OUTRA EMPRESA DO SALNÉS ACADA O SELO "GALICIA CALIDADE"

A Vicepresidencia segunda e Consellería de Economía, Empresa e Innovación, a tráves de Galicia Calidade, vén de incorporar ao selo autonómico produtos das empresas alimentarias Grupo Leche Río (Lugo), Conservas del Noroeste (Vilaboa) e as adegas Gran Bazán (Vilanova de Arousa) e Finca Millara (Pantón), logo de superaren os controis de calidade realizados pola entidade pública. Con estas novas adhesións o selo de garantía suma os produtos e servizos de máis de 135 empresas galegas. Hai que lembrar que recentemente Galicia Calidade tamén incorporou as empresas Viña Costeira, Confraría de Pescadores San Bartolomé de Noia, Freshcut e Pementos Carmucha.

A marca de garantía continúa na súa labor de certificación das empresas máis representativas do sector alimentario galego. No ámbito do sector lácteo galego, son xa tres empresas punteiras as que contan co distintivo: Feiraco, Larsa e agora Leite Río, tanto para as marcas Leite Río como para Leyma. No ámbito da conserva, coa chegada de Conservas del Noroeste, que conta como marca máis coñecida Cabo de Peñas, Galicia Calidade conta tamén coas empresas Jealsa e Luís Escurís Batalla, en peixe, e Conservas a Rosaleira no mundo vexetal.

No referente ao sector vitivinícola son xa 18 as adegas que contan cos seus viños amparados polo selo de calidade, onde están presentes as cinco denominacións de orixe. Na D.O. Rías Baixas coa chegada de Gran Bazán, son xa 8 as adegas certificadas: Adega dos Eidos, Adega Valdés, Terra de Asorei, Altos de Torona, Paco & Lola, Señorío de Rubiós e Valtea. Na Ribeira Sacra, Finca Millara súmase a Regina Viarum e Vía Romana. Ademais, a D.O. Valdeorras conta con tres adegas: A Coroa, Ruchel e Terriña; Monterrei suma dúas adegas, Gargalo e Quinta do Buble; e o Ribeiro coa recente incorporación de Viña Costeira suma dúas adegas xunto a Bodegas Nairoa.

Galicia Calidade conta na actualidade con máis de 400 produtos certificados de máis de 135 empresas galegas, onde o sector alimentario e o sector turístico- hoteis, restaurantes, casas rurais e clubes náuticos- suman case o 90% do total.

NORMAS PARA A CELEBRACIÓN DOS MERCADOS AGROALIMENTARIOS

Unha distancia mínima de seis metros entre postos, luvas desbotables e xel para vendedores e clientes e evitar que os puntos de venda estean enfrontados son algunhas das medidas da Consellería do Medio Rural esixidas para a continuación desta actividade crave para o rural Os mercados agroalimentarios volven a Galicia con menos aforos e postos. Desde o pasado día 4 os mercados agroalimentarios poden xa instalarse nas vilas e cidades galegas para elo deben cumprir uns requisitos esixidos pola Xunta de Galicia. A Xunta de Galicia permite desde o pasado 4 de maio que os mercados agroalimentarios volven funcionar grazas "ao avance temporal do estado de alarma e os datos que reflicten unha evolución positiva na loita contra a pandemia", ademais de que noutras comunidades autónomas xa se permite a súa celebración. Estas feiras son de competencia municipal e os concellos terán a última palabra sobre se levarán a cabo e toda a normativa recóllese na resolución publicada pola Consellería do Medio Rural coa meta principal de revitalizar esta actividade tan importante para o rural galego, xa que en moitos casos debido á dispersión de poboación e a existencia de pequenos núcleos de habitantes, os mercados son a principal vía de abastecemento. A volta destas feiras vén acompañada dunha estrita normativa debido á crise sanitaria do coronavirus, polo que nos mercados locais só se poderán vender produtos agroalimentarios e os postos deberán cumprir unhas normas específicas para que o desenvolvemento da actividade non supoña ningún risco para a saúde. Ademais, reducirase o aforo e o número de postos (deberase garantir unha limitación ao 25% dos postos habituais ou autorizados e unha afluencia inferior a un terzo do aforo habitual).

