A DEPUTACIÓN, ÚNICA ADMINISTRACIÓN PENINSULAR CON FINANCIAMENTO EUROPEO LANZARÁ O PROXECTO ‘DEPOMAR’

A Deputación, única administración peninsular en acadar financiamento europeo para lanzar o proxecto ‘Depomar’.

Carmela Silva subliña a importancia deste proxecto para “sensibilizar sobre a preservación dos ecosistemas e recursos mariños e empoderar e visibilizar ás mulleres e o seu papel nas actividades pesqueiras e marisqueiras”.

A presidenta da Deputación Carmela Silva amosou a súa satisfacción tras ter coñecemento de que a institución provincial é a única administración peninsular española en acadar financiamento do Fondo Europeo Marítimo e de Pesca (FEMP) para poñer en marcha o proxecto ‘Depomar’. En total, esta iniciativa ten un orzamento de máis de 59.280 dos cales 44.460 € proveñen de Europa e preto de 15.000 € da Deputación, para –en palabras de Silva– “sensibilizar sobre a preservación dos ecosistemas e recursos mariños e empoderar e visibilizar ás mulleres e o seu papel nas actividades pesqueiras e marisqueiras”.

O programa ‘Depomar’ conta con cinco liñas de accións que vai liderar a Deputación e “nas que as mulleres van ter un papel fundamental”. A primeira consiste no deseño dun código de boas prácticas de actividades que se desenvolven na Rede Natura 2000 para incentivar a protección e conservación, a recuperación da biodiversidade, a organización do sector pesqueiro con criterios de sustentabilidade, o respecto polas zonas protexidas do literal, así como o liderado e empoderamento da muller profesional do mar. Ao respecto, a presidenta detallou que “o código plasmarase nun documento sinxelo e breve, práctico, visual e moi pedagóxico, dirixido tanto a profesionais como público en xeral que tamén difundiremos a través da web e das redes sociais”.

Tamén, a través de ‘Depomar’ vaise lanzar un vídeo para divulgar a importancia de conservar o patrimonio mariño e visibilizar o papel da muller nas industrias pesqueiras e marisqueiras. Así, tal e como adiantou Carmela Silva, “a muller mariscadora será protagonista do guión, con testemuñas en primeira persoa, pero tamén aparecerán persoas en representación das federacións de confrarías, grupos de pesca, Seo Birdlife, e outras organizacións”. Igualmente, desenvolverase unha campaña de concienciación que se concentrará sobre o terreo en espazos protexidos e na que participarán as mulleres mariscadoras e da industria pesqueira de xeito activo. A maiores se impulsará unha xornada técnica, “na que as mulleres volverán ser protagonistas” e na que participarán persoas relatoras especializadas en diferentes materias, así como ONG, empresas pesqueiras ou grupos de acción local. Finalmente, o proxecto DepoMar inclúe unha liña de publicidade, para que todas as actividades cheguen á cidadanía mediante os medios de comunicación tradicionais e as novas tecnoloxías.

A Deputación de Pontevedra é a única administración peninsular e unha das tres de España, xunto co Cabildo Insular de Fuerteventura e o Consell de Menorca, en acadar financiamento do Fondo Europeo Marítimo e de Pesca (FEMP) para a posta en marcha do proxecto ‘Depomar’. Esta iniciativa forma parte do programa europeo Pleamar, creado co obxectivo de axudar á sustentabilidade da actividade pesqueira e acuícola en Europa, que xestiona en España a Fundación Biodiversidade do Ministerio de Transición Ecolóxica. 

 

ESTE SÁBADO TOCA CAMBIO DE HORA

Este sábado toca cambiar a hora. Na madrugada do 28 (sábado) ao 29 de marzo (domingo) de 2020, ás 02:00 serán as 03:00. Desta forma, entraremos no horario de verán. Este ano, o cambio de hora chega nun momento excepcional na sociedade, xa que ante a pandemia do COVID-19, a ciudadania atópase confinada. Na UE, unha directiva de 2001 estableceu que o último domingo de marzo e outubro, é dicir dúas veces ao ano, levaría a cabo o cambio de horario, aínda que Europa estuda agora acabar con esta medida. Os países europeos teñen de prazo ata abril de 2020 para decidir se quedarán co horario de verán ou co de inverno. Se optan pola primeira opción, o último cambio de hora terá lugar en marzo de 2021, mentres que o reloxo cambiarase por última vez en outubro de 2021 naqueles países que decidan permanecer no horario de inverno.

