PRESENTADA A VI XORNADAS DE PORTAS ABERTAS NAS RUTAS DO VIÑO

Celebraranse nas cinco denominacións de orixe protexidas dos viños de Galicia, Monterrei, Rías Baixas, Ribeira Sacra, O Ribeiro e Valdeorras, as dúas últimas fins de semana de maio

A directora de Turismo de Galicia apunta á consolidación deste produto como un avance na mellora do nivel competitivo do sectores turístico e vitivinícola

Destaca que estas xornadas contribuirán tamén á posta en valor das paisaxes e os recursos patrimoniais, “a etnografía e a artesanía dos territorios”

A directora de Turismo de Galicia, Nava Castro, que hoxe presentou a VI edición das Xornadas de Portas Abertas nas Rutas dos Viños de Galicia, destacou que a consolidación e promoción deste produto “mellora o nivel competitivo do sector turístico pero tamén a difusión do produto e dos produtores, repercutindo directamente na economía e xerando imaxe de destino”.

Para Nava Castro, estas xornadas, que se celebrarán a penúltima fin de semana nas denominacións de orixe protexidas dos viños Rías Baixas e O Ribeiro, e a última fin de semana de maio en Monterrei, Ribeira Sacra e Valdeorras; tamén contribuirán á posta en valor das paisaxes e dos recursos patrimoniais, así como da “etnografía e da artesanía dos territorios e das súas singularidades gastronómicas”.

Así, lembrou que os pazos, os xardíns, as camelias, os conxuntos históricos, os centros de interpretación, os monumentos naturais ou as pintorescas aldeas, “son algúns exemplos do que todos aqueles que participen nestas xornadas poderán gozar e coñecer”.

Programa enoturístico completo

Na súa intervención, a directora de Turismo de Galicia referiuse as Xornadas de Portas Abertas nas Rutas dos Viños de Galicia como un “completo programa de actividades de enoturismo”, que nesta edición inclúe tres visitas guiadas gratuítas ás adegas de cada unha das cinco denominacións de orixe, así como a participación en catas e degustacións.

Ademais das visitas, Nava Castro manifestou que cada ruta ofrecerá un programa especial de actividades pra a fin de semana, “coma o venres de tapeo, catas comentadas, visitas a museos do viño, rutas monumentais, paseos en barca, trens turísticos, descontos en aloxamentos e outros eventos relacionados co mundo do viño”

Por outra parte, engadiu a directora de Turismo de Galicia, varios restaurantes de cada una das denominacións de orixe protexidas dos viños da Comunidade galega, “ofrecerán dous menús elaborados especialmente para a ocasión”.

Estes menús constarán de dous pratos maridados con viños de adegas das denominacións de orixe galegas e unha sobremesa. Ademais, algúns dos establecementos de restauración adheridos a estas xornadas presentarán tamén menús infantís para menores de 12 anos que acompañen aos adultos.

Bus do viño

Nava Castro lembrou tamén que nesta edición das Xornadas de Portas Abertas nas Rutas dos Viños de Galicia tamén se pon a disposición dos visitantes o bus do viño, “para poder achegarse comodamente e sen ningún problema nin preocupación ás diferentes adegas”.

Deste xeito, para a responsable de Turismo de Galicia, esta “é unha oportunidade única para gozar da perfecta maridaxe que existe entre o turismo e a enoloxía, un xeito diferente de descubrir un destino”.

Segundo engadiu Nava Castro, “os viños viven impregnados da cultura que os a rodea e transmiten ao viaxeiro o sabor de cada terra e, deste xeito, cada vez son máis os turistas que acoden a Galicia para entender a concepción dos viños”.

A vinculación da enoloxía coa gastronomía –explicou a directora de Turismo de Galicia- , co patrimonio coa cultura e a tradición que arrodean ao mundo do viño conseguen que no seu conxunto o feito de probar novos viños e de visitar os territorios nos que se producen, “estea converténdose nunha tipoloxía turística con gran potencia e un auxe significativo”.

Sen dúbida, rematou Nava Castro, “o turismo enolóxico estase a converter nun dos nosos principais reclamos, xa que outorga unha experiencia orixinal ao englobar unha infinidade de posibilidades para todos os gustos e preferencias”.