ROSA QUINTANA ENXALZA O LABOR DAS MARISCADORAS DE CAMBADOS

Rosa Quintana enxalza o labor das mariscadoras de Cambados como exemplo dos valores das mulleres galegas do mar.

A conselleira do Mar, Rosa Quintana, visitou hoxe ás mariscadoras da confraría de pescadores de Cambados para escoitar e analizar as súas necesidades e dar resposta a posibles dúbidas relacionadas coa súa actividade. Neste sentido, a titular de mar destacou que o traballo das profesionais do marisqueo de Cambados é un exemplo dos valores das mulleres do mar de Galicia polo seu compromiso coa boa xestión dos recursos e cunha explotación sustentable.

A representante do Executivo galego lembrou que esta visita é a resposta a outra anterior na que as mariscadoras lle trasladaron o seu interese de manter un encontro específico co sector do marisqueo, que agrupa a arredor de 200 profesionais nesta localidade. Unha actividade de moita importancia para a lonxa de Cambados pois o ano pasado facturou preto de oito millóns de euros só cos produtos extraídos polo sector marisqueiro.

Rosa Quintana destacou que as mulleres do mar como as de Cambados reflicten a esencia do potencial feminino no eido do mar, tal como se pode ver no vídeo Mulleres by the sea, publicado o 8 de marzo, Día Internacional da Muller. Nel pódense ver exemplos de mulleres do complexo mar-industria galego que mostran o especial cariño que teñen polos seus oficios, a vontade de protexer o seu medio de vida ou a presenza da muller desde sempre neste sector.

Son exemplos de distintas profesionais da cadea mar-industria de Galicia, que conta con preto de 500 mulleres na pesca extractiva, máis de 1.100 no ámbito da acuicultura -das que de 700 traballan nas bateas-, máis de 2.600 mariscadoras e milleiros de traballadoras vencelladas ás industrias conserveiras e do conxelado.

Por iso, a conselleira do Mar subliñou que a aportación das mulleres do mar, como as de Cambados, é fundamental para o complexo mar-industria de Galicia e salientou que sen a súa participación o mar galego perdería os seus sinais de identidade porque boa parte dos seus grandes referentes son mulleres.

A CONSELLEIRA DO MAR VISITA A CONFRARÍA DE CAMBADOS

A conselleira do Mar, Rosa Quintana, visitou hoxe a Confraría de Pescadores de Cambados, onde mantivo un encontro cos seus representantes para coñecer as necesidades da entidade e dos seus socios e aclarar dúbidas relacionadas coa súa actividade. A titular de Mar, que estivo acompañada durante o encontro co cabido pola directora xeral de Pesca, Acuicultura e Innovación Tecnolóxica, Mercedes Rodríguez, salientou a importancia de que se manteña un contacto fluído e constante entre sector e Administración para buscar as mellores solucións ás necesidades que lle van xurdindo aos profesionais do mar.

Nesta liña, a representante do Executivo galego fixo fincapé na transcendencia do mantemento das instalacións dos portos e das lonxas galegas para facilitar o traballo diario dos profesionais do mar. Este tipo de visitas periódicas, lembrou a titular de Mar, enmárcanse nese obxectivo e permiten intercambiar impresións co sector en primeira persoa, analizar e coñecer en directo os problemas existentes en cada zona e buscar o mellor xeito de solucionalos o antes posible.

A petición máis destacada que os membros do Cabildo lle fixeron a Rosa Quintana foi a necesidade de acometer, canto antes, ben unha reforma en profundidade da lonxa de Tragove, ben a construción dun novo edificio.

ENTREVISTA A FÁTIMA ABAL. OS ESPUMOSOS RÍAS BAIXAS EN XAPÓN E A FESTA DA VIEIRA

A alcaldesa Fátima Abal adiantou varias novas nunha entrevista nen COPE Pontevedra.
O viño albariño espumoso servirase nunha feira de Tokio grazas á promoción que fixo Cambados en FITUR, a Feira Internacional do Turismo celebrada a pasada semana en Madrid. Profesionais xaponeses solicitaron unhas botellas da Denominación de Orixe Rías Baixas para o seu evento. Posteriormente, confirmaron que visitarán Cambados na festa do Albariño de agosto, segundo anunciou en COPE + Pontevedra a alcaldesa Fátima Abal. Esta variedade de espumoso promocionarase tamén na Festa do Albariño que se celebra en Mallorca no mes de abril e nas novas xornadas que organizará Cambados os días 14, 15 e 16 de febreiro no Salón José Pena. Sobre esa localización, Abal recoñeceu que non corre risco por necesitar dunha autorización de Portos de Galicia, xa que o viño maridará con conservas e, desta forma, mantense un uso relacionado co sector do mar. Segundo o que a presidenta de Portos de Galicia transmitiulle á rexedora do Salnés, este ano resolverase a petición de Cambados para que o paseo dá Calzada deixe de ser terreo portuario e pase a ser municipal.
FESTA DA VIEIRA Despois de non poder celebrarse en 2019 por falta de produto, o Concello de Cambados e a confraría local recuperará a festa da Vieira durante a fin de semana do 17 ao 19 de xullo, posiblemente cambiando de localización ao parque Torrado e pasando a ser un evento máis popular.


A entrevista completa AQUÍ.

