CONTINÚA A BAIXADA DE ENFERMOS EN GALICIA POR COVID-19

Os casos activos de coronavirus en Galicia continúan á baixa. Este mércores a Consellería de Sanidade notifica 4.251, fronte aos 4.297 dos que daba conta este martes, o que supón unha baixada de 46.

Nas últimas 24 horas curáronse un total de 205 persoas, o que á súa vez indica que os contaxios situáronse por baixo da barreira dos 200, 163 en concreto. Por áreas sanitarias, A Coruña marca 975 (-2); Lugo, 537 (-2); Ourense, 765 (+9, a única subida); Pontevedra, 786 (-7); Vigo, 503 (-7); Santigo, 537 (-35, o maior descenso); e Ferrol, 148 (-2). En canto á situación asistencial, hai 27 pacientes en UCI (-1) e 210 hospitalizados (-2), aínda que hai que ter en conta que a última hora da tarde deste martes notificábanse desde o Sergas catro novos óbitos, que elevan o total durante a pandemia a 740. En concreto, trátase de dous homes de 86 e 81 anos e unha muller de 86 que estaban ingresados no Complexo Hospitalario Universitario de Ourense, e doutro home de 83 anos ingresado no Complexo Universitario Hospitalario de Santiago. Con estes novos casos, o número de falecidos diagnosticados con coronavirus desde o comezo da 'nova normalidade' ascendeu a 119. Hai 4.014 persoas afrontando o Covid nos seus domicilios e 18.949 galegos xa se curaron desde que se desatou a pandemia.