preguntaron porque non se sabe case nunca os criterios para dar premios, por exemplo na gala da Festa da Vendima que se celebrou o sábado en Cambados.

Nadie critica as persoas que se levaron, nesta ou na anterior edición, os recoñecementos. 
Ao moitos viticultores da D.O. de Cambados lles gustaria saber por boca do sr. Abal que criterio usa para galardoar aos "mellores viticultores". Máis idade? Máis producción? Máis hectáreas? Mellor graduación? Cepas máis antigas? Mellor acidez?.....
ou máis amigo?
Por eso estas persoas que nos consultaron, viticultores e non viticultores piden que o concelleiro de enoturismo revele o criterio de elección.

O C.R. RÍAS BAIXAS ESTIMA UNHA PRODUCIÓN DE 36 MLLS DE QUILOS DE UVA NESTE 2018

O Consello Regulador Rías Baixas estima a produción para este ano en 36 millóns de quilos de uva, un 10% menos que en 2017

O Órgano de Control e Certificación presentou ao Pleno do Consello Regulador da Denominación de Orixe Rías Baixas o Informe de Estimación de Colleita 2018. Este documento, redactado en base aos datos estimados polos técnicos de campo das empresas durante a primeira quincena do mes de xullo, constata que, ata ese momento, o viñedo atopábase en moi bo estado sanitario a pesar de ser un ano moi complicado no meteorolóxico.

O documento analizado polos vogáis do Pleno estima a produción deste ano en "36 millóns de quilogramos de uva, un 10% menos que a colleita do 2017". Con ese volume de produción poderían vinificarse ao redor de 24 millóns de litros de viño.

Para a redacción deste informe, os técnicos do Consello Regulador supervisaron máis do 50% da superficie produtiva da denominación. No escrito, destacan que o índice de fertilidade deste ano é maior que o de 2017. A pesar diso, estiman unhas diminucións na colleita dun 10% debidoprincipalmente a "problemas de corremento de flor e de enfermidades fúngicas, sobre todo mildiu".

O documento do Órgano de Control e Certificación lembra que os casos de mildiu producíronse especialmente nas subzonas do Condado do Tea e no Val do Salnés. Con todo, "os técnicos de campo consultados esperan que sexan máis ben danos puntuais e non xeralizados", apunta o informe.

Esta situación vén propiciada por un ano climatológicamente "moi húmido, con tormentas e alternancia de períodos con altas e baixas temperaturas". Segundo explícase no documento, "as condicións meteorolóxicas adversas fan que os viñedos presenten unha situación moi heteroxénea e, en consecuencia, que resulte máis complicado estimar a produción coa mesma precisión que en 2017".En termos xerais, o ciclo vexetativo da colleita2018 en Rías Baixas comezou con "un atraso fenológico de 2-3 semanas aproximadamente con respecto ao ano anterior e unha semana con respecto a un ano normal".

O Informe de Estimación de Colleita 2018 examina fundamentalmente a información proporcionada polos técnicos de campo das adegas e as empresas de servizos agrarios, cuxas observacións e datos achegados nas enquisas, realizadas a mediados de xullo, sométense a unha análise detallada e a un procesamento estatístico. Finalmente, os resultados obtidos pondéranse en función da superficie supervisada por cada técnico para contar, deste xeito, con criterios unificados.

Ademais, e como tarefa de reforzo e garantía, o persoal dos servizos técnicos do Órgano de Control do Consello Regulador, xunto a algún dos técnicos asesores de campo, desprázanse ás distintas subzonas da Denominación de Orixe para efectuar mostraxes dos viñedos e pesada de acios. Con esta práctica, pretenden corroborar a situación real sobre o terreo.

Na actualidade, este Consello Regulador acolle a 183 adegas, 5.293 viticultores, así como 4.045 hectáreas repartidas entre 21.607 parcelas.

A VENDIMA 2017, A TERCEIRA MAIOR DA DÉCADA

A colleita de 2017 foi a terceira máis abundante da última década. Ascendeu, en total, a máis de 61 millóns de quilos de uva, en xeral de moi boa calidade, a pesar dos episodios de climatoloxía adversa que se sucederon durante o ano.

