OUTRA EMPRESA DO SALNÉS ACADA O SELO "GALICIA CALIDADE"

A Vicepresidencia segunda e Consellería de Economía, Empresa e Innovación, a tráves de Galicia Calidade, vén de incorporar ao selo autonómico produtos das empresas alimentarias Grupo Leche Río (Lugo), Conservas del Noroeste (Vilaboa) e as adegas Gran Bazán (Vilanova de Arousa) e Finca Millara (Pantón), logo de superaren os controis de calidade realizados pola entidade pública. Con estas novas adhesións o selo de garantía suma os produtos e servizos de máis de 135 empresas galegas. Hai que lembrar que recentemente Galicia Calidade tamén incorporou as empresas Viña Costeira, Confraría de Pescadores San Bartolomé de Noia, Freshcut e Pementos Carmucha.

A marca de garantía continúa na súa labor de certificación das empresas máis representativas do sector alimentario galego. No ámbito do sector lácteo galego, son xa tres empresas punteiras as que contan co distintivo: Feiraco, Larsa e agora Leite Río, tanto para as marcas Leite Río como para Leyma. No ámbito da conserva, coa chegada de Conservas del Noroeste, que conta como marca máis coñecida Cabo de Peñas, Galicia Calidade conta tamén coas empresas Jealsa e Luís Escurís Batalla, en peixe, e Conservas a Rosaleira no mundo vexetal.

No referente ao sector vitivinícola son xa 18 as adegas que contan cos seus viños amparados polo selo de calidade, onde están presentes as cinco denominacións de orixe. Na D.O. Rías Baixas coa chegada de Gran Bazán, son xa 8 as adegas certificadas: Adega dos Eidos, Adega Valdés, Terra de Asorei, Altos de Torona, Paco & Lola, Señorío de Rubiós e Valtea. Na Ribeira Sacra, Finca Millara súmase a Regina Viarum e Vía Romana. Ademais, a D.O. Valdeorras conta con tres adegas: A Coroa, Ruchel e Terriña; Monterrei suma dúas adegas, Gargalo e Quinta do Buble; e o Ribeiro coa recente incorporación de Viña Costeira suma dúas adegas xunto a Bodegas Nairoa.

Galicia Calidade conta na actualidade con máis de 400 produtos certificados de máis de 135 empresas galegas, onde o sector alimentario e o sector turístico- hoteis, restaurantes, casas rurais e clubes náuticos- suman case o 90% do total.

DUAS RUTAS TURÍSTICAS CON PASO POLO SALNÉS DISTINGUIDAS COA "Q" DE CALIDADE

A directora de Turismo de Galicia, Nava Castro, salientou hoxe o carácter pioneiro de Galicia ao contar coas primeiras rutas Q de Calidade Turística, os itinerarios identificados pola súa excelencia turística e que, de xeito piloto, se está a experimentar en territorios vitivinícolas galegos e no Camilño de Santiago.

Así o manifestou durante o V Congreso Internacional de Calidade Turística que se está a celebrar desde hoxe en Tenerife onde participou na mesa redonda A enogastronomía de calidade como oportunidade de desenvolvemento local. Durante a súa intervención, Nava Castro salientou a colaboración materializada este ano entre a Xunta e o Instituto para a Calidade Turística Española (ICTE) coa que a marca Q se estenderá ás Rutas do Viño de Galicia e ao Camiño de Santiago a través do proxecto pioneiro Galicia, apostando pola calidade.

Como recordou, ao abeiro deste acordo impulsarase a creación das chamadas Rutas Q, unha figura pioneira en España onde se inclúen como proxecto piloto o Camiño Portugués e a Ruta do Mar de Arousa e Río Ulla, así como as Rutas dos Viños das Denominacións de Orixe Rías Baixas e Ribeira Sacra. E especialmente nestas últimas, nas referidas aos territorios vitivinícolas Nava Castro centrou o seu relatorio.

Tamén salientou as diferentes iniciativas postas en marcha co apoio do sector onde o enoturismo ten un gran peso como as xornadas de portas abertas das rutas dos viños, ou propostas como o spa viñoterapia en Leiro, a sinalización das rutas do viño, a creación do Museo do Viño de Galicia e mesmo a conservación dos lagares rupestres de Oímbra.

