NA MADRUGADA DO DOMINGO HAI QUE CAMBIAR A HORA

A madrugada do próximo domingo, 27 de outubro, finalizará o horario de verán cando ás 03.00 horas atrásense os reloxos e de novo volverán marcar as 02.00 horas en España. Deste xeito, recuperarase un ano máis o horario de inverno, de acordo coa Directiva Europea do Cambio de Hora que se aplica en todos os Estados da UE. En febreiro de 2018, a proposta de Finlandia, a Eurocámara votou sobre a posibilidade de terminar co cambio de hora. A pesar de recibir 384 votos en contra e tan só 153 a favor, o Parlamento Europeo comprometeuse a estudar a viabilidade do cambio de hora e abriu unha consulta pública. Aínda que a Comisión Europea aprobou a eliminación do cambio de horario, en marzo deste ano a comisión de Transporte e Turismo do Parlamento Europeo apostou por atrasar ata o ano 2021 a eliminación do cambio de hora bianual proposto pola Comisión Europea para abril deste ano, de forma que as capitais teñan máis tempo para decidir se o país queda co horario de verán ou o de inverno. As primeiras disposicións sobre o horario de verán adoptáronse en Europa en 1980 e desde o ano 2000, coa mencionada directiva, quedaron establecidas as regras que marcan o seu inicio en marzo e a súa finalización en outubro. España xeograficamente está situada no uso GMT+1 coincidindo coa maior parte de Europa, excepto Reino Unido, Irlanda e Portugal, que se manteñen no UTC/GMT+0. Esta adscrición de fuso é a que marca desde 1940 a hora oficial española, adiantada en 60 minutos á hora universal. Na latitude de España as horas de sol son as mesmas, aproximadamente dez no inverno e unhas 14 no verán, pero non amence ou anoitece á mesma hora no leste que no oeste, podendo haber máis dunha hora de diferenza dun extremo ao outro. Vigo, por exemplo, é a cidade europea na que máis tarde anoitece. De acordo coa normativa vixente, o cambio de hora de verán a inverno prodúcese o último domingo de outubro en toda Europa, de acordo á Directiva Comunitaria do Cambio de Hora, que é de obrigado cumprimento co obxectivo de lograr un aforro enerxético. Segundo estimacións do Instituto para a Diversificación e Aforro da Enerxía ( IDAE), o potencial de aforro en iluminación podería alcanzar ao redor de 300 millóns de euros, o equivalente ao 5 por cento do total. Desa cantidade, 90 millóns corresponde ao potencial dos fogares españois, o que supón un aforro de 6 euros por fogar e 210 millóns restantes aforraríanse nos edificios do terciario e na industria. O cambio de hora empezou a xeneralizarse a partir de 1974, a partir da primeira crise do petróleo, cando algúns países decidiron adiantar o reloxo para aproveitar mellor a luz do sol e consumir así menos electricidade en iluminación. Aplícase como directiva desde 1981 e foi renovada sucesivamente cada catro anos.

A DEPUTACIÓN APOIARÁ A SEIS MUNICIPIOS DO SALNÉS A REALIZAR PROXECTOS DE ILUMINACIÓN SUSTENTABLE

A Deputación de Pontevedra deu o paso previo para asinar convenios cos concellos beneficiarios dos proxectos de iluminación sustentable en Bens de Interese Cultural (BIC), iluminación exterior sustentable e substitución de caldeiras de combustible non renovable por outras de biomasa. Tal como explicou a deputación nun comunicado, trátase de actuacións que supoñerán un investimento de case tres millóns de euros e que van beneficiar ata a 34 concellos para cambiar a súa iluminación exterior, sete que van iluminar de forma eficiente os seus BIC e cinco que instalarán novas caldeiras de biomasa para substituír as existentes de combustible non renovable. Para os 34 municipios que van mellorar a súa iluminación e aforrar na súa factura enerxética destinaranse 2,43 millóns de euros. En concreto, con esta actuación van substituír máis de 6.100 puntos de luz, "que supoñerán un aforro medio dun 61%" en Arbo, Baiona, Barro, Caldas, Cambados, Covelo, Crecente, Cuntis, Fornelos de Montes, O Grove, A Guarda, A Illa de Arousa, Meaño, Meis, Moaña, Mondariz, Moraña, Mos, As Neves, Nigrán, Oia, Pazos de Borbén, Poio, Pontecesures, O Porriño, Portas, Rodeiro, O Rosal, Salvaterra, Silleda, Soutomaior, Tomiño, Tui e Vilanova de Arousa. Xunto con esta actuación está tamén a iniciativa para instalar luminarias LED que favorezan o aforro enerxético en BIC dos concellos de Baiona, Caldas, A Guarda, Meis, Poio, Salvaterra de Miño e Vilanova de Arousa. Este proxecto supón un investimento de case 130.000 euros. No caso da substitución de caldeiras de combustible non renovable por outras de biomasa, o investimento ascenderá ata máis de 416.000 euros, e acolleranse os concellos de Caldas, A Guarda, Mondariz, Portas e Salvaterra. A Deputación de Pontevedra enviou xa as cartas informativas a todas as localidades relativas á concesión da axuda e ao proxecto para realizar. Desta maneira, nas próximas semanas a institución provincial vai comezar a asinar os convenios para poder iniciar as actuacións.