A FROTA DE CAMBADOS RECOLLE 1500 QUILOS DE LIXO NOS FONDOS MARIÑOS

A segunda campaña de retirada de lixo mariño na ría de Arousa no marco do proxecto europeo CleanAtlantic, desenvolvida do 2 ao 5 de decembro pola frota de rastro de vieira da confraría de Cambados, saldouse coa recollida de 1.500 quilos de residuos de distinto tipo. A maioría deles, máis do 75%, correspóndese con utensilios ou elementos elaborados con plástico.

Esta acción, organizada polo Centro Tecnolóxico do Mar-Fundación Cetmar no marco do proxecto CleanAtlantic, que coordina o organismo dependente da Consellería do Mar, participaron un total de 27 embarcacións cambadesas durante o desenvolvemento da súa actividade profesional na zona denominada O Canal, na parte interna da ría de Arousa, nunha área comprendida entre Cambados, a Illa de Arousa e O Grove.

Dos 1.504,25 quilos de residuos recollidos nesa área, arredor dun 77% correspondíase con restos de materiais plásticos, concretamente 1.159,77 quilos. O resto eran elementos de goma (6%), metais (4%), produtos orgánicos como madeira procesada ou papel (2,6%), unha pequena porcentaxe de vidro (0,25%) e mesturas de materiais diversos (9,9%).

Os resultados obtidos nesta campaña coinciden en canto ao tipo de residuos recollidos coa acción anterior desenvolvida na ría de Arousa polo proxecto CleanAtlantic. Entre os días 4 e 7 de novembro a frota de bou de vara da confraría de Cambados participou na retirada de lixo nunha zona situada entre Vilanova, a Illa de Arousa e a banda norte da ría de Arousa e recolleu arredor de 3.000 quilos de residuos en só catro días de actividade.

Toda a información extraída destas accións permite coñecer con maior detalle as mellores condicións operativas para a recollida de residuos, a súa orixe e as cantidades, así como os impactos no medio, co que se obteñen datos para deseñar medidas orientadas á redución do lixo que chega ao mar e a súa xestión.

O proxecto europeo CleanAtlantic está financiado polo Programa Espazo Atlántico e ten como obxectivo mellorar as capacidades para previr, monitorizar e reducir o lixo mariño a través da cooperación rexional. O consorcio desta iniciativa está integrado por 19 organizacións de cinco países (España, Francia, Portugal, Irlanda e Reino Unido) e a participación galega está formada polo Cetmar, o Instituto Tecnolóxico para o Control do Medio Mariño de Galicia (Intecmar), a Universidade de Santiago de Compostela (USC) e investigadores dos centros galegos do Instituto Español de Oceanografía (IEO).

DUAS ZONAS MARISQUEIRAS DE CAMBADOS PASAN A SER ZONAS B NAS QUE SE PODE MARISCAR

A mellora dos resultados obtidos nos controis que realiza periodicamente o Instituto Tecnolóxico para o Control do Medio Mariño de Galicia (Intecmar), dependente da Consellería do Mar, nas zonas de porodución marisqueira permitiu que desde a semana pasada sete desas zonas de produción mellorasen a súa clasificación microbiolóxica, o que facilita o labor do sector.

As análises realizadas nestas áreas de traballo revelaron de xeito continuado menores niveis de contaminación pola bacteria E. Coli que na súa anterior clasificación, o que permitiu cambiar a súa catalogación mediante unha resolución publicada polo Intecmar o pasado xoves. As melloras supoñen que dúas zonas que tiñan clasificación B -os produtos extraídos delas tiñan que pasar por un proceso de depuración previo á súa venda- pasan a ser zonas A, polo que o marisco pode ser comercializado directamente sempre a través dun centro de expedición. Mentres, outras cinco zonas catalogadas como C -polo que o produto tiña que pasar pola depuración natural mediante reinstalación en batea- ou B/C estacional, pasan a ser zona B, co que o marisco extraído delas poderá comercializarse directamente previo paso por unha depuradora.

Estes cambios, froito da mellora da calidade das augas, facilitarán o traballo dos mariscadores ao reducir ou eliminar os prazos de depuración dos produtos extraídos e deberían redundar nun mellor prezo das súas capturas en lonxa.

As zonas que pasan de estar clasificadas como B a ser zona A son a parte media da ría do Barqueiro, en Lugo, e a enseada de Meloxo, na ría de Arousa, mentres que na ría arousá están outras dúas das cinco zonas que melloran de C a B. Unha delas é a do saco de Fefiñáns, en Cambados, que antes era C e agora pasa a ser B, e a outra é a coñecida como Entre canos, tamén en Cambados, que ata agora era B/C estacional -sendo C entre novembro e xuño- e que pasa a ser B todo o ano.

As outras melloras de clasificación das zonas de produción correspóndense co banco da Comboa, na ría de Ortigueira, coa enseada de Caranza, en Ferrol, e coa parte media do esteiro do río Mandeo. Estas tres áreas de traballo pasaron de estar catalogadas como zonas C a ser zona B, co que o produto extraído só ten que pasar por unha depuradora antes da súa comercialización.

O traballo de seguimento constante dos bancos marisqueiros que fai a Xunta a través do Intecmar permite coñecer o seu estado e ver o xeito de mellorar a súa produción polo que estas melloras na clasificación son froito en moitos casos de labores para rexenerar os bancos marisqueiros e actuacións para mellorar o saneamento das rías.

