MELLORAR SERVIZOS E TENTAR QUE VOLVAN A SER PÚBLICOS

O Concello debe prestar servizos municipais de calidade e ben xestionados para contribuír a mellorar a vida de todos os veciños e veciñas de Cambados. Esta obriga non se cumpriu ao longo dos anos de goberno local de Luis Aragunde e o seu equipo. Case a totalidade dos servizos municipais foron privatizadosa empresas afíns ao Partido Popular, sen que isto redundara nunha mellor xestión ou nun abaratamento das taxas que pagamos os cambadeses e cambadesas. Máis ben, todo o contrario.

Por iso, Somos Cambados intentará recuperar todos os servizos públicos privatizados, analizando un a un os contratos asinados e ver cales se poden anular o antes posible para mellorar eses servizos básicos para a cidadanía cambadesa.

Sen dúbida, un dos servizos que máis preocupa e descontenta aos veciños e veciñas de Cambados é o Servizo de Abastecemento de Auga sanitaria aos domicilios. Son numerosas as persoas que se queixan deste servizo, cuxo prezo consideran moi caronun concello galego que non padece problema de seca. Tamén son abundantes as reclamacións no relativo ao servizo de Saneamento, igualmente privatizado polo Partido Popular. As queixas esténdense ao servizo de recollida do Lixo, cuxas taxas tampouco son precisamente baratas.

Somos Cambados cre preciso ademaiscompletar a rede de saneamento e abastecemento de auga en todos os núcleos de poboación de Cambados, pois, en pleno ano 2015, segue habendo lugares nas nosas parroquias que non dispoñen de auga sanitaria nin están conectados á rede de saneamento. Tamén é necesario mellorar a xestión e o control periódico da potabilidade das fontes públicas, publicando os resultados na web e no taboleiro municipais e nas propias fontes.

Eliminar os puntos de vertidos ao mar e os insufribles cheiros que padecemos, sobre todo no verán, debido á mala execución do saneamento, debe ser outra prioridade na axenda do novo goberno de Cambados. Cambadeses e turistas non temos porque seguir a sufrir ese cheiro noxento. Iso hai que arranxalo.

Outros servizos municipais privatizados son a gardería e a piscina. Con respecto á primeira, o recente incremento nas taxas que teñen que pagar as familias cambadesas polo coidado dos seus nenos sitúa a este servizo público externalizado a un nivel de prezos equiparable ao de calquera gardería privada. Mentres que no caso da piscina a polémica é ben coñecida: a súa xestión (nefasta ata o de agora) está privatizada mentres o que seu mantemento estamos a pagalo todos os cambadeses e cambadesas. Finalmente, non podemos esquecernos do lamentable estado en que se atopan as pistas de tenis municipais, cuxo acondicionamento e arranxo foi prometido en varias ocasións polo equipo do goberno local de Cambados. Desafortunadamente, neste ao igual que noutros numerosos casos, o goberno do Partido Popular incumpriu as súas promesas.

Por último, cómpre rematar este comunicado dicindo que Somos Cambados revisará todos os impostos, as taxas dos servizos e os custes dos mesmos, e negociará a súa baixa coas empresas que teñen adxudicado a privatización dos distintos servizos. Ademais, Somos Cambados comprométese a non subir ningún imposto nin taxa na seguinte lexislatura.