UN DÍA MÁIS AUMENTA O NÚMERO DE ENFERMOS EN GALICIA

As autoridades sanitarias detectaron nas últimas 24 horas 200 novos positivos por covid-19 en Galicia, unha cifra lixeiramente inferior á de xornadas anteriores, co que os casos activos aumentan ata os 4.119. En concreto, segundo os datos do balance deste martes publicado pola Consellería de Sanidade, Galicia conta con 4.119 casos activos por coronavirus, 18 máis que a xornada anterior. Do mesmo xeito, nas últimas 24 horas producíronse 174 altas, ata as 20.344.

Ourense suma e segue: 88 novos contaxios de coronavirus, que compensados con altas e defuncións tradúcense en 47 casos activos máis, ata os 1.084. Así as cousas, o total de casos activos en Galicia, polo efecto arrastre ourensán, volve subir: son 4.119 (+18), de acordo co último balance da Consellería de Sanidade. No resto de áreas, a situación queda como segue: 818 na Coruña (-2), 667 en Pontevedra (-18), 527 en Santiago (-1), 493 en Lugo (-2), 412 en Vigo (-7) e 118 (-1) en Ferrol. Descensos en todas, en claro contraste con Ourense. Hai 35 pacientes en UCI (-2) e 199 hospitalizados (-5), con 3.885 enfermos nos seus domicilios. Tras unha xornada, a do luns, na que se informou pola tarde de oito falecementos, o total de vítimas que deixa a pandemia ascende a 765. En paralelo, xa se curaron 20.344 persoas.