"O LOBO E A LÚA" ÚLTIMA MONTAXE DO CICLO *TEATRO AS 18:00*

O ciclo de teatro promovido pola Concellería de Cultura, que dirixe Víctor Caamaño, conclúe este domingo 19 de febreiro cunha función de Baobab Teatro, titulada "Ou lobo e a lúa". É unha obra que foi premiada no certame Barriga Verde, e que conta a historia dun lobo que quere falar coa lúa porque ten algo moi importante que contarlle, pero que non o consegue porque esta está demasiado alta. Os actores son Xosé Manuel Esperante e Cora Sayers.

Galardoada co XI Premio Barriga Verde de textos para teatro de monicreques, modalidade infantil, e coeditada pola Agadic e Bahía Edicións, O lobo e a lúa, de Andrea Bayer Lloves, tece unha trama clara e atraente, na que adapta claves de intriga e suspense ao imaxinario dos máis pequenos; unha historia de amizade, superación dos propios medos e de amor que pon en valor, á vez, a singularidade da arte dos monicreques para engaiolar un público familiar.

Auditorio da Xuventude, ás 18 horas. A entrada custa 3,5 euros, aínda que hai unha reducida de 2,5 para maiores de 65 anos, menores de 18, pensionistas, desempregados e estudantes.