A 'SANTA' DE ASOREY, XA ESTÁ EN GALICIA TRAS CASE 70 ANOS NO URUGUAI

O Museo Centro Gaiás acolle xa a escultura Santa de Francisco Asorey, que foi instalada esta mañá na sala de exposicións que a albergará ata abril de 2020 no marco de Galicia, un relato no mundo, a primeira das tres grandes exposicións xacobeas que terán lugar nos anos 19, 20 e 21. No acto de recepción da peza estiveron presentes o conselleiro de Cultura e Turismo, Román Rodríguez; o secretario xeral de Emigración, Antonio Rodríguez Miranda, o comisario da mostra, Manuel Gago, e a neta do escultor, Carmen Asorey, entre outras autoridades. Como se ve a máxima autoridade, Fátima Abal, do Concello de Cambados non foi invitada. 

Esta emblemática escultura, considerada polo propio Asorey como a obra da que estaba máis satisfeito, volve por vez primeira a España desde que saíra de Vigo en 1951.

Hai que agradecer á Casa de Galicia en Montevideo o préstamo temporal desta destacada obra para formar parte dunha exposición “que deixa patente o compromiso da Xunta para preservar e difundir o noso patrimonio, situando Galicia no contexto internacional e proxectando ao mundo a nosa riqueza cultural”, expresou o conselleiro. Galicia, un relato no mundo lémbranos tamén “a existencia dun valioso patrimonio cultural fóra do territorio galego, un legado vinculado ás raíces históricas e mitolóxicas da nosa cultura que nos conectan con Europa, e tamén á Galicia emigrante a través do valioso patrimonio preservado nos centros e sociedades galegas de América, que amosa o interese da diáspora pola cultura de Galicia”, resaltou o titular de Cultura.

A instalación da escultura na sala de exposicións do Museo Centro Gaiás realizouse en presenza tamén do secretario da Xunta Directiva da Casa de Galicia en Montevideo, José Enrique Sienra¬, -que acompañou a obra na súa viaxe a Galicia- o director xeral de Políticas Culturais, Anxo Lorenzo; a comisaria do Xacobeo 21, Cecilia Pereira; e a profesora de Historia de América da USC, Pilar Cagiao, asesora especial da exposición no relacionado coas pezas procedentes de América.

Contexto da obra

Realizada en madeira policromada e de case dous metros de altura, a escultura Santa é unha das pezas máis destacadas de Francisco Asorey, e tamén dunha das obras de arte galegas máis significativas do pasado século, polo potente e provocador simbolismo co que representou a muller galega, rachando cos códigos estéticos predominantes na época.

Foi presentada en 1926 na Exposición Nacional de Bellas Artes en Madrid, onde o escultor cambadés levaría a primeira medalla con outra obra, San Francisco. Santa, pola súa banda, provocou gran sorpresa pola súa representación dunha labrega galega cun corpo espido marcado polo duro traballo –nunha imaxe moi afastada da figura feminina idealizada que predominaba na arte de principios do século XX– e portando ademais un xugo de vacas, o que potencia a mensaxe de traballo e sometemento.

A imaxe orixinou un amplo debate, dando lugar a discusións arredor da representación do corpo da muller e tamén ao fío da lectura política da obra, que se asociou aos esforzos da muller labrega pero tamén se entendeu como un símbolo da situación da Galicia da época.

A obra sería cualificada na prensa da época como “dun realismo cru, brutal”; “dunha orixinalidade, atrevemento e beleza que só un artista de excepcionais facultades pode concibir e executar”, ou “a obra máis orixinal, máis dotada de virtualidade estética e de resistente valía que hai na Exposición Nacional”. Anos despois, nunha entrevista á prensa en 1956, Francisco Asorey consideraría esta escultura como a obra da que se atopaba “máis satisfeito”.

A ESCULTURA "SANTA" DE ASOREY RETORNA A GALICIA

A Xunta de Galicia, a través da Consellería de Cultura e Turismo, vén de pechar un acordo coa Casa de Galicia en Montevideo para exhibir a Santa, escultura en madeira policromada de Francisco Asorey. Trátase dunha das pezas máis destacadas do traballo do escultor cambadés, e tamén dunha das obras de arte galegas máis significativas e controvertidas do século pasado, polo potente e provocador simbolismo co que representou a muller galega, rachando cos códigos estéticos vixentes naquel tempo.

Considerada polo propio escultor como a obra da que estaba máis satisfeito, esta peza levaba fóra de Galicia desde 1951, cando foi enviada ao Uruguai. Volverá pois por vez primeira a España en case setenta anos para ser exhibida na mostra Galicia, un relato no mundo, a primeira das grandes exposicións internacionais do Goberno galego con motivo do Xacobeo 2021, que se inaugurará no Museo Centro Gaiás da Cidade da Cultura o vindeiro 14 de novembro.

