40 aniversario da Fundación de IDGA: Irmandade Democrática Galega
Había anos que as historias particulares non coincidían, dende aquel agónico franquismo da Barcelona loitadora, onde cadaquén buscaba o seu particular tesouro entre as alfaias da urbe mediterránea
Reuníronse na parroquia de Calo, concello de Teo, concretamente na
Casa Grande de Cornide, onde un tal Tarrío de Izquierda Republicana se
exiliara canda a guerra polos mares do cono sur. Había anos que as
historias particulares non coincidían, dende aquel agónico franquismo da
Barcelona loitadora, onde cadaquén buscaba o seu particular tesouro
entre as alfaias da urbe mediterránea: formación cultural, estudos
académicos, liberdade, democracia e incluso pan e salario. Por iso foi
emocionante, porque nos ollares residía sinceridade, complicidade e unha
morea de recordos anubrados polos tempos bretemosos desta realidade
liberalizada (que non libre). Algúns –como o que escribe– só coñeciamos
IDGA por medio dalgúns escritos (poucos) e pola consulta de certos
exemplares do seu voceiro clandestino: O Mallo. Irmandade Democrática
Galega (IDGA) nace na cidade condal en marzo de 1972, cando se aglutina
baixo causas comúns un grupo de galegos e galegas que, militantes ou
simpatizantes do nacionalismo, buscaban facer eco dos acontecementos que
suceden en Galiza e das aspiracións que esta debe ter. Sería longo
explicar aquí as tres etapas desta organización, todas as actividades
que realizan e os compromisos –e incluso riscos– que asumen os seus
membros. Mais hai que sinalar que ha ser a partir do asasinato daqueles
dous traballadores dos estaleiros ferroláns (Amador Niebla e Daniel Rei,
que este ano tamén conmemoramos) cando IDGA se configure formalmente,
tempo no que o PSG e a UPG asinan un manifesto común “Por unha Galiza
Ceibe e Socialista”.
Nese
instante son membros da organización galego-catalá: Xosé Lois García
(traballador na SEAT, taller número 7), Xosé González Rego (igualmente
operario nesa factoría, taller número 1), Margarita Ledo Andión
(estudante de xornalismo), Xerardo Rodríguez Arias, e varias persoas
máis, das cales moitas traballaban na devandita fábrica de automóbiles.
Sen menosprezar o importante labor doutra organización clandestina
durante o franquismo, como o é Brais Pinto, IDGA ten un activismo moito
máis social, de traballo directo nas empresas industriais, de loita
polos dereitos dos/as traballadores/as e do alumnado universitario,…
moito máis combativa no ambiente social dos/as galegos/as (daquela máis
de 6.000 que traballaban na SEAT). Por iso foi importante que o 1 de
xullo do corrente ano se celebrase, en Teo (onde nacera o histórico
Terzo de Calo, terra de Enrique Líster e de canteiros que termaron as
armas e loitaron pola democracia entregando a vida), este 40 Aniversario
da Fundación de IDGA. Até o lugar de Cornide chegou o son daquela
“vietnamita” coa que se editaron 4000 panfletos (ollo: en lingua
galega) que logo se repartirían na SEAT dando conta do que acontecía no
país, das mortes dos traballadores da Bazán,…
Moitos
dos membros deste círculo de amigos/as (de camaradas) vinculáronse coa
UPG (da que serían posteriormente “linchados”: caeron como follas
murchas de outono), e que logo cadaquén buscaría o seu espazo nas
distintas pólas da árbore nacionalista, que se alimenta do substrato
nutricio da historia, a tradición e a lingua.
A
cobertura que lle daba “legalidade” a IDGA era o departamento de
cultura da Asociación de Amigos de Nacións Unidas de Barcelona (con sede
no número 14 de Fontanella), dende a que se realiza a famosísima “semán
cultural galega” (á que asisten Manuel María, López-Suevos, Lois
Diéguez, Paco Rodríguez, Camilo Nogueira,…), e dende a que se celebran
outrosí unha morea de mesas redondas, faladoiros e actos de coloquio e
aprendizaxe.
É así que debaixo do emparrado da casa de Cornide ecoaron aquelas lecturas que do Sempre en Galiza se
fixeron nas fragas dos arredores de Barcelona, resoaron as arengas
estudantís e proletarias (“Queremos un traballo digno na Nosa Terra”,
que hoxe tamén bate con forza en min),… escoitouse a voz das Fusquenllas
(creadas dende IDGA) e ulíronse fotografías descoloridas nas que
ondeaba a bandeira nacional.
Mini
e Mero (Xosé Luís Rivas e Baldomero Iglesias, da Quenlla), Raúl Galego
(membro tamén deste grupo musical), Tereixa Buendía, Benito García
Bolaño, Maribel Golmar, Manuela Mariño, Encarna Otero (émulo para moitos
nacionalistas, que nos recordou o seu exilio en Tolousse), Noela Pousa
Castro e o que escribe ficamos emocionados, como ditosos espectadores
perante o acontecemento conmemorativo: que recendía a terra, a lingua, a
matria, a loita e a soberanía. Comeuse, falouse, abrazámonos,… e toda
esa materia emotiva quedou adobiada coa música sempre limpa (e
transparente), sincera (e nada difusa), incisiva e decisiva de Mini,
Mero e Raúl Galego. Porén os protagonistas foron aqueles membros de IDGA
reunidos na artúrica táboa de Cornide, alongada e sen cabeceiras e
preferencias, comunal e comunicativa: Pepe Barro, Alberte Campos, Chus
Castro, Xosé Lois García, Xesús García Mosquera “Boiro”, Xosé González
Rego “Foz”, Xosé Ramón Pousa Estévez, Xerardo Rodríguez Arias “O
Aviador” e Suso Vázquez. Fiquen nestas liñas o meu máis sincero
agradecemento e admiración por aquelas loitas que hoxe teñen que ser as
mesmas, para poder triunfarmos coa esperanza e estrela por bandeira.
Nova escrita por Héitor Picallo en Galicia Hoxe.
Nova escrita por Héitor Picallo en Galicia Hoxe.
No hay comentarios:
Publicar un comentario
NON SE PUBLICARÁN COMENTARIOS ANÓNIMOS. SI O COMENTARISTA QUERE PERMANECER NO ANONIMATO, NON SE PUBLICARÁ O NOME.