PROSIGUE A LENTA BAIXADA DE ENFERMOS EN GALICIA

Coronavirus Galicia: 340 contaxios novos e baixan a 5.530 os casos activos Baixan os infectados a nivel Galicia, pero tres áreas sanitarias empeoran: Ourense, Pontevedra e Santiago de Compostela. Día de boas e malas noticias sobre a evolución do coronavirus en Galicia. Rexistráronse menos contaxios que o sábado pasado e baixan os casos activos, pero tres áreas sanitarias empeoran o seu estado: Ourense, Pontevedra e Santiago de Compostela. O total de casos activos galegos baixa grazas ás outras catro, especialmente á Coruña e Vigo, as áreas que máis melloran hoxe. Os hospitalizados continúan descendendo e son 46 menos que o sábado pasado. Hoxe son 30 diagnósticos menos que fai sete días, e ademais procedendo de moitas máis probas. Os 340 casos novos de hoxe son o 4,44% de diagnósticos positivos de 7.653 probas PCR, mentres que os 370 do sábado pasado eran o 6,84% de positivos de 5.407 tests. Na web de datos do Sergas di que nas últimas 24 horas confirmáronse 301 de COVID-19 por PCR, pero a diferenza entre o total de infectados desde o inicio da pandemia de hoxe (56.065) e o de onte (55.725) é de 340 persoas. Do mesmo xeito, os novos contaxios por área sanitaria calculámolos co mesmo procedemento. Nas últimas 24 horas rexistráronse en Galicia 340 novos casos de SARS- CoV-2, 10 falecementos e 484 altas, o que fai que baixen en 154 persoas os casos de coronavirus, pasando dos 5.684 de onte aos 5.530 de hoxe. O total de hospitalizados baixa en 8 persoas, de 360 a 352 pacientes. O pasado sábado eran 398 hospitalizados, 46 máis que hoxe. O total de casos de coronavirus contabilizados polo Sergas desde o inicio da pandemia é de 56.065. Catro áreas sanitarias melloran e outras tres empeoran. A máis afectada segue sendo Vigo, con 1.315 casos (-86), seguida da Coruña con 1.017 (-76), Santiago con 852 (+28), Pontevedra con 851 (+12), Ferrol con 547 (-26), Lugo con 545 (-26) e Ourense con 403 (+20). Novos contaxios por área sanitaria A Coruña: 51 Ferrol: 31 Lugo: 19 Ourense: 30 Pontevedra: 64 Santiago: 92 Vigo: 53 Total: 340 O total de falecementos desde o inicio da pandemia alcanza as 1.303 persoas, 10 máis nas últimas 24 horas, e son xa 684 nesta segunda onda, superando os 619 da primeira. O total de hospitalizados é de 352 (-8), divididos en 54 (+3) na UCI e 298 (-11) en unidades de hospitalización. O total de probas PCR realizadas é de 975.267, delas 7.653 nas últimas 24 horas, cun 4,44% de positivos. 

Esta semana continúa cuns datos similares pero inferiores en 90 persoas á anterior. De luns a sábado rexistráronse 1.863 casos novos en Galicia, mentres que a semana pasada foron 1.953 nos cinco primeiros días.