O CERCO GALEGO SAE MOI MAL PARADO COS RECORTES DE COTAS DE XURELO E XARDA

Andrés García, portavoz da principal asociación de cerco galega, Acerga, denuncia que esta frota "sae moi mal parada" e "claramente prexudicada" dos recortes de cotas acordadas en Bruxelas, cunha baixada do 24% de xurelo ao Sur de Fisterra (IXa) e do 20% na xarda. A isto únese que "aínda non se sabe" se o ano que vén os cerqueiros galegos poderán pescar sardiña, xa que se deberá esperar a xaneiro para coñecer se Bruxelas acepta o plan de xestión conxunta entre España e Portugal, que ademais supón unha rebaixa do 14% en capturas.

En declaracións a Europa Press, García sostén que o xurelo e a sardiña "se atopan en perfecto estado" en Galicia e "en absoluto" existe un problema coas súas poboacións. "Non o entendemos", quéixase.

"En Bruxelas de que pensan que vive o cerco?", lamenta Andrés García. "Non sabemos que imos pescar", resume após o acordo alcanzado polos ministros de Pesca da UE despois de 22 horas de negociación.

NON VE "PRUDENTE" UN TRANSVASAMENTO ENTRE A VIIIC E A IXA

Con todo, valora o incremento do 21% nas posibilidades de pesca de xurelo no Cantábrico (a VIIIc), pero lembra que se produce despois de "anos" de baixadas que supuxeron un 40% menos.

Preguntado sobre a opción do transvasamento de posibilidades de pesca de xurelo da VIIIc á IXa, García non o ve "prudente", pois até agora se trasladaba a cota da IXa á VIIIc "porque é a que menos ten", por iso aínda que agora esta última teña unha alza leva anos de baixada.

Ademais, o portavoz de Acerga considera difícil conseguir intercambios co arrastre para unha reasignación porque tamén padece un descenso nas súas cotas.

Respecto á alza na anchoa na IXa, afirma que, aínda que haxa unha suba, para Galicia irá parar moi pouco pois só ten o 1,14%.

NEGOCIACIÓN "MOI DURA"

Pola súa banda, o presidente da Cooperativa de Armadores de Vigo (ARVI), Javier Touza, valora que ante "circunstancias tan adversas" se lograse "minimizar impactos", ao reducir baixadas para o "caso máis significativo" na pescada do sur de augas ibéricas, do descenso previsto do 30% ao 12%, así como na pescada do Gran Sol --cunha diminución que queda no 7% cando se esperaba do 19%--. Unhas cifras que "se adecúan moitísimo máis aos informes científicos".

E é que Touza subliña que a negociación deste ano foi "moi dura" e "especialmente complicada" polo posicionamento do comisario europeo de Pesca, Karmenu Vella, ao querer "impor o rendemento máximo sustentable en 2018, cando hai marxe até 2020".

Aquí, destaca a "moi intelixente" argumentación da ministra de Pesca, Isabel García Tejerina, acompañada pola conselleira do Mar, Rosa Quintana, que conseguiu alianzas de Francia, Portugal e Alemaña, pois apelou á "sensibilidade" para "estirar o posible" os prazos até 2020 para o rendemento máximo sustentable.

Nesta liña, remarca que as poboacións de especies "onde está a faenar frota española están en moita mellor situación que con outras frotas". A modo de exemplo, pon que en 2009 había cinco 'stocks' en rendemento máximo sustentable en España e nestes momentos xa son 44, o que supón "claramente un bo traballo".

Tamén apunta que "se abre unha xanela de oportunidade" para especies como cigala e sardiña, para o que cre que hai que ser "prudentes e vendo a avaliación dos 'stocks".

Con todo, recoñece que a situación é "máis complicada" para o xurelo, e aínda que o galo se reduce un 10% en Gran sol, aumenta un 20% o ibérico, mentres tamén crece un 15% para a raia.