Unha suba importante se temos en conta a caída da produción noutras zonas produtoras de España, que se sitúa en torno ao 15% con respecto ao ano 2016. Nos principais países produtores do mundo, Italia e Francia, as baixadas foron do 23% e 19%, respectivamente. Así, a previsión de produción mundial indica que houbo unha baixada de en torno ao 8%, convertendo a vendima do ano 2017 na máis baixa do século.

Esta importante caída da produción noutras zonas produtoras de España e dos principais países produtores do mundo vai supoñer unha moi boa oportunidade para ampliar mercados, sobre todo para a DO Rías Baixas que tivo unha colleita abondosa.

Do total, máis de 52 millóns de quilos corresponderon a variedades brancas, especialmente Albariño. De feito, Rías Baixas foi a D.O. de maior produción, co 64,08% do total recolleito en Galicia, con máis de 39 millóns de quilos. A D.O. Ribeiro recolleu 9,4 millóns de quilos (o 15,43% do total); Ribeira Sacra, 5,5 millóns (8,98%); Valdeorras, 4,1 millóns (6,81%) e Monterrei -a que maior descenso acusou con respecto ao ano anterior- quedou nos 2,8 millóns de quilos (o 4,70% do total).

As cinco denominacións de orixe vitivinícolas agrupan á inmensa maioría do sector do viño en Galicia. O case medio milleiro de adegas acollidas comercializaron en 2016 uns 416.000 hectolitros de viño, cun valor en orixe duns 195 millóns de euros (un 8,3% con respecto ao 2015).

Estamos a falar dun sector que, na campaña 2015/2016, incrementou as súas exportacións un 69% respecto á campaña 2010/2011, o que significa que exporta o 19,4% da produción total, que se incrementou nese período un 9%.

A D.O. RÍAS BAIXAS CONCLÚE A SEGUNDA MAIOR VENDIMA DA SÚA HISTORIA CON MÁIS DE 39 MILLÓNS DE QUILOS DE UVA

O Consello Regulador da Denominación de Orixe Rías Baixas dá por rematada a vendima de 2017 con 39.339.272 quilos de uva recollida, un 17,8 % máis que na campaña anterior. Con estas cifras, a Denominación de Orixe Rías Baixas obtén a segunda vendima máis cuantiosa da súa historia.

Esta campaña comezou a mediados de agosto e finalizou a mediados de octubre. Puídose prolongar tanto no tempo porque “a meteoroloxía permitiu que se puidese realizar gradual e selectivamente, de maneira que as adegas puideron agardar ao momento óptimo en cada parcela”, segundo explica o director técnico do Órgano de Control e Certificación do Consello Regulador, Agustín Lago.

Lago considera ademais que “todo apunta a que será unha gran anada de viños”, posto que “a vendimia este ano foi de libro, empezando polo estado fitosanitario da uva, os seus excelentes parámetros de calidade, así como o axeitado equilibrio entre grao e acidez”, indica o director técnico de Rías Baixas.

Se algo caracterizou esta vendima foi o seu carácter madrugador, debido ás condicións meteorolóxicas en primavera-verano que causaron un adianto do ciclo vexetativo da vide e da maduración da uva. Ademais, as xornadas de chuvia de principios de setembro, xusto antes da maior parte das tarefas de vendima, contribuíron a optimizar o comportamento do viñedo.

Esta campaña estivo protagonizada por 5.338 viticultores, que recolleron uva en 4.049 hectáreas para 184 adegas inscritas. Como xa é habitual nesta denominación, a produción das variedades brancas é maioritaria, cun 99,15% do total. Delas, a variedade Albariño é a raíña co 96,49% do total. Séguenlle a Treixadura, Caiño Branco e Loureira. E aínda que as variedades tintas só supoñen o 0,85% da produción, na presente campaña recolléronse 333.929 quilos de uva, na súa maioría na subzona do Condado do Tea. As variedades tintas maioritarias son a Sousón e a Brancellao.

En canto á distribución da vendima por subzonas, a do Salnés mantén a súa hexemonía co 63,82% da produción (supera os 25 millóns de quilos de uva), seguida polo Condado do Tea, O Rosal, Ribeira do Ulla e, por último, Soutomaior.