Estas melloras facilitarán o traballo dos profesionais do marisqueo das zonas afectadas e súmanse ás 27 zonas que melloraron a súa clasificación entre abril de 2009 e xullo deste ano, concretamente en 20 bancos marisqueiros e sete viveiros flotantes con incidencia en máis de 12 quilómetros cadrados de bancos marisqueiros e 740 bateas.

As análises realizadas polo Intecmar tamén constataron o empeoramento de dúas zonas de produción marisqueira, a enseada de Fisterra e a enseada de Bañobre. A primeira delas posou de ser A estacional (era B no mes de agosto) a ser B todo o ano e a segunda pasou de ser B a ser B de novembro a abril e C de maio a outubro. A elas súmanse os polígonos A Pobra A-B, unha zona de cultivo en viveiros que pasa de ser A a B.

A FROTA DE CAMBADOS INICIA TRES XORNADAS DE RECOLLIDA DE LIXO MARIÑO NO MARCO DO PROXECTO CLEANATLANTIC

A frota de rastro de vieira da confraría de Cambados iniciou hoxe tres días de campaña de retirada de lixo mariño na ría de Arousa. Esta acción, organizada polo Centro Tecnolóxico do Mar (Cetmar), dependente da Consellería do Mar, enmárcase no proxecto europeo CleanAtlantic para mellorar as capacidades de previr, monitorizar e reducir o lixo mariño a través da cooperación rexional. Neste proxecto tamén participa o Instituto Tecnolóxico para o Control do Medio Mariño de Galicia (Intecmar) e a súa directora, Covadonga Salgado, supervisou no porto de Tragove a posta en marcha de todo o dispositivo.

A campaña de recuperación de lixo mariño na ría de Arousa realízase coa colaboración da confraría de Cambados e consiste na localización e retirada de lixo do fondo mariño e de artes de pesca por parte da frota de rastro de vieira durante o desenvolvemento da súa actividade diaria. Os residuos que os profesionais do mar van recuperando deposítanse en sacos específicos colocados a bordo das embarcacións e un barco bateeiro actúa como plataforma intermedia no que depositar eses sacos para que non obstaculicen a actividade de extracción dos tripulantes.

Os sacos con residuos retirados do mar son pesados, caracterizados e levados a terra para a súa correcta xestión e estudo no marco do proxecto CleanAtlantic, que inclúe accións piloto para estudar as condicións operativas e loxísticas máis adecuadas para a retirada do lixo mariño coa colaboración do sector pesqueiro e para coñecer as capacidades dos diferentes aparellos nestas actuacións de limpeza.

De feito, a información obtida nestas accións permite coñecer con maior detalle as mellores condicións operativas para a recollida de residuos, a súa orixe e as cantidades, así como os impactos no medio, o que aporta información fundamental para deseñar posteriormente medidas orientadas á redución do lixo que chega ao mar e a súa xestión.

A Consellería do Mar avanza deste xeito na colaboración co sector pesqueiro para o estudo e recollida do lixo mariño e mostrando ao mesmo tempo a implicación do sector pesqueiro galego na protección e conservación do mares. De feito, a acción iniciada hoxe en Cambados súmase á realizada por esta mesma confraría a comezos de novembro e na que a frota de bou de vara retirou preto de 3.000 quilos de residuos mariños na zona interna da ría de Arousa.

O proxecto CleanAtlantic

Esta iniciativa europea na que se enmarcan as campañas de recollida de lixo no mar comezou en setembro de 2017 e finalizará en agosto de 2020. O grupo de traballo está integrado por 19 organizacións de cinco países (España, Francia, Portugal, Irlanda e Reino Unido) e conta coa participación de entidades galegas como o Cetmar, o Intecmar, a Universidade de Santiago de Compostela (USC) e investigadores dos centros galegos do Instituto Español de Oceanografía (IEO).

A nova na TVG

XUNTA E CONFRARÍA DE CAMBADOS ORGANIZAN UNHA RECOLLIDA DE LIXO MARIÑO NA RÍA DE AROUSA

A acción está promovida polo Centro Tecnolóxico do Mar en colaboración coa confraría de Cambados e desenvolverase entre o luns e o xoves da próxima semana coa participación da frota de rastro de vieira

A colaboración cos pescadores noutra iniciativa previa coa frota de bou de vara deu como resultado a comezos de mes a retirada de 3.000 quilos de residuos na zona interna desta mesma ría

O Centro Tecnolóxico do Mar-Fundación Cetmar desenvolverá entre o luns e o xoves da próxima semana unha nova campaña de retirada de lixo mariño na ría de Arousa coa colaboración da frota de rastro de vieira da confraría de Cambados. Trátase dunha acción enmarcada no proxecto europeo CleanAtlantic, que está coordinado polo centro dependente da Consellería do Mar e financiado polo Programa Espazo Atlántico. O seu obxectivo é mellorar as capacidades para previr, monitorizar e reducir o lixo mariño a través da cooperación rexional.

No marco das actividades orientadas á redución do lixo no mar, esta iniciativa inclúe unha serie de accións piloto dirixidas a estudar as condicións operativas e loxísticas máis adecuadas para a retirada de lixo mariño coa colaboración do sector pesqueiro e a coñecer as capacidades dos diferentes aparellos para estas actuacións de limpeza.

