A DEPUTACIÓN DE PONTEVEDRA DENUNCIARÁ AO ALCALDE DE VILANOVA POR INCITACIÓN AO ODIO

Os servizos xurídicos da Deputación de Pontevedra presentarán nos tribunais de Xustiza unha denuncia "fronte aos ataques machistas, ás inxurias e ás calumnias", pero tamén "fronte á posible incitación ao odio" que, a xuízo do goberno provincial, supoñen as declaracións do alcalde de Vilanova de Arousa, Gonzalo Durán nas que dixo que a presidenta da administración provincial, Carmela Silva, era a " chacha para todo" do "ancián" alcalde de Vigo, Abel Caballero. Este luns compareceu en rolda de prensa o portavoz do goberno da Deputación de Pontevedra (PSOE+BNG) Carlos López Font que anunciou que os servizos xurídicos da Deputación de Pontevedra traballan xa na redacción dunha denuncia contra este alcalde do Partido Popular. Ademais de condenar as manifestacións do rexedor vilanovés e solicitar a súa dimisión, López Font instou aos cargos da Xunta de Galicia e do Partido Popular a pronunciarse e condenar este tipo de actitudes "de tal gravidade que non se trata dunha defensa da persoa", neste caso da presidenta da Deputación, senón de "saír con valentía" ante un "ataque á dignidade de todas as mulleres".

O portavoz do goberno provincial tamén anunciou que a presidenta da Deputación "non se vai a volver referir a este señor". López Font asegurou que, como goberno da Deputación, "no que temos a bandeira da igualdade desde o minuto uno", teñen o "deber político" de poñerse de fronte a todos aqueles que utilicen "comportamentos e unha linguaxe machista contra as mulleres", cualificando de "linguaxe bélica" o que utilizou o Gonzalo Durán. "Non imos consentir estes ataques machistas, clasistas e fascistas; e moito menos en voz daqueles que ostentan cargos públicos e que estes ataques poidan quedar impunes", destacou o portavoz do goberno provincial. Este deputado lembrou que no caso concreto do alcalde de Vilanova de Arousa "reitérase neste tipo de comportamentos" con "insultos á presidenta da Deputación de Pontevedra única e exclusivamente polo feito de ser muller". Neste sentido, lembrou que esas declaracións realizáronse o venres "e reafirmáronse o domingo" polo que López Font dixo que "non podemos entender" como o presidente da Xunta de Galicia, Núñez Feijóo, e o vicepresidente, Alfonso Rueda, "aínda non saíron a condenar este comportamento do seu alcalde en Vilanova".

Igualmente referiuse ao "silencio" de Susana López Abella, secretaria de Igualdade da Xunta de Galicia, engadindo que "se non sae de forma inmediata a expresar o seu total e contundente rexeitamento a estas manifestacións machistas do señor Durán, quedará inhabilitada para exercer a función que lle corresponde que é a de representar ás mulleres na administración autonómica". Carlos López Font entende que se empeza insultando á muller, sendo peyorativo con ela e continúase coa violencia de xénero e matándoa. A secuela da violencia machista, segundo o deputado provincial, ten orixe neste tipo de descualificacións. "O que non se manifesta en contra é cómplice", apuntou. Ademais, indicou que non é a primeira vez que se realizan declaracións como esta contra a presidenta da Deputación Provincial por ser muller e lembrou a dimisión de Jorge Caldas, concelleira do PP de Moraña, que cualificara a Carmela Silva de "mala zorra" e "sinvergüenza".

CARMELA SILVA ENXALZA AO CONCELLO DE CAMBADOS POLA FESTA DO ALBARIÑO "MÁIS FEMININA DA HISTORIA"

A presidenta da Deputación de Pontevedra, Carmela Silva, xunto á alcaldesa de Cambados, Fátima Abal, inauguraron esta mañá a LXVI Festa do Viño Albariño que este ano presenta a súa edición "máis feminina da historia". Neste eido, Silva puxo en valor a aposta do Goberno local de Cambados por poñer en marcha iniciativas para promover a igualdade entre mulleres e homes, loitar contra as violencias machistas, apostar pola sustentabilidade e acadar a excelencia para converterse "estou segura que moi pronto en festa de interese turístico internacional".