Á súa vez, si se poderá aumentar a superficie habilitada para o exercicio desta actividade. Os postos deberán atoparse separados por unha vía de tránsito e cunha distancia mínima entre eles de seis metros, permitíndose unha separación mínima de catro metros entre os laterais. A Consellería do Medio Rural recomenda unha disposición dos postos ao tresbolillo, é dicir, en forma de triángulo equilátero evitando que un punto de venda estea enfrontado a outro. Dentro dun mesmo posto as persoas vendedoras deberán gardar entre si unha distancia mínima de dous metros e restrinxirase o servizo a un operador no caso de que as medidas do posto non fagan posible esta separación física a parte de que tamén poderán exercer a venda os parentes en primeiro grao que colaboran na actividade agraria ou empregados da explotación.
As luvas desbotables son o máis recomendable pola Consellería aos responsables dos postos, que á súa vez deberán dispoñer deste material sanitario para a clientela xa que será imprescindible para tocar os produtos en venda. Tamén son aconsellables nas casetas os dispensadores de xel desinfectante tanto para vendedores como usuarios de acordo coas recomendacións das autoridades sanitarias. Con respecto á limpeza e recollida, os refugallos xerados polo mercado deberán ser depositados en bolsas dentro dos colectores instalados polos servizos municipais de limpeza e recollida de lixo.

DÍA NACIONAL DA NUTRICIÓN

Desde a área  materno-infantil-EOXI, convidannos a celebrar con eles o DÍA NACIONAL DA NUTRICIÓN.

Será  o próximo 28 de maio de 2019 de 12:00 a 14:00h no Salón de Actos do Hospital do Salnés.

De estar interesados en asistir, é importante que avisedes   para adecuar o espazo, chamando o teléfono de secretaría de Dirección: 986 56 80 02  ou confirmando no teléfono 973533156 do Concello

Programa:

12:00 – 13:00: Actividades de fomento para unha alimentación sá.

13:00 – 13:30: Degustación de productos.

13:00 – 14:00: Charla “Carro da compra saudable, debemos fixarnos nas etiquetas?” impartida por Elena Allegue / Carmen N. Fernández (enfermeiras especialistas en nutrición).

A POLICÍA AUTONÓMICA E O SERVIZO DE GARDACOSTAS INTERVEÑEN 4.617 QUILOS DE XURELO EN RIBADUMIA

A Policía Autonómica de Pontevedra, en colaboración co Servizo de Gardacostas de Galicia, interveu o pasado venres un total de 4.617 quilos de xurelo tras un operativo na localidade de Ribadumia.

O obxectivo do dispositivo era controlar o transporte do peixe por estrada. Durante o transcurso do mesmo, inspeccionouse un camión que transportaba 1.325 caixas de xurelo, das que se comisaron 369 cun peso total de 4.617 quilos ao detectarse diferentes irregularidades na documentación e a trazabilidade do peixe.

O xurelo comisionado foi entregado ao Banco de Alimentos, levantouse unha acta de infracción e identificouse unha persoa. 

CURSO DE MANIPULADOR DE ALIMENTOS EN EXPOSALNÉS

O próximo mércores, día 28 de febreiro, ás 17:00h, a Oficina de Turismo de Cambados - Exposalnés, situada no Paseo da Calzada, s/n, acollerá un curso de Manipulador de Alimentos organizado pola empresa Enatop. Está dirixido a calquera persoa que o precise para traballar no sector da alimentación (hostalería, comercio, industria, pesca e marisqueo, agricultura, bodegas, etc.). Os interesados pódense inscribir e obter máis información no teléfono 636 53 57 60

A NUTRICIÓN NO DEPORTE BASE

En virtude do acordo de colaboración entre o Club Juventud Cambados e o Real Club Celta de Vigo, ambas entidades seguen organizando diversas actividades de xeito conxunto. A vindeira de elas terá lugar o vindeiro mércoles no auditorio de Cambados, dirixida a pais e nenos do noso fútbol base.

A actividade consistirá nunha charla que impartirá Federico Mallo Ferrer, Catedrático de fisioloxía e endocrinoloxía na Universidade de Vigo e nutricionista do primeiro equipo do Real Club Celta así como das súas categorías base. A temática da charla xirará entorno á importancia da nutrición no deporte base.

A charla comenzará 18:00 e a entrada é gratuita (ata completar aforo) polo que, desde o Club Juventud Cambados animan a todo o mundo a que asista a esta interesante ponencia.

