A ÁREA PONTEVEDRA-SALNÉS ACHEGASE AOS 1200 ENFERMOS

Coronavirus Pontevedra: 94 contaxios e soben a 1.194 os casos activos

Mantense alto o número de contaxios novos e seguen en alerta vermella 8 municipios da área sanitaria. Continúa sumando casos activos a área sanitaria de Pontevedra e O Salnés, cuns datos moi similares aos de onte (1 contaxio máis) e a mesma situación hospitalaria. Desde a medianoite de mañá ao sábado numerosos municipios da zona de Pontevedra estarán suxeitos a restricións. Nas últimas 24 horas producíronse 94 contaxios novos e 37 altas, o que fai que suban en 57 persoas os casos activos, pasando dos 1.137 de onte a 1.194 hoxe. Hai algúns cambios no nivel de alerta por municipios: Cuntis e Soutomaior soben a alerta laranxa e A Lama e Cerdedo-Cotobade deixan de estar en alerta. Alerta nivel 3 (vermella): Cambados (58 casos, 2 máis que onte) , Marín, O Grove, Poio, Pontevedra, Ribadumia, Sanxenxo e Vilagarcía de Arousa. Alerta nivel 2 (laranxa): Caldas de Reis, Cuntis, Soutomaior e Ponte Caldelas. Alerta nivel 1 (amarela): Bueu, Forcarei, Vilaboa e Vilanova de Arousa. O número de pacientes hospitalizados mantense en 78 persoas, distribuídos en 62 pacientes no CHU de Pontevedra (58 en planta e 4 na UCI), 14 no Hospital Público do Salnés e 2 no Quirónsalud de Pontevedra. Na área sanitaria de Pontevedra-O Salnés desde o inicio da pandemia tivo 3.919 casos de coronavirus, con 34 falecementos, 2.691 altas e 1.194 casos activos nestes momentos.