A DEPUTACIÓN DE PONTEVEDRA REPARTE 650.000 € A 21 CONFRARÍAS

A Deputación de Pontevedra destina preto de 650.000 euros ás confrarías da provincia por medio dun convenio asinado esta mañá entre o presidente da Federación, José Antonio Gómez Castro, e o titular da Administración provincial, Rafael Louzán.

Ó comezo do acto, no que tamén participaron os representantes dos 21 pósitos da provincia, Rafael Louzán quixo trasladar a solidariedade e o pésame da institución "a toda a familia mariñeira e, en especial, ás familias, amigos e compañeiros das vítimas" da traxedia do Mar de Marín, tras o cal se gardou un minuto de silencio na súa memoria.

Tras o minuto de silencio asinouse o convenio, ó abeiro do cal a Deputación de Pontevedra destina 484.000 euros para mellorar a produción e a comercialización no sector pesqueiro e marisqueiro.

A esta cantidade hai que sumar os 150.000 euros das 15 bolsas do Plan de práctica laboral, que lles permiten a outras tantas confrarías contar durante todo este ano con 15 titulados universitarios e de FP.

En total serán preto de 650.000 euros destinados a apoiar un sector estratéxico na provincia, que, en palabras do presidente da Deputación e do máximo responsable da Federación de Confrarías, está atravesando "un ano especialmente difícil" como consecuencia dos sucesivos temporais que afectaron tanto á pesca coma ó marisqueo.

Ademais de para a adquisición de semente, a achega da Deputación permitirá cubrir outras necesidades das confrarías coma a aplicación de novas técnicas para a modernización do proceso de produción e comercialización, a adquisición de equipamentos de frío industrial ou a mellora do equipamento técnico e sanitario das lonxas.

O reparto das achegas entre os 21 pósitos realizarase segundo uns criterios que previamente acordou a Federación coas confrarías en función das necesidades expostas por estas.

Confrarías participantes no acto

Confraría de Pescadores Virxe do Carme, Arcade

Confraría de Pescadores La Anunciada, Baiona

Confraría de Pescadores San José, Cangas

Confraría de Pescadores San Martín, Moaña

Confraría de Pescadores San Juan, Redondela

Confraría de Pescadores  San Francisco, Vigo

Confraría de Pescadores Santa Tecla, A Guarda

Confraría de Pescadores San Cipriano, Aldán

Confraría de Pescadores  San Martín, Bueu

Confraría de Pescadores Sta. María del Puerto, Marín

Confraría de Pescadores San Andrés, Lourizán

Confraría de Pescadores San Telmo, Pontevedra

Confraría de Pescadores San Gregorio, Raxó

Confraría de Pescadores Sta. Rosalía, Sanxenxo

Confraría de Pescadores San Roque, Portonovo

Confraría de Pescadores San Martiño, O Grove

Confraría de Pescadores San Antonio, Cambados

Confraría de Pescadores La Pastoriza, Vilanova de Arousa

Confraría de Pescadores San Xulián, A Illa de Arousa

Confraría de Pescadores Virxe do Rosario, Vilaxoán

Confraría de Pescadores Santiago Apóstolo, Carril