CAMPUS DO CELTA DE VIGO EN CAMBADOS

A Fundación Celta volve organizar novos clinics para nenos coincidindo coas vacacións escolares, neste caso para a próxima Semana Santa do mesmo xeito que xa fixo o pasado Nadal. Vigo, Cambados, Chapela e Dodro son os lugares escollidos para unhas actividades que pretenden «desenvolver e mellorar as capacidades específicas do fútbol, así como potenciar habilidades individuais e fomentar o traballo en equipo», destaca o club.


Este proxecto está dirixido a nenos e nenas con idades comprendidas entre os seis e os catorce anos. Caracterízase por «un punto de vista lúdico, primando o entretemento e a diversión que coforman, xunto á formación en valores, os elementos fundamentais da filosofía que prima a Fundación en todas as súas actividades», aseguran.

As instalacións da Madroa acollerán esta iniciativa o luns 21 e o martes 22, mentres que o Club Juventud de Cambados será anfitrión dun clinic o propio luns, ao campo de Chapela tocaralle o martes e ao de Chenlo o mércores 23, en todos os casos de 10.00 a 14.00. A inscrición pódese formalizar a través da web da Fundación Celta. Durante o pasado Nadal participaron ao redor de 500 nenos.