ÉXITO DE PÚBLICO NA I XORNADA SOBRE AGRICULTURA SOSTIBLE NO VIÑEDO

Xornada organizada por Delagro, Forvi e as adegas Condes deAlbarei, Martín Códax e Paco&Lola.

O obxectivo da xornada que se celebrou o pasado xoves en Cambados, era informar sobre os pormenores da nova lexislación que afecta ao uso sostible dos produtos  fitosanitairos empregados na vitivinicultura, que se estruturou en tres piares temáticos desenvolvidos por relatores especializados de Syngenta, compañía biotecnolóxica que integra solucións eficaces en protección de cultivos, e da Xunta de Galicia. Por unha banda, Mercedes Espasandín, encargada do ROMO (Rexistro Oficial de Maquinaria Agrícola) e da ITEAF (Inspección técnica de equipos de aplicación de produtos fitosanitarios) da Xunta, falou sobre a obriga de realizar, antes de 2016, unha inspección técnica dos equipos e máquinas de aplicación, similar á coñecida ITV.
Destacou ademais a importancia de motivar os viticultores para que realicen esta inspección e aconsellou que se informen nos Servizos Técnicos das cooperativas e preparen os equipos para que cheguen nas mellores condicións para superar a inspección. En caso de non a superar, haberá 30 días para emendar os defectos. Se son graves, poden non conseguir autorización para utilizalos.

Con respecto ao segundo piar, refírese á correcta aplicación dos produtos. Concretamente e pola súa importancia, afondouse no calibrado das máquinas e a calidade de pezas clave, como son os aparatos de medida (manómetros), as boquillas, ademais de no funcionamento do circuíto a presión polo que circula o produto. Segundo o relator, Eleuterio Málaga, xefe de expertos de campo de Syngenta, "a mellor máquina do mercado mal calibrada pode facer a peor aplicación".
E como terceiro piar importante está o respecto ao medio. Destacouse que un dos aspectos críticos é evitar a contaminación das augas e de lugares ou superficies que non son obxectivo dos tratamentos (eventualidade coñecida no argot técnico como "deriva").
A xornada pechouse coa conclusión de que "para facer o mellor viño do mundo temos que ser os mellores viticultores, e para iso temos que ser os máis responsables, porque o medio é cousa de todos,"