Os máis de 39,3 millóns de quilos de uva recollidos permitirán elaborar algo máis de 26 millóns de litros de viño certificado para atender a demanda dos viños Rías Baixas nos mercados galego, español e internacional. Na actualidade, os mercados exteriores supoñen máis do 28% da produción da D.O. Rías Baixas.

Esta foi a terceira vendima na que a Denominación de Orixe emprega o sistema de auditoría, no que traballaron 25 auditores/vedores, seguindo así a normativa vixente. Agustín Lago explica que “este traballo garante a orixe e a trazabilidade en todas as fases da elaboración do viño". Neste sentido, asegura que o sector está plenamente profesionalizado e comprometido coa excelencia, o que redunda na calidade dos viños.

SOMOS CAMBADOS PRESENTA UNHA MOCIÓN NO VINDEIRO PLENO POLO “ACOSO” DE FACENDA E INSPECCIÓN DE TRABALLO NA VENDIMA

Con este acordo buscase que remate a persecución por parte de Facenda e da Inspección de Traballo dunha práctica tradicional como é a axuda entre veciños para a vendima



A Axencia Tributaria está inspeccionando a axuda entre veciños para recoller a colleita de patacas, de uva ou o millo e herba para silo. Os sindicatos agrarios temen que as inspeccións esténdanse á colaboración puntual e desinteresada noutros labores que, como a matanza, sempre congregaron a familiares e veciños e que serven non só para alixeirar traballo, senón ademais para facer relacións sociais e xerar redes de solidariedade. Por outra parte funcionarios da Inspección de Traballo, escoltados pola Garda Civil, pretenden multar a veciños e familiares que axudan desinteresadamente nestes labores e por cuxa axuda non cobran nada.

Cada vez son máis as políticas do Goberno que agriden a unha economía, como a das explotacións agro gandeiras, sumida desde fai anos nunha continua crise. Primeiro foi o denominado “catastrazo” do Ministro Montoro, que pretendía “regularizar” instalacións accesorias da actividade agrícola, cobrando por unha galpón destartalado coma se fose unha vivenda habitable ou pola mera existencia de estruturas como un toldo. Despois, a revisión por parte de Facenda -no caso de Galicia, en colaboración coa Consellería de medio rural-, da transmisión de dereitos de pago único da PAC, que non tivo en conta que a maioría das transmisións prodúcense de pais a fillos e non teñen carácter pecuniaria.

Agora prodúcese un novo ataque a estas precarias economías, a persecución por parte de Facenda e da Inspección de Traballo dunha práctica tradicional é a axuda entre veciños para a vendima, práctica tradicional que nin constitúe unha fraude á Seguridade Social nin á Facenda Pública, xa que se enmarca nun contexto de cooperación, solidariedade e axuda mutua entre veciños necesarias para o normal desenvolvemento de explotacións agrícolas familiares de reducidas dimensións.

Por todo o exposto proponse ao Pleno da Corporación que se lle inste a Xunta de Galicia, a que solicite ao Ministerio de Facenda que deixe de perseguir unha actividade tradicional nas explotacións agrícolas galegas tipo familiar e de pequenas dimensións como é a axuda non retribuída entre familiares e veciños para a vendima. Que solicite a Inspección de Traballo a que non se lles multen a veciños e familiares que axudan nestes labores e por cuxa axuda non cobran nada, ademais de que se resolva se son actividades inspectoras illadas, ou existe algunha campaña especifica da Inspección de Traballo para perseguir un colectivo e unha actividade, como é a axuda entre veciños en tarefas agrícolas rudimentarias e explotacións de reducidas dimensións, que non é remunerada e que responde a un costume tradicional no campo de traballar colectivamente, primeiro nunhas leiras e logo noutras, para facer traballo dunha forma comunitaria e agradable; e que se solicite ao Goberno do Estado a que modifique o réxime Colaboración Familiar no ámbito laboral para así evitar estas inspeccións esperpénticas que nin sequera desde un punto de vista meramente recaudatorio teñen sentido e cuxa única finalidade parece ser a de acabar coas explotacións agro gandeiras de tipo familiar e de reducidas dimensións, tan tradicionais e abundantes en Galiza.