Controversia arredor desta obra mestra

A Santa de Asorey representa unha labrega galega cun corpo espido marcado polo duro traballo –nunha representación moi afastada da figura feminina idealizada que predominaba na arte de principios do século XX– portando ademais un xugo de vacas, o que potencia a mensaxe de traballo e sometemento.

Foi presentada en 1926 na Exposición Nacional de Bellas Artes en Madrid, onde Asorey levaría a primeira medalla da exposición con outra obra, San Francisco. A Santa, pola súa banda, provocou gran sorpresa e un amplo debate na prensa, dando lugar a discusións –que mesmo chegaron ás portadas de xornais como o ABC¬ arredor da representación do corpo da muller e tamén ao fío da lectura política da obra, que se asociou aos esforzos da muller labrega galega, pero que tamén se entendeu como un símbolo da situación da Galicia da época.

A obra sería cualificada na prensa da época como “dun realismo cru, brutal”; “dunha orixinalidade, atrevemento e beleza que só un artista de excepcionais facultades pode concibir e executar”, ou “a obra máis orixinal, máis dotada de virtualidade estética e de resistente valía que hai na Exposición Nacional”. No outro extremo, o mesmo Valle Inclán, nunha entrevista na Revista de Arte Gallego en 1930, descualificaría a obra tachándoa de “grotesca”. Anos despois, nunha entrevista á prensa en 1956, Francisco Asorey consideraría esta escultura como a obra da que se atopaba “máis satisfeito”.

A Santa foi adquirida pola Casa de Galicia de Montevideo (Uruguai) e partiu de Vigo para América en 1951. “Trátase dunha testemuña imprescindible do valioso e amplo patrimonio cultural galego do século XX preservado nos centros e sociedades galegas de América, e unha mostra do interese da diáspora pola cultura de Galicia”, explica o xornalista e divulgador Manuel Gago Mariño, comisario de Galicia, un relato no mundo, que conta tamén coa historiadora Pilar Cagiao Vila como asesora especial para a Emigración.

Testemuños da Galicia da emigración americana

Con motivo desta exposición, cruzarán tamén o Atlántico e poderanse ver por primeira vez en Galicia dúas pezas moi vencelladas ao nacemento das comunidades galegas en América, que serán fundamentais na conformación da identidade da Galicia contemporánea.

Por unha banda, formará parte da mostra a bandeira sinxela do Tercio de Galegos de Buenos Aires, de principios do século XIX. Esta peza está vinculada ao nacemento da unidade de infantería formada por seiscentos voluntarios galegos que se distinguiu na resistencia da cidade de Buenos Aires durante a invasión inglesa de 1807: o Tercio de Galegos formado e dirixido polo enxeñeiro de Campo Lameiro, Pedro Antonio Cerviño. A bandeira –que representa o escudo de Galicia bordado en fíos de ouro e prata por unha cara e da cidade de Buenos Aires pola outra– está vinculada directamente aos acontecementos que desencadearán posteriormente a formación da República Arxentina e supón unha das primeiras testemuñas materiais da unión dos galegos en América. Hoxe consérvase no Museo Marítimo Ingeniero Cerviño da Escola Nacional de Náutica Manuel Belgrano, en Buenos Aires.

Por outra banda, en Galicia, un relato no mundo exhibirase tamén a talla do Santiago Matamouros da Sociedad de Beneficencia de Naturales de Galicia, da Habana. Esta pequena escultura policromada é unha figura simbólica da formación da primeira agrupación galega en Cuba e un exemplo da presenza do Apóstolo Santiago como símbolo dos galegos en América desde a época colonial. A entidade foi constituída en 1871 como unha sociedade asistencial –destinada a socorrer aos emigrantes galegos na súa vida e a súa morte– e antecedeu no tempo á creación do Centro Galego de La Habana. A sociedade existe aínda hoxe, prestando para a exposición esta imaxe relixiosa do seu Santiago Matamouros, que presidiu a entidade e saía en procesión polas rúas da Habana todos os anos ata a revolución cubana de 1959.

A presenza de Galicia na América colonial

Entre as máis de 300 pezas exhibidas en Galicia, un relato no mundo destaca tamén unha obra de gran formato e moi pouco coñecida: o retrato ecuestre de Pedro Antonio Fernández de Castro, X Conde de Lemos, que foi vicerrei do Perú entre 1667 e 1672. O cadro vincúlase coa participación da alta aristocracia galega no goberno da América colonial e atópase actualmente no Museo de Arte Español Enrique Larreta (Buenos Aires).

Trátase dunha representación única dun aristócrata galego do século XVII, debida ao seu cargo como vicerrei. As pinturas ecuestres no Barroco estaban reservadas á monarquía ou a figuras de enorme poder político, como os validos. Estes cadros formaban parte do aparato da propaganda da monarquía hispánica nas colonias, e reproducían os modos, protocolos e formas de representación dos propios reis en Europa.