Carmela silva destacou o carácter da festa "que fala do que somos nós, do que son as Rías Baixas, a provincia de Pontevedra e Cambados. Podemos presumir, sen medo a que ninguén diga que somos excesivamente presumidas e presumidos, que temos o mellor viño branco do mundo, un viño cada vez máis recoñecido e internacionalizado e que é protagonista desta festa en Cambados".

A presidenta provincial afirmou que "este ano a festa ademais de ser extraordinaria fai unha importante aposta pola igualdade". Neste eido, Carmela Silva felicitou á alcaldesa por decidir que por vez primeira unha muller cambadesa, Merchi Álvarez, fai lectura do pregón e tamén por vez primeira unha muller, Menchu Lamas, encargarase do discurso do xantar do Albariño.

Ademais, a presidenta da Deputación destacou a incorporación dun punto morado durante os festexos para loitar contra as agresións sexuais que sofren as mulleres e a aposta pola sustentabilidade. Neste aspecto, a Deputación de Pontevedra dispuxo durante a festa un stand da campaña "Somos historias, somos sostibles", desde o que se vai dinamizar e concienciar á poboación para preservar e coidar o Medio Ambiente.

Pola súa banda, Fátima Abal puxo en valor o ambiente da festa e animou á xente a que se achegue estes días a Cambados a gozar da ampla oferta cultural, musical, vitivinícola e gastronómica da vila.

Este ano Cambados acolle a edición número sesenta e seis da Festa do Albariño, unha das festas decanas na honra dun viño de España. No ano 1977 foi declarada de interese turístico galego e no 1990 de interese turístico nacional e actualmente aspira á catalogación de festa de interese turístico internacional. Para este ano o concello ten preparada unha ampla oferta lúdica, cultural e musical, que completa as degustacións de viño Albariño e da gastronomía típica das Rías Baixas.

CARMELA SILVA ARREMETE DURAMENTE CONTRA FEIJÓO E RUEDA

Convida a Feijóo a "abandonar toda esperanza" de gobernar na Deputación Pontevedra tras as eleccións municipais de 2019 A presidenta da Deputación de Pontevedra, Carmela Silva, mostrouse "asombrada" polo uso "partidista" que, segundo di, fai o Goberno autonómico do diñeiro público. "Non chega nin un euro para os concellos gobernados por PSOE, BNG ou En Marea", denunciou. Nunha entrevista concedida este venres á Cadea Ser, Silva criticou a repartición de fondos "clientelar" que "subvenciona" os municipios onde goberna o PP. "Eles non entenden que gobernan para todos os galegos", esgrimiu. Así, a presidenta da Deputación de Pontevedra acusa o presidente galego, Alberto Núñez Feijóo, e ao vicepresidente, Alfonso Rueda, de "falta de lealdade" co organismo provincial, algo que, para Silva, é o seu "modo habitual" de gobernar. MUNICIPAIS DE 2019 Noutra orde de cousas, coa vista posta nos comicios municipais de 2019, a socialista tamén admitiu estar "convencida" de que o PSdeG poderá manter o goberno da Deputación. Neste sentido, Silva dixo "saber" que lle espera un ano "de confrontación total" cos demais partidos. "Pero estou afeita enfrontarme a este tipo de situacións, a esa política de destrución do PP", engadiu. "Sinto moito dicirlle ao señor Feijóo que abandone toda esperanza de recuperar a Deputación de Pontevedra porque o PP non volverá gobernar en moito tempo", expresou, para logo insistir no "desgaste moi importante" dos populares tanto en España como en Galicia, onde o presidente e o seu Executivo, ao seu modo de ver, "demostran unha gran incapacidade para responder os retos do século XXI". Así, Silva recoñeceu que as municipais serán "determinante" para a dirección do PSdeG, que estará "á altura". Ademais, destacou que "a nivel local, os alcaldes socialistas están moi consolidados na provincia de Pontevedra", onde, segundo asegurou, "volverán gobernar".

DIMITE O CONCELLEIRO DE MORAÑA QUE INSULTOU A CARMELA SILVA

O concelleiro do Partido Popular de Moraña, Jorge Caldas, que chamou "mala zorra y sinvergüenza" á presidenta da Deputación de Pontevedra, Carmela Silva, presentou esta tarde a súa dimisión.

Nun comunicado remitido polo PP de Pontevedra, o edil confirma a súa "renuncia voluntaria" como concelleiro e tenente de alcalde neste municipio pontevedrés.