A campaña que se levará a cabo nos vindeiros días coa colaboración da confraría de Cambados consistirá na localización e retirada de lixo do fondo mariño e de artes de pesca abandonadas ou perdidas mediante a participación dos pescadores, que depositarán eses residuos recuperados durante as faenas ordinarias de pesca en sacos específicos a bordo de cada embarcación. Para facilitar a operativa dos profesionais participantes, un barco bateeiro actuará como plataforma intermedia de depósito deses sacos, que serán pesados, caracterizados e posteriormente levados á terra para a súa correcta xestión.

Desta maneira dáse continuidade á campaña de retirada de residuos dos fondos mariños realizada pola frota de bou de vara desta confraría a comezos deste mes e na que se retiraron cerca de 3.000 quilos de residuos da zona interna da ría de Arousa.

Con estas actividades o Centro Tecnolóxico do Mar (Cetmar) avanza na colaboración co sector pesqueiro en proxectos centrados no estudo e retirada de lixo mariño unindo a limpeza do fondo mariño coa adquisición de datos sobre esta problemática que afecta ao conxunto dos océanos e poñendo de manifesto a forte implicación do sector pesqueiro galego na protección e conservación dos mares.

A información obtida permite coñecer con maior detalle as mellores condicións operativas para a recollida de residuos, a súa orixe e as cantidades así como os impactos no medio, o que aporta información fundamental para deseñar posteriormente medidas orientadas á redución do lixo que chega ao mar e a súa xestión.

O proxecto CleanAtlantic no que se enmarcan estas accións de recollida de lixo no mar comezou en setembro de 2017 e finalizará en agosto de 2020. O consorcio está integrado por 19 organizacións de cinco países (España, Francia, Portugal, Irlanda e Reino Unido) e as entidades galegas participantes son o Cetmar, o Instituto Tecnolóxico para o Control do Medio Mariño de Galicia (Intecmar) e a Universidade de Santiago de Compostela (USC) ademais de investigadores dos centros galegos do Instituto Español de Oceanografía (IEO).

A XUNTA CONVOCA 12 NOVOS PERMISOS DE EXPLOTACIÓN PARA MARISQUEO A PÉ NA CONFRARÍA DE CAMBADOS

A Consellería do Mar convoca 12 novos permisos de explotación para marisqueo a pé na confraría de pescadores de Cambados. Para poder optar a eles, os solicitantes deben cumprir, entre outros, os requisitos exixidos no Decreto 425/1993, do 17 de decembro, polo que se regulan os permisos de explotación para exercer a actividade pesqueira e marisqueira e presentar a documentación requirida pola Consellería do Mar.

Os interesados poderán consultar a convocatoria na páxina web da Consellería, neste enlace. O prazo de presentación de solicitudes é de 15 días hábiles tras a publicación destas convocatorias no taboleiro de anuncios da Xefatura Territorial e na páxina web da Consellería.

As solicitudes e a documentación acreditativa deberán presentaranse preferiblemente por vía electrónica a través do formulario normalizado dispoñible na sede electrónica da Xunta de Galicia (https://sede.xunta.es). Tamén se poderán presentar en papel nas oficinas de rexistro da Xunta de Galicia, oficinas de correos ou no resto de lugares indicados na Lei de réxime xurídico das administracións públicas e do procedemento administrativo común.
Unha vez rematado o prazo de solicitude, a Consellería do Mar procederá á súa valoración. As solicitudes serán estudadas e baremadas, segundo recolle a Resolución do 12 de novembro de 2013 da Dirección Xeral de Desenvolvemento Pesqueiro pola que se aproba o baremo para obter o permiso de explotación para o marisqueo a pé.

Cabe lembrar que todas as prazas se convocan despois de comprobar a súa viabilidade nos informes técnicos e sempre tendo en conta a compatibilidade e sustentabilidade dos recursos e criterios socieconómicos.

O PROXECTO DA CONFRARÍA DE CAMBADOS FINALISTA DOS PREMIOS ECONOMÍA AZUL

Preto de 7.000 votos da cidadanía axudaron a escoller os cinco proxectos sustentables dos grupos de acción local do sector pesqueiro (GALP) gañadores da segunda edición dos Premios Economía Azul. Os recoñecementos anunciáronse hoxe nunha gala celebrada na Cidade da Cultura. Tanto aos cinco proxectos gañadores como os dez finalistas e ao resto de iniciativas presentadas nos últimos anos recibiron os eloxios dos presentes.

Agradeceuse a aportación destes proxectos ás zonas costeiras de Galicia no marco do acto de entrega destes galardóns, celebrado na Cidade da Cultura e que contou coa participación dos representantes das confrarías de pescadores, unha representante da Rede Europea das Zonas de Pesca (Farnet), e as presidentas e presidentes dos grupos de acción local do sector pesqueiro (GALP) de Galicia.

As iniciativas que resultaron gañadoras destes premios foron no eido de apoio á pesca costeira artesanal, o proxecto Do mar á mesa: Depuración e punto de venda, do GALP A Mariña-Ortegal. No ámbito da creación de emprego, a iniciativa gañadora foi Albergue Estela do Mar, do GALP Ría de Vigo-A Guarda, e no de diversificación, o proxecto elixido foi Obras de Restauración do Dique da Cabana e a súa contorna, do GALP Golfo Ártabro Norte.

