A DEPUTACIÓN DE PONTEVEDRA APOSTA POLO TURISMO ORNITOLÓXICO

A Deputación de Pontevedra acaba de poñer en marcha as tres primeiras rutas de turismo ornitolóxico da provincia, en colaboración coa organización SÉ- BirdLife. As tres rutas discorren polas contornas do estuario do Miño e da Ramallosa, polo complexo intermareal Umia-O Grove e polas Brañas do Xestoso. Segundo explicou a presidenta provincial, Carmela Silva, esta campaña de turismo ornitolóxico cumpre cos obxectivos do recentemente presentado Plan Estratéxico de Turismo, co dobre obxectivo de promocionar as zonas nas que se poden ver aves no seu hábitat natural e de sensibilizar á poboación sobre a necesidade de protección destes espazos “que son un recurso de primeira orde e unha oportunidade de desenvolvemento turístico”, apuntou. A primeira destas rutas guiadas será o próximo 21 de xaneiro ao complexo intermareal Umia-O Grove, onde acoden anualmente preto de 18.000 aves procedentes do norte de Europa para pasar o inverno ou no seu camiño cara a África. A segunda ruta será ao estuario do Miño e a Foz da Ramallosa, e celebrarase o 4 de febreiro; mentres que a terceira visita guiada será ás Brañas do Xestoso, entre os municipios de Silleda, Forcarei e Lalín, e desenvolverase o 20 de maio. As tres rutas serán coordinadas por membros de SEO- BirdLife que facilitarán aos participantes material para o avistamento das aves. O prazo de inscrición comezará o 9 de xaneiro e poderá realizarse a través da web da Deputación (www.depo.gal) ou nos rexistros de Vigo e Pontevedra.

16 CONCELLOS DO SALNÉS-ULLA-UMIA CREARÁN UN NOVO GRUPO DE DESENVOLVEMENTO RURAL

O delegado territorial da Xunta en Pontevedra, José Manuel Cores Tourís, presidiu esta mañá a primeira reunión conxunta dos 16 concellos que conformaban os GDR de Salnés e Ulla-Umia co obxectivo da posta en marcha do novo grupo de desenvolvemento rural que permitirá a presentación de proxectos dentro do programa Leader Galicia 2014-2020. A semana pasada xa tiveran unha toma de contacto.

A reunión asistiron alcaldes e representantes dos concellos de O Grove, A Illa, Meaño, Meis, Portas, Catoira, Cambados, Ribadumia, Sanxenxo, Vilanova de Arousa, Caldas de Reis, Pontecesures, Moraña e Valga. Non asistiron os municipios de Vilagarcía de Arousa nin de Cuntis.

No anterior territorio de actuación existían 31 GDRs en Galicia, 6 deles correspondentes a Pontevedra, que agora pasa a contar con 5. Deste xeito, hoxe reuníronse os membros representativos dos GDRs do Salnés e máis de Ulla-Umia para unirse nun só grupo de desenvolvemento rural que pasará a chamarse, segundo acordaron hoxe: GDR Salnés-Ulla-Umia. 

Na reunión de hoxe acordouse traballar en 3 ámbitos á vez: na reforma do estatuto do novo grupo, na distribución territorial e na preparación da estratexia programática.

Para a reforma do estatuto acordouse tomar como base o existente xa no GDR-Salnés, integrándose no mesmo o resto de concellos procedentes do do Umia-Ulla. Así, cada concello terá agora que aprobar en pleno a entrada no novo grupo. Os cambios previstos son o do nome do GDR nacente, a súa modificación territorial con maior número de concellos, e a regulación da xunta directiva que pasaría, con case total seguridade, a contar con 21 membros en lugar de 19, dos cales 10 serían representantes da administración e os outros 11 do sector privado.

E finalmente, hoxe tamén se abordou a preparación da estratexia futura do GDR, tomándose a decisión de solicitar ofertas a empresas especializadas en programas de desenvolvemento rural, dándose de prazo unha semana para volver a reunirse de cara a elección das ofertas máis axeitadas. 

O proceso culminará coa celebración dunha Asemblea constituínte na que se aprobarán os seus estatutos, escollerase unha xunta directiva e se establecerá un plan de traballo para elaborar a estratexia de desenvolvemento local. Finalmente, tras a asemblea o GDR, xa formalmente constituído, deberá comezar a definir o programa de desenvolvemento para o seu territorio.

Os membros deste novo GDR son conscientes de que teñen que desenvolver a súa estrutura de cara a poder converterse en entidade colaboradora para a a xestión da medida Leader Galicia e para a concesión de axudas cofinanciadas co Fondo Europeo Agrícola de Desenvolvemento.

Segundo apuntou José Manuel Cores Tourís, o orzamento deste novo programa será de 84 millóns de euros para toda Galicia que se xestionará a través de 24 GDRs.