ESTE SÁBADO ÚNETE A "LA HORA DEL PLANETA"

A Hora do Planeta é moito máis que apagar a luz durante unha hora, é un gran movemento global para enfrontar un problema global: o cambio climático. Unha campaña multitudinaria que empezou en 2007 en Sidney, impulsada por WWF, como un xesto simbólico da loita contra o cambio climático. En todo pobo e cidade as casas e rúas apáganse e as redes sociais acéndense para esixir aos gobernos de todo o mundo cambios políticos en materia enerxética. O cambio climático é xa una das maiores ameazas á biodiversidade No próximos tres anos, desde WWF facemos unha chamada de atención dentro a Hora do Planeta para sensibilizar ao mundo sobre o cambio climático e tamén sobre a perda de vida salvaxe que vén asociada aos seus impactos, dous problemas que son dúas caras da mesma moeda. En 2017, millóns de cidadáns , miles empresas e entidades de todo o mundo, 187 países e 7.000 cidades sumáronse á Hora do Planeta. Neste vídeo, podes ver como vivimos a gran festa da Hora do Planeta en España: Necesitas máis razóns para unirte? Entra na web da campaña e seguro que atopas máis.

CONECTATE

PRESENTADAS AS OBRAS DA PISCINA MUNICIPAL

Esta mañán presentouse a obra da nova cuberta da Piscina Municipal de Cambados.
Ao acto asistiron a Presidenta da Deputación, Carmela Silva e o diputado David Regades. acompañados pola Alcaldesa Fátima Abal, e os concelleiros Víctor Caamaño, Tino Cordal, J.R. Abal, Mila Martinez, M. José Cacabelos e Xurxo Charlín. 

A obra foi adxudicada á UTE Prace Servizos e Obras S.A. Copsesa. Deste xeito, a nosa vila contará, nun prazo de 11 meses, cunha das maiores reclamacións que viña facendo a cidadanía de Cambados nestes últimos anos. A empresa presentou unha oferta por 846.744,99 euros, unha rebaixa sobre o prezo que figuraba no concurso pública da substitución da envolvente e diversas melloras no seu interior.

Deste xeito, en canto rematen as obras de mellora e de reforma do complexo deportivo do Pombal, Cambados contará cunhas instalacións que corrixen as deficiencias do anterior edificio e que incluirán a substitución da cuberta do complexo (por mor da deficiencia en transmitancia térmica que presenta na actualidade) e a actualización das instalacións de climatización do complexo deportivo. O novo edificio integrarase no espazo urbano lindeiro, reducindo o impacto ambiental; mellorarase o seu confort térmico, unificaranse o vaso e a praia da piscina cos espazos lindeiros para así mellorar a resposta funcional deste espazo e modificarase o peche para que limite a demanda enerxética que se precisa para acadar o benestar térmico.

Con esta reforma tamén se mellorará a eficiencia das novas instalacións para así cumprir coa normativa aplicable grazas á instalación de sistemas de eficiencia enerxética que reducirán o consumo enerxético mediante o control e a regulación da temperatura, a mellora do sistema de iluminación coa integración de equipos altamente eficaces e con sistemas de control e integración de luz natural e a mellora do sistema de xeración da auga quente sanitaria e o de quecemento da auga da piscina.