MANTENSE A NORMATIVA QUE REGULARÁ A VENDIMA EN RÍAS BAIXAS

O Consello Regulador da Denominación de Orixe Rías Baixas remitiu a viticultores e adegueiros as normas que rexerán a campaña de vendima e que foron aprobadas no Pleno do pasado 9 de xuño. Desde a Denominación insisten na necesidade de colaborar todo o necesario para que a recollida da uva se desenvolva con normalidade e sempre prestando a máxima atención ao coidado da uva, o que redundará na calidade dos viños e en que sigan sendo competitivos nuns mercados cada vez máis esixentes.

A normativa de vendima mantense con respecto ao ano anterior no cumprimento da EN-UNE-17065-. Dita norma de calidade, no caso das adegas, “implica a revisión dos sistemas de autocontrol durante a vendima, todo iso de fronte ao cumprimento dos requisitos marcados no Regulamento, Manual de Calidade e Prego de condicións. Desta maneira, en caso de detectar algún incumprimento (Non conformidade), ao finalizar a vendima, o Órgano de Control e Certificación emitirá un informe definitivo, que será remitido á adega para a súa corrección”, reza o escrito.

Do mesmo xeito, os viticultores recibirán un Informe de validación de colleita, que dará amparo á súa produción e servirá como xustificante das entregas de uva. O devandito documento remitirase antes do 20 de novembro.

Os viticultores e adegas remitirán a información a través da plataforma dixital

No caso dos viticultores, o Consello Regulador recomenda a familiarización co uso da plataforma dixital, só accesible aos asociados, onde poden consultar ou imprimir todos os datos relacionados coa súa actividade, así como a normativa da Denominación de Orixe que se atopa en vigor. Neste sentido, anuncian que o próximo ano a web converterase no punto de referencia para a publicación de anuncios ou informacións de interese para o viticultor.

Dita plataforma tamén conta cun sistema de comunicación específico no que as adegas dan conta, en tempo real, das entregas de uva en vendima. Un sistema que xa funcionou a pleno rendemento nas pasadas vendimas.

Finalmente, infórmase os viticultores sobre a publicación do Real decreto 772/2017 polo que se regula o potencial vitícola. Nel especifícase como o Ministerio de Agricultura e Pesca, Alimentación e Medio Ambiente procederá coa concesión de autorizacións administrativas para novas plantacións de viñedo.

A D.O. RÍAS BAIXAS ESTIMA A RECOLLIDA DE 37,6 Mlls DE Ks DE UVA EN VENDIMA, 12% MÁIS QUE EN 2016

O Servizo Técnico presentou ao Pleno do Consello Regulador da Denominación de Orixe Rías Baixas o Informe de Estimación de Colleita 2017. No devandito documento, indícase que as boas condicións climáticas do mes de xuño provocaron ?un alto ritmo de crecemento vexetativo? que, sumado á excelente saúde dos viñedos, contribúe a un previsible incremento na produción para esta colleita. Así, prevese a recollida de preto de 37,6 millóns de quilogramos de uva, o que significa ao redor dun 12% máis que na colleita 2016, que foron 33.404.961 quilos, polo que se estima un volume de ao redor de 26 millóns de litros de viño.  
Esta situación vén propiciada tamén por unha primavera moi seca e cálida, cunha anomalía positiva na temperatura media de 1,8ºC. Ademais, o ciclo vitícola 2017 en Rías Baixas foi cualificado polo Servizo Técnico como excelente, con ausencia de pragas e enfermidades. Lembran, neste sentido, que esta Denominación de Orixe, fóra de certos viñedos nas subzonas de Ribeira do Ulla e Condado do Tea, non se viu afectada polas fortes xeadas de finais do pasado mes de abril.

En función da meteoroloxía deste mes de agosto, e como consecuencia do adianto do ciclo vexetativo da vide, desde o Consello Regulador están a ultimar todos os preparativos ante a posibilidade de que a vendima se teña que iniciar antes. 

