PRESENTADA A URBANIZACIÓN DAS CASAS DOS MESTRES DO MAGARIÑOS E AS OBRAS DO COMEDOR DO SAN TOMÉ

O delegado territorial da Xunta en Pontevedra, José Manuel Cores Tourís, visitou esta mañá o CEP Antonio Magariños Palacios de Cambados para presentar á comunidade educativa o proxecto de demolición das antigas vivendas de mestres e da urbanización desta parcela co obxectivo de ampliar o patio escolar.

Nesta visita, o delegado territorial estivo acompañado da alcaldesa de Cambados, Fátima Abal, así como do xefe territorial de Educación, César Pérez Ares, e dos responsables dos centro educativos.

Estas obras, que contan cun orzamento de 114.000 euros, suporán a demolición de 10 das 12 vivendas pareadas con edificacións auxiliares adosadas, que ocupan a parte norte da parcela do colexio. Dous destes edificios quedarán en mans da asociación de pais e nais do colexio.

Tal e como explicou Cores Tourís, o obxectivo deste proxecto é liberar este espazo para poder ampliar o patio escolar e así converter esta zona nun lugar de esparcemento e actividades para uso do centro educativo. O centro incluso ten pensado poñer en marcha unha horta escolar.

A demolición das vivendas, segundo matizou o delegado territorial, “realízase despois de que se comprobase que as mesmas atópanse deshabitadas e sen uso. O terreo que queda libre regularizarase, eliminando as soleiras, os pavimentos e peches existentes, podaranse as árbores e actuarase no peche da parcela”. Ademais, levantarase o cercado norte para construír outro igual ao existente, de sillares de granito, complementándose a actuación cunha malla metálica.

Este venres remata o prazo administrativo e contratarase a empresa que executará os traballos en canto o concello aporte a licencia de obra. O prazo de execución será de tres meses.

Comedor Santo Tomé

Por outra banda, aproveitando a visita a Cambados, o delegado territorial entregou á alcaldesa de Cambados o convenio que se vai firmar entre a Consellería de Educación e o municipio de cara á instalación dun servizo de comedor escolar no CEIP Santo Tomé.

As actuacións teñen un orzamento de 120.000 euros e se executarán sobre un inmoble de titularidade municipal adscrito a uso educativo. “Non podemos esquecer que nestes intres é necesaria a colaboración entre administracións para a poder afrontar unha obra destas características”, explicou Cores Tourís, “deste xeito”, engadiu, “os convenios entre administracións constitúen un instrumento adecuado para desenvolver a súa cooperación en cuestións de interese común”. As obras serán así financiadas ao 50% entre ambas institucións.

Os traballos executaranse durante o próximo verán de cara a que poida abrir o servizo no curso educativo 2020-21, cunha capacidade de cerca de cen usuarios.

O CEIP DE SAN TOMÉ DE CAMBADOS CREARÁ UN CLUBE DE CIENCIA

O CEIP San Tomé de cambados únese a outros centros educativos galegos para compoñer un "Clube de Ciencia" no seu colexio.

Un total de 91 centros educativos públicos (62 máis que o curso pasado) desenvolverán durante o presente curso 2018/19 o ‘Club de ciencia’, unha iniciativa da Consellería de Educación, Universidade e Formación Profesional que ten como finalidade estimular o espírito científico entre o alumnado galego ao tempo que impulsar as vocacións STEM (Ciencias, Tecnoloxía, Enxeñaría e Matemáticas) cara a estudos posteriores nos campos de coñecemento do ámbito científico tecnolóxico.

Esta acción -que forma parte da Estratexia galega para a educación dixital, Edudixital 2020- desenvolverase en 44 centros da provincia da Coruña, 10 de Lugo, 9 de Ourense e 28 de Pontevedra. 

Os clubs, para os cales a Consellería destina 1.500 euros para cada centro, nacen como un espazo de aprendizaxe non formal baseado nunha metodoloxía de indagación onde os docentes suxiren diferentes accións enfocadas ao alumnado co obxecto de que poidan dar resposta ás súas curiosidades e aos seus intereses e resolver problemas.