CHARLA CÓMO AFORRAR NA FACTURA ELÉCTRICA

Todos aqueles que teñan dúbidas sobre a súa factura eléctrica ou queiran saber as claves para aforrar nos consumos e coñecer cómo optar ao novo Bono Social teñen unha importante cita de asesoramento.
Será o vindeiro xoves 23 en Exposalnés, en Cambados, ás 20.30 horas.

Un encontro no que se abordarán temas como os que a cotío chegan á oficina de consumo de Cambados, tal como explicaban o concelleiro de Economía e Facenda, Xurxo Charlín, o traballador municipal encargado da OMIC, e a técnica de Consumo Ana Cores.

ESTA NOITE CAMBIA A HORA: AS TRES VOLVERÁN A SER AS DÚAS

Último fin de semana de outubro, nova cita puntual coas manillas do reloxo. A madrugada do domingo chega o horario de inverno: ás 03.00 horas serán as dúas. A noite alóngase unha hora para fortuna dos que caeron en brazos de Morfeo e non tanto para quen traballa. 
É responsable do cambio a Directiva Comunitaria do Cambio de Hora, que é de obrigado cumprimento co obxectivo de lograr un aforro enerxético. Este, segundo estimacións do Instituto para a Diversificación e Aforro da Enerxía (IDAE), podería alcanzar ao redor de 300 millóns de euros, o equivalente ao 5% do total. Desa cantidade, 90 millóns corresponde ao potencial dos fogares españois, o que supón un aforro de 6 euros por fogar e 210 millóns restantes aforraríanse nos edificios do terciario e na industria. O cambio de hora empezou a xeneralizarse a partir de 1974, a partir da primeira crise do petróleo, cando algúns países decidiron adiantar o reloxo para aproveitar mellor a luz do sol e consumir así menos electricidade en iluminación. Aplícase como directiva desde 1981 e foi renovada sucesivamente cada catro anos.

CONTA ATRÁS PARA A NOVA CUBERTA DA PISCINA DO POMBAL

O goberno de Carmela Silva adxudica a redacción do novo proxecto

A Deputación de Pontevedra vén de asinar a adxudicación coa empresa, que terá un prazo máximo de tres meses para elaborar o proxecto

A Deputación de Pontevedra asinou hoxe a adxudicación da redacción do proxecto básico e de execución das obras relativas á substitución da cuberta e á actualización das instalacións da piscina climatizada do complexo polideportivo do Pombal, en Cambados. Deste xeito, o Goberno da institución provincial inicia a conta atrás para que a veciñanza de Cambados poida volver facer uso destas instalacións, confirmando do mesmo xeito o seu compromiso total e absoluto cun proxecto prioritario para O Salnés.

Por un importe de 21.586,40 euros (IVE engadido), a empresa adxudicataria do proxecto foi "Naos 04 Arquitectos, S.L.P.", que se compromete a redactalo nun prazo máximo de tres meses. Malia a iso, o Goberno de Carmela Silva está a traballar arreo para que se reduzan os prazos na medida do posible, garantindo non só que os veciños e as veciñas de Cambados poidan volver dispor destas instalacións no menor tempo posible senón tamén a calidade dos traballos.

Antes da adxudicación deste contrato, a Deputación xa elaborou o estudo xeotécnico, avanzando coas tramitacións pertinentes coa máxima celeridade. Ademais, dende o momento no que a empresa entregue o proxecto básico e de execución da obra e se lle dea o visto bo, o goberno provincial sacarao a licitación. Unha vez que comecen as obras, os usuarios e usuarias da piscina de Cambados poderán empregar a de Vilagarcía de Arousa, xa que a empresa encargada da súa xestión é a mesma.

A finais de 2016, a Deputación de Pontevedra tivo que rescindir o contrato da obra ante a serie de deficiencias que presentaba o proxecto herdado do Goberno anterior da institución provincial. Aquel primeiro proxecto non solucionaba os problemas que presentaba o espazo, na cuberta da piscina e tamén noutras estancias como os vestiarios, nin tampouco se axustaba á normativa.

