CONDENADO O SACERDOTE CAMBADÉS A 32 ANOS DE PRISION POR ABUSOS SEXUAIS

Condenan a un sacerdote que exercía en Vigo por abuso a menores a 32 anos de cárcere Os feitos producíronse en 2019, cando os nenos, entón de 15 anos, acudiron a un campamento en Cambados de onde é natural o sacerdote. O relixioso era profesor no colexio Salesianos da localidade viguesa Un sacerdote de Vigo foi condenado a 32 anos de prisión por abusar sexualmente de seis menores que se atopaban ao seu cargo durante un campamento. O condenado, profesor de relixión, cometeu estes feitos en 2019, no concello de Cambados, segundo a sentenza da sección cuarta da Audiencia de Pontevedra facilitada polo TSXG. Os abusos tiveron lugar cando os mozos tiñan 15 anos e acudiron a unha actividade de peregrinación a Santiago de Compostela, que organizaba unha asociación xuvenil dirixida polo relixioso. O sacerdote foi condenado pola autoría de sete delitos de abuso sexual, tres deles continuados, e alén da prisión, o tribunal imponlle 36 anos de liberdade vixiada, unha orde de afastamento das vítimas durante 31 anos máis e o pagamento dunha indemnización de 76.000 euros ao conxunto dos seis menores. A sentenza considera que o relixioso "aproveitou" a súa situación de superioridade derivada da súa profesión, da confianza que os menores depositaran nel e da relación de amizade que lles unía, "que ía máis aló da de profesor-alumno", para facerlles tocamentos, o que xerou nas vítimas "sen ningunha dúbida" un dano psicolóxico "evidente". As probas baséanse fundamentalmente no testemuño das vítimas dos abusos, quen declarou que quedaron en estado de "choque" cando o sacerdote levou a caso os abusos, sen ser capaces de reaccionar porque non podían crer que puidese facerlles algo así, apunta o TSXG. Para "conseguir satisfacer o seu desexo sexual", segundo as maxistradas, o sacerdote actuaba sobre os menores en horas nocturnas, "cando o estado de alerta diminúe e o nivel de conciencia decrece", vencendo calquera "resistencia posible" das vítimas. Ademais, destacan que a estes abusos súmase a existencia desa situación de superioridade derivada desa relación de amizade e de ascendencia "que o acusado construía ao redor de todos e cada un dos menores". O tribunal subliña que as vítimas narraron "con firmeza e de forma acorde á súa idade" o que lles ocorreu e o que viron respecto dos outros, sendo "coherentes" e mostrando incluso un "sentimento de culpa" por non saber reaccionar nese instante. A sentenza tamén aprecian que os estudantes carecen de "motivación

espuria, animadversión ou interese" en prexudicar ao acusado, ao que consideran "o seu amigo ou o seu referente" e cos que todos eles mantiñan unha "boa relación". A sentenza confirma que o relixioso executou actos sexuais sobre cada un dos menores consistentes, en todos os casos, en tocamentos nos órganos xenitais, normalmente por encima da roupa, aínda que, nalgunha ocasión, tamén por baixo. "Os actos realizados non deixan lugar á dúbida, non só polo proceder subrepticio, aproveitando as horas nocturnas e o soño dos menores, senón polos actos de contido inequivocamente sexual”, recalca a Audiencia na súa resolución. #Respecto a a defensa do sacerdote, a Audiencia de Pontevedra afirma que o feito de que este non presente trazos psicopatolóxicos característicos dun abusador nin teña unha personalidade que lle impida controlar os seus impulsos non o descarta como autor dos abusos.  

O tribunal tamén rexeita a liña defensiva que suxería que os abusos os puido cometer outra persoa e que os menores se haberían equivocado na súa identificación. A sentenza da Audiencia de Pontevedra é aínda susceptible da presentación de recursos.