OS SOCIALISTAS DE CAMBADOS VOLVEN A EXAMINAR A ARAGUNDE

Estas preguntas súmanse ás mocións rexistradas para a ampliación do hospital do Salnés, e para o correcto etiquetado do mexillón. Así, o grupo encabezado por Fátima Abal aproveitará o pleno do vindeiro xoves 18 para preguntar por varias cuestións de actualidade, entre elas a nova e polémica relación de postos de traballo do concello, que será sometida a votación no propio pleno, e na cal se lle suben o soldo aos cargos de confianza do alcalde mentres que se lles baixa a moitos outros operarios, pretendendo dar así lexitimidade aos sobresoldos que de forma irregular se veñen aboando dende fai anos.

Os socialistas tamén preguntarán pola situación de interinidade de varios policías locais. Segundo explica Fátima Abal: “o Concello nomeou interinos para cubrir temporalmente uns postos vacantes, mentres se resolvía o proceso selectivo para cubrir definitivamente estes postos. Sen embargo, foi pasando o tempo e a situación non variou en absoluto, xa que o proceso está paralizado dende fai máis de 7 anos. Unha vez máis, a inactividade dun concello sen iniciativa e que se mostra incapaz de facer as cousas ben, en tempo e forma, leva a que estes empregados públicos vivan nunha situación de incertidume durante un prazo intolerable de tempo. Os socialistas queremos que se busque una solución para que estes traballadores poidan ser regularizados e integrados na plantilla”

Outras cuestións que tamén abordarán os socialistas teñen que ver coa enorme demora na reparación da conexión a internet da biblioteca municipal, que por mor dunha avería estivo máis dun mes sen dispoñer dun servizo tan fundamental hoxe en día. Tamén preguntarán pola falta de limpeza nas rúas de Cambados, algo que por desgraza é habitual dende fai moito tempo e que dana tan seriamente a imaxe dunha vila que ten no turismo un dos motores da súa economía. Ademáis, tamén farán varias preguntas relativas ao transformador eléctrico que se sitúa na rúa os Pazos, nun terreo de titularidade municipal e moi próximo ás vivendas.