LOUZÁN DÍ QUE O SEU É UN "XUÍCIO POLÍTICO"

O actual presidente da Federación Galega de Fútbol, Rafael Louzán, expresidente provincial do PP e da Deputación de Pontevedra, compareceu este mércores no xulgado de Cambados para esgotar o último trámite polo que a xuíz instrutora decidirá nuns días se abre ou non xuízo contra el por presunto delito continuado de suborno pasivo no sobrecusto do aluguer, en 2008, duns baixos comerciais a outro político do mesmo partido.

MÁIS INFORMACIÓN

O actual asesor do grupo parlamentario do PP na Deputación de Pontevedra (organismo que presidiu durante 12 anos), que afronta un ano de prisión, máis de dúas de suspensión de cargo público e o comiso dos locais, optou por asistir á vista, xunto aos tamén coacusados, a súa muller e o concelleiro de Pazos de Borbén, Severino Reguera, aínda que a Lei do Tribunal do Xurado non obriga a comparecer aos imputados. Fixérono con intención de declarar pero a maxistrada Laura Fernández non lles deu opción, alegando que xa o fixeron en sede xudicial.

Ao termo da audiencia, Louzán declarou que "este caso non se sostén". "É un xuízo político que só existe porque me chamo Rafael Louzán e fun presidente da Deputación de Pontevedra e isto tamén mo comentaron moitos cidadáns pola rúa, mesmo algúns dos meus adversarios políticos", afirmou.

Louzán restou importancia á súa comparecencia nun proceso que describiu como "un longo peregrinar" e aclarou que no caso de que a xuíza de Cambados acorde a apertura de xuízo, cre que, entón, ante a Sección Cuarta da Audiencia, o último filtro xudicial e o tribunal que ten que convocar ao xurado popular, terá, dixo, "máis oportunidades de poder" explicarse.

Louzán engadiu que o seu defensa está "moi ben argumentada e documentada" e defendeu que "todo está perfectamente claro", xa que as probas achegadas "non poden ser máis contundentes" ao seu favor. "Creo que todos os cidadáns temos que ser iguais ante as leis e ter o mesmo trato e non diferente por ser presidente da Deputación ou un cargo público nesta provincia", reprochou Louzán.

Nesta mesma liña argumental e invocando dereitos constitucionais pronunciáronse as defensas na vista, o que deu pé ao xuíz para descualificar os comentarios dos avogados que cualificaron o caso como "unha cuestión política xudicializada".

Tampouco a instrutora admitiu a presentación de novas probas por parte das defensas, que pediron o arquivo do caso. Tanto o avogado do matrimonio Louzán, José Fernández Iglesias, do despacho de Garrigues en Vigo, como o de Severino Reguera, Martín Serantes, opuxéronse unha vez máis ás teses do fiscal, negando que existise un pacto tácito entre o entón presidente e o deputado provincial para cobrar favores a cambio da proxección política de Severino Reguera, e que só se trata dunha operación comercial dun particular.

O fiscal Augusto Santaló reiterouse nos feitos descritos no seu escrito de acusación do pasado mes de xullo nos que hai indicios de criminalidade no sobreprezo dos alugueres polos que pediu a apertura de xuízo contra os tres acusados. Santaló baseouse, ademais, nos autos da Sección Segunda da Audiencia de Pontevedra, que desestimou todos os recursos das defensas e apreciou indicios de suborno.