A ADEGA TERRA DE ASOREI RECIBEU HOXE O SELO "GALICIA CALIDADE"

O conselleiro de Economía, Emprego e Industria, Francisco Conde, destacou hoxe na visita á adega Terra de Asorei en Meis a aposta da Xunta por unha industria galega do viño que combine calidade con tradición e innovación para seguir medrando. É o caso de Terra de Asorei que hoxe recibiu oficialmente o selo de Galicia Calidade e conta coas técnicas máis avanzadas de tratamento e elaboración.

O titular de Economía definiu o proxecto como “moderno e diferenciado” no Salnés que se está a posicionar nunha comarca que destaca polos seus caldos, xa que desenvolve na súa xestión as claves para o éxito no mercado que, segundo Conde, son o coñecemento, a innovación, o produto de calidade e o entusiasmo e paixón.

De feito, nas súas novas instalacións, o titular de Economía explicou que mesturan o coñecemento empresarial e adegueiro coas últimas innovacións en tecnoloxía e equipamento. A aposta pola modernización, un feito no que incide o Goberno galego para que a industria galega sega crecendo e exportando, permítelle na actualidade á adega do val do Salnés unha capacidade para producir 400.000 botellas ao ano. A empresa produce na actualidade nas súas 60 hectáreas de viñedo tres marcas da D.O Albariño e exporta a unha decena de países, onde factura hoxe en día o 35% das súas vendas. A compañía non só está presente en países europeos como Reino Unido ou Holanda, senón tamén en Estados Unidos e Xapón.

Terra de Asorei centra os seus investimentos en mellorar a produción, o que repercute nun control máis exhaustivo da calidade da uva durante todo o proceso, desde a cepa ata a súa elaboración e posterior comercialización.

Galicia Calidade, tal e como explicou o conselleiro, quere acompañar a todas aquelas bodegas que, como Adega Terra de Asorei, están a traballar pola mellora constante dun viño asegurando que é a fórmula para competir nos mercados internacionais máis esixentes e satisfacer as demandas do consumidor. “Galicia Calidade está ao servizo das empresas para axudarlles nos procesos de internacionalización, sempre vincualdos ao territorio e a tradición”, engadiu.

Para rematar, incidiu na posta en valor do sector vitivinícola que, segundo apuntou, enriquece o valor turístico de Galicia e a calidade que exporta a economía galega. 

Seis familias da Comarca do Salnés con longa tradición adegueira e vinícola que uníronse a principios do século XXI. Co obxectivo de mellorar os nosos sistemas de elaboración dun albariño 100 % de alta calidade, continuar coa modernización para crear viños albariños con personalidade e que buscan a excelencia. E como empresas familiares manter os proxectos adaptándose a un mundo aberto e cambiante. Esta aposta pola calidade foi tamén o paso da empresa familiar á profesional.

ONTE PRESENTOUSE O SELO DE CALIDADE SICTED

A Deputación de Pontevedra impulsa o certificado de calidade SICTED entre o sector turístico de Cambados

O deputado de Turismo, Santos Héctor, destaca que xa son 22 empresas as que solicitaron a súa certificación en apenas un mes

A Deputación de Pontevedra está a impulsar ao longo deste ano un plan de asesoramento gratuíto entre as empresas turísticas da provincia para implantar o certificado de calidade SICTED. O deputado de Turismo, Santos Héctor, subliñou hoxe, nunha sesión informativa sobre o proxecto que se desenvolveu en Exposalnés en Cambados, que en apenas un mes xa son 22 empresas as que solicitaron a súa certificación.

Na presentación da certificación de calidade que tivo lugar en Exposalnés o deputado provincial estivo acompañado pola concelleira de Turismo de Cambados, Milagros Martínez, o presidente da asociación de comerciantes e empresarios da Zona Centro, Juan Rey; e Tania Abalde, técnica da consultora que desenvolve o proxecto SICTED na provincia. Segundo destacou Santos Héctor, tras os primeiros encontros co sector desenvolvidos en Vigo, Bueu e Pontevedra, foron 22 empresas as que solicitaron a súa certificación, "o que nos sitúa moi próximos ao cincuenta por cento dos obxectivos que nos marcamos ao comezo desta iniciativa para este ano".    

O deputado de Turismo recordou que neste momento existen 203 empresas na provincia que contan co certificado SICTED e que a previsión é que este ano se superen as 250, tal e como se puxo xa de manifesto.