O Informe de Estimación de Colleita 2017 conta fundamentalmente coa información proporcionada polos técnicos de campo das adegas, cuxas observacións e datos achegados nas enquisas sométense a unha análise detallada e a un procesamento estatístico. Pondéranse en función da superficie supervisada por cada técnico para contar, deste xeito, con criterios unificados. 

Ademais, e como tarefa de reforzo e garantía, persoal dos servizos técnicos do Órgano de Control do Consello Regulador, xunto a algún dos técnicos asesores de campo, desprázanse ás distintas subzonas da Denominación de Orixe para efectuar mostraxes dos viñedos. Deste xeito, buscan corroborar a situación real sobre o terreo. Na actualidade, este Consello Regulador acolle a 181 adegas, 5.515 viticultores, así como 4.044 hectáreas cuxos viñedos suman 21.774 parcelas.

A D.O. RÍAS BAIXAS ACADA OS 32 MILLÓNS DE QUILOS DE UVA

OS 32 MILLÓNS DE QUILOS DE UVA VENDIMIADOS CUMPREN COAS EXPECTATIVAS EN CANTO A CALIDADE E CANTIDADE NA D.O. RÍAS BAIXAS

O Consello Regulador da Denominación de Orixe Rías Baixas cumpriu as súas expectativas en canto a calidade e cantidade patentes na campaña de vendima 2015, cun total de 31.917.611 quilos uva vendimiada, un 32% máis que o ano pasado. Este Consello Regulador deu por concluída a campaña de 2015, que pasa a ser a terceira máis abundante da súa historia ata o momento, o pasado 3 de outubro cun rendemento medio de 7.820 kg por hectárea.  
Para o director técnico da D.O. Rías Baixas, Agustín Lago, "cumpríronse as nosas previsións en canto á cantidade prevista polo Órgano de Control e Certificación, así como á calidade da uva, que consideramos moi boa en base aos parámetros fundamentais de grao, máis elevado que a pasada campaña, e acidez, máis compensada". 

Os case 32 millóns de quilos de uva recollidos nesta campaña transformaranse nuns 22 millóns de litros de viño de moi alta calidade, segundo as estimacións que baralla o Órgano de Control e Certificación de Rías Baixas. "Unha cantidade de viño que nos garantirá manter os niveis de comercialización en todos os mercados", engade Agustín Lago 

A produción da variedade Albariño, dentro das variedades brancas, segue sendo a maioritaria, representando o 96,8% do total. Séguenlle a Treixadura, Loureira e o Caiño Branco. Aínda que as variedades tintas só supoñen o 0,77% da produción, na presente campaña recolléronse 246.660 quilos de uva, un 19,79 % máis que o ano anterior e coa variedade Sousón na cabeza.

En canto á produción, a subzona do Salnés mantén a súa hexemonía, seguida polo Condado do Tea, O Rosal, Ribeira Ulla e, por último, Soutomaior.

Durante a campaña de 2015 implantouse na totalidade da adegas da Denominación de Orixe Rías Baixas o proxecto de mellora e adaptación a ÚNEA-NISO/IEC 17065, normativa de obrigado cumprimento para todos os órganos certificadores de viños da Unión Europea. Vinte e sete auditores encargáronse de comprobar que os inscritos cumpriron as normas do manual de calidade e as especificacións técnicas recollidas no do prego de condicións. "Agora o nivel de control é máis exhaustivo e máis profundo. De maneira que no departamento técnico crúzanse moitos datos e, ao mesmo tempo, a trazabilidad e o control en adega é aínda máis intenso", manifesta o director técnico.

CALIFICADA DE EXCELENTE A VENDIMA DO 2015

A vendima deste 2015 nas cinco denominacións de orixe de Galicia (Monterrei, Rías Baixas, Ribeira Sacra, Ribeiro e Valdeorras) pode cualificarse como excelente, de acordo coas previsións feitas polos propios consellos reguladores, tanto desde o punto de vista da cantidade como da calidade.

Así se desprende dun informe elaborado pola Consellería do Medio Rural e do Mar, no que se constata un incremento do 20,85% na cantidade total de uva recollida con respecto á vendima de 2014. Deste xeito, para este ano a previsión da colleita é de 63 millóns de quilos de uva, fronte aos 49,8 millóns da campaña de 2014.