Jorge Caldas asegura que o comentario que realizou na súa "conta particular" de Facebook é "ofensivo" e "inadecuado" e sinala que "non se corresponde coa miña opinión persoal acerca da señora Silva".

O edil entende que esta expresión "inxustificada" e "inxustificable" non se corresponde cunha relación "lóxica" entre adversarios políticos.

En todo caso, Caldas lembra que o contexto no que se produciu este comentario foi o da "frustración" polas diferenzas xurdidas coa Deputación sobre a cancelación do rally Rías Baixas, aínda que reitera que esta "discrepancia" non xustifica o "insulto persoal que proferín".

Con este comunicado, o edil popular traslada de forma "expresa e sentida" o seu arrepentimento polo "erro" cometido e pide perdón á presidenta da Deputación.

O PLAN CONCELLOS DA DEPUTACIÓN CONTARÁ CON O 30% MÁIS DE DIÑEIRO

A presidenta da Deputación de Pontevedra, Carmela Silva, salientou hoxe, na presentación do Plan Concellos 2016, que os fondos económicos se incrementarán nun trinta por cento con respecto ao que se dispoñía en anteriores exercicios. Así, subliñou que serán 40 millóns de euros os que se

repartirán os 60 concellos da provincia que se inclúen no Plan Concellos 2016.

Carmela Silva destacou que en 2015 foron 24 millóns os dedicados aos concellos e os seis millóns de libre disposición do presidente, fronte aos 40 millóns para o 2016, onde os criterios de repartición son transparentes e coñecidos por todos e todas. "A libre disposición do presidente é a espada do clientelismo, caciquismo e a discriminación, algo que agora eliminamos", sinala Silva.

A presidenta, que compareceu ante os medios acompañada polo vicepresidente, César Mosquera, salientou que os concellos poderán determinar a elección dos investimentos e actuacións subvencionables que desexen realizar dentro das catro liñas de axuda coas que vai contar o plan: para investimentos, propios ou cofinanciados con outras administracións; para amortización de créditos bancarios, pagamento de débedas a acredores e pagos de gastos correntes; para actividades culturais, deportivas, sociais, turísticas e actividades medioambientais; e a última das liñas, para a creación de emprego destinado ao funcionamento dos servizos municipais.

Os outros 24 millóns de euros do plan vanse repartir atendendo a tres criterios básicos: a poboación de cada concello, a súa superficie e os seus núcleos de poboación. Precisamente este último criterio, que se introduce para 2016, pretende primar a dispersión poboacional  e a dificultade de prestar servizos a estes núcleos illados.

Ademais, inicialmente estes 24 millóns de euros contan cunha distribución previa en tres grupos de concellos. Os concellos de menos de dez mil habitantes contarán con 7,2 millóns; os concellos de entre dez mil e vinte mil habitantes terán 9,6 millóns; e os concellos de entre vinte mil e cincuenta mil recibirán 7,2 millóns de euros.

Pola súa banda, o vicepresidente, César Mosquera, destacou como un orgullo o traballo feito para acadar un plan para todos os concellos con estas cantidades económicas e, sobre todo, "renunciar á libre disposición, que parecía unha tolería, renunciando expresamente a calquera discrecionalidade". Mosquera tamén subliñou o compromiso de permanencia deste plan e o respecto á autonomía total dos concellos.

A PRESIDENTA DA DEPUTACIÓN VISITA CAMBADOS

A Presidenta da Deputación de Pontevedra, Carmela Silva, sinalou hoxe, tras a entrevista co goberno municipal de Cambados coa súa alcaldesa a fronte, Fátima Abal, o estudo para optar a fondos europeos que garantan a formación e a recolocación de traballadores do sector do mar.

Silva subliñou que xunto a Cambados son moitos os concellos da provincia onde os traballadores do sector do mar teñen moi complicada a súa recolocación noutros sectores laborais e "as administracións non poden mirar ate outro lado e a Xunta e o Goberno teñen as súas responsabilidades". Pero destacou a necesidade de xuntar a todos estes concellos e á Deputación para estudar a posibilidade de contar con algún fondo europeo para actividades en declive para garantir a formación e recolocación destes traballadores noutros sectores laborais.