FEIRAS TRADICIONAIS DOS PRODUCTOS DO MAR DA RÍA DE AROUSA

O domingo 25 de outubro ás 12:00 no Salón José Peña, realizaráse unha degustación de produtos da ría preparados de forma tradicional e contaráse con xogos para os máis pequenos. A entrada é de balde e adicada a todas as familias.

PROGRAMA DE INTERNACIONALIZACIÓN DO SECTOR AGROALIMENTARIO GALEGO

A Consellería de Traballo e Benestar e a Escola de Organización Industrial promoven un programa de asesoramento para a mellora da competitividade das cooperativas, SAT e confrarías de pescadores.

O programa consta de dúas partes:

A primeira parte consisitirá no estudo da cooperativa/SAT/Confraría para analizar o seu modelo de negocio actual e realizar un completo informe detallado que comprenderá tanto o modelo de negocio como as recomendacións para as potenciais melloras que se poidan introducir no mesmo.

Unha vez analizado e realizado o plan de negocio analizaráse a posibilidade de realizar unha estratexia de internacionalización personalizada para os participantes e adaptada ás súas necesidades, establecendo no caso de que non os tivera na actualidade, que recursos necesitaría e en que prazos sería convinte que fora introducindo a internacionalización na súa actividade, así como os mercados que resultarían máis axeitados a cada un deles.

A segunda parte consistirá na realización dun informe detallado e personalizado  da estratexia de internacionalización daqueles beneficiarios que no momento actual ou a medio prazo teñan maior potencial de acceso a mercados exteriores.

Que beneficios reciben os participantes?

Todos eles recibirán un plan de negocio detallado da súa actividade adaptado aos modelos solicitados polas institucións públicas, institucións financeiras, ou posibles colaboradores (inversores, distribuidores...). Plan que ademais é dinámico, aportando ao beneficiario as ferramentas necesarias para que o poida ir adaptando á evolución do seu negocio.

Todos eles recibirán un informe detallado do seu potencial presente ou futuro de internacionalización con recomendacións específicas para a adaptación da súa actividade aos mercados internacionais así como o tipo de mercados máis axeitados para cada un dos beneficiarios.

Os 30 beneficiarios con maior capacidade de internacionalización recibirán un plan de internacionalizaciónviable, personalizado e adaptado ás súas capacidades e expectativas.

Como o imos facer?

A través dun asesoramento personalizado a cada un dos beneficiarios nos seus propios centros de traballo e mediante citas previamente establecidas e acordadas co beneficiario

Cando o imos facer?

Ao longo do mes de outubro.

Quenes o imos facer?

Consultores e formadores homologados de EOI cun mínimo de 15 anos de experiencia tanto en empresa como en internacionalización e cun gran coñecemento das institucións.

Toda a información suministrada polos beneficiarios será de carácter confidencial.

ÉXITO DE ECOLOGICAL GALICIA EN CAMBADOS

Cambados acolleu esta fin de semana unha nova edición de Ecological Galicia. Esta feira, pensada para dar a coñecer os produtos con certificación ecolóxica, serviu de punto de encontro para un sector que non para de medrar. No 2014 facturou 31 millóns de euros, un 20% máis ca o ano anterior, e demostrou a súa capacidade para atraer mozos ao rural.

 Este é o terceiro ano que a feira Eco-Logical Galicia toma o centro de Cambados para amosarlles aos veraneantes os beneficios de consumir produtos ecolóxicos. Falamos de alimentos producidos sen axuda da química e co máximo respecto ao medio ambiente e ao benestar animal. Pero iso non é todo. Nas xornadas técnicas que se celebraron paralelas á feira, os expertos destacaron que o uso de técnicas agrícolas sustentables fai que os alimentos ecolóxicos sexan máis saudables e presenten un perfil nutricional mellor que os convencionais.

Cosmética, artesanía e sobre todo alimentación con selo ecolóxico chegados de toda España atraeron a atención dos visitantes. Entre os produtores amparados polo selo da Agricultura ecolóxica de Galicia, CREAGA, atopamos novidades como a dunha empresa coruñesa. Pratos precociñados ecolóxicos e vexetarianos, cun mes de caducidade, que venden por Internet para todos aqueles que queren comer san pero non teñen tempo para cociñar.