Mentres, no referente a innovación local, a iniciativa premiada foi a planta de produción de aceite de microalgas do GALP Costa da Morte. Neste apartado concurría o proxecto ‘Mellora económica e diversificación e innovación en produtos da pesca local para interese colectivo’. Confraría de Pescadores San Antonio de Cambados. Na categoría de economía circular -un galardón de nova creación nesta edición- o proxecto elixido foi Produción de mallas protectoras biodegradables para o cultivo de mexillón, do GALP Ría de Arousa. 

Durante o acto a conselleira do Mar agradeceu o labor dos grupos de acción local do sector pesqueiro, que se ten comprobado que son un instrumento útil para a xeración de emprego e de iniciativas innovadoras económicas e empresariais. “Son ferramentas de cohesión territorial que permiten mellorar a economía das súas comunidades e fixar a poboación nas contornas costeiras”, salientou Rosa Quintana.

Os premios Economía Azul teñen carácter bienal e están promovidos pola Consellería do Mar a través da Dirección Xeral de Desenvolvemento Pesqueiro. Con eles preténdese motivar a potenciais promotores a que presenten proxectos ao abeiro do GALP, dar visibilidade ao traballo dos GALP nas zonas pesqueiras e recoñecer os mellores proxectos aprobados no marco das estratexias de desenvolvemento local participativo (EDLP) dos GALP que contribuíron ao desenvolvemento sustentable das zonas pesqueiras.

A gala de entrega de premios estivo conducida polas actrices Marta Pérez e Diana Sieira de Inversa Teatro e, tralo acto de entrega de galardóns a todos os distinguidos polo seu traballo, contou cun peche musical a cargo de Davide Salvado.

Elección dos premiados

Os finalistas que optaban ao galardón foron seleccionados por unha comisión encargada de escoller tres proxectos por cada categoría entre as propostas presentadas polos GALP. Os criterios desta selección estiveron determinados polos beneficios que os proxectos son capaces de xerar para o sector pesqueiro; a súa contribución á creación de emprego nas zonas pesqueiras; o reforzo da identidade, a cultura e o patrimonio local da zona pesqueira; os elementos innovadores no contexto local; a creación de oportunidades para mulleres e mozas/os no sector pesqueiro ou marítimo; e a contribución a unha economía circular.

Ademais, para a elección dos proxectos gañadores, houbo unha votación pública entre os días 1 e 20 de outubro na que participou a cidadanía a través da web https://galp.xunta.gal/. Os galardóns non teñen dotación económica, pero supoñen un recoñecemento público para os proxectos destacados en cada unha das categorías.

ESTE VENRES SABREMOS SI A CONFRARÍA DE CAMBADOS ACADA O PREMIO ECONOMÍA AZUL

A Xunta recoñecerá este venres os mellores proxectos de desenvolvemento sustentable nas zonas pesqueiras galegas, promovidos polos grupos de acción local do sector pesqueiro no marco da implantación das Estratexias de Desenvolvemento Local Participativo (EDLP). Será no transcurso da gala da segunda edición dos Premios Economía Azul que se celebrará este venres a partir das 19:00 horas no salón de convencións do edificio Cinc da Cidade da Cultura.
A gala estará conducida polas actrices Marta Pérez e Diana Sieira de Inversa Teatro e contará cun peche musical a cargo de Davide Salvado.

Os Premios Economía Azul están promovidos pola Consellería do Mar, a través da Dirección Xeral de Desenvolvemento Pesqueiro. Con eles preténdese visibilizar o traballo dos GALP nas zonas pesqueiras e motivar a potenciais promotores para que presenten proxectos ao abeiro das EDLP dos GALP.

Nesta segunda edición convocáronse cinco categorías: mellor proxecto de apoio á pesca costeira artesanal, mellor proxecto de creación de emprego, mellor proxecto de diversificación, mellor proxecto de innovación local e mellor proxecto de economía circular. Os proxectos finalistas foron seleccionados durante a primeira semana de setembro por unha comisión encargada de escoller tres proxectos por cada categoría entre as propostas presentadas polos GALP.

Os criterios da selección están determinados polos beneficios que os proxectos son capaces de xerar para o sector pesqueiro, a súa contribución á creación de emprego nas zonas pesqueiras, o reforzo da identidade, a cultura e o patrimonio local da zona pesqueira; os elementos innovadores no contexto local e a creación de oportunidades para mulleres e mozos/as no sector pesqueiro ou marítimo.

A categoría de apoio á pesca costeira artesanal (incluído o marisqueo a pé) comprende aqueles proxectos que aborden, entre outros aspectos, novas canles de comercialización, o aumento do valor dos produtos pesqueiros, a revalorización das especies menos coñecidas, a oferta de produtos de proximidade e tamén solucións para promover o uso dos descartes.

Na área de creación de emprego valóranse aqueles proxectos que estimulen a economía das zonas pesqueiras, reforcen o seu atractivo desenvolvendo servizos de alta calidade, capaciten ás persoas e promovan o emprendemento no sector pesqueiro ou marítimo.

Na categoría de diversificación avalíanse novas actividades no sector pesqueiro e marítimo, a ligazón do turismo e o sector pesqueiro, diversificación pesqueira cara o turismo pesqueiro, e o fomento e aproveitamento do patrimonio cultural marítimo-pesqueiro.

Na de innovación local considéranse as iniciativas que redunden en novas ideas na zona e novas formas de pensar e de facer. A innovación pode referirse a novos mercados, produtos, servizos, métodos de organización e a innovación social.

