O ALBARIÑO MÁIS SOLIDARIO

Como cada ano, Martín Códax adquire o compromiso de doar os seus ingresos do popular ciclo de concertos de verán, que celebra anualmente a adega, a varias organizacións solidarias.
Adegas Martín Códax, de Cambados, fixo entrega este venres pasado, 7 de setembro, das doazóns ás entidades beneficiarias da sétima edición do ciclo de concertos os Xoves de Códax. Este ano o ciclo, que reúne a artistas galegos e de todo o mundo en espectáculos de fusión cultural e musical, contou con oito concertos abertos ao público, así como un noveno exclusivo para socios da adega e pechado ao público, pero tamén de carácter solidario. Así, ás oito entidades dadas a coñecer con anterioridade, súmase tamén a Fundación Andrea, asociación desde a que dan atención e apoio económico, moral e informativo ás familias con fillos con enfermidades de longa duración, crónicas ou terminais, facilitando solucións e axuda. A directora de Márketing e Comercial da adega, María Garrido, foi a encargada de abrir o acto ao que asistiron representantes de cada unha das nove asociacións beneficiadas. Tras resaltar a grande e crecente acollida que ten este ciclo musical entre o público e o seu carácter solidario, reflexo do compromiso da adega para coa sociedade galega, María Garrido cedeu a palabra ao presidente de Adegas Martín Códax, Xoan Allegue, quen nun emotivo discurso destacou o grande labor que fan desde cada unha das asociacións, axudando a facer un pouco máis soportables situacións moi complexas. Os representantes das asociacións tamén aproveitaron para dedicar unhas palabras de agradecemento á adega por esta iniciativa, que lles permitirá levar a cabo diferentes proxectos destinados a axudar á sociedade. Cos concertos celebrados ao longo deste verán, a adega recadou preto de 45.000 euros a repartir entre as entidades beneficiarias. A este acto de entrega asistiron representantes de cada unha das asociacións, que aproveitaron para agradecer a solidariedade de todo o público dos Xoves de Códax. Ao acto asistiron Mario Trigo, presidente da Asiciación Bata; Eva María Silva Noal, secretaria e xerente da asociación TDAH Salnés; Carmen Fernández Pego, secretaria de APROPARK; Mila Hermida, educadora social de Cáritas; Marie Isabelle Prado, vicepresidenta de Afaga; Amaya Castro Noya, da Fundación Andrea; Mayte Celeiro, da asociación Ansia; Alicia Rey Taboas, administrativo e Solidariedade Galega co Pobo Saharauí; e Rosa María Fernández Cortizo, técnico de Administración e responsable de Calidade do Centro Princesa Letizia da Asociación Amencer- Aspace.