O CENTRO DE "A MERCED" AFORRARÁ UN 25% EN ENERXÍA GRAZAS A UNHA CALDEIRA DE BIOMASA

O delegado territorial da Xunta en Pontevedra, José Manuel Cores Tourís visitou esta mañá o concello de Cambados para comprobar a instalación cunha caldeira de biomasa nun edificio público executada grazas a unha axuda da Consellería de Economía, Emprego e Industria. 
O delegado territorial estivo acompañado nesta visita polo concelleiro de Enoturismo de Cambados, José Ramón Abal. 
O concello de Cambados instalou unha caldeira de biomasa no centro sociocultural da Merced a través dunha axuda solicitda ao Instituto Enerxético de Galicia (Inega) de máis de 33.000 euros, a través da liña de axudas para proxectos de equipamentos térmicos de biomasa. En total, o investimento superou os 44.000 euros.
No ano 2016 beneficiáronse destas subvencións, na provincia de Pontevedra, 12 concellos, os de Vila de Cruces, Cuntis, Forcarei, Dozón, Cambados, Silleda, Bueu, Illa de Arousa, Lalín, Porriño, Meis e Covelo, destinando o INEGA un montante total de 565.622 euros para a execución de un total de 28 caldeiras. Estes proxectos supuxeron un investimento global de 780.000 euros.

Por outra banda, tamén está aberta unha liña de axudas para persoas físicas, agrupacións privadas ou propietarios de inmobles do sector residencial de cara a poñer en marcha pequenas infraestruturas de equipamentos térmicos de biomasa. Neste caso, a contía global da convocatoria ascende a 2,2 millóns de euros.
 

NA MADRUGADA DESTE DOMINGO CAMBIA A HORA

Na madrugada do próximo sábado 26 de marzo ao domingo 27 comezará o horario de verán e os reloxos deberán adiantarse unha hora (ás 2.00 serán as 3.00) para cumprir así coa Directiva Comunitaria 2000/84/CE que rexe o cambio de hora. Ata o último domingo de outubro non volverán cambiarse, para gozar de máis horas de luz natural e aforrar na artificial. Non en balde, segundo as estimacións do Instituto para a Diversificación e Aforro da Enerxía (IDAE), entidade pública empresarial do Ministerio de Industria, Enerxía e Turismo, o aforro en iluminación en España polo cambio de hora pode chegar a representar un 5% do consumo eléctrico en iluminación, equivalente a uns 300 millóns de euros.

A Consellería de Economía, Emprego e Industria, a través do Instituto Enerxético de Galicia (Inega), salienta que o cambio de hora previsto para esta fin de semana –co comezo do horario de verán, na madrugada do sábado ao domingo deberanse adiantar os reloxos unha hora (ás 02.00 horas serán as 03.00 horas)–, representa un aforro potencial de enerxía en iluminación estimado no 1% para o sector doméstico, e do 3% para o sector servizos, alcanzándose unha diminución no consumo eléctrico total no conxunto de Galicia próximo ao 0,4%.

O cambio de hora comezou a xeneralizarse de forma desigual a partir de 1974 por mor da primeira crise do petróleo. Entón algúns países decidiron adiantar os seus reloxos para poder aproveitar mellor a luz natural do sol e consumir así menos electricidade en iluminación. A directiva aplícase desde 1981 e cada catro anos renovouse de forma sucesiva.

A DEPUTACIÓN ESTUDARÁ AS MELLORAS NA PISCINA MUNICIPAL

 A Deputación de Pontevedra vai estudar as necesidades de climatización e mellora da cuberta da piscina municipal de Cambados, tras o encontro que mantiveron hoxe o deputado provincial de Cooperación, David Regades, a alcaldesa, Fátima Abal, e o tenente de alcalde, Víctor Caamaño.

Ambos os responsables municipais formuláronlle ao deputado provincial a necesidade de mellorar a cuberta e, sobre todo, reducir a súa altura para que os custos derivados da climatización de todo o espazo sexan menores que os actuais, moi elevados, segundo a alcaldesa.

Ante estas demandas, David Regades e os técnicos da Deputación mostráronse dispostos a facer un estudo sobre as verdadeiras necesidades de climatización da totalidade das instalacións para cumprir coa normativa vixente.

Ao mesmo tempo, o deputado provincial comprometeuse coas máximas autoridades municipais de Cambados a estudar a posibilidade de reducir a altura da nova cuberta da piscina, para evitar os altos custos que ten o mantemento da temperatura interior da instalación. Regades subliñou que, como co resto dos concellos, "a nova Deputación mostra sempre a máxima colaboración e dispoñibilidade, pero deben ser os técnicos os que indiquen as posibilidades reais das actuacións que nos piden dende o Concello de Cambados".