Por último, na de economía circular téñense en conta novas ideas que apoien a economía circular relacionada co sector pesqueiro, en particular proxectos dos seguintes tipos: reutilización, reparación e reciclaxe de materiais empregados nas actividades do sector pesqueiro; deseño de produtos que empreguen materiais que minimicen os residuos e a contaminación; e que engadan valor a subprodutos pesqueiros ou reduzan refugallos alimentarios da actividade produtiva. Para escoller os proxectos gañadores celebrouse unha votación pública entre o 1 e o 20 de outubro na web galp.xunta.gal.

Os proxectos finalistas desta segunda edición de entre os que sairán os gañadores son:

Ao premio para o mellor proxecto de Apoio á pesca costeira artesanal

1/ ‘Do mar á mesa: Depuración e punto de venda’. Confraría de Pescadores de Cedeira. (GALP A Mariña – Ortegal).

2/ ‘Comercialización sustentable mediante a mellora da xestión da trazabilidade’. Confraría de Pescadores de Noia. (GALP Costa Sostible).

3/ ‘Deseño e desenvolvemento dun protocolo de coxestión entre as confrarías de Muros e Noia para a mellora de aproveitamento dos recursos marisqueiros’. (GALP Costa Sostible).

Ao premio para o mellor proxecto de creación de emprego:

1/ ‘Centro de Elaboración e Transformación de productos do mar.’ Mariscos Antón Fernández, S.L. (GALP Costa Sostible).

2/ ‘Ampliación de Local e Mellora dos Medios Técnicos’. Nordés Velería S.L. (GALP Ría de Pontevedra).

3/ ‘Albergue Estela do Mar’. Estela do Mar Sociedade Cooperativa Galega. (GALP Ría de Vigo-A Guarda).

Ao Premio para o mellor proxecto de diversificación

1/ ‘Obras de Restauración do Dique da Cabana e a súa contorna’. Concello de Ferrol. (GALP Golfo Ártabro Norte).

2/ ‘Mar da Morosa Artesáns do Peixe’. Javier Beiro Rebollido. (GALP Costa Sostible).

3/ ‘A Guarda, Mar de Sal: Posta en valor das salinas romanas do Seixal e Camposancos como recurso patrimonial e turístico’. Concello de A Guarda. (GALP Ría de Vigo-A Guarda).

Ao Premio para o Mellor Proxecto de Innovación local

1/ ‘Augas Santas cervexa artesá da Mariña’. Mª Jimena Iriarte Moreno. (GALP A Mariña-Ortegal).

2/ ‘Planta de produción de aceite de microalgas’. CARBIOTECH S.L.U. (GALP Costa da Morte).

3/ ‘Mellora económica e diversificación e innovación en produtos da pesca local para interese colectivo’. Confraría de Pescadores San Antonio de Cambados. (GALP Ría de Arousa).

Ao Premio para o Mellor Proxecto de Economía Circular

1/ ‘Persoas Diversas + Confrarías = Economía Circular’. ASPABER (Asociación de Pais de Discapacitados Psíquicos de Bergantiños). (GALP Costa da Morte).

2/ ‘Taller de Sensibilización Medioambiental da Costa da Morte’. Asociación de Redeiras Artesás Illa da Estrela. (GALP Costa da Morte).

3/ ‘Produción de mallas protectoras biodegradables para o cultivo de mexillón’. Ecoplas Barbanza S.L. (GALP Ría de Arousa).

PERTO COSTA VICEPRESIDENTE DA FEDERACIÓN GALEGA DE CONFRARÍAS DE PESCADORES

A xunta xeral da Federación Galega de Confrarías de Pescadores reuniuse esta mañá para elixir os seus presidente e vicepresidentes, de acordo coa normativa sobre elección dos órganos de goberno desta entidade. 

Como presidente foi elixido José Antonio Pérez Sieira, patrón maior da confraría de Ribeira. Como vicepresidente 1º, Ruperto Costa Fernández, patrón maior da confraría de Cambados e como vicepresidente 2º Jacobo Balseiro Ferreiros, vicepatrón maior primeiro da confraría de San Cibrao.

A continuación, e de acordo co calendario electoral, o vindeiro 25 de novembro darase inicio ao prazo de presentación de recursos sobre a elección dos órganos de goberno da Federación ante a Xunta Electoral, que finalizará o día 27 de novembro. 

O 3 de decembro rematará o prazo para a resolución de recursos sobre a elección dos órganos de goberno e ao día seguinte farase a súa proclamación definitiva. Unha vez completados os correspondentes prazos de presentación e resolución de recursos, será a toma de posesión dos órganos de goberno nos seus cargos, prevista para o 5 de decembro. 

