A XUNTA PRORROGARÁ ATA O 12 DE NOVEMBRO O DISPOSITIVO ANTILUMES POLAS PREVISIÓNS METEOROLÓXICAS

Rosa Quintana trasladou que polo momento non se detectou ningún tipo de vertido nas rías e lembrou que desde o pasado luns 16 de outubro permanece activado o Plan territorial de contaminación mariña accidental de Galicia.


A Xunta prorrogará ata o vindeiro 12 de novembro o actual dispositivo de loita contra incendios forestais, para facer fronte ao risco de lumes polas previsións meteorolóxicas adversas. Así o anunciou hoxe a conselleira do Medio Rural, Ángeles Vázquez, tras supervisar, xunto coa titular de Mar, Rosa Quintana, os labores de inspección para o desenvolvemento de accións que eviten o arrastre de cinzas cara os bancos marisqueiros en Ventosela (Redondela). Ángeles Vázquez explicou que nestes días valorouse a posibilidade de prorrogar o operativo, como xa se fixo antes da vaga de lumes, respondendo ás previsións de tempo seco e solleiro, que incrementan o risco de ocorrencia de incendios.

En relación con esta visita a Redondela, a titular de Medio Rural insistiu na necesidade de actuar con criterios técnicos e de xeito coordenado para paliar os danos dos lumes, especialmente no que se refire aos posibles arrastres de cinzas e chans a causa das chuvias.

Neste mesmo sentido, lembrou que os técnicos do Centro de Investigación Forestal de Lourizán, que contan cun alto grao de cualificación profesional, son os encargados de coordinar todos estes labores. Farano, segundo explicou a conselleira, perimetrando e parametrizando en primeiro lugar os lumes, a través de prospeccións aéreas e vía satélite. A continuación farán inspeccións sobre o terreo e analizarase a afección dos incendios en cada zona, para delimitar despois as áreas prioritarias de actuación.

A partir dese intre decidirase cal é a técnica máis axeitada para actuar fronte a erosión, dispoñendo a localización exacta dos traballos de mulching ou helimulching (cobertura de palla). Sobre estes labores, a conselleira insistiu en que se deben levar a cabo “sempre de xeito coordinado e con asesoramento técnico, porque senón podemos caer nun pequeno fracaso, xa que o arrastre pode ser máis prexudicial se botamos demasiada palla ou non se estende debidamente” e incluso pode dificultar o rebrote da vexetación. Outras medidas, dixo, pasan pola colocación de barreiras xeotéxtiles ou de carácter natural para evitar arrastres aos canles fluviais, o mar ou os acuíferos.

Sen afeccións no mar

Pola súa banda, a conselleira do Mar, Rosa Quintana, trasladou que polo momento non se detectou ningún tipo de vertido de terras ou cinsa en ningunha das rías galegas. Así, lembrou que desde o pasado luns 16 de outubro, permanece activado o Plan Territorial de Contaminación Mariña Accidental de Galicia (Camgal) na súa fase de alerta, para previr danos nos bancos marisqueiros a consecuencia do arrastre de materiais.

Nesta liña, Rosa Quintana explicou que o persoal do Servizo de Gardacostas e as asistencias técnicas das confrarías de pescadores de Galicia están controlando a posibilidade de que cheguen vertidos de terra ou cinsas ás zonas marisqueiras, centrando as inspeccións sobre todo nas desembocaduras dos ríos Miñor e Verdugo.