MÁIS FALECIDOS E MÁIS CONTAXIOS

 

A cifra de positivos diarios por Covid-19 en Galicia ascendeu este sábado ata os 276, unha cantidade algo superior á que viña rexistrando nos últimos días. No caso dos contaxios activos, o parámetro polo que se move o Sergas no seu balance estatístico diario, a cifra incrementouse nas 24 horas comprendidas entre a noite do xoves e a do venres en 48, de 4.317 a 4.365 enfermos.

Atendendo á evolución específica de cada zona, as áreas que rexistran incrementos son Pontevedra, que pasa de 611 a 651 enfermos, Vigo, que suma 25 (431); Ferrol, con cinco máis (181) e Lugo, que só engade un novo (745). Pola contra, A Coruña (1.223; -15), Ourense, (509; -2), Santiago (626; -5) reducen os seus casos. En canto á situación hospitalaria, 29 pacientes están en UCI (tres menos) e 200 noutras unidades (nove menos), o que tradúcese nunha mellora puntual da carga asistencial e que os últimos pacientes detectados están a ser tratados desde os propios domicilios. Tres persoas de entre 85 e 93 anos con patoloxías previas faleceron nas últimas horas, o que eleva o total de falecidos a 710. Pola súa banda, as altas emitidas ata o de agora cóntanse en 16.525, 228 máis que as rexistradas onte. A Consellería de Política Social informou tamén acerca da situación en residencias da terceira idade e para persoas discapacitadas. Son 365 persoas infectadas en total, cunha proporción de 263 usuarios e 102 profesionais baixo tratamento por contraer o virus. Non hai moitos cambios: dous traballadores e un usuario engadíronse ao reconto tras dar positivo, mentres que outro empregado foi dado de alta.