Na seguinte táboa resúmense os resultados destes comicios:

FEDERACIÓN GALEGA DE CONFRARÍAS

A CARAVANA POLA ACUICULTURA EN CAMBADOS

Produtores, comercializadores, consumidores, cociñeiros, investigadores, divulgadores, xornalistas…. Déronse cita hoxe en Cambados. Fano baixo o paraugas da Rede de Inmunogenómica de enfermidades de peixes e moluscos, centrada na procura de solucións innovadoras para o control sanitario na acuicultura, que organizou unha xornada co obxecto de difundir a importancia e seguridade asociada á produción de moluscos. Con saída de Santiago de Compostela, os organizadores de “a Caravana pola Acuicultura”, nome co que se bautizou esta actividade, e durante o traxecto ata a Confraría de Pescadores de Cambados, deron a coñecer de maneira moi divulgativa -dada a variedade de público asistente-, tres proxectos europeos relacionados con moluscos nos que participa actualmente a Rede: SETTLE ( Bivalve conditioning and settlement – keys to competitive hatchery production), OYSTERECOVER ( Establishing the scientific basis and technical procedures and standards to recover the European flat oyster production through strategies to tackle the main constraint, Bonamiosis ) e COCKLES Co- operation for restoring Cockle shellfisheries & its ecosystem- services in the Atlantic Area.

Unha vez na Confraría de Cambados, e tras a presentación da Rede Inmunogenom, os participantes coñeceron en detalle o cultivo de ameixas e berberechos así como o cultivo de mexillón. Fixérono da man de expertos e profesionais. Ás explicacións acompañáronse visitas en situ, tanto ao banco de produción de moluscos infaunales de Ou Sarrido (en Cambados), como a unha batea de preengorde de semente de berberecho e ameixa, unha batea de engorde de mexillón e outra de engorde de recoiro. “Estamos firmemente convencidos das bondades da produción de organismos acuáticos por ser a única alternativa sustentable en relación co crecemento da poboación humana, pero tamén pola calidade e seguridade asociadas a estas producións. E non menos importante, pola súa relevancia para o mantemento das comunidades rurais costeiras especialmente en Galicia”, sinala Paulino Martínez, coordinador da Rede Inmunogenom. “É por isto –engade- que queremos trasladar o noso convencemento sobre o valor da acuicultura e a importancia de investir en mellorar as producións e a súa sustentabilidade a través da investigación. Para iso, nada mellor que organizar unha xornada, como a que deseñamos e que sirva de altofalante cara á sociedade nun formato demostrativo e interactivo”. A xornada finalizou cunha degustación de moluscos de Galicia.
Inmunogenom, formada por investigadores da Universidade de Santiago de Compostela e do Centro de Investigacións Mariñas de Corón está financiada polas "Axudas para a consolidación e estruturación de unidades de investigación competitivas e outras accións de fomento nas universidades do SUG, nos organismos públicos de investigación de Galicia e noutras entidades de Sistema Galego de I+D+i", da Consellería de Cultura, Educación e Ordenación Universitaria de la Xunta de Galicia.

PERTO COSTA CONTINUARÁ DE PATRÓN MAIOR DE CAMBADOS

Ruperto Costa seguirá á fronte da Confraría de Cambados ao gañar as eleccións de hoxe cun gran respaldo.
En canto as mariscadoras e dado que a anterior non se presentaba a reelección hai nova presidenta, trátase de María Resúa Rey.

Os resultados oficiosos son 16 representantes de 24 posibles e 3 empates.

A CONFRARÍA DE CAMBADOS XÓGASE O SEU FUTURO NAS ELECIÓNS DE MAÑÁN

Máis de 12.300 profesionais do mar están chamados a votar mañá nas eleccións ás confrarías de pescadores de Galicia.

-As mesas electorais abrirán ás 10:00 horas da mañá e permanecerán abertas ata as 20:00 horas.

-Votarán todas as confrarías simultaneamente agás os pósitos de Fisterra, Mera, Sada e O Vicedo, xa que non precisan ir a eleccións ao coincidir o número de candidatos co número de vogais á xunta xeral. 

Mañá sábado 29 de setembro as confrarías de pescadores galegas participarán nun proceso electoral no que máis de 12.300 empresarios e traballadores do mar poderán escoller os vogais que conformarán a xunta xeral e que os representarán os vindeiros catro anos. Nestes comicios votarán todas as confrarías simultaneamente agás os pósitos de Fisterra, Mera, Sada e O Vicedo, xa que non precisan ir a eleccións ao coincidir o número de candidatos co número de vogais á xunta xeral.

Trátase do primeiro paso dun proceso electoral que se desenvolverá en tres partes. Trala proclamación electoral provisional das persoas que formarán parte da xunta xeral e os vogais das xuntas directivas das agrupacións sectoriais, terán lugar as eleccións nas tres federacións provinciais e finalmente elixirase ao presidente da Federación Galega de Confrarías de Galicia.

As votacións darán comezo simultaneamente ás 10:00 horas, permanecendo abertas as comisións electorais un mínimo de catro horas e un máximo de oito horas -ben ininterrompidamente ou cun receso intermedio- segundo o estableza o plan electoral de cada confraría aprobado e ratificado pola Consellería do Mar.

Tal e como se establece na orde do 29 de abril de 2014, os secretarios/as de cada confraría deberán levantar acta inmediatamente cos resultados das votacións e remitilas no prazo das 24 horas seguintes (sen ter en conta o domingo) ao día das eleccións.

Na Confraría San Antonio de Cambados serán 504 os/as chamados/as a exercer o seu dereito ao voto.

Decidirán entre a candidatura que preside actualmente o cabildo ou a candidatura vinculada a membros da anterior directiva presidida por Benito González, un Patrón Maior con máis sombras que luces.

Artigo de "A TI MEU CAMBADOS" ¡¡¡VAIASE SR. GONZALEZ!!!

