CONTINÚA A MELLORA DE PONTEVEDRA-SALNÉS A PESAR DO AUMENTO DE FALECIDOS

Coronavirus Pontevedra: 40 contaxios novos e baixan a 856 os casos activos

Nova mellora na área sanitaria de Pontevedra e O Salnés, que cada vez ten menor incidencia. Continúa mellorando a área sanitaria de Pontevedra e O Salnés, con cada vez menos incidencia nos seus municipios, que na súa maioría continúan en situación de confinamento perimetral. Nas últimas 24 horas producíronse 40 contaxios novos, 2 falecementos (unha muller de 85 anos e outra de 92 anos, que faleceron no Hospital Miguel Domínguez de Pontevedra e no CHOP, respectivamente, procedían da Residencia Soremay) e 53 altas, o que fai que baixen en 15 persoas os casos activos, pasando dos 871 de onte a 856 hoxe. Segue baixando a incidencia da área sanitaria e, salvo Vilaboa polo seu rebrote en residencia, ningún municipio xa está por encima dos 300 de incidencia (O Grove está xusto nesa cifra). A cidade de Pontevedra segue sendo a urbe galega máis afectada, pero a súa traxectoria segue sendo descendente e está xa en 213. E en Cambados baixa en un o número de enfermos e sitúase en 35 activos O número de pacientes hospitalizados sobe de 50 a 51 persoas, distribuídos en 43 pacientes no CHU de Pontevedra (34 en planta e 9 na UCI), 5 no Hospital Público do Salnés e 3 no Quirónsalud de Pontevedra. Na área sanitaria de Pontevedra-O Salnés desde o inicio da pandemia tivo 5.831 casos de coronavirus, con 67 falecementos, 4.948 altas e 856 casos activos nestes momentos.