CHARLAS SOBRE ENERXÍA

A Confederación de Empresarios de Pontevedra (CEP) organiza durante o mes de decembro tres seminarios sobre medidas de aforro enerxético na Peme en tres asociacións territoriais. 
O dia 14 de decembro en FONCALOR - Asociación Provincial de Instaladores de Fontanería, Calefacción, Gas, Climatización, Mantemento e Afíns de Pontevedra; O 15 de decembro na sede da CEP en CAMBADOS e o 20 de decembro en AEMOS - Asociación de Empresarios de Mos. O obxectivo destes seminarios é dar a coñecer as liñas de axuda do INEGA e a Aplicación de Diagnóstico Enerxético on-line para PEMES, así como medidas de aforro e eficiencia enerxética. 
Por outra banda, o 21 de decembro realizarase tamén un Workshop sobre Enerxías Renovables e Eficientes vs Innovación na sede da CEP. Estas sesións están abertas a todas as persoas interesadas previa inscrición na páxina web do proxecto: www.ge2cs.com Participarán nestes seminarios varios dos socios do proxecto (INEGA, ITG e INEGI), así como o Centro Tecnolóxico de Automoción de Galicia, o Centro Economics for Energy ou o Bureau Veritas.

Documentos: 

 Programa workshop GE2Cs 2112.pdf

 Programa_Seminario_GE2Cs_20122011.pdf

 Programa_Seminario_GE2Cs_15122011.pdf

 Programa_Seminario_GE2Cs_14122011.pdf

ARRANCA A NOVA FACTURACIÓN DA LUZ

Hoxe arranca a facturación da luz por horas, que se lles vai aplicar a aqueles que teñen contadores intelixentes e seguen acollidos á tarifa regulada, que non se pasaron ó mercado libre. En Galicia as estimacións falan duns 620.000 usuarios, máis de 10 millóns en toda España.

O cambio só afecta ós clientes acollidos ó Prezo Voluntario ó Pequeno Consumidor (PVPC) que teñan un contador intelixente e efectivamente integrado no sistema de telexestión. Poden saber se é o seu caso mirando na factura, onde pon "Datos do contrato". Se non é así, seguirán pagando a electricidade en función duns parámetros medios de consumo ata que teñan o dispositivo.

Se lles afecta a nova tarificación horaria, poden saber cales son as horas máis caras e as máis baratas consultando a web de Red Eléctrica Española; no apartado PVPC, tódolos días a partir das 20.15 horas atoparán a información da xornada seguinte. Para hoxe, por exemplo, a hora máis cara serán as 21.00 h, e a máis barata, as 03.00 h.

Os expertos do sector eléctrico e a maioría das asociacións de consumidores calculan que o aforro máximo que poden conseguir centrando o seu consumo ás horas máis baratas pode ser de 36 euros ó ano. Lembran que o consumo efectivo representa pouco máis dun terzo da factura final.

AXUDA ECONÓMICA PARA O PAGO DA FACTURA ELÉCTRICA, E SOLICITUDES DE EXENCIÓN NO CANON DA AUGA E NO COEFICIENTE DE VERTEDURA

Dende a Concellería de Servizos Sociais do Concello de Cambados comunicamos a existencia dunha nova axuda económica para o pago da factura eléctrica a través do tícket eléctrico social de Galicia, consistente nunha cantidade fixa semestral de 90€ para unidades de convivencia que cumpran os requisitos e de 150€ para as que acrediten ser ademais familia numerosa.

O prazo de presentación da solicitude conclúe o 15 de setembro de 2015 e débense cumprir entre outros os seguintes requisitos:

• Ter fillos menores de 18 anos a cargo.
• Estar aboando a factura eléctrica.
• Que os ingresos totais da unidade de convivencia non superaran os 9.585,19€ no ano 2013 (798,76€ mes).
•  Informar ademais da existencia da exención no canon da auga e no coeficiente de vertedura por estar en situación de exclusión social cumprindo entre outros os seguintes requisitos:
• 
  

• Os ingresos totais da unidade de convivencia non superarán os 6.390,13€ o ano (532,51€/mes)
• O titular do contrato debe estar empadroado no enderezo para o que solicita bonificación.

