POR SEGUNDO DÍA CONSECUTIVO, BAIXA O TOTAL DE ENFERMOS

A segunda onda do coronavirus en Galicia tende á estabilización. A recuperación progresiva dos enfermos permite que volva descender o número de casos activos por Covid-19 na Comunidade. Segundo o último balance do Sergas, actualmente hai 4.336 persoas co virus. Son 25 menos que na xornada previa. Pero os contaxios seguen producíndose. Nas últimas, segundo os datos que ofrece a Xunta, atopáronse 240 novos casos de coronavirus na Comunidade. A incidencia dos brotes en Galicia, mantén a máis de medio millón de persoas con restricións para tentar frear a expansión do coronavirus. Este venres, sumábanse os habitantes da Guarda, Lalín, Laxe, Poio, O Rosal e Vilaboa. Desde a media noite están sometidos ás mesmas limitacións que Santiago, Lugo, Ourense, Pontevedra, Carballo, A Laracha, Ponteceso, Arteixo e certos barrios da cidade da Coruña. Por áreas sanitarias, o balance sanitario arroxa unha melloría no cómputo de casos activos na máis afectada, a da Coruña. Baixan en 63 os enfermos ata os 1.340 infectados. Tamén se producen descensos en Lugo (848 activos, 7 menos) e Santiago (679 casos, -10) mentres Vigo mantense con 364. Con todo, rexístranse aumentos en Ourense que chega ata os 486 casos (+23); Pontevedra (349 casos, +26) e Ferrol (180 casos, +6). Pese ao descenso de casos activos, a presión hospitalaria increméntase lixeiramente. Hai xa 28 pacientes na UCI, dúas máis que a xornada anterior e 206 ingresados en planta (5+). As cifras continúan, con todo, afastadas das que se produciron durante o pico da pandemia. O pasado día 6 de abril, as UCI dos hospitais galegos trataban a un total de 168 pacientes. Ese mesmo día, había outros 939 enfermos en planta. Tamén hai que lamentar novas mortes. Galicia suma outros dous falecementos, un home de 77 anos que estaba ingresado no CHUAC coruñés e unha muller de 87 anos anos que estaba ingresada no HULA de Lugo. Ambos presentaban patoloxías previas. Desde o inicio da pandemia de coronavirus contabilízanse xa 679 mortes. Nas residencias de anciáns e de discapacidade a situación tamén permanece estable. Hai 263 usuarios contaxiados, un menos que onte, e 82 traballadores, tres menos.