GALICIA CONTINÚA BAIXANDO AO MESMO RITMO DA SEMANA PASADA

Coronavirus Galicia: 342 contaxios novos e baixan a 5.927 os casos activos Continúan baixando os casos activos e os contaxios na comunidade, pero Ferrol e Santiago empeoran. Seguen baixando os contaxios de coronavirus en Galicia, que por segundo día consecutivo volven ser menos que hai unha semana (342 fronte a 369, 27 menos), e os casos activos a nivel de toda a comunidade seguen baixando despois do gran descenso de onte. Hai, con todo, diferenzas por áreas sanitarias. Mentres que A Coruña, Lugo, Pontevedra e Vigo seguen descendendo, especialmente as dúas primeiras, a área de Ourense queda xusto igual que onte, a de Santiago empeora levemente e a de Ferrol faino con forza. O motivo é que seguen existindo "puntos quentes" onde a situación de transmisión do COVID-19 non está controlada, sendo os máis notables As Pontes e Boiro. Os 342 casos novos de hoxe son o 5,13% de diagnósticos positivos de 6.659 probas PCR, mentres que os 369 do martes pasado eran o 5,64% de positivos de 6.535 tests. Na web de datos do Sergas di que nas últimas 24 horas confirmáronse 329 de COVID-19 por PCR, pero a diferenza entre o total de infectados desde o inicio da pandemia de hoxe (55.080) e o de onte (54.738) é de 342 persoas. Do mesmo xeito, os novos contaxios por área sanitaria son calculados co mesmo procedemento. Nas últimas 24 horas rexistráronse en Galicia 342 novos casos de SARS- CoV-2, 8 falecementos e 403 altas, o que fai que baixen en 69 persoas os casos de coronavirus, pasando dos 5.996 de onte aos 5.927 de hoxe. O total de hospitalizados sobe en 3 persoas, de 372 a 375 pacientes. O pasado mércores eran 431 hospitalizados, 56 máis que hoxe. O total de casos de coronavirus contabilizados polo Sergas desde o inicio da pandemia é de 55.080. Ferrol empeora notablemente Por áreas sanitarias, melloran catro, unha queda igual (Ourense) e empeoran Santiago e, sobre todo, Ferrol. A máis afectada segue sendo Vigo, que ten 1.499 casos activos (-18), seguida da Coruña con 1.193 (-51), Pontevedra con 871 (-28), Santiago con 785 (+2), Lugo con 606 (-18), Ferrol con 596 (+44) e Ourense con 377 (igual). Novos contaxios por área sanitaria A Coruña: 47 Ferrol: 51 Lugo: 30 Ourense: 34 Pontevedra: 48 Santiago: 53 Vigo: 79 Total: 342 O total de falecementos desde o inicio da pandemia alcanza as 1.281 persoas, 18 máis nas últimas 24 horas, e son xa 662 nesta segunda onda, superando os 619 da primeira. O total de hospitalizados é de 375 (+3), divididos en 51 (+1) na UCI e 324 (+2) en unidades de hospitalización. O total de probas PCR realizadas é de 952.173, delas 6.659 nas últimas 24 horas, cun 5,13% de positivos. Esta semana continúa cuns datos moi similares, lixeiramente inferiores, á anterior. De luns a mércores rexistráronse 878 casos novos en Galicia, mentres que a semana pasada foron 891 nos tres primeiros días.