NA MADRUGADA DO DOMINGO HAI QUE CAMBIAR A HORA

A madrugada do próximo domingo, 27 de outubro, finalizará o horario de verán cando ás 03.00 horas atrásense os reloxos e de novo volverán marcar as 02.00 horas en España. Deste xeito, recuperarase un ano máis o horario de inverno, de acordo coa Directiva Europea do Cambio de Hora que se aplica en todos os Estados da UE. En febreiro de 2018, a proposta de Finlandia, a Eurocámara votou sobre a posibilidade de terminar co cambio de hora. A pesar de recibir 384 votos en contra e tan só 153 a favor, o Parlamento Europeo comprometeuse a estudar a viabilidade do cambio de hora e abriu unha consulta pública. Aínda que a Comisión Europea aprobou a eliminación do cambio de horario, en marzo deste ano a comisión de Transporte e Turismo do Parlamento Europeo apostou por atrasar ata o ano 2021 a eliminación do cambio de hora bianual proposto pola Comisión Europea para abril deste ano, de forma que as capitais teñan máis tempo para decidir se o país queda co horario de verán ou o de inverno. As primeiras disposicións sobre o horario de verán adoptáronse en Europa en 1980 e desde o ano 2000, coa mencionada directiva, quedaron establecidas as regras que marcan o seu inicio en marzo e a súa finalización en outubro. España xeograficamente está situada no uso GMT+1 coincidindo coa maior parte de Europa, excepto Reino Unido, Irlanda e Portugal, que se manteñen no UTC/GMT+0. Esta adscrición de fuso é a que marca desde 1940 a hora oficial española, adiantada en 60 minutos á hora universal. Na latitude de España as horas de sol son as mesmas, aproximadamente dez no inverno e unhas 14 no verán, pero non amence ou anoitece á mesma hora no leste que no oeste, podendo haber máis dunha hora de diferenza dun extremo ao outro. Vigo, por exemplo, é a cidade europea na que máis tarde anoitece. De acordo coa normativa vixente, o cambio de hora de verán a inverno prodúcese o último domingo de outubro en toda Europa, de acordo á Directiva Comunitaria do Cambio de Hora, que é de obrigado cumprimento co obxectivo de lograr un aforro enerxético. Segundo estimacións do Instituto para a Diversificación e Aforro da Enerxía ( IDAE), o potencial de aforro en iluminación podería alcanzar ao redor de 300 millóns de euros, o equivalente ao 5 por cento do total. Desa cantidade, 90 millóns corresponde ao potencial dos fogares españois, o que supón un aforro de 6 euros por fogar e 210 millóns restantes aforraríanse nos edificios do terciario e na industria. O cambio de hora empezou a xeneralizarse a partir de 1974, a partir da primeira crise do petróleo, cando algúns países decidiron adiantar o reloxo para aproveitar mellor a luz do sol e consumir así menos electricidade en iluminación. Aplícase como directiva desde 1981 e foi renovada sucesivamente cada catro anos.

ESTA NOITE CAMBIA A HORA: AS TRES VOLVERÁN A SER AS DÚAS

Último fin de semana de outubro, nova cita puntual coas manillas do reloxo. A madrugada do domingo chega o horario de inverno: ás 03.00 horas serán as dúas. A noite alóngase unha hora para fortuna dos que caeron en brazos de Morfeo e non tanto para quen traballa. 
É responsable do cambio a Directiva Comunitaria do Cambio de Hora, que é de obrigado cumprimento co obxectivo de lograr un aforro enerxético. Este, segundo estimacións do Instituto para a Diversificación e Aforro da Enerxía (IDAE), podería alcanzar ao redor de 300 millóns de euros, o equivalente ao 5% do total. Desa cantidade, 90 millóns corresponde ao potencial dos fogares españois, o que supón un aforro de 6 euros por fogar e 210 millóns restantes aforraríanse nos edificios do terciario e na industria. O cambio de hora empezou a xeneralizarse a partir de 1974, a partir da primeira crise do petróleo, cando algúns países decidiron adiantar o reloxo para aproveitar mellor a luz do sol e consumir así menos electricidade en iluminación. Aplícase como directiva desde 1981 e foi renovada sucesivamente cada catro anos.

AGE DENUNCIOU ANTE O PARLAMENTO EUROPEO Á FUNDACIÓN FRANCO

Lídia Senra denuncia ante a CE que a Fundación Franco fai apoloxía do xenocidio e a Ditadura Insta á Comisión Europea a posicionarse ante o insulto que é para as vítimas que esta Fundación realice as visitas guiadas ao Pazo de Meirás A eurodeputada considera que se están a vulnerar a Carta dos Dereitos Fundamentais da UE e a Decisión Marco contra o racismo e a xenofobia Lídia Senra, eurodeputada galega integrada no Grupo Confederal da Esquerda Unitaria Europea/Esquerda Verde Nórdica (GUE/NGL), decidiu levar ante a Comisión Europea (CE) a actitude da Fundación Francisco Franco e a situación na que se atopa o Pazo de Meirás, cuxas visitas guiadas son xestionadas directamente por esta Fundación.