De todos os xeitos, a Presidenta da Deputación confirmou a Fátima Abal que levará á xuntanza con Núñez Feijoo o tema dos traballadores do mar que, non só en Cambados, senón en toda a provincia ten unha incidencia moi alta. Igualmente outros dos aspectos sobre que preguntará ao presidente da Xunta de Galicia é sobre as previsións da administración autonómica sobre o centro de día de Cambados.

Na xuntanza coa alcaldesa e o equipo de goberno cambadés a Presidenta da Deputación asegurou que vanse a corrixir todas as deficiencias atopadas no pavillón do IES Cabanillas que foi inaugurado a toda presa polo anterior presidente Rafael Louzán e que ten moitos problemas.

No encontro abordouse tamén a creación por parte da institución provincial do servizo de asesoramento xurídico-técnico aos concellos como unha ferramenta fundamental para a laboura de colaboración da Deputación cos municipios de toda a provincia. Carmela Silva tamén informou aos concelleiros do goberno do novo fondo de cooperación local  que garantirá que sexan as institucións municipais quenes dirixan as actuacións e subvencións da Deputación en cada concello.

Por último, a preguntas dos xornalistas a Presidenta da Deputación anunciou a presenza do colectivo de bombeiros forestais no pleno da institución provincial, que celebrará  a finais de mes, para explicar  as súas demandas sobre a súa situación laboral e profesional.

NOVO PLAN DE EMPREGO DA DEPUTACIÓN

A presidenta da Deputación de Pontevedra confirma "un cambio radical" no modelo do fomento do emprego para loitar contra a precariedade laboral e anuncia que o novo plan que aprobará o Pleno provincial o día 25 de setembro creará emprego de calidade e de respecto aos dereitos dos traballadores. "Era unha demanda de todas as alcaldesas e alcaldes da provincia e esta é a nosa resposta, o plan de emprego vaise a prorrogar pero con melloras moi substanciais nas condicións laborais. Fronte a xornadas de 25 horas e salarios de máis ou menos 400 euros, pasarase a unha xornada de 35 horas e máis de 900 euros", dixo Carmela Silva. "Nós somos moi críticos co modelo laboral existente. Non queremos un emprego precario senón traballo de calidade e con dereitos.  Non é asumible unha xornada de 25 horas porque ademais dificulta o traballo que hai que realizar, pero o que é máis preocupante é que houbese salarios de miseria, que é o que se percibía. Agora teremos un plan de emprego respectuoso coa dignidade das persoas".

A presidenta da Deputación insistiu en que "o desemprego e a precariedade no traballo é o problema máis importante ao que nos enfrontamos os cidadáns. As administracións debemos ter as politicas de emprego como un eixe fundamental cando, ademais, ese emprego facilita que os concellos poidan seguir prestando servizos básicos e dar resposta ás demandas de cidadás e cidadáns".

Os 1.550 postos de traballo do novo plan de emprego repártense en función da poboación. Aos concellos de ata 2.000 habitantes correspóndelles un total de 70 traballadores. 360 postos de traballo son para os municipios da provincia de entre 2.000 e 5.000 habitantes, o mesmo número de empregos que para os concellos de entre 5.000 e 10.000 habitantes. Os municipios de entre 10.000 e 20.000 contarán con 450 novos traballadores. Outros 238 empregos repartiranse entre os concellos de entre 20.000 e 50.000 habitantes e 72 traballadores serán para os municipios de máis de 50.000.

A presidenta da Deputación de Pontevedra tamén adiantou que xa se traballa para que os programas de emprego de 2016 sigan os mesmos criterios e condicións laborais que as deste plan, que sairá adiante o próximo día 25.

CARMELA SILVA VISITARÁ OS CONCELLOS DE PONTEVEDRA ANTES DE FINAIS DE NOVEMBRO

Tras os encontros cos alcaldes de Pontevedra e Vilagarcía Carmela Silva  inicia este mércores, en Cangas e Silleda, as visitas institucionais ao resto dos municipios da provincia. A presidenta da Deputación percorrerá nos próximos dous meses e medio os 62 concellos pontevedreses, onde manterá reunións cos alcaldes e alcaldesas para coñecer de primeira man as necesidades e inquietudes de cada localidade e para explicarlles persoalmente o novo modelo de relación cos municipios implantado polo goberno provincial.

Silva cumpre así co seu compromiso, xa expresado no seu discurso de investidura, para que a Deputación se convirta nunha institución intermunicipal e non supramunicipal e que os concellos e os seus representantes sexan os verdadeiros interlocutores da institución provincial.