A partir do 14 de novembro e ata o 12 de abril de 2020 poderemos vela de novo ‘aquén-mar’ despois de 70 anos na diáspora, como unha das pezas centrais de Galicia, un relato no mundo.

Descubre aquí a historia 

CHARLA SOBRE ASOREY NO ANIVERSARIO DO SEU PASAMENTO

Este venres 30 de xuño nos salóns de ExpoSalnés terá lugar un acto cultural sobre a figura do escultor cambadés Francisco Asorey xa que o próximo día 2 de xullo cumpriranse 56 anos do seu falecemento.

A profesora i estudiosa do escultor Maribel Iglesias dará unha charla sobre a vida e a obra de Francisco Asorey.


Francisco Asorey González (Cambados 1889- Santiago 1961), un dos escultores máis importantes de Galicia. Estudou en Barcelona adquirindo unha inicial formación académica con tendencias barrocas de imaxinerías tradicional española. Aínda así soubo evolucionar no seu tempo podendo atopar na súa obra tinguiduras de expresionismo, simplicidade, esquematismo e ata inicios de cubismo e postcubismo.

Recibe encargos para facer monumentos civís, escultura funeraria e retratos, nos que destaca o estudo psicolóxico herdanza da plástica rodiniana.

Unha das últimas obras do autor é A Piedade (1944) destinada ao Panteón de Galegos Ilustres de Buenos Aires onde retoma o mundo románico e os acentos primitivistas das súas primeiras obras. Neste período se intercalan os encargos de esculturas conmemorativas onde o seu estilo tínguese de acento grandilocuente e monumentalidad tan ao gusto da época.


Francisco Asorey faleceu en Santiago de Compostela o 4 de xullo de 1961.

FRANCISCO PAZOS GAÑA O III CERTAME ASOREY DE ESCULTURA

O artista Francisco Pazos Martínez (Meaño, 1961) fíxose co primeiro premio do III Certame de Escultura Francisco Asorey pola súa obra ‘Menhir con buxardos’. O nome do gañador deuse a coñecer esta tarde no pazo cambadés de Torrado coincidindo coa inauguración da exposición na que se exhiben as 16 obras finalistas do concurso, organizado pola Asociación Cultural Francisco Asorey co apoio da Consellería de Cultura, Educación e Ordenación Universitaria.

O gañador recibiu as felicitacións do secretario xeral de Cultura, Anxo Lorenzo, en nome do Goberno galego, quen salientou como un motivo de satisfacción para as artes plásticas en Galicia a consolidación deste Certame de Escultura Francisco Asorey, que na súa terceira edición incrementou máis dun cincuenta por cento o número de obras participantes respecto do pasado ano”. Nese sentido, Anxo Lorenzo referiuse ás máis de 60 obras presentadas na edición de 2016 –por artistas galegos, do resto do Estado e internacionais– como “un reflexo da repercusión e mais do importante papel que vén desenvolvendo este premio, así como do destacado lugar que xa ocupa, por méritos propios, no panorama artístico”.

O secretario xeral tamén tivo palabras de recoñecemento para os artistas finalistas, “cuxa obra podemos contemplar hoxe nesta exposición que abre a súas portas en Cambados, terra natal do insigne escultor que lle dá nome ao certame e terra de orixe tamén doutras figuras de referencia da arte actual galega como o de Manolo Paz”.

Accésits para Augusto F. Arana e Rodrigo Domínguez

Xunto co primeiro premio, dotado con 5.000 euros, o xurado do certame –integrado pola presidenta da Asociación Cultural Asorey, María del Carmen Asorey; por Manuel Paz, por Carlos Valle e por Manuel Mosquera Cobián, actuación como secretario Vicente Pérez Otero– concedeulles cadanseu accésit a Augusto Fernández Arana (Cádiz, 1969) e mais Rodrigo Domínguez (O Barco de Valdeorras, 1989) polos traballos ‘A tía pequena’ e ‘Baco I’, respectivamente, que recibiron 1.000 euros cada un.

Co seu apoio ao premio, a Consellería de Cultura, Educación e O.U. promove a continuidade deste certame escultórico, creado en 2014, para favorecer a creación artística e recordar a figura do escultor Francisco Asorey.

No acto tamén interviñeron a presidenta da asociación promotora do certame, María del Carmen Asorey; xunto co deputado provincial de Cultura e Normalización Lingüística Xosé Leal Fariña, e mais o concelleiro delegado de Cultura do Concello de Cambados, Víctor Manuel Caamaño, en representación das restantes institucións implicadas nesta iniciativa.

