O cambadés Eduardo Pérez Baamonde, foi o gañador da terceira edición do certame de Pintura Rápida Vila de Cedeira, unha convocatoria que este ano reuniu a un total de 24 artistas, sete máis que na anterior. Pérez Baamonde pintou a ponte nova e o casco antigo de Cedeira sobre un fondo de ceo e montaña.
O segundo premio foi para José Carlos Triñanes Buceta (Rianxo) -que optou por reproducir o río e a ponte de madeira-, mentres que Manuel Carballeira (Valdoviño) fíxose co terceiro cun contraste de luces e sombras do porto cedeirense.
O certame, celebrado este domingo, convidaba a afeccionados e profesionais da pintura para mostrar diferentes realidades dos recunchos máis coñecidos da vila. As obras premiadas pasan a ser propiedade do Concello.
A organización do certame estivo a cargo da concellería de Cultura. O seu titular, María Xosé Rodríguez, presidiu o acto de entrega de premios, no que destacou a consolidación da convocatoria, o altísimo nivel das obras presentadas e a boa acollida dos pintores "nunha mañá espléndida, con moita xente paseando e parándose a ver as obras", sinalou.
O Concello repartiu entre os premiados un total 1.300 euros, de maneira que o primeiro recibiu 600 euros; o segundo 400 e o terceiro 300, ademais dos diplomas correspondentes.
Raúl Gil Bures foi o gañador da anterior edición cunha obra na que se recollía un tramo do paseo da Mariña. No ano 2015, Pío Costa quedou primeiro.
No hay comentarios:
Publicar un comentario
NON SE PUBLICARÁN COMENTARIOS ANÓNIMOS. SI O COMENTARISTA QUERE PERMANECER NO ANONIMATO, NON SE PUBLICARÁ O NOME.