Por denominacións de orixe, o maior incremento previsto con relación ao ano pasado rexístrase na de Rías Baixas, cun 27,82%. Séguenlle a D.O. Monterrei, cun 19,4% de aumento. Moi preto desta cifra está o Ribeiro (incremento do 19,3%).

A positiva evolución rexistrada en relación coa última tempada ven confirmar a tendencia dos últimos dez anos. Así, de facerse efectivas as previsións, a vendima de 2015 será a segunda mellor do período, só superada pola de 2006, na que se recolleron algo máis de 64 millóns de quilos nas denominacións de orixe de Galicia. Na seguinte táboa figuran os datos totais de quilos recollidos na última década, evolución que tamén se pode apreciar na gráfica:
 

ANO	COLLEITA (kg.)
2006	64.024.521,0
2007	41.417.808,0
2008	40.688.762,0
2009	47.400.321,0
2010	57.710.898,0
2011	77.897.267,0
2012	44.203.063,0
2013	57.784.603,0
2014	49.863.480,4
2015	63.000.000,0

Este ano a maioría de comarcas comezaron a vendimar na última semana de agosto, adiantándose así unha semana respecto a anteriores campañas. En Ribeiro, Rías Baixas e Ribeira Sacra estiman rematar a vendima na primeira semana de outubro, mentres que en Monterrei e Valdeorras agardan ter acabado a mediados ou finais de setembro.

As temperaturas foron en xeral superiores a outras campañas, provocando o adianto na maduración e as importantes oscilacións térmicas entre o día e a noite favoreceron a síntese de compostos aromáticos, aportando complexidade e intensidade, á vez que se conserva o frescor. A falta de precipitacións durante o ciclo da vide favoreceu un excelente estado fitosanitario da uva, co que diminuíu a cantidade de tratamentos necesarios.

O estrés hídrico das plantas permitiu ademais a obtención de uvas de pequeno tamaño aumentando a relación pelexo/polpa e por tanto a concentración de aromas.

Como feitos destacados, na Ribeira Sacra hai que salientar que o bo estado sanitario da uva non se debe só ás boas condicións climatolóxicas, senón tamén ao traballo dos viticultores que cada vez máis fan poda en verde e manteñen as cepas coa carga adecuada. No Ribeiro este ano o Órgano de Control e Certificación da D.O. dispón dunha aplicación informática de alta mobilidade, que permite máxima garantía na trazabilidade e Control de Calidade.

Cómpre destacar tamén que para controlar esta vendima mobilizáronse por parte das distintas denominacións de orixe e da Consellería do Medio Rural e do Mar máis de un centenar de técnicos, entre persoal fixo e eventual.

OS VITICULTORES DO SALNÉS ESPERANZADOS COA COLLEITA DESTE ANO

Se a alguén lle sentou ben a chuvia dos últimos días é aos adegueiros da denominación de orixe Rías Baixas. A uva está en perfecto estado. Este ano, cunha boa climatoloxía, bo tempo, calor, agora esta chuvia que é magnífica para corrixir a acidez, para a maduración e para todo. Os adegueiros e viticultores da zona amósase moi optimista de cara á colleita deste ano polas boas condicións atmosféricas que houbo ata agora. 

A uva está en perfecto estado. Como se pode ver ao visitar as viñas, estas están superverdes e moi limpas. 
Agora o que necesita a uva é sol para acabar de madurar e coller todo o azucre e a graduación que lle fai falta. A vendima está previsto que comece a mediados de setembro e as expectativas son moi boas tanto en calidade coma en cantidade. Arredor duns 35 ou 36 millóns de quilos de uva.

En xeral na D. O. Rías Baixas prevese que se acade sobre un 35 por cento por riba da colleita do ano anterior. Entre un 35 e un 40 por cento. Vai ser un viño fantástico. Case non vai haber traballo para os enólogos na adega porque tal e como está a uva o viño vai saír moi bo, non vai haber que facer malolácticas, nin grandes cousas. A calidade da uva é moi bo.