Este mércores 16 a presidenta visitará os concellos de Cangas e Silleda e, nos días que restan de setembro, os de Pontecaldelas o día 17, Marín e Redondela o 28, Lalín, A Illa e A Guarda o 29 e A Estrada e Ponteareas o día 30.

CARMELA SILVA ANUNCIA UN NOVO PLAN DE EMPREGO

A presidenta da Deputación de Pontevedra, Carmela Silva, anunciou a incorporación de máis de cinco millóns de euros de remanentes de tesourería, dos cales máis de dous millóns se destinarán a poñer en marcha un novo plan de emprego para os concellos da provincia.

Silva sinalou que pretende seguir garantindo o traballo de persoal cualificado nos concellos ante as dificultades que teñen estas institucións para a contratación de novo persoal. A presidenta subliñou que o máis importante é que este novo plan de emprego pretende garantir unhas mellores condicións económicas para os traballadores. "Queremos que o próximo Pleno de fin de setembro poida aprobar a incorporación destes remanentes e a posta en marcha do plan pero tamén estamos a traballar na modificación das bases, de xeito que estes traballadores poidan cobrar salarios dignos e teñan unha xornada normal", afirmou Silva.

No que vai de ano estivéronse desenvolvendo 198 bolsas de práctica laboral na Deputación e nos concellos da provincia de Pontevedra. Moitos destes bolseiros renunciaron por conseguir traballo durante o período de prácticas e a maioría finaliza o seu traballo neste ano.

Comprobado o resultado positivo destas bolsas e a demanda crecente de persoal con diferente especialización que solicitan os concellos decidiuse volver a convocar unhas bolsas que atendan os obxectivos de eficacia e axilidade dos concellos e a demanda de emprego dos profesionais que non poden acceder con facilidade ás tarefas municipais.

Deste xeito, garántese que os puntos de información turística do aeroporto de Peinador e dos concellos de Bueu, Poio, Cambados, Baiona, Tui e Pontevedra, entre outros, manteñan a súa actividade durante outros seis meses. Esta prórroga dos bolseiros solicitárona os propios titores designados polos concellos.

Por último, Carmela Silva tamén destacou a concesión de 1,3 millóns de euros por parte do Ministerio de Educación para poñer en marcha o programa "PracticumDepo 2015", que está orientado a completar a formación dos mozos e mozas, a mellorar o seu dominio dos idiomas e a ampliar as súas posibilidades de inserción laboral.

En concreto, trátase de que os recén titulados en FP poidan realizar prácticas en empresas no estranxeiro. Nesta primeira fase 46 escolares partirán a Irlanda e Italia para traballar en empresas da súa rama formativa.

Os alumnos e alumnas que participarán neste proxecto corresponden a centros educativos de Vigo, Pontevedra, Ponteareas, Vila de Cruces, Silleda, Salvaterra de Miño, Tomiño, Marín Sanxenxo e Moaña.

Os centros de FP que participan no programa PracticumDepo 2015 son:

Seis centros de Vigo (IES A Guía, Ricardo Mella, Centro de Artes Plásticas e Deseño Atlántico, Chapela, Politécnico e Centro de Formación Divino Maestro);

Tres centros de Pontevedra: (Centro de Formación e Experimentación Agroforestal de Lourizán, IES A Xunqueira I e IES Montecelo).

Un centro de cada un dos seguintes concellos: Ponteareas (A Granxa), Vila de Cruces (IES Marco do Camballón), Silleda (IES Pintor Colmeiro), Salvaterra de Miño (IES Salvaterra de Miño), Cambados (IES Francisco Asorey), Tomiño (IES de Tomiño), Marín (IES Chan do Monte), en concreto, Sanxenxo (IES de Vilalonga) e Moaña (IES A Paralaia).

As bolsas para estes estudantes son de entre 7.000 e 9.000 euros por persoa dependendo do lugar escollido e de 275 euros para a viaxe.

CARMELA SILVA PRESENTA O PROXECTO SANePLAN

A presidenta da Deputación de Pontevedra, Carmela Silva, presentou onte o proxecto SANePLAN, que desenvolve a institución provincial xunto co Instituto Tecnolóxico de Galicia, dentro do programa europeo LIFE+.