XA PODES VER AS OBRAS PARTICIPANTES NO III CERTAME FRANCISCO ASOREY

Desde o pasado dia 18 xa se poden ver as esculturas presentadas no III Certame de Escultura Francisco Asorey na súa páxina web. O número de inscritos aumentou máis dun 50% en relación ao ano anterior, participando artistas de dez comunidades autónomas distintas entre outras, Asturias, Cantabria, Pais Vasco, Cataluña, Andalucía, Castela León, Madrid, Murcia, Navarra e por suposto Galicia. En próximas datas reunirase o xurado para elexir as obras finalistas e os premiados con 1º premio e os dous accesit.


http://www.franciscoasorey.es/

3º CERTAME DE ESCULTURA FRANCISCO ASOREY

A Asociación Cultural Francisco Asorey convoca a terceira edición do certame de escultura que leva o nome deste artista, coa colaboración da Consellería de Cultura e Educación, do Concello de Cambados e da Deputación Provincial de Pontevedra. Representantes das catro institucións presentaronhai duas semáns na localidade de Cambados, vila natal de Asorey, a nova convocatoria deste certame escultórico, destinado á promoción e á posta en valor da creación artística actual.

“O legado dun dos grandes artísticas plásticos do século XX na nosa terra segue a ser hoxe un referente e serve, ademais, de inspiración constante para os creadores e creadoras do noso tempo”, asegurou Anxo Lorenzo. Nese sentido, o secretario xeral recordou que “Asorey é unha figura senlleira na escultura de Galicia, un dos piares da nosa arte e da nosa cultura, o ‘artista da raza’, un creador que é patrimonio de todos os galegos e as galegas”. “Tanto –engadiu–, que as súas obras forma parte da nosa contorna urbana, como os monumentos a San Francisco en Santiago de Compostela, a Curros Enríquez na Coruña, a Joaquín Loriga en Lalín ou a Eduardo Cabello en Vigo, xunto con numerosas placas, bustos e outras obras en museos, igrexas, e institucións diversas da nosa xeografía”.

Na rolda de prensa tamén interviran o deputado provincial de Cultura e Normalización Lingüística de Pontevedra, Xosé Leal Fariña, e o Concelleiro de Cultura de Cambados, Víctor Caamaño, en representación das restantes institucións implicadas nesta iniciativa.

Traballos inéditos de tema libre
Calquera persoa, sen limitación de idade, pode participar neste premio, cunha única obra de tema libre, inédita e orixinal, da que sexa autora, realizada en calquera material e cuxas dimensións non superen os 120 cm de alto e os 80 cm de profundidade e de ancho.

Exposición das obras finalistas na Casa da Parra
O certame está dotado con 5.000 euros para a obra gañadora, ademais de dous accésits de 1.000 euros cada un. Os traballos finalistas conformarán a exposición do Certame de Escultura Francisco Asorey, que, segundo anunciou o secretario xeral de Cultura na rolda de prensa, itinerará no último trimestre do ano a Santiago de Compostela, onde se poderá ver no centro expositivo da Casa da Parra.

As bases do certame están accesibles nas webs www.fundacionasorey.com e en www.cultura.gal, e o prazo para a inscrición está aberto ata o vindeiro 20 de xuño.

Máis de 40 obras a concurso na segunda edición
“Nas dúas edicións anteriores do certame –afirmou Anxo Lorenzo– tivemos a oportunidade de constatar, a través das 41 obras presentadas a concurso por artistas de nacionalidades diversas, a calidade das esculturas participantes e a excelencia das e dos autores, tanto dos consagrados como daqueles emerxentes que están a labrar o seu futuro nesta disciplina”.

Unha exposición en Cambados recolleu os 12 traballos finalistas, obra de autores recoñecidos xunto con outros de artistas emerxentes, procedentes no caso de Galicia do alumnado da Facultade de Belas Artes de Pontevedra, da Escola de Arte e Superior de Deseño Mestre Mateo de Santiago de Compostela, da Escola de Artes Pablo Picasso da Coruña ou da Escola de Canteiros de Pontevedra. A obra gañadora da pasada edición foi ‘Lambetazo’, de José Castro, mentres que os traballos Miguel Ángel Vigo e de Óscar Aldonza recibiron cadanseu accésit.

PRESENTADO A 3ª EDICIÓN DO CERTAME DE ESCULTURA ASOREY

A Asociación Cultural Francisco Asorey convoca a terceira edición do certame de escultura que leva o nome deste artista, coa colaboración da Consellería de Cultura e Educación, do Concello de Cambados e da Deputación Provincial de Pontevedra. Representantes das catro institucións presentaron esta mañá na localidade pontevedresa de Cambados, vila natal de Asorey, a nova convocatoria deste certame escultórico, destinado á promoción e á posta en valor da creación artística actual.

“O legado dun dos grandes artísticas plásticos do século XX na nosa terra segue a ser hoxe un referente e serve, ademais, de inspiración constante para os creadores e creadoras do noso tempo”, asegurou Anxo Lorenzo. Nese sentido, o secretario xeral recordou que “Asorey é unha figura senlleira na escultura de Galicia, un dos piares da nosa arte e da nosa cultura, o ‘artista da raza’, un creador que é patrimonio de todos os galegos e as galegas”. “Tanto –engadiu–, que as súas obras forma parte da nosa contorna urbana, como os monumentos a San Francisco en Santiago de Compostela, a Curros Enríquez na Coruña, a Joaquín Loriga en Lalín ou a Eduardo Cabello en Vigo, xunto con numerosas placas, bustos e outras obras en museos, igrexas, e institucións diversas da nosa xeografía”.