MAÑÁ COMEZA A CAMPAÑA ELECTORAL ÁS VOGALÍAS DAS XUNTAS XERAIS DAS 63 CONFRARÍAS DE GALICIA QUE SE PROLONGARÁ ATA O 27 DE SETEMBRO

Un total de 1.843 traballadores e de 1.239 empresarios do mar son candidatos a vogais

Os comicios desenvolveranse en tres partes, celebrándose en primeiro lugar as eleccións nas 63 confrarías, despois nas tres federacións provinciais e finalmente elixirase ao presidente da Federación Galega de Confrarías de Galicia

En Cambados hai dous grupos ben diferenciados. Os que apoian ao actual Patrón Mayor e unha lista alternativa na que aparecen varios nomes vinculados á etapa anterior.

Un total de 1.843 traballadores e 1.239 empresarios do sector do mar concorren como candidatos a vogais das xuntas xerais das 63 confrarías de pescadores de Galicia nas eleccións para a renovación dos seus órganos reitores, que se celebrarán o 29 de setembro. Cumprida esta fase de proclamación de candidaturas definitivas, mañá iniciarase a campaña electoral, que se prolongará ata o 27 de setembro incluído, sendo o 28 de setembro a xornada de reflexión.

Unha vez electos os vogais da xunta xeral, tomarán posesión dos seus cargos na súa sesión constitutiva, que terá lugar na sede da confraría no prazo máximo de cinco días desde a súa proclamación definitiva. Neste primeiro pleno da sesión constitutiva da xunta xeral, iniciarase o procedemento para elixir o patrón/a maior, vicepatróns/as maiores e vogais do cabido.

Elección dos patróns e vicepatróns

Os membros da xunta xeral elixirán por maioría simple en primeira volta ao patrón ou patroa maior entre os candidatos presentados. Para o caso de empate repetiranse as votacións en segunda volta e de manterse o empate resolverase a favor do de maior antigüidade na confraría e no caso de persistir o empate, a favor do de maior idade. A continuación e no mesmo acto, a xunta xeral elixirá de entre os seus membros os vicepatróns maiores primeiro e segundo e os vogais do cabido, respectando a paridade e proporcionalidade que se estableceu para a xunta xeral.

Imaxe: Faro de Vigo

Todos estes pasos veñen explicados na normativa de convocatoria de eleccións, publicada no Diario Oficial de Galicia do 3 de xullo de 2018 e que regula todo o proceso electoral nas confrarías de pescadores e establece o proceso a seguir en cada momento, detallando todos os pasos para elixir o patrón maior e os membros do cabido. Tal e como establece esta normativa, os comicios desenvolveranse en 3 partes. En primeiro lugar realizaranse as eleccións nas 63 confrarías de pescadores de Galicia, despois celebraranse as votacións nas 3 federacións provinciais e finalmente elixirase ao presidente da Federación Galega de Confrarías de Galicia.

NOTA: Anéxase táboa co número de candidatos a vogais das xuntas xerais de cada unha das confrarías

CONFRARÍA	TOTAL CANDIDATOS XUNTA XERAL	CANDIDATOS EMPRESARIOS	CANDIDATOS TRABALLADORES
A CORUÑA	25	13	12
A GUARDA	107	25	82
A ILLA DE AROUSA	38	18	20
A POBRA	33	13	20
ALDÁN-HÍO	52	29	23
ARCADE	30	16	14
ARES*	21	5	16
BAIONA	33	15	18
BARALLOBRE	41	29	12
BUEU	19	10	9
BURELA	124	49	75
CABO DE CRUZ	123	101	22
CAIÓN*	24	7	17
CAMARIÑAS	46	29	17
CAMBADOS	46	24	22
CAMELLE	71	36	35
CANGAS	31	16	15
CARIÑO	94	29	65
CARREIRA-AGUIÑO	27	18	9
CARRIL	38	22	16
CEDEIRA*	177	58	119
CELEIRO	19	10	9
CORCUBIÓN	13	7	6
CORME*	74	20	54
ESPASANTE*	28	8	20
FERROL	39	23	16
FISTERA*	141	63	78
FOZ*	48	10	38
LAXE	15	8	7
LIRA	13	8	5
LORBÉ*	25	9	16
LOURIZÁN	42	18	24
MALPICA*	206	59	147
MARÍN	17	10	7
MERA	10	5	5
MIÑO	19	1	18
MOAÑA	17	9	8
MUGARDOS	17	2	15
MUROS	22	11	11
MUXÍA	21	12	9
NOIA	50	24	26
O BARQUEIRO*	32	10	22
O GROVE	46	18	28
O PINDO*	18	2	16
O VICEDO	10	5	5
PALMEIRA*	32	15	17
PONTEDEUME	23	16	7
PONTEVEDRA	41	12	29
PORTO DO SON*	76	37	39
PORTONOVO	18	9	9
PORTOSÍN*	279	44	235
RAXÓ	18	9	9
REDONDELA	46	29	17
RIANXO	50	26	24
RIBADEO*	31	5	26
RIBEIRA	44	21	23
SADA	19	13	6
SAN CIBRAO*	38	12	26
SANXENXO	14	6	8
VIGO	33	10	23
VILABOA	13	6	7
VILANOVA	38	21	17
VILAXOÁN*	127	34	93
	3082	1239	1843

*Nestas confrarías non se presentou ningunha candidatura, polo tanto todos os membros do censo que cumpren requisitos son elixibles.