AS MULLERES DO MAR DE AROUSA LEVAN A SÚA ARTE A CUBA

Mariscadoras pertencentes á Asociación de Mulleres do Mar de Arousa realizaron un proxecto coordinado desde a Facultade de Belas Artes da Universidade de Vigo pola profesora de Arte e Espazo Social, Natividad Bermejo. Devandito proxecto, que trata de dar visibilidade e poñer en valor o traballo que desenvolven estas mulleres, e a elas mesmas, será presentado o próximo 9 de marzo na Habana, na exposición ‘Bruxas e bolboretas’ coordinada pola profesora Ana Seoane. Nela participarán varias artistas vinculadas coa Facultade de Belas Artes xunto con outras artistas cubanas. A representación do colectivo arousán está composta por diferentes obxectos escultóricos partindo da tradición artesanal do traballo con cunchas nos pobos costeiros de Galicia, aplicada na arquitectura e a fabricación de obxectos. As esculturas reproducen, en gran formato, o símbolo da muller e o propio logotipo da asociación. A Asociación de Mulleres do Mar de Arousa naceu dun proxecto do Grupo de Acción Local do Sector Pesqueiro Ría de Arousa (GALP 5). Neste sentido cabe destacar o valor dos GALP para reforzar o papel das mulleres no mar e darlle máis visibilidade. As Estratexias de Desenvolvemento Local Participativo aprobadas pola Consellería do Mar pretenden contribuír á promoción da igualdade entre homes e mulleres. Ao amparo das destas estratexias, os GALP desenvolven diferentes proxectos que inclúen actuacións destinadas a aumentar o emprego e a cohesión territorial nas comunidades pesqueiras e acuícolas, ademais de fomentar o emprego feminino e contribuír a diversificar as actividades realizadas no marco da actividade da pesca e respecto doutros sectores da economía marítima.

O principal fin desta asociación será defender os intereses das mulleres vinculadas ao mundo do mar, reforzando o seu empoderamento e visibilidade.