Este é o terceiro ano consecutivo que se pon en marcha esta iniciativa, que arrancou como experiencia piloto no curso 2016/17 con 9 centros e que se ampliou a 29 o pasado curso 2017/18. Agora, ao abeiro da convocatoria deste ano, incorpóranse outros 62 novos centros ao ‘Club de ciencia’, o que fai un total de 91 centros de ensino público.

O obxectivo da mesma pasa por fomentar o espírito científico e a curiosidade do alumnado, o que favorece, en consecuencia, o traballo das áreas denominadas STEM (Ciencias, Tecnoloxía, Enxeñaría e Matemáticas), unha das prioridades da Consellería de cara aos próximos anos.

Aprendizaxe mediante indagación e resolución de problemas

O ‘Club de ciencia’ defínese como un espazo de aprendizaxe non formal baseado nunha metodoloxía de indagación, onde os docentes suxiren diferentes accións enfocadas aos alumnos e alumnas co obxecto de que estes podan dar resposta ás súas curiosidades e aos seus intereses, así como resolver problemas.

Neste sentido, a creación deste espazo no centro pode converterse nun escenario propicio para desenvolver estratexias metodolóxicas que promovan capacidades, coñecementos e técnicas que aumenten o interese dos participantes por saber, cada vez máis, sobre diversos campos da ciencia e as súas posibilidades de aplicación na tecnoloxía.

O proxecto ten que desenvolverse fóra do horario lectivo e nos espazos que se consideren ou habiliten do centro docente. Este horario deberá cumprir, como mínimo, unha media de catro horas ao mes, comezando a partir da concesión definitiva do proxecto, ata final do período lectivo do alumnado durante o curso 2018/19.

A XUNTA DERRUBARÁ AS CASAS DOS MESTRES DO MAGARIÑOS E FINANCIARÁ PARTE DO COMEDOR DE SAN TOMÉ

La Voz de Galicia

O xefe territorial de Educación, César Pérez Ares, mantivo unha reunión esta mañá co concelleiro de Cambados, Víctor Caamaño, e os directores dos colexios Magariños e San Tomé, para analizar as necesidades de ambos centros educativos.

Durante o encontro analizouse a situación das casas dos mestres do CEP Magariños.

Segundo informou Pérez Ares, a Xunta encargarase do derribo das mesmas, cumprindo así coa demanda formulada polo Consello Escolar, e co obxectivo de que se poida utilizar este espazo como ampliación do actual patio do centro.
“A partida para a demolición destas vivendas xa está aprobada e agora redactarase o proxecto para que sexa executado ao longo do presente ano”, explicou o xefe territorial.

Por outra banda, tamén se deu entrega, tanto ao concelleiro cambadés como ao director do CEIP San Tomé, do proxecto para a execución do comedor deste colexio que terá unha capacidade de cerca de cen comensais e que suporá, ademais da construción deste espazo, a posta en marcha doutras melloras do centro.

Deste xeito, segundo apuntou o responsable de Educación, o custo da obra roldará os 118.000 euros, “investimento que terá que ser asumido ao 50% por parte do concello, tal e como estamos a facer con todos os municipios que desexan poñer en marcha proxectos coma este nos seus colexios”, engadiu Pérez Ares.

O xefe territorial emprazou a unha próxima reunión ao concelleiro de Educación de Cambados e ao director do centro, unha vez que se analice a capacidade do concello para incluír esta obra nos orzamentos municipais.

Fonte: Arousa Sí Radio

​

OS CENTROS DE ENSINO DE CAMBADOS NO PLAN DE MELLORAS DE BIBLIOTECAS

A Consellería de Cultura, Educación e Ordenación Universitaria vén de publicar no Diario Oficial de Galicia a orde pola que se resolve a convocatoria do Plan de Mellora de Bibliotecas Escolares (Plambe) en centros non universitarios sostidos con fondos públicos para o curso 2017/2018, ao abeiro do que se incorporan 36 novos centros, xa estaban os centros cambadeses, a este programa. Deste xeito, forman parte do Plan este curso un total de 646 centros educativos.

