O COMITÉ CLÍNICO DECIDE AS MEDIDAS PARA O FIN DE ANO

O comité clínico que asesora á Xunta para tomar decisións no marco da pandemia está reunido nestes momentos, a tres días de Noitevella, para analizar a incidencia do coronavirus en Galicia tras as primeiras celebracións do Nadal. Farao coa vista posta nesa última noite do ano, cando están previstas novas reunións familiares nos fogares galegos.

De feito, este encontro mantense despois de dous días nos que a taxa de positividade das PCR practicadas disparouse ata o 8,4% deste domingo, un valor que "preocupa" ao conselleiro de Sanidade, Julio García Comesaña. Neste contexto, hai que ter en conta que a Organización Mundial da Saúde (OMS) sitúa no 5% o límite para dar por controlada a pandemia. Durante unha comparecencia #ante os medios tras o inicio da campaña de vacinación contra a covid-19 na residencia Porta do Camiño de Santiago, Comesaña admitiu que hai un aumento da taxa de positividade, pero que iso "tamén depende de se se fan máis peneirados ou menos". En calquera caso, avanzou que este luns o comité clínico estará "pendente" destas cifras, así como das de contaxios durante os primeiros días do Nadal, nos que de feito se aliviaron as restricións postas desde a Xunta. Iso si, o titular de Sanidade non quixo adiantar se os datos conlevarán ou non medidas máis duras contra a pandemia.