LEVE MELLORÍA NA ÁREA PONTEVEDRA SALNÉS

Coronavirus Pontevedra: 37 contaxios novos e baixan a 839 os casos activos

Seguen baixando os contaxios e casos activos na área pontevedresa, que ten no Salnés a súa zona máis afectada. A área sanitaria de Pontevedra e O Salnés continúa mellorando e rexistrando menos casos activos e contaxios. Non se comunican máis de 50 casos nun día desde o 1 de decembro, e o número de casos activos continúa baixando aos poucos xunto coa incidencia da área sanitaria. Nas últimas 24 horas producíronse 37 contaxios novos, 1 falecemento ( unha muller de 89 anos no CHOP) e 53 altas, o que fai que baixen en 18 persoas os casos activos, pasando dos 856 de onte a 839 hoxe. Continúa baixando a incidencia da área sanitaria, e particularmente na área metropolitana de Pontevedra. A capital do Lérez está preto de baixar dos 200 de incidencia, mentres que Marín e Poio mantéñense un pouco por baixo. A zona máis afectada segue sendo a do Salnés. Cambados mantén os 35 casos de onte. O número de pacientes hospitalizados sobe de 51 a 52 persoas, distribuídos en 43 pacientes no CHU de Pontevedra (33 en planta e 10 na UCI), 6 no Hospital Público do Salnés e 3 no Quirónsalud de Pontevedra. Na área sanitaria de Pontevedra-O Salnés desde o inicio da pandemia tivo 5.831 casos de coronavirus, con 68 falecementos, 5.001 altas e 839 casos activos nestes momentos.