Na actualidade o CRAEGA conta con 703 produtores inscritos, entre produtores, envasadores e comercializadores. Destaca a incorporación de mozos que ven no ecolóxico a oportunidade de producir alimentos con garantías e valor engadido.

Os principais consumidores dos produtos ecolóxicos están no norte de Europa e agora tamén nos Estados Unidos. É o caso do viño ecolóxico cada vez máis demandado nos mercados internacionais. En Galicia xa hai exemplos de que é posible facer viño sen usar química grazas á loita biolóxica, os tratamentos autorizados e unhas prácticas culturais axeitadas.

Ecological Galicia tamén contou con obradoiros infantís para fomentar entre os máis cativos o respecto pola terra e trasmitirlles os valores da agricultura sustentable.

OFERTA DE EMPREGO EN CAMBADOS

A empresa Disalsa, adicada ao sector da alimentación, abrirá o vindeiro mes de outubro unhas novas instalacións no polígono industrial do Salnés. Trátase dunha sala de despece de polos, para a cal abre unha convocatoria para cubrir 22 novos postos de traballo.
Os interesados e interesadas poden entregar o seu CURRÍCULUM na oficina de orientación laboral situada na rúa Ourense nº8 (Edificio de Servizos Municipais) ou a través do email orientacion@cambados.es antes do 21 de agosto. Despois desa data, a empresa realizará un proceso de SELECCIÓN, para o cal serán notificados.

VOLVE A CAMBADOS "ECOLOGICAL GALICIA"

Ecological Galicia celébrase anualmente a segunda semana de agosto, de xoves a domingo.

Relatorios dous mellores profesionais do sector de diversos lugares de España con variadas temáticas, exposición de proxectos a realizar, novos produtos, degustacións, cursos, catas, encontros profesionais..., todo nun mesmo espazo ao longo de catro días.

Convidan a mergullarse non variado programa de actividades e desexamos velos na feira para probar, coñecer, debater, opinar, escoitar e en definitiva, axudar a construír o novo panorama  ecolóxico galego.


ACTIVIDADES

Xoves, 6 de agosto 2015

Venres, 7 de agosto 2015

Sábado, 8 de agosto 2015

Domingo, 9 de agosto 2015

Edición 2015:
Data de celebración: do 6 ao 9 de agosto
Horario da feira:
Apertura: 11:00
Peche: 21:30-22:00 prevese un descanso de 14:30-16:30, pero estará aberto o catering para quen desexe comer ecolóxico.
Lugar: Paseo da Calzada, Cambados (Pontevedra)

VOLVE ECOLOGICAL A CAMBADOS

Por terceiro ano, Cambados volve acoller a feira Ecological Galicia. Un proxecto que pretende impulsar a produción e comercialización dos produtos ecolóxicos en Galicia.

Expositores de varias partes de España daranse cita para darse a coñecer neste sector especializado e na restauración.

Ponencias:
Venres de 11:00 h - 14:00 h
Novas formas de desenvolver unha empresa agrícola
Relator: Santiago Pérez, Finca Los Cuervos

Sábado de 11:00 h - 14:00 h
Bosques e xardíns comestibles. Relator Lolo Andrade.

TÉCNICAS CULINARIAS SAUDABLES: POTENCIANDO E RESPECTANDO O POTENCIAL DO ALIMENTO.
Domingo de 11:00 a 14:00

Prezo: 15,00€/persona, pagamento mediante transferencia bancaria.
Mínimo 20 persoas. En caso de non chegar ao mínimo devolveriamos o importe.
Imparte: Silvia Méndez

UN PULO A DIETA ATLÁNTICA

Demostrar as propiedades anticanceríxenas dos grelos dos mexillóns ou do viño albariño e comprobar como mellora a saúde dunha familia que segue a dieta atlántica galega. Son dous obxectivos, ambiciosos, pero seis empresas galegas e o Centro Superior de Investigacións Científicas acaban de unirse nun proxecto único en España. 

Dende o centro de saúde da Estrada efectuaranse os controis sanitarios ás familias que participan no ensaio clínico. Durante seis meses, 150 familias galegas alimentaranse con menús nutricionalmente saudables que inclúen alimentos autóctonos galegos.