Senra rexistrou unha pregunta por escrito dirixida ao ente comunitario na que a informa da “grande indignación na Galiza e no resto do Estado español que está a xerar” o feito de que a Fundación Francisco Franco estea a xestionar desde hai meses as visitas guiadas ao Pazo de Meirás, un Ben de Interese Cultural (BIC) cuxa propiedade ostenta a familia do ditador, “tras ser espoliado ao pobo a través de expropiacións de terras e extorsión con subscricións populares obrigatorias”. Senra considera intolerable que a Fundación asegurase hai unhas semanas que para ela é “unha honra e unha excelente oportunidade mostrar ao gran público a grandeza da figura de Francisco Franco”. Ante esta situación, e tendo en conta que todos os Estados membros deben cumprir a Decisión Marco 2008/913/JAI do Consello, relativa á loita contra o racismo e a xenofobia, Lídia Senra pídelle á CE que se posicione sobre se considera que estamos ante un insulto ás vítimas do franquismo e ante un exercicio de apoloxía do xenocidio e da Ditadura. Así mesmo, pídelle unha posición sobre o feito de que esta Fundación sexa a encargada das visitas guiadas ao Pazo do Meirás. En aras a cumprir a Carta dos Dereitos Fundamentais da UE, a eurodeputada insta á Comisión Europea a poñerse en contacto co Estado español e coa Xunta e tomar as medidas que sexan necesarias para atallar esta situación, condenar o franquismo e esixir a prohibición real da apoloxía da Ditadura franquista.

UNHA CAMBADESA LIDERARÁ AS XUVENTUDES POPULARES DE EUROPA

Foi elexida secretaria xeral co cen por cento dos votos, no congreso celebrado na cidade croata de Dubrovnik este sábado

Unha muller galega lidera  novas xeracións do PP en Europa. Maru Pardal foi elexida secretaria xeral co cen por cento dos votos, no congreso celebrado na cidade croata de Dubrovnik este sábado. 

A cambadesa de 31 anos ocupábase, ata agora das relacións internacionais da asociación de mozos do partido popular. Maru Pardal estudou Tradución e Interpretación en Vigo e especializouse en Dereito, Economía e Política da Unión Europea.  
Maru Pardal (1986) estudou Tradución e Interpretación en Vigo e especializouse en Dereito, Lei, Economía e Política da Unión Europea. Tamén é parella de Javier Dourado, secretario xeral de Novas Xeracións en España, con quen ten unha filla nada o pasado mes de outubro.

UNHA PROFUNDÍSIMA BORRASCA ACHÉGASE A GALICIA

Unha profundísima borrasca de grandes dimensións percorre esta semana o Atlántico norte xerando ventos tempestuosos e ondas de gran tamaño que xa chegaron ás costas de Islandia, Irlanda e Escocia.

A súa intensidade e posición tamén axudan a que bombee aire cálido desde latitudes inferiores á rexión do ártico, onde as temperaturas estes días están moi por encima do que é habitual dificultando a formación de xeo en pleno inverno.

No centro da borrasca a presión atmosférica ha chegado aos 932 milibares, un valor habitualmente rexistrado en furacáns categoría 4.  Por outra banda, o intenso gradiente isobárico que acompaña á tormenta está a axudar a producir ventos próximos ao 150 km/h, capaces de xerar ondas de 14 metros.

Presión en superficie durante as últimas horas. No centro da borrasca aparece un valor de 936 mb aínda que anteriormente chegara aos 932 mb.
Todos estes elementos convértena nunha potentísima borrasca, unha das máis intensas rexistradas no Atlántico norte despois das de decembro de 1986, xaneiro de 1993 e decembro de 2015, que alcanzaron os 900, 916 e 928 milibares respectivamente.

Aínda que a tormenta avanza cara ao norte e este moi preto de Islandia, está previsto que durante os próximos días vaia perdendo intensidade non sen antes xerar ventos tempestuosos en Islandia e o norte das Illas Británicas.

En España, só deberiamos notar os seus efectos nas costas do noroeste peninsular. Durante os próximos días chegarán ondas de mar de fondo xeradas a miles de quilómetros de distancia e que seguro máis dunha amante do surf vai agradecer.

Fonte: eltiempo.es.