Por todo iso, Touza asegura que se "conseguiu que tamén se tivese en conta os estudos de impacto socioeconómico destes anos" sobre unha zona "tan dependente da pesca como é Galicia".

A XUNTA DEFENDE QUE É MÁIS QUE A PROPOSTA INICIAL

Pola súa banda, pese ao descenso en especies como a pescada e o xurelo, a conselleira do Mar, Rosa Quintana, defende que a frota galega terá un 4% máis de posibilidades de pesca para 2018 respecto da proposta inicial que realizaba a Comisión Europea para os Totais Admisibles de Capturas (TAC) e cotas.

Así, a Xunta resalta que o sector pesqueiro galego poderá pescar 20.000 toneladas máis de peixe e marisco o ano que vén, polo que o considera "netamente satisfactorio" en liñas xerais ante a situación de partida da Comisión Europea.

MANIPULACIÓN DA TVG INFORMANDO SOBRE O CERCO

A maioría da frota galega de cerco -os 120 buques agrupados na Asociación de Armadores de Cerco de Galicia (Acerga)- leva xa dúas semanas de protestas. Unhas protestas que levaron a Santiago cunha acampada diante do edificio da Xunta en San Caetano.

Acerga leva estas dúas semanas tentando que a Xunta e o Goberno central busquen “solucións reais” ao problema de limitación das cotas pesqueiras. Unhas solucións que, polo momento, non dan chegado.

Sen embargo, o Telexornal da TVG do pasado mércores informaba sobre o levantamento do campamento de San Caetano e a volta ao mar dos barcos pertencentes a Acerga o vindeiro luns. Unha información que foi completamente desmentida por esta asociación.

“Desde Acerga queremos desmentir esa información, non se levantará o campamento de San Caetano e os nosos barcos permanecerán amarrados sen retomar a súa actividade”, apuntou a entidade a través das redes sociais. Tamén pide á TVG que “contraste as súas fontes antes de publicar unha noticia como a emitida onte”.


Galicia Confidencial

A FROTA DO CERCO PERMANECERÁ AMARRADA

O motivo, segundo indica o presidente de Acerga, é a "falta de viabilidade económica" que lles supón saír a faenar debido á ausencia de cotas

A frota do cerco representada por Acerga, uns 120 barcos dos 150 existentes en Galicia, permanecerá amarrada. Isto débese a "falta de viabilidade económica" que lle supón saír a faenar debido á ausencia de cotas e tras o peche da pesqueira ao sur de Fisterra decretado polo Goberno o venres.
O presidente de Acerga, Andrés García, explicou que os armadores tomaron esta decisión na asemblea convocada hoxe en Portosín e á que acudiron máis do 90% dos asociados.
"Non podemos seguir no mar porque non temos rendemento económico nin sequera para pagar os soldos da tripulación", lamentou García. Ademais engadiu que xa remataron as últimas capturas da cota de xurelo e apenas lles queda nada da de cabala.
O presidente de Acerga avanzou que o vindeiro luns cada armador entregará o rol do seu barco na capitanía marítima, como evidencia deste amarre e pedirán o apoio dos demais buques do cerco galego para que se "sumen" a esta protesta.


Fonte:TVG

O SECTOR DO CERCO DISPOSTO A IR AOS TRIBUNAIS

O sector do cerco se manifestou onte.
Continúan reclamando un aumento da cota de bocarte xa que aseguran que as augas ao sur de Fisterra están cheas desta especie. Advirten que se non lles fan caso irán aos tribunais.

Os mariñeiros do cerco volveron tirar bocarte ao chan, desta volta en Portosín. Non poden vender as capturas porque esgotaron a cota, pero aseguran que nos caladoiros ao sur de Fisterra hai moita cantidade de bocarte. 

"É un bocarte que vai morrer, ten de vida tres anos pero non o podemos pescar. Non podemos darlle de comer a estas familias. Non hai dereito co que se está facendo", decía o presidente de ACERGA.