Na rolda de prensa tamén interviron o deputado provincial de Cultura e Normalización Lingüística de Pontevedra, Xosé Leal Fariña, e o Concelleiro de Cultura de Cambados, Víctor Caamaño, en representación das restantes institucións implicadas nesta iniciativa.

Traballos inéditos de tema libre
Calquera persoa, sen limitación de idade, pode participar neste premio, cunha única obra de tema libre, inédita e orixinal, da que sexa autora, realizada en calquera material e cuxas dimensións non superen os 120 cm de alto e os 80 cm de profundidade e de ancho.

Exposición das obras finalistas na Casa da Parra
O certame está dotado con 5.000 euros para a obra gañadora, ademais de dous accésits de 1.000 euros cada un. Os traballos finalistas conformarán a exposición do Certame de Escultura Francisco Asorey, que, segundo anunciou o secretario xeral de Cultura na rolda de prensa, itinerará no último trimestre do ano a Santiago de Compostela, onde se poderá ver no centro expositivo da Casa da Parra.

As bases do certame están accesibles nas webs www.fundacionasorey.com e en www.cultura.gal, e o prazo para a inscrición está aberto ata o vindeiro 20 de xuño.

Máis de 40 obras a concurso na segunda edición
“Nas dúas edicións anteriores do certame –afirmou Anxo Lorenzo– tivemos a oportunidade de constatar, a través das 41 obras presentadas a concurso por artistas de nacionalidades diversas, a calidade das esculturas participantes e a excelencia das e dos autores, tanto dos consagrados como daqueles emerxentes que están a labrar o seu futuro nesta disciplina”.

Unha exposición en Cambados recolleu os 12 traballos finalistas, obra de autores recoñecidos xunto con outros de artistas emerxentes, procedentes no caso de Galicia do alumnado da Facultade de Belas Artes de Pontevedra, da Escola de Arte e Superior de Deseño Mestre Mateo de Santiago de Compostela, da Escola de Artes Pablo Picasso da Coruña ou da Escola de Canteiros de Pontevedra. A obra gañadora da pasada edición foi ‘Lambetazo’, de José Castro, mentres que os traballos Miguel Ángel Vigo e de Óscar Aldonza recibiron cadanseu accésit.

III CERTAME DE ESCULTURA FRANCISCO ASOREY

Na mañá de hoxe tivo lugar, na Secretaría Xeral de Cultura, unha reunión preparatoria do  III Certame de Escultura Francisco Asorey. Na citada reunión estiveron presentes o Secretario Xeral de Cultura, o Deputado Provincial de Cultura da Deputación de Pontevedra, o Concelleiro de Cultura do Concello de Cambados e os representantes da Asociación Cultural Francisco Asorey.

Nesta reunión acordouse establecer o modelo de convenio ou ben de protocolo de colaboración que debe rexer entre as catro entidades organizadoras deste certame, no que se definirá o papel a desempeñar por cada organismo (obxectivo e grado de implicación das partes).

Así mesmo se acordou a modificación puntual das bases de participación do certame, que se agardan facer públicas neste mes de febreiro en Cambados. Este ano, as obras presentadas ao certame serán expostas inicialmente en Cambados e despois do verán, na Casa da Parra  en Santiago de Compostela.

OBRAS PREMIADAS NO II CERTAMEN DE ESCULTURA FRANCISCO ASOREY

"Lambetazo"

O secretario xeral de Cultura, Anxo Lorenzo, destacou  Cambados a contribución do Certame de Escultura Francisco Asorey á promoción e posta en valor da creatividade actual. Fíxoo durante o acto de inauguración da exposición coas obras finalistas da segunda edición deste premio, promovido pola Asociación Francisco Asorey co apoio da Consellería de Cultura, Educación e Ordenación Universitaria, xunto co Concello de Cambados e mais da Deputación Provincial de Pontevedra.

En referencia á participación no certame, o secretario xeral tamén salientou o alcance internacional desta segunda edición, na que, á creatividade galega, se sumaron obras de artistas procedentes doutras comunidades autónomas como Cataluña, Andalucía, Euskadi e Castela e León, así como de países como Portugal e Cuba.

Artistas de diferentes nacionalidades

"Trinta segundos antes de chorar"

Foron un total de 41 traballos realizados por autores e autoras de diferentes nacionalidades, entre os que se seleccionaron as 12 obras finalistas que conforman a mostra inaugurada no recinto de Exposalnés coa participación tamén do concelleiro delegado de Cultura do Concello de Cambados, Víctor Caamaño, e da presidenta e do secretario da Asociación Francisco Asorey, Carmen Asorey e Vicente Pérez, respectivamente, entre outros.