Para mais información poñerse en contacto cos Servizos Sociais municipais sitos no nº8 da rúa Ourense, 3º andar, telf.:986520510 solicitando cita para tramitar a solicitude.

ESTE DOMINGO HAI CAMBIO DE HORA

A madrugada do próximo domingo, día 29 de marzo, comeza a "Hora de Verán" Os reloxos deberán adiantarse unha hora (ás 02.00 h serán as 03.00 h), en cumprimento da Directiva Comunitaria que rexe o denominado "Cambio de Hora" e que afecta a todos os países membros da Unión Europea.

O "Cambio de Hora" comezou a xeneralizarse, aínda que de xeito desigual, a partir de 1974, cando se produciu a primeira crise do petróleo e algúns países decidiron adiantar os seus reloxos para poder aproveitar mellor a luz do sol e consumir así menos electricidade en iluminación. Aplícase como directiva dende 1981 e foi renovada sucesivamente cada catro anos.

Dende a aprobación da Novena Directiva, polo Parlamento Europeo e Consello da Unión, en xaneiro de 2001, este cambio aplícase con carácter indefinido. Dita Directiva está incorporada ao ordenamento xurídico español por Real decreto 236/2002, de 1 de marzo.

EXPERTOS NO MERCADO ORIENTARÁN SOBRE TARIFAS ELÉCTRICAS

Os usuarios de enerxía eléctrica que desexen coñecer se poden pagar menos na súa factura da luz e como facelo, ou que queiran aclarar calquera dúbida relacionada co mercado eléctrico, dispoñen desde hoxe mesmo dunha rede de 10 oficinas distribuídas por toda a provincia onde recibirán asesoramento individualizado por parte de expertos na materia e que estará aberta, como mínimo, durante os próximos dous meses.

Isto é posible grazas á colaboración entre a Deputación de Pontevedra e a Unión de Consumidores de Galicia, que vén de poñer en marcha a antedita rede de oficinas co obxectivo de contribuír a poñer un pouco de luz no complexo funcionamento do sistema eléctrico español.

Así o anunciaron esta mañá o presidente da Administración Provincial, Rafael Louzán, e o presidente da Unión de Consumidores de Galicia (UCGAL), Miguel López, nunha rolda de prensa celebrada no Pazo Provincial.

As oficinas situaranse na sede da Deputación en Pontevedra e en Vigo; nas respectivas casas do concello en Cangas, A Estrada, Lalín, Tui e Vilagarcía; en Exposalnés, en Cambados; na Oficina Municipal de Información ao Consumidor en Ponteareas; e no Multiusos da Xunqueira en Redondela, e estarán abertas ao público de 10,00 horas a 14,00 horas, de luns a  venres.

CHARLA INFORMATIVA SOBRE AS ELÉCTRICAS DO B.N.G.

 

A HORA DO PLANETA NON VAI CON ARAGUNDE

As Xuventudes Socialistas de Cambados presentaron a semana pasada, concretamente o día 21, un escrito no rexistro do Concello solicitando ao mesmo que se sume á iniciativa ‘’A Hora do Planeta’’ impulsada por WWF e apoiada por moitas organizacións ecoloxistas.
Unha semana despois, e un día antes de que a iniciativa se leve a cabo, non obtivemos resposta do Concello de Cambados á nosa proposta, o que supón que o equipo de goberno local non ten en conta as propostas de asociacións da nosa vila.

O Secretario Xeral das XSG Cambados, Ismael Agra, afirmou que ‘’Luis Aragunde volve a mostrar a súa cara antidemocrática ao non responder ás propostas presentadas polas Xuventudes Socialistas de Cambados’’. Ademais, asegurou ‘’A Hora do Planeta conta co apoio por todo o mundo, asemade co apoio de Concellos de España e de Galicia’’. Tamén: ‘’Cambados volve quedar á marxe na realización de actos cunha repercusión importante pola negativa do goberno local’’.


Por outra parte, Ismael Agra concluíu dicindo que ‘’é unha mágoa que o goberno local ignore as propostas de colectivos que presentan as súas iniciativas, tendo en conta que nin o PP nin as Novas Xeracións teñen propostas para a vila’’.