Tania Abalde, responsable da empresa consultora que vai implantar a certificación, insistiu en que a metodoloxía e os requisitos son esixidos pola Secretaría de Turismo do Goberno de España, que é quen finalmente outorga a distinción.

Para poder optar á certificación as empresas deben estar englobadas nalgún dos 32 oficios que identifica o SICTED: praias; bares e cafeterías; axencias de viaxe; guías turísticos; seguridade cidadá; comercios; cámpings; adegas; portos deportivos; palacios de congresos; hoteis e apartamentos; turismo industrial; servizos de limpeza; taxis; albergues; convention bureaux; outros servizos; aloxamentos rurais; artesáns; atraque de cruceiros e ferries; servizos turísticos de saúde; empresas de transporte turístico; estacións de esquí e montaña; espazos naturais protexidos; oficinas de información turística; museos e centros de interese turístico; empresas de turismo activo; escolas de español para estranxeiros; aluguer de vehículos e embarcacións de recreo; campos de golf e campos de pitch&putt; restaurantes e empresas turísticas de cátering.

As empresas terán ata o próximo día 14 de setembro para adherirse ao proxecto. Posteriormente, abrirase un proceso de formación e asesoramento individual a cada empresa para concluír coa avaliación final. Por último, será Turismo Rías Baixas quen valore as propostas que finalmente obteñan a certificación.

Esta sesión de Cambados é a cuarta que desenvolven os técnicos cos empresarios do sector turístico para promover a adhesión das empresas á certificación SICTED. Agora resta desenvolver, en breve, outras dúas en Cangas e Vilagarcía de Arousa. 

AROUSÁNS EN CHUECA, MADRID

A Consellería de Economía e Industria, a través de Galicia Calidade, achegará ao mercado madrileño de San Antón, concretamente no barrio de Chueca, a excelencia dos produtos gastronómicos galegos cunha iniciativa que se desenvolverá o vindeiro venres día 28 e o próximo sábado 29, e que inclúe showcookings e degustacións.

Mark Wernink 

Más de 20 empresas de distintos sectores estarán representadas nas demostracións e talleres que se realizarán no popular recinto comercial realizados por destacadas figuras da gastronomía e sumillería galega como son o premio nacional de gastronomía Kike Piñeiro, coordinador do apartado gastronómico; Óscar del Toro, mellor barista galego 2010 e 2011, e Óscar Quintana, nariz de ouro 2014 da zona norte. Completan o equipo de profesionais Iván Méndez, Eloy Cancela, Mark Wernink, Conchi Peiteado e Miguel Ibáñez.

Na planta baixa recibirase aos cidadáns con cafés de pota realizados con auga mineral, froita fresca ou mesmo tarta de Santiago, todos os produtos certificados por Galicia Calidade. Ademais tamén se ofrecerán outros produtos como xamón, queixo, merluza do pincho, pan, tenreira galega, castañas, todo aderezados cos mellores caldos, cervexa e licores.

Entre as empresas particantes a acción contará coa presenza de Estrella Galicia, Cabreiroá, Coren, Torre de Núñez, Ingapán, Hornos San Fiz, Luís Escurís Batalla, Merluza do Pincho, Aguas de Mondariz, Gargalo, Grupo HGA Bodegas, Valtea, Bodegas Nairoa, Bodegas Ruchel, Castro Baroña, Adega dos Eidos, Customdrinks, Pazo Vilane, Caracoles do Gallo, Patatas Conde, Queixería Cas Leiras e Kiwi Atlántico. Ademais tamén contará coa presenza das Indicacións Xeográficas Protexidas como Ternera Gallega ou Castaña de Galicia.

Vista do mercado madrileño

Con esta acción Galicia Calidade busca promocionar os produtos fóra da nosa comunidade e directamente no punto de venda, onde os consumidores podan apreciar a calidade dos produtos galegos. Na actualidade, cada día é máis importante para as empresas estar presentes onde os consumidores elixen os produtos, e onde se pode incidir nesta toma de decisións.

Entre as actividades a desenvolver cada día haberá showcookings cos produtos das empresas participantes entre as 12.30 e as 15.30 horas. Pola noite, acompañados dos produtos da empresa Hijos de Rivera, programarase unha “tapas en lata”, poñendo en valor a industria conserveira galega, todo aderezado con música en directo. O recinto acollerá tamén unha exposición de Artesanía de Galicia.