Os alimentos serán cedidos por seis empresas galegas, que traballarán xunto con sete grupos científicos. Porque o outro enfoque do proxecto é demostrar as propiedades saudables de alimentos coma o viño branco albariño, o aceite galego e os grelos; e mesmo intentar aumentar esas propiedades, modificando cambios no cultivo e nos procesos de conservación.
O obxectivo de Galiat 6+7 é demostra-los beneficios saudables da dieta atlántica, ao tempo que se mellora a competitividade empresarial de Galicia.

SR.FEIJÓO MENOS DISCURSO E MÁIS TRABALLAR POR GALICIA

O presidente da Xunta, Alberto Núñez Feijóo, destacou o domingo que Galicia conta con “excelentes” produtos agroalimentarios, artigos “excepcionais e diferenciados” que ofrecen potencialidades que “debemos aproveitar e acrecentar”. Por suposto.

Por un lado, proxectan o rural galego como un lugar axeitado para vivir, cheo de posibilidades e de oportunidades, como espazo xerador de riqueza e de emprego; e, polo outro, constitúen un elemento “esencial” dun dos grandes atractivos turísticos da nosa comunidade, a enogastronomía, a segunda motivación -tras a natureza- pola que os turistas nos elixen como destino. “Creo que é unha gran maridaxe que paga a pena potenciar; porque a nosa terra conta con todos os ingredientes para producir os mellores manxares”, manifestou o titular da Xunta.

Pero todo esto vaise o garete cando vemos en tendas e supermercados productos de fora de Galicia etiquetados coma galegos. Sexan do mar ou da terra sempre atoparemos este tipo de etiquetas que non fan máis que desprestixiar os nosos productos, aparte da competencia desleal.
Todo isto evitaríase con máis controis e sancións aos que incumplan coa normativa.
Pero, como van loitar contra que fai grandes aportacións as campañas do PP?

Un “selo diferenciador”, dixo, que xorde do “continuo esforzo dos traballadores do agro galego”, que desde as súas pequenas explotacións espalladas ao longo do mapa “miman día a día a materia prima, animados pola seguridade e pola confianza que proporciona o traballo ben feito”, afirmou. Dende logo pouca confianza poden ter cando ven que o seu traballo é máis apreciado fora que na nosa terra.

“Eles, ao igual que os que aquí estades presentes, co labor cotiá contribuídes a que a Marca Galicia se vaia abrindo camiño e conquistando mercados”. Unha tarefa, engadiu, na que as 30 Denominacións de Orixe e Indicacións Xeográficas Protexidas existentes en Galicia xogan un papel de liderado “fundamental”.

Na foto vedes un exemplo claro do que decimos aínda que non é "produto galego" en grandes superficies galegas está a ocurrir pero con produto da nosa comunidade. Bueno, produto de fora ao que bautizan coma galego.

RECOLLIDA DE ALIMENTOS DO PSOE CAMBADÉS PARA OS MÁIS NECESITADOS

Os Socialistas de Cambados solicitan un ano máis a colaboración de todas aquelas persoas que desexen participar na recollida de alimentos que fan nestas datas en beneficio de Cáritas de Cambados.

A situación que viven moitas persoas do noso entorno fai necesaria esta recollida porque entenden que unha asociación como Cáritas é primordial para atender a moitas familias cambadesas que o están  a pasar mal. Ademáis hai que ter en conta que o número de usuarios de Cáritas incrementouse ó longo deste ano e as axudas administrativas en cambio disminuíron, todo elo sumado á suba de taxas do noso Concello e ó conseguinte empobrecemento da poboación.

“Este é xa o tercer ano que levamos a cabo esta iniciativa baixo o lema “Un Nadal para todos”, e a verdade é que estamos moi satisfeitos cos resultados acadados ata agora. En Cambados encontramos xente moi solidaria que nestas datas se compromete a axudar ós máis necesitados. O primer ano recolléronse tamén multitude de xoguetes que foron repartidos entre usuarios de Cáritas e de Amigos de Galicia”.

 A entrega de alimentos non perecedeiros pode facerse nos supermercados e nos colexios colaboradores que teñan o cartel da campaña de recollida, así como nos propios locales de Cáritas de Cambados que están situados na Igrexa Parroquial. O horario para a entrega nos locales de Cáritas será de luns a venres de 18.00 a 21.00 horas.

 Esperamos que un ano máis a a sociedade cambadesa se volque de novo con esta iniciativa a favor dos máis desfavorecidos do noso pobo.