SEGUNDO UN PERITO O PRESTIGE TIÑA QUE SER REMOLCADO A PORTO

 O perito holandés Klass Reigniger, proposto pola propietaria do 'Prestige', Mare Shipping, e a defensa do capitán, Apostolos Mangouras, comparou a actuación das autoridades españolas na xestión desta catástrofe coa dunha "avestruz que mete a cabeza na area e espera que aconteza o menos malo posible".

   No xuízo polo sinistro marítimo, Reigniger defendeu que a "solución" era levar o barco "a un porto refuxio", en alusión á enseada de Corcubión, e acusou de "incomprensible" a decisión de afastalo. Así, díxo que o levar rumbo noroeste era "pedir a berros a creación de problemas maiores".

   "Se se quería afastar, polo menos, levalo rumbo sueste", sentenciou este perito, con 43 anos de experiencia en salvamento marítimo e que traballou para Smit Tak, actual Smit Salvage, a empresa de rescate que contratou a armadora.

ARRANQUE DA MÁQUINA

   Na súa declaración, Reigniger admitiu que o buque estaba "ferido" o mesmo día do accidente --o 13 de novembro de 2002-- e argumentou que debeu levarse, por iso, a porto refuxio.

   Tamén cuestionou a decisión de acender a máquina do 'Prestige' o día 14, que adoptou o inspector marítimo Serafín Díaz Regueiro, a primeira persoa que mandaron as autoridades españolas ao buque.

   En concreto,  dixo que tomar esta medida, sen realizar unha inspección previa, "vai en contra dos principios fundamentais de salvamento". "Sen unha inspección nunca se arranca unha máquina", remarcou este perito holandés ao advertir que isto pode ocasionar "un dano estrutural grave".

ESCORA DO BUQUE

   Sobre a decisión do capitán do 'Prestige' de corrixir a escora de 25 graos que tiña o barco co lastrado de tanques con auga, admitiu que, de estar alí, non aconsellaría ao capitán "facelo".

   "Pero coa escora que había, hai que elixir", remarcou este perito, para quen Apostolos Mangouras merece "un grande aplauso" por tomar unha decisión "sen ter un coñecemento completo da situación".

  Este perito manifestou que, a pesar dos seus 43 anos de experiencia, nunca estivo nun buque cunha escora así e apuntou que se as persoas presentes no xuízo permanecesen nun barco así "faríanse augas menores nos seus pantalóns", citou como exemplo.

   O mesmo argumento da súa experiencia utilizou para afirmar que, durante a súa vida profesional, non se atopou unha xestión "tan caótica" como a do 'Prestige'.