GALICIA BAIXA DOS 6000 CASOS ACTIVOS TRAS UN RÉCORD DE ALTAS

Coronavirus Galicia: 262 contaxios novos e baixan a 5.996 os casos activos

Enorme descenso dos casos activos grazas a un récord de 894 altas, concentradas sobre todo en Lugo e Vigo. Hoxe é martes e como case todos os martes desde o inicio da pandemia é día de boas noticias sobre a evolución do coronavirus en Galicia. Hoxe rexistrouse o récord de altas desde o inicio da pandemia, con 894 pacientes que superaron oficialmente o coronavirus nas últimas 24 horas, relacionados sobre todo coas áreas sanitarias de Lugo e Vigo, que baten os seus respectivos récords de altas nun día. Isto provocou que o número de casos activos baixe en 648 nun só día, outro récord que se supera hoxe. O número de contaxios novos é 9 persoas máis baixo que o martes pasado. Hoxe todas as áreas melloran grazas ao elevado número de altas, e o único punto en Galicia onde se están rexistrando un alto número de casos novos é Boiro. Hai dúas noticias máis, unha boa e outra mala: os hospitalizados baixan en 40 persoas nun só día, pero rexístrase un repunte de falecementos, 16 nas últimas 24 horas. Os 262 casos novos de hoxe son o 4,66% de diagnósticos positivos de 5.618 probas PCR, mentres que os 271 do martes pasado eran o 6,06% de positivos de 4.466 tests. Na web de datos do Sergas di que nas últimas 24 horas confirmáronse 232 de COVID-19 por PCR, pero a diferenza entre o total de infectados desde o inicio da pandemia de hoxe (54.738) e o de onte (54.476) é de 262 persoas. Do mesmo xeito, os novos contaxios por área sanitaria son calculados co mesmo procedemento. Nas últimas 24 horas rexistráronse en Galicia 262 novos casos de SARS- CoV-2, 16 falecementos e 894 altas, o que fai que baixen en 648 persoas os casos de coronavirus, pasando dos 6.644 de onte aos 5.996 de hoxe. O total de hospitalizados baixa en 40 persoas, de 412 a 372 pacientes. O pasado martes eran 431 hospitalizados, 59 máis que hoxe. O total de casos de coronavirus contabilizados polo Sergas desde o inicio da pandemia é de 54.738. Todas as áreas melloran, sobre todo Vigo, Lugo e A Coruña Hoxe todas as áreas sanitarias de Galicia melloran, especialmente as de Vigo, Lugo e A Coruña. A olívica segue sendo a máis afectada pero experimenta unha espectacular mellora e baixa a 1.517 (-265). Séguenlle A Coruña con 1.244 (-105), Pontevedra con 899 (-72), Santiago con 783 (-12), Lugo con 624 (-147), Ferrol con 552 (-24) e Lugo con 377 (-23). Novos contaxios por área sanitaria A Coruña: 37 Ferrol: 16 Lugo: 18 Ourense: 22 Pontevedra: 44 Santiago: 65 Vigo: 60 Total: 262 O total de falecementos desde o inicio da pandemia alcanza as 1.273 persoas, 16 máis nas últimas 24 horas, e son xa 654 nesta segunda onda, superando os 619 da primeira. O total de hospitalizados é de 372 (-40), divididos en 50 (-10) na UCI e 322 (-30) en unidades de hospitalización. O total de probas PCR realizadas é de 945.514, delas 5.618 nas últimas 24 horas, cun 4,66% de positivos. Esta semana continúa cuns datos moi similares, lixeiramente superiores, á anterior. De luns a martes rexistráronse 536 casos novos en Galicia, mentres que a semana pasada foron 522 nos dous primeiros días.