Carmela Silva destacou que a súa finalidade é desenvolver un sistema de información que permita integrar as redes de saneamento e tratamento das augas residuais na planificación urbana das cidades.

"O que poñemos en marcha neste momento", subliñou a presidenta, "é a primeira parte do proxecto que leva a cabo a Deputación, que trata de recompilar os datos da rede e das infraestruturas de saneamento e depuración nos cinco concellos adheridos a este plan". O traballo de campo realizarao, por un importe de 102.850 euros, a empresa Lagares Oca S. L., que foi a gañadora do concurso convocado para o efecto.

No proxecto de recollida de datos van participar os concellos de Baiona, Cambados, Ribadumia e Vilanova de Arousa; tamén o concello de Chiesina Uzanesse, da rexión italiana da Toscana.

Por último, Carmela Silva destacou que a participación económica total da Deputación no proxecto é de 248.642 euros, cunha achega do 50 % de fondos da Unión Europea.

AS POUSADAS DE LOUZÁN PASARÁN POR FISCALÍA E O TRIBUNAL DE CONTAS

As Pousadas do Salnés, baixo sospeita.  
A presidenta da Deputación de Pontevedra denuncia irregularidades no que fora o proxecto estrela do seu predecesor á fronte do organismo provincial. A intención de Carmela Silva é recompilar documentación para trasladala á Fiscalía e ao Tribunal de Contas. Ademais das Pousadas, outros tres proxectos con fondos europeos  están baixo sospeita, sumando máis de 35 millóns de euros de financiamento.

  A presidenta da Deputación ven de denunciar irregularidades na xestión e nos pagamentos de proxectos que contan con fondos europeos impulsados polo goberno do seu predecesor, Rafael Louzán. Carmela Silva anunciou que están recompilando información para trasladala á Fiscalía e ao Tribunal de Contas. 

Trátase de cinco iniciativas que contan con máis de 35 millóns de euros de fondos europeos: DepuTrans, DepoTic, DepoGap e Pousadas do Salnés, o proxecto estrela de Rafael Louzán. Neste caso a presidenta apuntou que se triplicou o orzamento inicial. Carmela Silva explicou que é a súa obriga informar tanto á Fiscalía como ao Tribunal de Contas atendendo ao principio de transparencia das administracións. Despois serán estas institucións as que tomen as medidas oportunas. A presidenta advertiu que non ía asumir ningunha xestión irregular. 

NENOS SAHARAUIS VISITAN A DEPUTACIÓN

Este ano, 407 nenos saharauís chegaron ata Galicia no marco do programa "Vacacións en paz" que cada ano organiza a asociación Solidariedade Galega co Pobo Saharauí. Ata a provincia de Pontevedra viñeron 170 dos cales 80 visitaron, onte, o Pazo Provincial da Deputación de Pontevedra onde foron recibidas pola Presidenta Carmela Silva e a deputada provincial Eva Villaverde.

Solidariedade Galega co Pobo Saharauí (SOGAPS) é unha organización non gobernamental que ten por obxectivo tanto mellorar as condicións de vida dos refuxiados saharauís como da poboación residente no Sáhara Occidental ocupada por Marrocos. A súa presidenta, Maite Isla, subliñou, durante a visita ó Pazo da Deputación de Pontevedra, que ademais do programa "Vacacións en paz", SOGAPS ten en marcha outras iniciativas como unha comisión sanitaria que con periodicidade viaxa ós campamentos, unha comisión de ensino, outra de dereitos humanos e ata unha de xornalistas.

Sobre "Vacacións en paz", Maite Isla destacou que "a provincia de Pontevedra é a que máis está respondendo de Galicia, aquí foi onde se iniciou o movemento de solidariedade co pobo saharauí e ata aquí, dos 407 nenos que chegaron a Galicia, viñeron 170 que regresarán os días 6 e 7 de setembro ó Sáhara".

Pola súa parte, a presidenta da Deputación de Pontevedra sinalou que "hoxe recibimos ás rapazas e rapaces do pobo saharauí que pasan na provincia de Pontevedra as súas vacacións no marco do programa de solidariedade de <Vacacións en Paz> que nos enche a todas e todos de orgullo". A maiores, Silva engadiu que esta recepción serve para que as mozas e mozos "coñezan como funcionan as nosas administracións, os espazos onde se desenvolve a actividade política, nos que se toman decisións".

