OS NOVOS CONTAXIOS CONTRARRESTADOS POLAS ALTAS EN GALICIA

Tras semanas de ascenso imparable desde finais de xullo, a tendencia á alza do número de persoas que atravesan o coronavirus fréase en Galicia. Na Comunidade hai actualmente 4.230 casos activos, son 13 menos que a xornada anterior, segundo os datos divulgados polo Sergas. A baixada prodúcese a pesar de producirse 161 contaxios, pero a cifra de recuperados avanzou máis rápido ao rexistrarse 173 altas na Comunidade nas últimas horas. Ademais hai que contabilizar unha nova morte polo Covid-19, que deixa o cómputo total de falecidos desde que se inicio a pandemia en 663. Por áreas sanitarias a situación varía. A máis afectada, a da Coruña, sofre un importante ascenso de casos activos, ata chegar aos 1.413 (279+). En Lugo a situación mellora, baixan 15 os activos ata os 801. Tamén se reduce a lista de persoas con coronavirus en Santiago, que baixa a 662 tras descender en 26 os casos activos. Soben Ourense (467, oito casos máis); Pontevedra (371, 28+); Vigo (346, 2+) e Ferrol (170, 19+). O descenso de casos activos nótase tamén nos hospitais. En planta tratan de recuperarse do virus 187 persoas, sete menos que a xornada anterior. Pero hai un ingresado máis nas UCI, que xa prestan atención a 22 enfermos.