O legado de Asorey

“Ademais de favorecer a promoción dos nosos creadores e creadoras actuais –dixo o secretario xeral de Cultura–, este certame tamén contribúe a manter vivo o legado de Francisco Asorey, un dos artistas galegos máis singulares da renovación da arte escultórica no pasado século”.

Canteira de artistas galegos

"Ciclo"

Xunto con traballos de autores recoñecidos, as canteiras de artistas galegos tamén estiveron representados no certame con obras do alumnado da Facultade de Belas Artes de Pontevedra, da Escola de Arte e Superior de Deseño Mestre Mateo de Santiago de Compostela, da Escola de Artes Pablo Picasso da Coruña ou da Escola de Canteiros pontevedresa.

PREMIADOS

1º PREMIO: "Lambetazo", Jose Manuel Castro (Ponteceso, A Coruña)

ACCESIT:"Ciclo", de Oscar Aldonza Torres (Ames, A Coruña)

ACCESIT: "Trinta segundos antes de chorar", Miguel Ángel Vigo Baleirón (Padrón, A Coruña) 

CAMBADESES FINALISTAS NO CERTAMEN

"Elefante estepario"

"Sons e Sucos", Javier Pérez González.

"Elefante estepario", Jesús Mª Gómez Charlín

II EDICIÓN DO CERTAME DE ESCULTURA FRANCISCO ASOREY

A Asociación Cultural Francisco Asorey en colaboración co Concello de Cambados, a Secretaría Xeral de Cultura da Xunta de Galicia e a Deputación de Pontevedra organiza a II edición do Certame de escultura Francisco Asorey. Os doce finalistas desta edición poderanse ver no Concello de Cambados e o xurado decidirá o gañador e os dous accésit se o considera oportuno.

Lugar: ExpoSalnes, paseo da Calzada. Cambados
Data: martes 14 de xullo do 2015
Hora: 20:00 horas
Intervirán 
D. Anxo Lorenzo, Secretario Xeral de Cultura da Xunta de Galicia

D. Victor Caamaño,  Concelleiro delegado de cultura do Concello de Cambados 

Representantes da Deputación de Pontevedra.

Membros da corporación municipal do Concello de Cambados 

Representantes da Asociación Cultural Francisco Asorey  

O DEPARTAMENTO DE COMUNICACIÓN DA XUNTA CESA A LUÍS ARAGUNDE

Non imos valorar os resultados da operación, eso deixámolo para vos.
Pero o certo que ou certas persoas que traballan na Xunta, concretamente no Departamento de Comunicación non se enteran de nada. Confundir a "Toñito" Iglesias con Luís Aragunde pode ser porque o invitado ao acto era o noso alcalde e ao final foi sustituído polo seu segundo ou que o segundo quixo probar aínda, que fose por uns intres, o que se sinte sendo alcalde. Ou tamén porque non se enteran de nada que é a opción que ten máis fundamento.

A cuestión é que hoxe descubreuse unha placa na casa que Asorey utilizou como taller en Santiago e na nota de prensa que sacou a xunta indica as autoridades que asistiron ao acto e nomea a Luís Aragunde cando non estaba presente e quen si estaba era o teniente-alcalde Antonio Iglesias. 

Como vedes nas imaxes, non mentimos.

HOMENAXEAN A ASOREY NA CASA QUE EMPREGOU DE OBRADOIRO EN SANTIAGO

Coincidindo co 126º aniversario do nacemento de Francisco Asorey, a Consellería de Cultura, Educación e Ordenación Universitaria participou hoxe no acto de descubrimento dunha placa conmemorativa na súa honra, que tivo lugar na rúa compostelá Tras de Santa Clara, onde o artista tivera o seu obradoiro.

Durante o acto de homenaxe ao escultor, promovido polo Concello de Santiago, o secretario xeral de Cultura, Anxo Lorenzo, referiuse a Asorey como unha das figuras máis sobranceiras da renovación da arte escultórica do século XX e recordou que as súas obras xa forman parte da expresión identitaria de Galicia no plano artístico, grazas a unha recoñecida creación que soubo conectar a tradición coa vangarda.

Ademais do secretario xeral de Cultura, participaron no acto o secretario xeral de Cultura, Anxo Lorenzo, o tenente alcalde de Cambados, Antonio Iglesias, membros da Asociación Francisco Asorey e o fillo do artista, José Manuel Asorey, entre outros.

PRESENTADA A II EDICIÓN DO CERTAME DE ESCULTURA FRANCISCO ASOREY

Na presentación desta segunda edición, o titular de Cultura e Educación, Xesús Vázquez Abad, loou o labor da asociación cultural ‘Francisco Asorey’ por manter vivo o seu legado artístico e por actuar como dinamizador do talento e a creatividade de novos artistas. Segundo dixo, o seu departamento non pode quedar á marxe desta iniciativa, da que salientou tamén o pulo que recibe tanto por parte da Deputación de Pontevedra coma do Concello de Cambados.