A asociación galega do cerco ve inxusto que Andalucía leve o 98% de cota fronte ao 1,14% de Galicia. Non ven as cousas igual en Asturias. Alí, os armadores critican que os barcos galegos queiran acaparar máis cota de bocarte por rematar antes de tempo a que tiñan asignada.

En Galicia insisten en que había o compromiso do Ministerio de aumentar a cota se había moito bocarte e por iso amezan con acudir á xustiza.

OS MARIÑEIROS PROTESTARON DIANTE DA RESIDENCIA DE FEIJÓO

Máis dun centenar de mariñeiros da frota galega do cerco volveu á rúa este sábado para denunciar que a actual repartición de cotas de especies como o xurelo, a cabala e a sardiña aboca á "ruína total" a máis de 100 barcos deste segmento, os que se agrupan en torno á asociación Acerga (que engloba ao 80% do sector). 
Un ano despois das mobilizacións protagonizadas por estes pescadores en cidades como  A Coruña, Santiago e Vigo, o escenario esta vez foi o de Monte Pío, na capital galega, ás portas da residencia do presidente da Xunta de Galicia.
Neste lugar fixeron soar bucinas, asubíos e petardos case 200 traballadores, que advirten de que repetirán a estampa de xeito indefinido cada sábado, ata que o titular do Goberno galego, Alberto Núñez Feijóo, os reciba para abordar a súa problemática directamente con el, e non coa conselleira do Mar, Rosa Quintana, quen xa anunciou que os recibiría este luns xunto ao secretario xeral de Pesca.

O SECTOR DO CERCO POR FIN SERÁ RECIBIDO NA XUNTA

Despois de varias peticións de reunións por fin decideu a Conselleira que era hora de entrevistarde co cerco.

A conselleira do Medio Rural e do Mar, Rosa Quintana, e o secretario general de Pesca do Ministerio de Agricultura, Alimentación e Medio Ambiente, Andrés Hermida, reuniranse o vindeiro luns, 16 de marzo, con representantes da Asociación de Armadores de Cerco de Galicia (ACERGA) para escoitar as propostas e peticións relacionadas co sector ao que pertencen.

A reunión, que terá lugar ás 11:00 horas na sala de Xuntas da Consellería do Medio Rural e do Mar, responde a unha solicitude da asociación e é unha mostra do compromiso da Consellería do Medio Rural e do Mar de manter diálogo cos sectores primarios para coñecer de primeira man as súas preocupacións.

MOBILIZACIÓNS DIANTE DA RESIDENCIA DE FEIJÓO

A Asociación Galega do Cerco mantén a convocatoria de mobilización para este sábado en Santiago. Denuncian así o desinterese da administración por non terse reunido co sector ante a problemática do recorte dos TAC que afrontan.

Á espera de obter o permiso para concentrarse ás portas da residencia oficial do presidente da Xunta, a Asociación de Armadores do Cerco de Galicia mantén a convocatoria da mobilización para este sábado. 

Obteñan ou non a autorización están dispostos a concentrarse en Monte Pío a partir das once da mañá para expresar o seu malestar ante a administración autonómica por non terse reunido co sector para abordar o problema da redución das cotas. Deixando á marxe a pesquería da sardiña, necesitada dun plan de recuperación, os cerqueiros reclaman máis cota de xurelo e xarda. Na actualidade consideran que o reparto é inxusto xa que, mentres algunhas embarcacións dispoñen de TACS razoables, outras non poden saír a pescar polo reducido dos cupos. Á espera de coñecer as consecuencias da concentración prevista para este sábado, ACERGA xa advirte que a flota ten pensado dar a batalla polo que se seguirán a manifestar cada sábado ata ser recibidos polos representantes do executivo galego ós que acusan de non defender á flota cedendo ante os intereses dos gobernos central e europeo.