CAMBIO DE HORA NA MADRUGADA DO DOMINGO

Esta fin de semana comeza o horario de inverno. Os reloxos atrasaranse unha hora. Será, coma sempre, na madrugada do sábado ao domingo, cando ás tres serán as dúas na España peninsular. Amencerá antes, anoitecerá máis cedo e o debate sobre este cambio recrúase máis ca nunca. Dúas comunidades, as Baleares e Valencia, piden non efectuar esta medida e manter o horario estival. Parece ser que Mariano Rajoy incluso estuda unha proposta para aliñar o noso fuso horario con Londres. Todo o contrario que Feijóo que onte declarou que era español e non portugués en referencia a que si Galicia debería ter o mesmo fuso horario que Portugal, unha hora menos que na península. 

Un dos argumentos que empregan os defensores de adiantar ou atrasar unha hora o reloxo é o aforro enerxético, ademais doutros como beneficios para o comercio ou a seguridade viaria. Segundo estimacións do Instituto para a Diversificación e Aforro da Enerxía (IDAE), o potencial de aforro en iluminación en España polo cambio de hora pode chegar a representar un 5% do consumo eléctrico en iluminación, equivalente a uns 300 millóns de euros. Esta medida adóptase en 70 países de todo o mundo.


Con todo, segundo un informe de 2007 de Rede Eléctrica de España (REE), a empresa que rexistra minuto a minuto a evolución da demanda eléctrica, durante os primeiros días de aplicación da medida detectábase un aforro no consumo eléctrico que se vai diluíndo co paso do tempo.

RECEVIN REUNEUSE EN CAMBADOS

A Rede Europea de Cidades do Viño (RECEVIN) volveu a convocar para onte 12 de setembro en Cambados unha reunión do seu Consello de Administración.

A rede volve tomar contacto tras a última reunión celebrada, o pasado 29 de abril, en Alcázar de San Juan. Entre os temas para tratar, a celebración do "Día Europeo do Enoturismo" -que se conmemora o segundo domingo do próximo mes de novembro- ou a elección da "Cidade Europea do Viño 2017" que, nesta ocasión, recaerá sobre un lugar do estado español.

A elección, entre as diferentes candidaturas, da cidade española sobre a que en 2017 recaerá o título de "Cidade Europea do Viño" e a posta en común de ideas para a celebración, o segundo domingo de novembro, do "Día Europeo do Enoturismo" foron dous dos puntos centrais contemplados na orde do día desta nova reunión de RECEVIN.

Aparte disto, tamén se trataron outros asuntos de orde interna, así como a aprobación da carta de apoio á cidade italiana de Conegliano Valdobbiadene -situada na provincia italiana de Treviso e pertencente a unha comarca con gran produción vitivinícola -para que sexa declarada pola UNESCO como Patrimonio da Humanidade. Tamén levou a aprobación o Protocolo con CEUCO (Consello Europeo de Confrarías enogastronómicas).

PROGRAMA DE MOBILIDADE TRANSNACIONAL XUVENIL

A Dirección Xeral de Xuventude, Participación e Voluntariado comunica que no DOG do 8 de abril de 2016 publicouse a Orde do 23 de marzo de 2016 do programa de mobilidade transnacional xuvenil (Galeuropa) con cargo ao programa de emprego xuvenil.

Este programa ten como finalidade apoiar a mobilidade da xuventude galega para que realice prácticas formativas non remuneradas en entidades/empresas públicas ou privadas de países europeos ben directamente concedendo axudas individuais aos mozos e mozas ou ben mediante concesión de axudas a proxectos de mobilidade de entidades sen ánimo de lucro ou proxectos de concellos.
Os destinatarios/as das axudas son mozos e mozas menores de 30 anos que estean inscritos no ficheiro do Sistema Nacional de Garantía Xuvenil no ámbito da Comunidade Autónoma de Galicia e cumpran a acondición de beneficiarios/as do sistema.
O importe da axuda total inclúe una axuda para os gastos de aloxamento, viaxe  e manutención que varían en función do país de realización da práctica formativa e en función da duración da mesma. E para os proxectos de mobilidade promovidos polos concellos e entidades sen ánimo de lucro se prevé una axuda para apoio aos aspectos organizativos, a execución do proxecto, e para a entidade de acollida no país de realización das prácticas formativas.
Está a súa disposición toda a información sobre este programa no seguinte enlace; http://xuventude.xunta.es/2016040818900/programa-de-mobilidade-transnacional-xuvenil-galeuropa-2016.html  ou nos números de teléfono 981 544 645 / 981 544 854 / 981 541 688 e a través do correo electrónico galeuropapr-garantiaxuvenil@xunta.es

TUROPERADORES E PERIODISTAS POLACOS E ALEMÁNS VISITAN GALICIA

Un grupo de sete operadores turísticos polacos e outro de seis xornalistas alemáns están a realizar un percorrido pola Comunidade galega nunha viaxe organizada por Turismo de Galicia ao obxecto de darlles a coñecer parte da oferta turística galega.

