O B.N.G. de Cambados ven de presentar un escrito no concello relativo prohibición de aparcar en varias rúas de Cambados.
O grupo municipal do BNG ven de reunirse con veciños e veciñas da rúa Borrón, os cales lle transmitiron o seu malestar porque desde hai uns días non se permite aparcar vehículos na súa rúa e que esta decisión municipal foi tomada de xeito unilateral, sen ningún tipo de información previa por parte do concello e sen ofrecerlles ningunha opción para solucionar o problema que lle están a crear con esta decisión. Que con posterioridade a esta reunión, veciños/as de Fefiñáns falaron co BNG para informarlles de que teñen a mesma problemática e de que a policía municipal lles informou que deben ir acostumándose a non aparcar na rúa (tampouco entende o BNG iso de “ir acostumándose”, porque ou está prohibido aparcar ou non o está.
Semella, ademais, que polas múltiples queixas deste tipo, que se están a escoitar estes días en Cambados, hai moitas rúas de características semellantes (semipeonís e con vivendas que adoitan carecer de garaxe) nas que se están a multar aos veciños/as sen que entendan porque en rúas onde levan anos aparcando, de súpeto se lles estea a multar e, mentres tanto, na Praza de Fefiñáns, nun conxunto cualificado de BIC, está permitido aparcar.
1.- En que rúas semipeonís de Cambados está prohibido o aparcamento na súa totalidade? Cando tomou o concello esta decisión?
2.- Por que se nestas rúas, está prohibido aparcar, non hai sinalización permanente que o indique?
3.- Quen tomou a recente decisión de cambiar o criterio, nestas rúas, e comezar a multar por aparcar, cando con anterioridade non se facía?
4.- Por que non se informou aos veciños/as deste cambio de criterio?
5.- Cando se prohibirá o aparcamento na Praza de Fefiñáns, que si é imprescindible?
No hay comentarios:
Publicar un comentario
NON SE PUBLICARÁN COMENTARIOS ANÓNIMOS. SI O COMENTARISTA QUERE PERMANECER NO ANONIMATO, NON SE PUBLICARÁ O NOME.