ESTE DOMINGO CAMBIA A HORA

Este domingo prodúcese o cambio de hora do verán.
Ás dúas da madrugada deste 29 de marzo haberá que adianta-los reloxos unha hora.
Este cambio horario suporá un aforro aproximado do 5% da enerxía que se gasta, segundo as estimacións do Instituto para a Diversificación. Equivale a uns 300 millóns de euros.
Nos fogares o aforro estimado en luz co cambio de hora é de seis euros.
O cambio horario comezou durante a primeira guerra mundial para aforrar carbón, malia que empezou a xeneralizarse en 1974 a raíz da primeira crise do petróleo.
Así que este domingo durará unha hora menos. Ás dúas da madrugada adiantarémo-los reloxos ás tres. 

DEPUTACION IMPULSA UN PROXECTO PARA MUDAR AS CALDEIRAS DE VARIOS CONCELLOS DE GASOLEO POR AS DE BIOMASA

54 dos 62 concellos da provincia teñen na actualidade unha ou varias caldeiras de gasóleo para dotar de calefacción e auga quente sanitaria as súas instalacións municipais, cun gasto anual medio de entre 12.000 e 34.000 eur

Reducir esta factura enerxética e rebaixar as emisións de CO2 á atmosfera son obxectivos que persegue a Deputación de Pontevedra co proxecto de eficiencia enerxética que ten en marcha e que pretende levar a cabo da man dos concellos da provincia.

Así o anunciou esta mañá o presidente da Deputación, Rafael Louzán, que subliñou que o vindeiro 28 de novembro manterá un encontro cos alcaldes para presentarlles un estudo, realizado pola Administración provincial, que reflicte que a substitución das actuais caldeiras de gasóleo por outras de biomasa (pélet, estela ou similares) representaría un aforro duns 500.000 euros ó ano.

Segundo os datos manexados pola Deputación o aforro medio anual dunha caldeira de biomasa con respecto a unha de gasóleo é de 9.000 euros por caldeira, co cal nuns tres anos estaría amortizado o investimento inicial.

Rafael Louzán incidiu en que se pode acadar un aforro económico e ambiental notable, polo que xa hai concellos que amosaron o seu interese en sumarse a esta iniciativa para substituír as caldeiras nos seus municipios.

A XUNTA DE GALICIA AFUNDE AS ENERXÍAS RENOVABLES

Os socialistas galegos esixenlle  ao goberno galego que faga valer a posición estratéxica de Galicia como produtor de enerxía eléctrica para mellorar as tarifas dos usuarios. No debate dunha pregunta oral en Comisión,  “de enerxía sabemos, producimos e pesamos abondo como para ser escoitados na planificación estatal”

Os socialistas acusan a Xunta de amparar unha reforma eléctrica que en realidade “só favorece ás cinco grandes compañías españolas” mentres que resulta “catastrófica para o desenvolvemento das enerxías renovables no noso país”. Lembran que “nin as organizacións sectoriais da enerxía, nin as organizacións empresariais nin de consumidores avalan esta reforma”.

Advertin que o goberno galego “só se preocupou da reforma da enerxía ata que rematou o proceso de crear un novo imposto, a partires de aí se desentenderon do futuro do sector eólico galego, por non falar das outras renovables ás que nin poñen atención”. Explicou que “non se resolve o problema do autoconsumo, mesmo penalizando que os cidadáns busquen mecanismos para reducir o custe da enerxía eléctrica”.

Din os socialistas que o goberno galego deixou aos investidores galegos “sen capacidade de recuperar o investimento” en enerxía eléctrica a o eliminar as primas polos investimentos en enerxías renovables, mentres incrementan a factura eléctrica dos consumidores.

Engaden que a reforma do sector eléctrico “non aborda a resolución definitiva do déficit de tarifa, non contempla medidas para reducir o custe de produción de enerxía e renuncia a o liderado de España e Galicia nas enerxías renovables”.  “Dan a entender que o país camiña cara unha maior dependencia da enerxía producida por combustibles fósiles”.

A consecuencia é que un sector en expansión en Galicia, o das enerxías renovables, “vai ser freado pola política do goberno de castigar a tódolos investidores que participaron no último concurso eólico” e que, ao contrario que no resto das reformas enerxéticas, non recuperarán o seu investimento.