60 CONCELLOS DE PONTEVEDRA BENEFICIARANSE DO PROGRAMA "CONECTADAS 2016" DA DEPUTACIÓN

A Xunta de Goberno da Deputación de Pontevedra vén de aprobar a relación de entidades ás que se lle conceden as accións formativas enmarcadas dentro do programa "Conectadas 2016". Son 332 as entidades locais beneficiarias dunha iniciativa á cal a Corporación destinou case 300.000 € (295.264,20 €). Vigo (con 44), A Estrada (33), Lalín (con 24), Ponteareas (con 18) e Pontevedra (14) encabezan a listaxe de concellos con máis cursos outorgados.

As actividades máis solicitadas foron as de "Traballos en tea, coiro, madeira e outros elementos" (34 entidades solicitantes), "Pilates" (33), "Risoterapia" (30), "Zumba" (29), "Cociña. Menú diario" (25), "Ximnasia de mantemento" (24), "Cestería" (21), "Arte floral. Ornamentación" (18), "Pastelería e repostería creativa" (16) e "Cociña e alimentación. Hábitos saudables" (outros 16), amosando a riqueza e diversidade dun programa estruturado en oito grandes bloques temáticos: "Muller emprende: Iniciativas sostibles para o emprego", "Muller e cultura: Artes visuais", "Actualízate" (alfabetización dixital), "Coas túas mans", "Porque ti o fas" (arte floral e ornamentación), "Súmate ao cambio" (cociña e alimentación), "Ponte en forma" e "Coidados persoais e saúde".

As actividades realizaranse ao longo de 60 concellos da provincia e son máis de 5.000 alumnas e alumnos os que se poderán beneficiar do programa. Cada un dos cursos terá unha duración de 35 horas e precisará un mínimo de 15 persoas participantes, organizándose en grupos de entre 20 e 25 persoas como máximo e con preferencia ás mulleres. Un 25% das prazas se reservan para homes, agás no caso dos cursos relacionados coa cociña e alimentación, onde a distribución de prazas será mixta.

O programa "Conectadas 2016" ten como obxectivo potenciar a participación e promoción das mulleres, mellorar a súa formación básica e favorecer as relacións interpersoais en igualdade, así como o intercambio de experiencias. Faino mediante accións formativas e coa incorporación de maneira transversal dos principios de igualdade, corresponsabilidade e conciliación nos distintos eidos persoal, laboral e familiar. Ademais, tamén pretende contribuír á mellora da empregabilidade das mulleres e o seu mantemento no mercado de traballo, reducindo a brecha dixital mediante o emprego da información e as novas tecnoloxías.