A DELEGACIÓN PONTEVEDRESA COÑECE O SISTEMA DO COMPOSTAXE

A expedición pontevedresa da Deputación coñeceu onte o sistema de tratamento de lixo que se está a realizar na localidade vasca de Larrabetzu cun grupo de 175 veciños e dous restaurantes e que é perfectamente aplicable a pequenos núcleos de poboación dentro de calquera concello da provincia de Pontevedra e incluso a hortas urbanas, como poden ser as de Conde Bugallal e Eduardo Pondal no municipio de Pontevedra.

Esta forma de compostaxe comunal está a reducir en case un 20% o lixo que vai ao sistema de residuos habitual (a incineración) e supón tanto un beneficio económico coma ecolóxico para a Administración local.  Os custos de poñer en marcha esta iniciativa reducíronse "a 32 euros de mercar os parafusos e as madeiras", segundo explicou o encargado da planta, Eduardo Cordero, "para que despois un agricultor se fixese cargo do mantemento e se beneficiase do uso do compost".

No caso de Larrabetzu, de feito, este sistema aplícase en paralelo á xestión que fai o concello vasco dentro da mancomunidade da que forma parte (que trata outras dúas terceiras partes dos residuos orgánicos da vila). En breve, os composteiros pasarán a incorporar a fracción orgánica doutros 40 veciños,  así como os do restaurante Azurmendi (de tres estrelas Michelín). O obxectivo é ir incorporando cada vez a máis poboación.

Por todos estes motivos o sistema de Larrabetzu é perfectamente  extrapolable a pequenos núcleos da provincia galega: pode ser un perfecto punto de partida para comezar a aforrar no recibo do lixo e para concienciar a poboación da súa necesaria implicación nos tratamentos biolóxicos do lixo.

Representantes dos 25 concellos que participaron na visita mostraron o seu interese por este tipo de planta de tratamento polo seu baixo custo, polo que a curto prazo se poderían ver instalados composteiros comunais similares na provincia de Pontevedra.

No caso de Pontevedra, todos os concellos que quixesen poñer en marcha unha iniciativa similar poderían facelo de forma inmediata co soporte técnico da Deputación de Pontevedra, que se faría cargo de poñer a disposición o mestre composteiro e da súa formación e dotaría do estruturante para chegar ao compost final. Os beneficios notaríanse tanto nun aforro na recollida, no tratamento coma na utilización do produto final por parte dos agricultores.