INAUGURADO DE FORMA OFICIAL O PAVILLÓN DO INST. CABANILLAS

CARMELA SILVA ENTREGA Á ALCALDESA DE CAMBADOS, FÁTIMA ABAL, AS CHAVES DO PAVILLÓN RAMÓN CABANILLAS PARA QUE SE INICIE A ACTIVIDADE DEPORTIVA

A Presidenta de Deputación de Pontevedra, Carmela Silva, visitou Cambados esta mañá, para facer a entrega das chaves do pavillón Ramón Cabanillas e do Pombal á alcaldesa Fatima Abal e á dirección do centro educativo. Un acto que nada ten que ver co que fixo o seu antecesor no cargo que veu a sacar a foto nun pavillón sen rematar e a escondidas e sin avisar á diectiva do centro. Un acto no que destacaba a presenza do ex-alcalde e o seu segundo, so, como decimos para a fott. Algo que sucedeu co recén remodelado campo do Pombal e que non se pode utilizar para a práctica do futbol.

Durante a entrega das chaves, as rapazas do clube de voleibol X.A.V. de Cambados amosáronlle á Presidenta, Carmela Silva, as novas intalacións renovadas e estrearon o pavillón entrenando e xogando ó voleibol.

Carmela Silva quixo comprobar de preto o estado das obras realizadas.

Carmela Silva tamén adiantou que a pesar do mal estado das arcas da Deputación, ten previsto outorgar unha serie de axudas para que todos os concellos da provincia de Pontevedra poidan adquirir novo equipamento deportivo para as súas intalacións.

CARMELA SILVA CONVOCARÁ AO SECTOR DO VIÑO

A Presidenta da Deputación de Pontevedra, Carmela Silva, anunciou hoxe na inauguración da Festa do Albariño de Cambados que convocará ao sector vinícola a unha xuntanza para analizar conxuntamente o seu futuro.

Silva reconoceu o "gran esforzo"  do propio sector na internacionalización acometida o longo dos últimos anos e subliñou que "as administracións temos a obriga de comprometernos con el porque ademais forma parte do ADN da provincia de Pontevedra".

Neste senso, as conversas mantidas con colleiteiros e bodegueiros ao longo da inauguración e no recorrido polo paseo da Calzada, serviron para que Carmela Silva se marque como obxectivo "que a Deputación poña os instrumentos necesarios para garantir que o sector do viño siga crecendo".

A Presidenta recordou que o sector do viño é moi importante en Pontevedra "non so pola súa importante produción senón tamén polo seu atractivo turístico ligado aos paisaxes de toda a provincia".

Por último, Silva felicitou á alcaldesa de Cambados, Fátima Abal, pola excelente organización da festa e, animou a todos os pontevedreses e pontevedresas a achegarse a vila durante estas xornadas.  

LOUZÁN "SAQUEOU" A DEPUTACIÓN NAS ÚLTIMAS SEMANAS

Como ven sendo habitual desde que se produce un cambio de goberno desdes as pasadas eleccións de maio e cando os que entran novos nas institucións ben sexa concellos ou deputacións o primeiro que se fai é mirar as arcas-
A  presidenta da Deputación de Pontevedra explicou a situación das contas da institución provincial. Segundo denunciou, no último mes do seu goberno Rafael Louzán deixou sen recursos os diferentes plans que tiña en marcha o executivo provincial.

  Dos seis millóns de euros de libre disposición do Plan Provincial de Obras e Servizos, só quedan 245. Dos 1,5 millóns de libre concorrencia, o anterior goberno deixou todos adxudicados.  O deste plan é só un exemplo do que, segundo Carmela Silva, atopou o seu equipo ao repasar as contas provincias. No Plan de Acción Municipal, para actividades culturais, deportivas e sociais, só quedan 45 euros dos 200.000 de libre disposición e case 19.000, xa adxudicados, dos 800.000 destinados á concorrencia. Do millón de euros para asociacións e entidades sen ánimo de lucro do Plan de Acción Comunitaria, restan 65 euros. Estes investimentos do último mes de goberno tamén foron comentados polo actual vicepresidente. César Mosquera asegura que el non se sorprendeu polo estado das contas. Mosquera asegurou que o equipo comezará a traballar nos orzamentos para o vindeiro ano, sen que se plantexen adiantar a súa posta en marcha para paliar a falta de fondos.