GALICIA BAIXA OS CONTAXIOS

Volven descender os casos activos de coronavirus en Galicia. Son 4.432, de acordo co último parte da Consellería de Sanidade, fronte aos 4.449 notificados este sábado, o que conleva un recorte de 17 casos. Un comportamento que se produce grazas ás 245 altas producidas nas últimas 24 horas, que indican que, a pesar de todo, o virus segue activo e os contaxios aínda aumentan en máis de 200 ao día.

Por áreas sanitarias, segue á fronte A Coruña, con 1.046, pero 31 casos activos menos; Pontevedra rexistra 826 (+16); son 728 en Ourense (+39); 589 en Lugo (-53); 577 en Santiago (+22); 512 en Vigo (sen cambios); e 154 en Ferrol (-10). A situación, por tanto, é de significativa disparidade. En canto ao cadro asistencial, rebáixase a presión en UCI, ao pasar de 35 a 33 pacientes (aínda que onte á noite faleceron dous anciáns hospitalizados no HULA), e baixa tamén a hospitalización, de 201 a 198. Hai 4.201 persoas afrontando a enfermidade nos seus domicilios. Con 18.316 curados desde o inicio da pandemia, a cifra de falecidos sitúase nos 729.