OS TEXTOS AUTÓGRAFOS DE ROSALÍA XA ESTÁN NA R.A.G.

A descuberta destes novos textos, a cargo dos profesores Henrique Monteagudo e María Xesús Lama, consiste nun poema manuscrito inédito en galego da súa primeira etapa poética, e en varias pezas manuscritas en castelán dos seus últimos anos.

Xa se poden consultar na web da Real Academia Galega os manuscritos inéditos de Rosalía de Castro presentados este xoves.

Son textos autógrafos, escritos por ela mesma, e os investigadores defenden a súa importancia: din que botan luz sobre os comezos da súa carreira poética en galego e sobre os últimos pasos da súa obra en castelán. De feito, os escritos en castelán revelan que a autora traballaba nun novo libro nos últimos meses da súa vida. A propia Rosalía déixanos o título nun deses pregos: "Postrimerías". Consciente, din os estudosos, de que sería o derradeiro. Tamén ela mesma dá conta de que se trataba dun proxecto novo, porque no encabezado -a carón do título- escribe "Rosalía. Del tomo inédito".

Máis información na R.A.G.