Ademais do conselleiro de Cultura e Educación, no acto tamén estiveron a presidenta da asociación e neta do artista, María del Carmen Asorey Abelleira; o seu presidente de honra e fillo do escultor, José Manuel Asorey Ferreiro; o alcalde de Cambados, Luis Aragunde; a deputada provincial de cultura de Pontevedra, Ana Isabel Vázquez Reboredo; e o secretario xeral de Cultura, Anxo Lorenzo.

Bases do concurso
No certame, promovido pola asociación cultural Francisco Asorey, poderá participar calquera persoa independentemente da súa idade (xa que na convocatoria anterior estaba limitado a un máximo de 30 anos), cunha única obra escultórica de tema libre, orixinal e inédita, é dicir, que non fora presentada a ningún outro certame, mostra, exposición ou exhibición pública de ningún tipo.

Os interesados, que poden consultarse as bases no enderezo electrónico www.franciscoasorey.es , deberán formalizar unha inscrición previa nun prazo que comeza hoxe e remata o 10 de xuño deste ano.

Un xurado integrado por personalidades relevantes do mundo artístico e cultural será o encargado de escoller os gañadores. O premio do certame está dotado con 5.000 euros e, ademais, concederanse dous accésits de 1.000 euros. 

BASES
 

A PRENSA DI O QUE O CONCELLO QUERE ESCOITAR?

A exposición "O ASOREY DESCOÑECIDO" por moito que se empeñen no contrario desde o Concello é un absoluto fracaso.

So 3000 visitas durante os meses de verán e tendo en conta que domos 14000 cambadeses polo menos e quitemos 4000 que están fora e nenos de curta idade que non contan, cos datos aportados so unha moi pequena parte dos cambadeses visitou a exposición. Sen embargo a prensa "amiga" da por boas as cifras dadas polo concello e non fan a máis mínima crítica.
Por certo unha sala cuns horarios pésimos, de martes a domingo de 11.00 a 14.00 e de 18.00 a 21.00 horas. So seis horas ao dia e os luns pechado. Tendo en conta o clima que tivemos e que algunhas mañáns non se cumpleu........

Segundo os datos facilitados polo Concello, o 58 por cento dos visitantes eran galegos, un 40 por cento de fóra da comunidade autónoma (o 18 por cento destes procedían de Madrid, o 10 por cento do País Vasco, o 8 de Castilla e León e o 4 de Asturias) e o 2 por cento restante eran estranxeiros. Entre estes, rexistráronse cidadáns portugueses, franceses, arxentinos, italianos e ata xaponeses.

Desde o Concello de Cambados valoran que a "situación estratéxica do Pazo de Torrado situado non Conxunto Histórico e nunha dás arterias principais dá zona monumental, facilita que haxa un amplo número de visitantes onde predominan vos de orixe nacional, debido á gran cantidade de turistmo familiar e circuítos programados pola comarca e as Rías Baixas, onde Cambados xoga un papel referente".

"CONTRABASSE" GAÑA O I CERTAME DE ESCULTURA ASOREY

Un contrabaixo esculpido en madeira fíxose co máximo galardón do primeiro Certame de Escultura Francisco Asorey. Os accésits foron para outras dúas pezas en granito unha e escaiola a outra. Agora o gañador disporá de seis mil euros e dunha sala para expoñer tódalas súas creacións durante un mes. David Leiros Araujo, autor deste ‘Contrabasse’, é xa o primeiro gañador do Certame de Escultura Francisco Asorey. O concurso, que naceu este ano co gallo do 125 aniversario do nacemento do escultor cambadés, logrou convocar 24 propostas, todas realizadas por artistas menores de trinta anos. 

©ArousaSiRadioSalnés

Só once delas pasaron á fase final. A decisión final foi complicada. Había varias obras dun nivel semellante. Finalmente o comité decantouse pola que rexistraba un mellor acabado. Entre as finalistas había pezas elaboradas maioritariamente en pedra, escaiola, algunha con detalles en chumbo ou barro. Os accésits foron para as obras ‘Fragmentos de un cuerpo desechado’, de Adrián Taracido, e ‘Sophie Sente’, do valgués Francisco Escariz, o único presente durante o fallo do premio. Varias obras máis das finalistas pertencía a antigos alumnos da Escola de Canteiros. 

 O gañador leva un premio de seis mil euros e poderá expoñer ó público as súas obras nun espazo do concello de Cambados aínda por determinar. Ademais a obra quedará en depósito no municipio durante dous anos e logo pasará a propiedade da Asociación Asorey. 

INAUGÚRASE A EXPOSICIÓN "O ASOREY DESCOÑECIDO"

Hoxe inaugúrase a exposición "O Asorey descoñecido" e  presentarase a obra premiada no primeiro certamen de escultura en honor ao artista coincidindo co 53 aniversario da morte do artista.