Os axentes turísticos polacos, que representan ás compañías Top Travel Incentives, OBP Incentive & Sport Travel, Weco Travel, Power Sport, Mazurkas Travel, Furnel Travel e Haxel Events & Incentive, comezaron onte a súa estadía en Galicia na cidade de Vigo, pola que fixeron unha visita panorámica.

Onte tamén visitaron a cidade de Pontevedra, a vila de Combarro, a Illa da Toxa, onde visitaron un complexo hoteleiro e termal, e fixeron un pequeno cruceiro pola Ría de Arousa entre O Grove e Cambados.

Hoxe, 2 de outubro, os operadores turísticos polacos farán un percorrido polo caso histórico da cidade de Santiago e visitarán varios hoteis da capital compostelá.

O día 3 de outubro trasladaranse ata a Costa da Morte, con paradas en Noia, Muros e visitas a Carnota e Fisterra. Tamén poderán coñecer a vila de Muxía e a súa contorna.

Os operadores turísticos polacos rematarán a súa estadía en Galicia cunha visita á cidade da Coruña, onde descubrirán os seus recursos turísticos e a súa oferta de aloxamento.

DOUS CAMBADESES LEVANDO CAMBADOS POLO MUNDO

O próximo día 7, e os días 14 e 15 de novembro, os competidores do  ximnasio Vital-Sport de Cambados Eloy González Costa e Víctor Martínez Batalla acudirán, na primeira data, á localidade de Seseña (Toledo) e, ao fin de semana seguinte, a Málaga, como integrantes do equipo Body Sport Team, ao que pertencen os competidores desta especialidade do Club Vital Sport Cambados, e dirixido por Xullo García PAMPÍN, para participar nos  Campionatos de Físicoculturismo e Fitness de AEFF, na categoría Men's Physique, Open Barbarian, na primeira data, e a, posteriormente, ao Campionato de España.  

Este ano, como novidade reseñar que este último, é clasificatorio para o Campionato Mundial Mr. & Ms. Universe N.A.C., que se celebrará na cidade alemá de Hamburgo o día 28 dese mesmo mes. Tamén decir que estes dous deportistas está a buscar colaboracións e patrocinios para poder acudir ao campionato Nacional que indicamos, calquera axuda, colaboración ou apoio que poidan recibir, será benvida, podendo para iso contactar directamente con eles a través das súas páxinas de Facebook, ou no ximnasio. 
Desde CORES DE CAMBADOS dámoslles ánimos na preparación e desexámoslles sorte para os campionatos.


Facebook de Eloy González

Facebook de Víctor Martínez

UNHA CAMBADESA COMPETIRÁ NO CAMPEONATO DE EUROPA

Con só 14 anos, a pontevedresa Alba Trigo segue demostrando por que é unha das grandes promesas da vela española. A moza, natural de Cambados, finalizou en terceira posición na categoría feminina do Campionato de España de Vela da clase Optimist que se disputou esta fin de semana na localidade cántabra de Laredo.

A actual campioa galega da súa clase -situada no segundo posto do ranking nacional- acompañou no podio desta esixente regata deportistas máis experimentadas como a mallorquina Aina Colom, que logrou a vitoria en augas cántabras, e a catalá Iset Segura. Ambas as dúas son a campioa do mundo e a subcampiona europea de clase Optimist, respectivamente.

Grazas a este resultado, Alba Trigo foi a única regatista galega seleccionada pola Federación Española para participar no próximo Campionato de Europa que se celebrará en Gales.

Asegura afrontar esta experiencia con moita ilusión e os nervios propios do momento, xa que só conta con sete días para preparar a viaxe. O seu barco viaxará directamente de Laredo ata Londres e ela voará o próximo domingo dende Barcelona para unirse aos seus compañeiros de selección antes de irse xuntos a terras galesas.

Alba, que pertence ao RCN Sanxenxo e dedica todas as súas fins de semana aos adestramentos, soña con facer un bo papel neste Europeo e poder optar a participar no Mundial da clase Optimist.

Para iso, Alba Trigo espera poder contar con axudas de máis patrocinadores e institucións porque, ata agora, os gastos destas viaxes os asume a súa propia familia.

Info e imaxes: PONTEVEDRAVIVA