CAMBADOS FARÁ DE CONEXIÑO DE INDIAS

A Deputación de Pontevedra implantará nos concellos de Cambados, Ribadumia, Vilanova de Arousa e Baiona un sistema para mellorar a xestión das redes de saneamento e depuración.
Farao no marco do proxecto Saneplan, integrado no proxecto europeo Life + que se desenvolve en colaboración co Instituto Tecnolóxico de Galicia e coa empresa italiana Phisys, dependente da Universidade de Florencia.

O obxectivo é deseñar e validar sistemas de planificación integrada das infraestruturas de saneamento, utilizando novas tecnoloxías de precisión aplicadas a todos os elementos que integran o servizo de saneamento e depuración.

Créase así un sistema no que se van recollendo datos en todos e cada un dos puntos do sistema (bombeos, tubaxes, válvulas, pozos de rexistro, EDAR…), de forma que, por medio do seu tratamento tecnolóxico e matemático, se poida obter información relevante para mellorar a xestión e o deseño das redes.

Os custos asociados ó saneamento e á depuración; as respostas da rede e as modificacións precisas ante posibles variacións debidas ó cambio climático (aumento ou diminución da choiva); e as necesidades de ampliación no caso de producirse unha maior presión urbanística son algúns dos datos que se obteñen.

Con esta información poderá mellorarse tanto a calidade das verteduras coma a xestión das infraestruturas e o seu deseño, de forma que as redes de saneamento poidan dimensionarse adecuadamente e planificarse de forma acorde coa xestión urbanística e cos parámetros máis adecuados para a protección do contorno natural e urbano.

Así mesmo, permitirá aforrar custos en enerxía e asegurar o futuro dos recursos hídricos ó adaptar as redes ás necesidades reais de cada poboación.

Os catro concellos seleccionados nos que se comezará a implantar este sistema funcionarán a modo de proxecto piloto, xunto cun concello da Toscana, Italia, de forma que se poida comprobar o seu funcionamento e corrixir os posibles fallos.

A elección dos concellos nos que se vai desenvolver esta experiencia piloto realizouse por medio dun concurso público aberto ó que se podían presentar todos os concellos e mancomunidades da provincia interesados.

Os tres municipios da comarca de Arousa fixérono de forma conxunta a través da Mancomunidade do Salnés, mentres que Baiona o fixo de forma individual.          
Á hora de valorar as propostas tivéronse en conta os traballos e o compromiso previo coa xestión integral do ciclo da auga.