Ás 12 horas no salón de plenos do Concello a comisión presentará a peza ganadora no primeiro certamen de escultura que leva o nome do artista cambadés.

Pola tarde, ás 19,30 horas, no Parador de Turismo do Albariño o alcalde de Cambados, Luís Aragunde, recibirá á familia do escultor, aos membros da comisión e ás autoridades presentes no acto.

Tras elos a comitiva depositará un ramo de flores no monumento dedicado ao "Escultor dá Raza" instalado no céntrico Paseo dá Calzada da localidade. Durante este momento soará, interpretado polo conxunto "Os Carballeiras", a música do Antigo Reino de Galicia.

No Pazo de Torrado, ás 20 horas está prevista a inauguración da exposición "O Asorey descoñecido" composta por pezas que intentarán achegar a figura do escultor aos seus visitantes.

Neste acto intervirán, tanto o alcalde de Cambados  como José Manuel Asorey, fillo do escultor que falará da figura do seu pai e Carmen Asorey, neta do artista e gerente da asociación que leva o nome do seu avó.

FIRMADO O CONVENIO XUNTA-CONCELLO PARA O 125ANIVERSARIO DE ASOREY

O conselleiro de Cultura, Educación e Ordenación Universitaria, Xesús Vázquez Abad, e o alcalde de Cambados, Luis Aragunde, asinaron un convenio a través do que ambas as entidades subscriben a súa colaboración para a conmemoración do 125 aniversario do nacemento de Francisco Asorey, tal e como anunciara xa o conselleiro na ofrenda floral realizada ao escultor o pasado mes de marzo no Panteón de Galegos Ilustres.
A través do acordo asinado hoxe, a Consellería achegará 12.500 euros para apoiar dúas das actividades programadas para homenaxear o cambadés neste 2014. Así, o departamento dirixido por Xesús Vázquez Abad colaborará co primeiro certame de escultura ‘Francisco Asorey’, destinado a escultoras e escultores galegos ou que residan en Galicia menores de 30 anos, que participan neste certame presentando unha obra inédita e orixinal de temática libre. Así mesmo, o departamento de Cultura autonómico contribuirá tamén á organización da mostra que percorrerá a traxectoria de Francisco Asorey e que se exporá tanto no Pazo de Torrado (Cambados) como no de Fonseca (Santiago).

CONVOCADO O CERTAME DE ESCULTURA ASOREY

A Consellería de Cultura, Educación e Ordenación Universitaria colabora co I Certame de Escultura Francisco Asorey para “favorecer a creatividade dos artistas novos no ámbito das artes plásticas e de poñer en valor a obra e a figura de Asorey”. Así o afirmou o secretario xeral de Cultura na presentación da iniciativa, que tivo lugar hoxe en Cambados, concello natal do escultor.

Acompañado polo alcalde de Cambados, Luis Aragunde; polo presidente de honra e a presidenta da Asociación Cultural Francisco Asorey, José Manuel Asorey e Carmen Asorey, respectivamente; e polos membros da comisión organizadora Manolo Paz e Carlos Valle, o secretario xeral de Cultura destacou “o interese da Consellería por contribuír coa difusión do legado de Asorey, así como por afondar no recoñecemento dun dos piares artísticos da nosa cultura”, coincidindo coa celebración do 125.º aniversario do seu nacemento.

Con este obxectivo, a Consellería de Cultura e Educación asinará este ano un convenio de colaboración co Concello de Cambados “que nos permitirá seguir dando novos pasos nesta consecución, con iniciativas coma este certame de escultura, para recordar e honrar o ilustre cambadés que abriu un camiño de creatividade e renovación da arte escultórica”.

Un certame para os novos talentos

Promovido pola Asociación Cultural Francisco Asorey co apoio da Xunta de Galicia, dos concellos de Santiago de Compostela e de Cambados, da Deputación de Pontevedra e de La Caixa, o certame está dirixido a artistas novos galegos ou residentes en Galicia. Para participar, cada artista deberá presentar unha única obra escultórica da que sexa autor, de temática libre, inédita e orixinal, realizada en calquera material (pedra, madeira, escaiola, barro, ferro, aceiro, etc.). A inscrición realizarase na páxina web www.franciscoasorey.es entre o 28 de marzo e do 15 de xuño, ambos os dous incluídos.

O premio do certame escultórico está dotado coa cantidade de 6.000 euros e a súa concesión implica tamén a exposición de obras do gañador ou gañadora durante un mes nuha sala de exposicións coa posibilidade de venda. Concederanse, así mesmo, dous accésits. O xurado estará integrado por personalidades relevantes do mundo artístico e cultural e a súa composición darse a coñecer o próximo 2 de xullo en Cambados, coincidindo co día no que se dará a coñecer o gañador ou gañadora.