Ata que chegue a hora da vendima os viticultores céntranse en preparar as instalacións para a recepción da uva e eliminar as follas do viñedo para tratar de ter aireados os acios.

AGÁRDASE UNHA COLLEITA EXCEPCIONAL DE ALBARIÑO, EN CANTIDADE

O Consello Regulador da Denominación de Orixe Rías Baixas agarda que este ano a colleita se sitúe entre os 32-35 millóns de quilos de uva, case un 40 por cento máis que o ano pasado e en torno ó dez por cento superior á media anual na DO. É a estimación que se realizou o pasado venres no pleno do consello celebrado esa mañá. As previsións de vendima, se a climatoloxía sen mantén estable, mantéñense na primeira quincena de setembro. 
Segundo os datos aportados polo órgano de control do Consello Regulador da Denominación de Orixe Rías Baixas, o pleno da entidade acordou fixar a estimación de colleita para este 2015 entre os 32 e os 35 millóns de quilos de uva. A cifra supón un aumento de en torno ó 35-40 por cento con respecto á pasada campaña, cando os problemas en floración e os fortes ataques de mildiu deixaron o volume recollido en torno ós 24 millóns de quilos; e un dez por cento superior á media anual na DO.   Con esta previsión de aumento de colleita agárdase que a calidade da uva tamén sexa moi boa, se ben é preciso a entrada no envero en próximos días e que chova.   Con estes baremos, e se a campaña se mantén estable, agárdase que os traballos de vendima se comecen na subzona do Salnés a mediados de setembro e no Rosal uns días antes.  

CORES TOURÍS O MARCO POLO DOS MEDIOS DE COMUNICACIÓN

O non ter que facer, fai que o superdelegado ordene cando se acaba a vendimia.

Onte en Cambados

O delegado territorial da Xunta en Pontevedra, José Manuel Cores Tourís, visitou o xoves, en compaña do alcalde de Portas, Roberto Vázquez, unhaa cooperativa da localidade para comprobar a evolución da vendima na comarca de Caldas, dentro da Denominación de Orixe Rías Baixas.

“O obxectivo desta visita”, engadiu o delegado territorial, “é estar en contacto cos viticultores e bodegueiros para coñecer o seu sentir nesta vendima na que, se estima, vanse recoller 22 millóns de quilos de uva en toda a denominación de orixe”. Ante os medios de comunicación declarou que se daba por rematada a vendima.

Aínda que poida estar en contacto co consello regulador debéronlle informal mal pois a dia de onte voltou visitar outra adega, neste caso en Cambados xunto coa conselleira do ramo, alcalde e teniente alcalde de Cambados e a guapísima deputada no Horreo, Rosa Oubiña, de Cambados tamén.

Tourís o xoves

Como queira que xa non debía ter Obradoiros (4 polo menos visitou esta semán) que visitar eses dias, buscou esa excusa para saír na prensa. Porque polo que parece gústalle saír na prensa máis que un "lápiz a un tonto". 

A XUNTA ENGANA AOS PEQUENOS VITICULTORES

Os representantes dos sindicatos Unións Agrarias e Sindicato Labrego Galego en nome dos produtores vitivinícolas das Rías Baixas séntense enganados pola Xunta de Galicia ao non ter convocado a mesa do viño para este ano a pesar de comprometerse a iso.

Os produtores esperan que a próxima semana, durante os últimos días de setembro, se leve a cabo a campaña forte de vendima e lamentan que non se acordase aínda un prezo. Denuncian que dende as adegas intentan meter medo aos viticultores de maneira que se rebaixen os prezos. Hai que ter en conta, segundo apuntan os sindicatos, que a presenza de chuvia e as enfermidades que están a afectar aos viñedos van afectar á produción deste ano ao considerar que se recollerán menos de 20 millóns de quilos de uva.

O pasado ano, as adegas pagaron entre 0,90 e 1 euro polo quilo de albariño e os produtores entenden que, este ano, o prezo debería situarse sobre 1,30 euros. Os sindicatos denuncian ademais o atraso nos pagamentos por parte das bodegas que, nalgúns casos, supera os 15 meses.