MÁIS DE 300 NOVOS CASOS COVID-19 EN GALICIA

Despois de dúas xornadas sumando máis de 400 novos contaxios de coronavirus, o último balance da Consellería de Sanidade, divulgado a través da web do Sergas, con datos do 10 de outubro ás 18 horas, revela que o virus dá, neste sentido, unha certa tregua, ao confirmarse 313 casos por PCR en 24 horas. O total de casos activos fíxase en 4.379, 21 máis que a véspera. A web do Sergas recollía 4.383, pero a Consellería de Sanidade informou de que non estaban consignados catro novos falecementos, que elevan o total a 784, o que altera algunhas das cifras que figuran na versión online.

As últimas vítimas que deixa a pandemia de coronavirus en Galicia son dous homes de 59 e 74 anos no CHUAC coruñés e dúas mulleres de 83 e 88 no CHUAC e o CHUS santiagués, respectivamente. Todos eles presentaban patoloxías previas. Por áreas sanitarias, a situación é a seguinte: Ourense, Verín e O Barco de Valdeorras: o dato de novos contaxios, 86, é visiblemente inferior aos 191 da véspera; isto sitúa o total de casos activos en 1.482, só 8 máis que o día anterior grazas a un número moi próximo de altas. A Coruña e Cee: engade 51 casos detectados por PCR e o total sitúase en 745, dous menos, ao darse un número practicamente idéntico de altas e producirse tres decesos. Ferrol : a área menos castigada detecta 18 contaxios e o total de casos activos pasa a 122, 8 máis. Lugo, A Mariña e Monforte de Lemos: 35 novas infeccións, 462 casos activos en total, catro menos que o día anterior ao darse máis altas. Pontevedra e O Salnés: 21 contaxios novos, 507 casos activos, 34 menos que o sábado. Santiago de Compostela e Barbanza: as 40 novas infeccións levan o total de casos activos a 597, 16 máis. Vigo: a área da cidade olívica, unha das que mellor está a soportar a segunda onda, engade un número considerable de infeccións, 62, co que o total de casos activos chega a 464, un salto de 29. Hospitais e residencias En canto á situación asistencial, as cifras apuntan a unha rebaixa na presión, pero hai que ter igualmente en conta o impacto dos catro « éxitus»: son 170 os pacientes en planta hospitalaria, cinco menos, e hai tamén dous enfermos menos de Covid en UCI, co que son 35 os que requiren de coidados intensivos. Polo que se refire ás residencias sociosanitarias, a principal novidade é que se retiran da listaxe 30 usuarios do Incio (Lugo) tras dar negativo na última PCR. Así, son 424 usuarios e 138 traballadores infectados en xeriátricos e un e 10 en centros para persoas con discapacidade.