A resolución dos centros incorporados pode consultarse no enlace https://www.xunta.gal/dog/Publicados/2017/20171024/AnuncioG0164-171017-0003_gl.html . A Consellería de Educación destinou a esta convocatoria un total de 1.342.000 euros.

As axudas para os centros de nova incorporación -30 públicos e 6 concertados- están destinadas á actualización dos fondos documentais da biblioteca escolar, á renovación do mobiliario e outro equipamento necesario, así como para outros gastos de funcionamento e a súa adxudicación resolveuse logo da análise das necesidades descritas na solicitude presentada, en función da maior adaptación aos criterios recollidos na convocatoria (que se materializa na puntuación acadada pola memoria e programas presentados), e das características de cada centro (número de unidades e de alumnos e alumnas matriculados).

No caso dos centros públicos incorporados con anterioridade, os que o fixeran entre 2005 e 2007 reciben asignacións para fondos así como para mobiliario e outros equipamentos; os que se integraran entre 2008 e 2015 recibiren asignacións para fondos, e os centros integrados na convocatoria de 2016 contías para fondos, mobiliario ou outros equipamentos, así como para gastos de funcionamento específicos da biblioteca.

No caso dos centros concertados integrados na convocatoria 2016 reciben axudas para fondos documentais, mobiliario e outros equipamentos, así como para gastos de funcionamento.

Novo modelo

O plan de mellora procura incentivar e impulsar o desenvolvemento de proxectos de biblioteca escolar que procuren a dinamización deste espazo como un centro de recursos de lectura, información e aprendizaxe, na que se incorporen espazos para a creación, a aprendizaxe manipulativa, a investigación, o traballo colaborativo e a construción do coñecemento de xeito compartido. Así mesmo, as bibliotecas integradas no Plambe traballan no deseño e desenvolvemento de programas para a adquisición de competencias informacionais e mediáticas, na integración das novas tecnoloxías e o concepto de alfabetización múltiple (ou multialfabetismo) á hora de abordar a formación lectora do alumnado.

Por outra banda, este modelo de biblioteca tamén ten un enfoque inclusivo, contribúe á compensación das desigualdades sociais e á calidade do ensino que se imparte no centro e implícase en actividades de extensión cultural destinadas a toda a comunidade escolar.

Plan LÍA

O Plan de mellora enmárcase na estratexia da Xunta de Galicia neste eido, o Plan LÍA de bibliotecas escolares para o período 2016-2020, que ten entre os seus obxectivos o de dotar os centros educativos de bibliotecas escolares útiles, estables, sustentables e acordes ás necesidades do século XXI. Entre os doce ámbitos de actuación definidos como desafíos, a rede de bibliotecas escolares precisa de actuacións continuadas para lograr avances na renovación das bibliotecas da totalidades dos centros, de forma progresiva.

Asemade, búscase continuar afianzando os bos resultados que o sistema educativo galego está a colleitar no referido á competencia lectora. Non en balde, Galicia acadou no Informe PISA 2015 unha puntuación de 509 puntos na competencia lectora, moi por riba dos 479 de 2006 e superando as puntuacións medias dos países da OCDE (493), da UE (494) e a media estatal (496). 

O COLEXIO DE SAN TOMÉ TERÁ BAÑOS NOVOS GRAZAS A XUNTA E CONCELLO

O delegado territorial da Xunta en Pontevedra, José Manuel Cores Tourís, visitou esta mañá xunto co xefe territorial de Educación, César Pérez Ares, o CEIP San Tomé de Cambados, onde a Xunta levará a cabo este ano obras de reforma dos aseos de Infantil.

O delegado territorial coñeceu así as necesidades prioritarias deste centro educativo, acompañado tamén polo concelleiro de Educación, Víctor Caamaño, e o de Obras, José Ramón Abal.

Segundo apuntou o responsable da Delegación Territorial da Xunta, as obras executaranse este ano grazas a un acordo de colaboración co concello de Cambados, aportando a administración autonómica un montante que roldará entre os 35.000 e os 40.000 euros para a execución destes novos aseos, beneficiándose un total de 8 aulas.

O concello, pola súa banda, acordou encargarse da execución da conexión de saneamento, así como aportar mano de obra para a execución destes traballos.

José Manuel Cores Tourís destacou a importancia da colaboración entre institucións para a execución deste tipo de obras nos centros educativos dos diferentes concellos pontevedreses. recordando que a labor realizada neste senso coa anterior Deputación e lamentando que “o actual Goberno provincial no estea a apoiar este tipo de acordos que permiten conservar, manter e mellorar colexios e institutos”.

Cores Tourís debeu esquecer que a Deputación non ten competencias en Educación algo que é responsabilidade únicamente da Xunta.

KARAOKE EN SAN TOMÉ CAMBIA POLA CHUVIA A TORRADO

Bótaslle kara ¿ou que? é o karaoke que Gas Natural presenta o vindeiro mércores en Cambados. As voces máis atrevidas da comarca encherán o parque de Torrado a partir das 21.00 horas. Os interesados en subir ao escenario poderán gañar fantásticos premios e unha gran salva de aplausos. A entrada e inscrición no evento son totalmente gratuítas.
A chuvia fai que o evento de traslade de lugar e se atrase media hora o comezo.

PRESENTADO EN CAMBADOS UN NOVIDOSO MÉTODO DE APRENDIZAXE DAS MATEMÁTICAS

A Consellería de Cultura, Educación e Ordenación Universitaria e Fundación Telefónica presentaron hoxe no CEIP San Tomé de Cambados un proxecto piloto baseado nunha metodoloxía innovadora de aprendizaxe das matemáticas que este curso proban por primeira vez cerca de 600 alumnos de 18 colexios galegos. A iniciativa, denominada JUMP Math e creada polo canadiense John Mighton, forma parte do programa “Desafío Educación” da Fundación.

No acto participaron o director de “Desafío Educación”, Pablo Gonzalo; o director xeral de Educación, Formación Profesional e Innovación Educativa, Manuel Corredoira; o representante de Obra Social La Caixa (que tamén colabora no proxecto), Alejandro Fernández; a coordinadora en España de JUMP Math, Carmen Salcedo; o alcalde de Cambados, Luis Aragunde, así como profesores e alumnos. Tamén asistiron o subdirector xeral de Ordenación, Innovación Educativa e Formación do Profesorado, Manuel Vila; e o xefe territorial en Pontevedra, César Pérez Ares.

A mellora dos resultados en matemáticas do alumnado é un dos retos da Consellería, posto que se trata dunha competencia clave. Neste senso, este mesmo martes presentouse o decreto que regula os currículos da Educación Secundaria Obligatoria e Bacharelato adaptados á LOMCE, que incluirán tres horas máis desta materia no primeiro caso.

A este reforzo súmase agora unha iniciativa que axuda a dar pasos cara un sistema educativo de excelencia. De feito, en países onde xa está implatada JUMP Math logrouse quintuplicar a taxa de sobresaíntes en matemáticas en apenas dous anos.

O B.N.G. DENUNCIA OUTRA VEZ O MAL ESTADO DA BALAUSTRADA DA ESCALINATA DE SAN TOMÉ

O B.N.G. de Cambados ven de solicitar a reparación da balaustrada da escalinata de San Tomé e non é a primeira vez que o fai.

Xa no mes de setembro do ano 2009, o BNG puxo en coñecemento deste concello, que veciños e veciñas de San Tomé  comunicaran o mal estado no que se encontraba a balaustrada (da “escalinata”) que hai diante do Pazo de Montesacro (actual Asilo de Anciáns no barrio de San Tomé). Estes últimos días novamente, veciños/as do lugar,  volven a trasladar a súa preocupación polo mal estado no que se encontra a citada

balaustrada de pedra, presentando agretadas moitas das xuntas de cemento e incluso nalgunhas zonas chega a moverse ao apoiarse a xente nela, co conseguinte perigo que isto pode supor para as persoas que fagan uso dela nun momento, ademais, onde está próxima a celebración da Festa da Valvanera; datas nas que se achega moita xente ao lugar.  

Polo tanto solicitan que envíen, canto antes,  a un técnico municipal que valore as deficiencias desta balaustrada e que se realicen as actuacións necesarias para arranxala.